Blog

သြဂုတ် ၂၀၊ ၂၀၁၅
M-Media

– မန်ယူ၏ အဓိကတိုက်စစ်မှူးအဖြစ် ယခုနှစ်အတွင်း ကစားခဲ့သည့်ပွဲများတွင် မိမိ စွမ်းဆောင်ရည် မကောင်းခဲ့သည့်ပွဲမှာ တစ်ပွဲသာရှိသည်ဟု တိုက်စစ်မှူး ရူနီက ဝေဖန်သူများကို ပြန်လည်တုန့်ပြန်လိုက်ပြီး ဂိုးများသွင်းခြင်းဖြင့် ၎င်းတို့၏ ဝေဖန်မှုကို အဆုံးသတ်စေမည်ဟု ပြောကြားလိုက်သည်။

တိုက်စစ်မှူး ရော်ဘင်ဗန်ပါစီနှင့် ဖယ်လ်ကာအိုတို့ ထွက်ခွာသွားပြီးနောက်ပိုင်း ရူနီမှာ မန်ယူတိုက်စစ်တွင် အဓိကတိုက်စစ်မှူး ဖြစ်လာခဲ့သည်။ သို့သော်လည်း ပြီးခဲ့သည့်နှစ်များအတွင်း ဂိုးစည်း၌ ခြိမ်းခြောက်မှု မပြုလုပ်နိုင်ခဲ့သည့် ရူနီမှာ ယခုရာသီ စပါး၊ အက်စတွန်ဗီလာ၊ ကလပ်ဘရုဂျက်အသင်းတို့နှင့် ကစားသည့် ပွဲများတွင်လည်း ဂိုးသွင်းနိုင်ခြင်း၊ သို့မဟုတ် ဂိုးစည်းအတွင်း ခြိမ်းခြောက်နိုင်ခြင်းပင် မရှိဟု အချို့သူများက ဝေဖန်ခဲ့ကြသည်။

သို့သော်လည်း ရူနီကမူ အက်စတွန်ဗီလာနှင့်တစ်ပွဲတွင်သာ မိမိ၏စွမ်းဆောင်ရည်မှာ စိတ်ပျက်ဖွယ်ရာဖြစ်ခဲ့သည်ဟု ဆိုပြီး မကြာမီ ဂိုးသွင်းခြေ ပြန်တွေ့လိမ့်မည်ဟု ပြောကြားခဲ့သည်။

“ဒီရာသီမှာ တစ်ပွဲပဲ ကျွန်တော်ဆိုးခဲ့ပြီး၊ လူတိုင်းက အဲဒါကိုပဲ ပြောနေကြပါတယ်။ ကျွန်တော့်ကစားသမားဘ၀ တစ်လျှောက်လုံးမှာ ဒီလိုမျိုးရှိခဲ့တယ်ဆိုတာ ကျွန်တော်သိပါတယ်။ ဒါပေမယ့် ဒီတစ်ပတ်မှာတော့ ဒါကို ချေဖျက်သွားနိုင်မယ်လို့ ကျွန်တော်မျှော်လင့်ပါတယ်” ဟု ရူနီက သတင်းထောက်များအား ပြောကြားခဲ့သည်။

ထို့ပြင် ယမန်နေ့က ချန်ပီယံလိဂ်ခြေစစ်ပွဲအဖြစ် ကစားခဲ့သည့် ကလပ်ဘရုဂျက်နှင့်ပွဲ၌ မိမိမှာ ကောင်းမွန်သည်ဟု ထင်ခဲ့ကြောင်း၊ တစ်ဂိုး သို့မဟုတ် နှစ်ဂိုးခန့် ရရှိနိုင်ခဲ့ကြောင်း၊ အနိုင်ရရှိမှုမှာ မိမိတို့အားလုံးအတွက် ကောင်းမွန်ခဲ့ကြောင်း ၎င်းက ထပ်လောင်းပြောကြားခဲ့သည်။

မန်ယူအတွက် ရူနီသွင်းယူပေးခဲ့သည့် နောက်ဆုံးဂိုးမှာ ဧပြီ ၄ ရက်နေ့က အက်စတွန်ဗီလာအား ၃ ဂိုး ၁ ဂိုးဖြင့် အနိုင်ရရှိခဲ့သည့်ပွဲတွင် ဖြစ်သည်။ နည်းပြဗန်ဂါးလ်ကမူ ရူနီ၏ ဂိုးမိုးခေါင်မှုအတွက် ဘရုဂျက်နှင့်ပွဲ မတိုင်ခင် ကာကွယ်ပြောကြားခဲ့သည်။

Ref: Goal