ဒီဇင်ဘာ ၂၃၊ ၂၀၂၁
M-Media
-မြန်မာ-အိန္ဒိနယ်စပ်မှာ သူပုန်တွေရဲ့ လှုပ်ရှားမှု မြင့်တက်လာပြီး ချင်းပြည်နယ်ကနေတစ်ဆင့် အိန္ဒိယထဲ ဝင်လာတာတွေ များလာတယ်လို့ အိန္ဒိယထောက်လှမ်းရေး ရင်းမြစ်တွေက ပြောပါတယ်။
အိန္ဒိယနိုင်ငံ အာသံနဲ့ မဏိပူရပြည်နယ်က ခွဲထွက်ရေးသမားတွေဟာ အိန္ဒိယ-မြန်မာ နယ်စပ်တစ်လျှောက်မှာ လှုပ်ရှားနေတာဖြစ်ပြီး မြန်မာဖက်မှာလည်း စခန်းတွေ ရှိနေပါတယ်။ ဒါပေမယ့် ၂၀၁၉ ခုမှာ အိန္ဒိယစစ်တပ်ဟာ မြန်မာစစ်တပ်ရဲ့ အကူအညီနဲ့ မြန်မာနိုင်ငံထဲအထိဝင်ရောက်ကာ ဒီစခန်းတွေကို ရှင်းလင်းခဲ့ပါတယ်။
ဖေဖော်ဝါရီ ၁ ရက် စစ်တပ်ကအာဏာသိမ်းပြီးနောက် မြန်မာနိုင်ငံမှာ စစ်အာဏာရှင်ကို ဆန့်ကျင်တဲ့ လက်နက်ကိုင်တော်လှန်ရေးတစ်ရပ် ပေါ်ပေါက်လာခဲ့ပြီး မြန်မာစစ်တပ်က အိန္ဒိယသူပုန်တွေကို နေရာပေးကာ နှိမ်နှင်းခိုင်းတာတွေ ရှိတယ်လို့ သတင်းတွေ ထွက်နေတာပါ။
မြန်မာနိုင်ငံက မတည်ငြိမ်မှုကို အခွင့်ကောင်းယူကာ အိန္ဒိယ သူပုန်အဖွဲ့တွေဖြစ်တဲ့ PLA နဲ့ RPF တို့ ချင်းပြည်နယ် နယ်စပ်မှာ ပြန်လှုပ်ရှားလာကြတယ်လို့ အိန္ဒိယထောက်လှမ်းရေး ရင်းမြစ်တွေက ပြောပါတယ်။ အမှတ် ၄၆ အာသံရိုင်ဖယ်တပ်က ဗိုလ်မှူး ဘီလာဘ် တရီပါသီ၊ ဇနီး၊ သားနဲ့ အခြား ၄ ဦး သေဆုံးခဲ့တဲ့ ပြီးခဲ့တဲ့လ ခြုံခိုတိုက်ခိုက်မှုကို ဒီသူပုန်အဖွဲ့တွေ လုပ်ဆောင်တာဖြစ်ပြီး နောက်ပိုင်းမှာ မြန်မာဖက်ကို ဝင်ရောက်ခိုလှုံသွားတယ်လို့လည်း ဆိုပါတယ်။
အိန္ဒိယဖက်ကို ဝင်ရောက်ဖို့အတွက် UNLF၊ PLA နဲ့ PREPAK အဖွဲ့က အဖွဲ့ဝင် ၁၅၀ လောက် ချင်းပြည်နယ်က ရွာတွေမှာ ခိုလှုံနေသလို၊ NSCN(KYA) အဖွဲ့က အဖွဲ့ဝင်တွေကတော့ အိန္ဒိယဖက် ဝင်ရောက်ကာ လှုပ်ရှားနေကြပြီလို့လည်း အိန္ဒိယထောက်လှမ်းရေး အစီရင်ခံစာတွေမှာ ဖော်ပြထားပါတယ်။
ဒါ့အပြင် အခြား အဖွဲ့အစည်းတွေက အဖွဲ့ဝင် ၄၀ ဝန်းကျင်လောက် အိန္ဒိယထဲဝင်ရောက်ဖို့ ကြိုးစားနေပြီး လာမယ့် သီတင်းပတ်တွေအတွင်း မဏိပူရနဲ့ နာဂလန်းပြည်နယ်တွေမှာ တိုက်ခိုက်မှုဖြစ်လာလိမ့်မယ်လို့လည်း အိန္ဒိယထောက်လှမ်းရေးက သတိပေးထားပါတယ်။
အိန္ဒိယနဲ့ မြန်မာစစ်တပ်တို့ဟာ အခုနှစ်အစောပိုင်းကလည်း နယ်စပ်တစ်လျှောက်မှာရှိတဲ့ သူပုန်စခန်းတွေကို ပူးပေါင်းရှင်းလင်းခဲ့ပါတယ်။
Ref : DNAindia
