Blog

အောင်မြင်ကျော်ကြားသော်လည်း မိမိမှာ မပျော်ရွှင်ဟု တိုးယေးပြော

အောက်တိုဘာ ၁၉၊ ၂၀၁၅
M-Media

– မိမိ၏ အောင်မြင်မှုများ၊ ၀င်ငွေများကိုကြည့်၍ လူများက မိမိမှာ ပျော်ရွှင်နေသည်ဟု ထင်မြင်နေကြသော်လည်း တကယ်တမ်းတွင် မိမိမှာ မပျော်ရွှင်ဟု မန်စီးတီး၏ ကွင်းလယ်ဗိုလ်ချုပ် ယာယာတိုးယေးက ပြောကြားလိုက်သည်။

ဘာစီလိုနာမှ ၂၀၁၀ ပြည့်နှစ်တွင် မန်စီးတီးတို့ ရောက်ရှိလာခဲ့သည့် တိုးယေးမှာ ပရီးမီးယားလိဂ်ဖလား ၂ လုံး၊ FA ဖလားတစ်လုံးနှင့် လိဂ်ဖလားတစ်လုံးတို့ကို မန်စီးတီးနှင့်အတူ ဆွတ်ခူး ရရှိထားသည်။ လက်ရှိတွင် တစ်ပတ်ပေါင် ၂၂၀၀၀၀ ဖြင့် စာချုပ် ၁၈ လ ကျန်နေသေးပြီး တိုးယေးကမူ မီဒီယာများမှာ မိမိအား ဦးတည်၍ ဝေဖန်နေသည်ဟုလည်း ထင်မြင်နေသည်။

“တစ်ခါတစ်ရံကျရင် ကျွန်တော် တော်တော်လေး မပျော်ရွှင်ဘူးလို့ ခံစားရပါတယ်။ ၂၀၁၀ ခုနှစ်မှာ မန်စီးတီးကို ရောက်လာတဲ့အခါ ကျွန်တော်က ဘောလုံးလောကကို သတ်ပစ်မယ်လို့ လူတွေပြောတာ ကျွန်တော်ကြားခဲ့ပါတယ်။ ဂျာနယ်လစ်တွေကလည်း ကျွန်တော့်လစာအကြောင်း ပြောကြတယ်။ ဒါပေမယ့် ကျွန်တော်ဒီကလပ်မှာရှိနေတာဟာ တိုးတက်ဖို့နဲ့ ဖလားတွေရအောင် ကူညီဖို့ပါ။ လူတော်တော်များများက ကျွန်တော်ဒါမျိုးပြောရင် ရယ်ကျဲ့ကျဲ့လုပ်ကြပါတယ်” ဟု ယာယာတိုးယေးက ပြောကြားခဲ့သည်။

Ref: Dailymail

October 19, 2015
တရုတ်စီးပွားရေးကော်မရှင် ထိပ်တန်းအရာရှိများ ခြစားမှုဖြင့် စစ်ဆေးခံနေရ

အောက်တိုဘာ ၁၉၊ ၂၀၁၅

M-Media

– တရုတ်နိုင်ငံ၏ စီးပွားရေးကို အဓိက စီမံခန့်ခွဲနေသည့် အမျိုးသား ဖွံ့ဖြိုးတိုးတက်ရေးနှင့် ပြုပြင်ပြောင်းလဲရေး ကော်မရှင် NDRC မှ တာဝန်ရှိသူ ၃ ဦးကို ခြစားမှုသံသယဖြင့် စုံစမ်းစစ်ဆေးမှုများ ပြုလုပ်နေသည်ဟု အာဏာရ ကွန်မြူနစ်ပါတီ၏ ခြစားမှု တိုက်ဖျက်ရေးအဖွဲ့က ယနေ့တွင် ပြောကြားလိုက်သည်။

စစ်ဆေးခံနေရသူများမှာ ကော်မရှင်၏ လူမှု ဖွံ့ဖြိုးရေးဌာန အကြီးအကဲ ၀မ်ဝေ၊ အရည်သွေး စစ်ဆေးရေးဌာနမှ သုတေသနပညာရှင်များ ဖြစ်ကြသည့် ရန်ဝေနှင့် ဇူဟေယူတို့ဖြစ်ကြပြီး စည်းကမ်းများကို ဆိုးဆိုးဝါးဝါး ချိုးဖောက်ခဲ့သည်ဟုဆိုကာ အသေးစိတ် အချက်အလက်များကို ထုတ်ပြန်ခဲ့ခြင်းမရှိချေ။

NDRC ကလည်း စုံစမ်းစစ်ဆေးမှုကို အတည်ပြုခဲ့ပြီး ပါတီ၏ အမိန့်များကို လိုက်နာကာ ခြစားမှုများကို ပြင်းပြင်းထန်ထန် တိုက်ဖျက်သွားမည်ဟု ပြောကြားခဲ့သည်။ တရုတ်သမ္မတ ဇီဂျင်ပင်းမှာ ၂၀၁၂ နှောင်းပိုင်းတွင် ပါတီခေါင်းဆောင်နေရာ ရလာပြီး ၂၀၁၃ ခုနှစ်တွင် အာဏာရပြီးကတည်းက ခြစားမှုများကို ပြင်းပြင်းထန်ထန် ကိုင်တွယ်ခဲ့ပြီး အကြီးတန်းအရာရှိ အများအပြားကို စစ်ဆေးခြင်း၊ ထောင်ချခြင်းများ ပြုလုပ်ခဲ့သည်။

Ref: Reuters

October 19, 2015
ဘိုင်ယန်ပွဲတွင် အားကုန်ထုတ်မည်ဟု ၀င်းဂါးပြော

အောက်တိုဘာ ၁၉၊ ၂၀၁၅
M-Media

– အင်္ဂါနေ့ညတွင် အိမ်ကွင်း၌ကစားမည့် ဘိုင်ယန်မြူးနစ်နှင့် ချန်ပီယံလိဂ်ပွဲတွင် မိမိအသင်းမှာ အားကုန်ထုတ်သွားမည်ဟု အာဆင်နယ်နည်းပြ အာဆင်ဝင်းဂါးက ပြောကြားလိုက်သည်။

ချန်ပီယံလိဂ် ကစားပြီးခဲ့သည့် အုပ်စုပွဲစဉ် ၂ ခုစလုံးတွင် အနိုင်ရရှိထားသည့် ဘိုင်ယန်မှာ ပုံစံကောင်းကို ပြသနေပြီး နောက်ဆုံး ၁၂ ပွဲစလုံးကို အနိုင်ကစားထားနိုင်သည်။ အာဆင်နယ်ကမူ ဒိုနုမိုဇာဂရက်ဘ်နှင့် အိုလံပီယာကော့စ်တို့ကို အံ့သြဖွယ်ရှုံးနိမ့်ထားကာ ချန်ပီယံလိဂ် အုပ်စု F တွင် အောက်ဆုံးရောက်နေသည်။

“ကျွန်တော်တို့ ပရီးမီးယားလိဂ်မှာ အကောင်းဆုံးဖြစ်နေပါတယ်။ တစ်ခြားတစ်ဖက်မှာလည်း ဘိုင်ယန်ပွဲအတွက် အကောင်းဆုံး ပြင်ဆင်ထားပါတယ်။ ဘာ့ကြောင့်လည်းဆိုတော့ ကျွန်တော်တို့မှာ ဒဏ်ရာရသူတွေမရှိဘဲ ၃ မှတ် ရယူရမယ်ဆိုတဲ့ အတွက်ကြောင့်ပါ။ ပွဲအတွက် တကယ့်ကို အာရုံစိုက်နိုင်တဲ့ အခြေအနေမျိုးမှာ ကျွန်တော်တို့ ရှိနေပါတယ်။ ပြီးတော့ အင်္ဂါနေ့ညမှာ ကျွန်တော်တို့ အားကုန်ထုတ်သွားမှာပါ။ အခုအချိန်မှာ ဘယ်လောက်ပြင်ဆင်ထားလဲ၊ ဘယ်လို ကျွန်တော်တို့ ချဉ်းကပ်ချင်သလဲဆိုတာ ကြည့်ရမှာပါ” ဟု ၀င်းဂါးက ၀က်ဖို့ဒ်အား ၃ ဂိုးပြတ်ဖြင့် အနိုင်ရခဲ့သည့်ပွဲအပြီးတွင် ပြောကြားခဲ့သည်။

Ref: Goal

October 19, 2015
ဖိလစ်ပိုင်မုန်တိုင်း လူအသေအပျောက်များနိုင်

အောက်တိုဘာ ၁၉၊ ၂၀၁၅
M-Media

– ဖိလစ်ပိုင် မြောက်ပိုင်းသို့ အင်အားပြင်းထန်သည့် တိုင်ဖုန်း ကော့ပူ ယမန်နေ့က စတင်ဝင်ရောက်ခဲ့ပြီး ကမ်းရိုးတမ်းဒေသများတွင် လေပြင်းများ တိုက်ခတ်မှုကြောင့် အနည်းဆုံး လူ ၃ ဦး သေဆုံးခဲ့ကာ ပြည်သူ ၁၆၀၀၀ ကျော်မှာ အိုးအိမ်စွန့်ခွာ ထွက်ပြေးခဲ့ရသည်ဟု အမျိုးသား သဘာဝကပ်ဘေး အေဂျင်စီက သတင်းထုန်ပြန်ခဲ့သည်။

မြောက်ပိုင်းရှိ အဓိကကျွန်း လူဇွန်မှာ မုန်တိုင်းဒဏ်ကို အဓိကခံစားခဲ့ရပြီး နေအိမ်များ၊ တံတားများ ပြိုကျပျက်ဆီးခြင်း၊ သစ်ပင်များ ပြိုလဲခြင်းတို့လည်း ရှိခဲ့သည်။ လျှပ်စစ်ဓာတ်တိုင်များ ကျိုးကျခြင်းကြောင့် ဓာတ်အားပြတ်တောက်မှုများလည်း ရှိနေပြီး အဆိုပါ မုန်တိုင်းမှာ ၃ ရက်ခန့် ဆက်လက် ကြာမြင့်မည်ဟု ခန့်မှန်းထားသည်။

မုန်းတိုင်းပြင်းထန်သည့် ဒေသတွင် ပိတ်မိနေသူများ ရှိနေကာ၊ လုံခြုံရေးနှင့် ဘေးအန္တရာယ်ကင်းရှင်းရေးအတွက် စိုးရိမ်ရမှုများလည်း ရှိနေပြီး သေဆုံးသူများလည်း ဆက်လက်မြင့်တက်လာနိုင်သည်။

Ref: Aljazeera

October 19, 2015
ဂျပန်ရေတပ် အင်အားပြပွဲ ယမန်နေ့က ပြုလုပ်

အောက်တိုဘာ ၁၉၊ ၂၀၁၅
M-Media

– ဂျပန် ရေကြောင်းကာကွယ်ရေးတပ်ဖွဲ့ JMSDF မှ ၃ နှစ်တစ်ကြိမ် ပြုလုပ်လေ့ရှိသည့် ရေတပ်အင်အားပြပွဲကို ယမန်နေ့က ဆာဂါမီပင်လယ်အော်တွင် ပြုလုပ်ခဲ့ပြီး ရေတပ်မှ သယ်ယူပို့ဆောင်ရေး သင်္ဘောများ၊ ခရုဇ်ဒုံးကျည်တပ် သင်္ဘောများ၊ ဖျက်သင်္ဘောများနှင့် ရေငုပ်သင်္ဘောများကို ထည့်သွင်း ပြသခဲ့သည်။

ဒုတိယကမ္ဘာစစ်နောက်ပိုင်း ဂျပန်နိုင်ငံမှ တည်ဆောက်ခဲ့သည့် စစ်ရေယောဉ်များတွင် အကြီးဆုံးဖြစ်သော ရဟတ်ယာဉ်တင်သင်္ဘော အီဇူမိုလည်း ထိုအင်အားပြပွဲတွင် ပါဝင်ခဲ့ပြီး အနောက်ပစိဖိတ်ဒေသတွင် အရေးပါသည့် အမေရိကန် တတိယ ရေယာဉ်အုပ်စုမှ တပ်မှူးနှင့်အတူ ၀န်ကြီးချုပ် ရှင်ဇိုအာဘေးမှာ ထိုပြပွဲသို့ တက်ရောက်ကြည့်ရှုခဲ့သည်။

ထိုအင်အားပြပွဲတွင် အမေရိကန် ရေတပ်မှ ရေယာဉ်များလည်း ပါဝင်ခဲ့သည်။ တောင်တရုတ်ပင်လယ်ရှိ ပိုင်ဆိုင်မှု အငြင်းပွားနေသော ကျွန်းများတွင် တရုတ်က ကျွန်းတုများ ဖန်တီးနေသည်ဟု သတင်းများ ထွက်ပေါ်လာပြီးနောက်ပိုင်း ဂျပန်နှင့် အမေရိကန်တို့မှာ စစ်းရေးအရ ပိုမို ပူးပေါင်းဆောင်ရွက်မှုများ ပြုလုပ်ခဲ့သည်။

Ref: RT

October 19, 2015