Blog

ဒီဇင်ဘာ ၉၊ ၂၀၂၁
M-Media

-လာမယ့်နှစ်ဇန်နဝါရီလမှာ မြန်မာနိုင်ငံကို သွားရောက်ဖို့ရှိပြီး စစ်ကောင်စီကို အာဆီယံအဖွဲ့မှာ ပါဝင်နိုင်ရေး ဆောင်ရွက်သွားမယ်လို့ ကမ္ဘောဒီးယားဝန်ကြီးချုပ် ဟွန်ဆန်က ပြောကြားလိုက်ပါတယ်။

ကမ္ဘောဒီးယားဟာ လာမယ့်နှစ်မှာ အာဆီယံဥက္ကဌအဖြစ် တာဝန်ယူဆောင်ရွက်မှာပါ။ မြန်မာနိုင်ငံက အာဏာသိမ်းစစ်ကောင်စီနဲ့ တွေ့ဆုံညှိနှိုင်းဖို့ ဆန္ဒရှိကြောင်း ပြီးခဲ့တဲ့လကစလို့ ဟွန်ဆန်က လူသိရှင်ကြား ထုတ်ပြောလာတာ ဖြစ်ပါတယ်။

စစ်ကောင်စီခန့်နိုင်ငံခြားရေးဝန်ကြီးကို ဟွန်ဆန်က အခုတစ်ပတ်မှာ ဖိတ်ကြားတွေ့ဆုံခဲ့သလို၊ စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို ကမ္ဘောဒီးယားလာဖို့ ဖိတ်ကြားမယ်လို့လည်း ဆိုပါတယ်။

ဒီကနေ့ နိုင်ငံအရှေ့တောင်ပိုင်းက လေဆိပ်ဖွင့်ပွဲအခမ်းအနားမှာ ဟွန်ဆန်က သူ့အနေနဲ့ လာမယ့်နှစ် ဇန်နဝါရီလမှာ မြန်မာနိုင်ငံကို သွားရောက်မှာဖြစ်ပြီး စက်မှုဝန်ကြီးကိုလည်း ခေါ်ဆောင်သွားမယ်လို့ ဆိုပါတယ်။

“ကျွန်တော်ပြောပြီးသားပဲ။ ကြိုက်တဲ့လူတွေ ကြိုက်သလို ပြောကြပါစေ။ မြန်မာနဲ့ ပူးပေါင်းဆောင်ရွက်မှုမလုပ်ရင် ဘယ်သူနဲ့ ကျွန်တော်တို့က သွားလုပ်ရမှာလဲ”

အာဆီယံဟာ အရင်လို ၁၀ နိုင်ငံအပြည့်ဖြစ်တာကို လိုလားပြီး ဒီအတွက် တိုင်းပြည်ကို စီမံနေတဲ့အဖွဲ့နဲ့သာ ပူးပေါင်းဆောင်ရွက်ရမှာဖြစ်ကြောင်း၊ အဖြေချက်ခြင်းထွက်မှာမဟုတ်ဘဲ နှစ်နဲ့ချီ ဆွေးနွေးရမှာဖြစ်ကြောင်း ဟွန်ဆန်က ထည့်သွင်းပြောဆိုခဲ့ပါတယ်။

“တစ်ခေါက်တည်းသွားတာနဲ့ ပြဿနာက ချက်ခြင်း ပြေလည်မသွားပါဘူး။ အနည်းဆုံး ဘုံပြဿနာတွေက ဘာလဲဆိုတာ ကျွန်တော်တို့ သိရမယ်။ ဒါဟာ ပြဿနာကိုဖြေရှင်းဖို့ လမ်းစပါပဲ”

ထိုင်းနိုင်ငံအခြေစိုက် နိုင်ငံရေးကျွမ်းကျင်သူ ပေါလ်ချိန်ဘာက စစ်ကောင်စီနဲ့ ဆွေးနွေးညှိနှိုင်းမယ့် ဟွန်ဆန်ရဲ့ အစီအစဉ်ကို အင်ဒိုနီးရှားနဲ့ ဖိလစ်ပိုင်လို ဒီမိုကရေစီနိုင်ငံတွေက လက်ခံမှာမဟုတ်ဘူးလို့ သုံးသပ်ပါတယ်။

ဩစတေးလျအမျိုးသားတက္ကသိုလ်က နိုင်ငံရေးသုတေသီ ဟန်တာမာစတန်က ဟွန်ဆန်ရဲ့ ဒီနည်းလမ်းဟာ ဒီမိုကရေစီ ဖော်ဆောင်နိုင်ဖို့မရှိဘဲ၊ ဖြုတ်ချခံလိုက်ရတဲ့ အရပ်သားအစိုးရနဲ့ ပူးပေါင်းဆောင်ရွက်တဲ့ နည်းလမ်းကသာ ယုံကြည်စိတ်ချရလိမ့်မယ်လို့ ပြောကြားခဲ့ပါတယ်။

ဧပြီလ အာဆီယံထိပ်သီးအစည်းအဝေးမှာ သဘောတူညီခဲ့တဲ့ အချက်တွေကို လိုက်နာဆောင်ရွက်ခြင်းမရှိတဲ့အတွက် အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို ယခုနှစ်အတွင်း ကျင်းပခဲ့တဲ့ ထိပ်သီးအစည်းအဝေး အနည်းဆုံး ၃ ခုမှာ အာဆီယံက ဖိတ်ကြားခဲ့ခြင်း မရှိပါဘူး။

Ref: vodenglish

ဒီဇင်ဘာ ၈၊ ၂၀၂၁
M-Media

-မြန်မာစစ်ခေါင်းဆောင်တွေရဲ့ စီးပွားရေးလုပ်ငန်းတွေနဲ့ သက်ဆိုင်တဲ့ ပေ့ချ်တွေ၊ အကောင့်တွေ အားလုံးကို ဖယ်ရှားသွားမယ်လို့ Facebook က ဒီကနေ့မှာ ကြေငြာပါတယ်။

အခုလိုကြေငြာပြီးပြီးချင်းမှာပဲ စစ်တပ်နဲ့ ဗီယက်နမ်တို့ ပူးတွဲပိုင်ဆိုင်တဲ့ ဆက်သွယ်ရေးလုပ်ငန်း MyTel ရဲ့ စာမျက်နှာကို ဖယ်ရှားလိုက်ပါတယ်။

Facebook မိခင်ကုမ္ပဏီ Meta ရဲ့ အာရှ-ပစိဖိတ်ဆိုင်ရာအကြီးအကဲ ရာဖေးလ် ဖရန်ကဲလ်က သူတို့ ပလက်ဖောင်းမှာ မြန်မာစစ်တပ် မတည်ရှိရေး ပိုမိုလုပ်ဆောင်သွားမှာဖြစ်ပြီး၊ စစ်တပ်ကပိုင်တဲ့ စီးပွားရေးလုပ်ငန်းတွေကိုလည်း ဖယ်ရှားသွားမယ်လို့ ပြောပါတယ်။

‘အရင်ကတည်းက အခုအချိန်အထိ အကြမ်းဖက်မှုတွေ၊ လူ့အခွင့်အရေးချိုးဖောက်မှုတွေ ကျူးလွန်နေတဲ့ မြန်မာစစ်တပ်ရဲ့ ဝင်ငွေရလမ်းမှာ စစ်ခေါင်းဆောင်တွေပိုင်တဲ့ စီးပွားရေးလုပ်ငန်းတွေက အဓိကကျနေတာကို နိုင်ငံတကာအသိုင်းအ၀ိုင်းနဲ့ အစိုးရမဟုတ်တဲ့အဖွဲ့အစည်းတွေက သက်သေသာဓက အထောက်အထား ပြည့်ပြည့်စုံစုံနဲ့ ဖော်ပြလာတဲ့အတွက်’’ ဒီလို အရေးယူဆောင်ရွက်ရခြင်းဖြစ်တယ်လို့လည်း ဖရန်ကဲလ်က ဆိုပါတယ်။

ရခိုင်ပြည်နယ်က လူနည်းစု ရိုဟင်ဂျာမွတ်စလင်တွေအပေါ် အမုန်းစကားပြောဆိုမှုကို အချိန်မီဖယ်ရှားဖို့ ပျက်ကွက်ခဲ့တယ်ဆိုပြီး ရိုဟင်ဂျာအဖွဲ့အစည်းတွေက နစ်နာကြေး ဒေါ်လာ ဘီလီယံ ၁၅၀ ရလိုမှုနဲ့ တရားစွဲပြီး ၂ ရက်အကြာမှာပဲ Facebook ရဲ့ ဒီကြေ​ငြာချက် ထွက်ပေါ်လာတာပါ။

ဖရန်ကဲလ်ကတော့ စစ်တပ်ပိုင်စီးပွားရေးလုပ်ငန်းတွေကိုဖယ်ရှားဖို့ သူတို့ရဲ့ဆုံးဖြတ်ချက်ကို လွန်ခဲ့တဲ့ သီတင်းပတ်အနည်းငယ်ကတည်းက ချထားတာဖြစ်ပြီး၊ အခုတစ်ပတ် ရိုဟင်ဂျာတွေရဲ့ တရားစွဲဆိုမှုနဲ့ မပတ်သက်ဘူးလို့ ထည့်သွင်းပြောဆိုခဲ့ပါတယ်။

ရိုဟင်ဂျာတွေအပေါ် စစ်တပ်က ကျူးလွန်မှုတွေဟာ အလွန်စက်ဆုပ်စရာကောင်းတယ်လို့ ဖရန်ကဲလ်က မှတ်ချက်ပေးခဲ့ပြီး အမုန်းစကားတွေဖယ်ရှားရေး အားထုတ်လုပ်ဆောင်နေတယ်လို့လည်း ဆိုပါတယ်။

ဖေဖော်ဝါရီ ၁ ရက်နေ့ စစ်တပ်က အာဏာသိမ်းကာ ပြည်သူလူထုအပေါ် အကြမ်းဖက် တိုက်ခိုက်သတ်ဖြတ်မှုတွေ၊ လူ့အခွင့်အရေးချိုးဖောက်မှုတွေ လုပ်ဆောင်တဲ့အတွက် အမေရိကန်အပါအဝင် ကမ္ဘာ့နိုင်ငံတွေက စစ်ခေါင်းဆောင်တွေနဲ့ သူတို့ပိုင်ဆိုင်တဲ့ စီးပွားရေးလုပ်ငန်းတွေကို ပိတ်ဆို့အရေးယူတာတွေ တိုးမြှင့်လုပ်ဆောင်လာပါတယ်။

စစ်ခေါင်းဆောင်တွေဟာ ကျောက်စိမ်း၊ ရေနံနဲ့သဘာ၀ဓာတ်ငွေ့၊ သစ်လုပ်ငန်း စတဲ့ ဒေါ်လာ ဘီလီယံပေါင်းများစွာ ရရှိတဲ့ လုပ်ငန်းတွေကို ဦးစီးလုပ်ကိုင်နေတာ ဖြစ်ပါတယ်။

ဖရန်ကယ်က စစ်ခေါင်းဆောင်တွေ အပြည့်အ၀မပိုင်ဆိုင်တဲ့ လုပ်ငန်းတွေကိုလည်း Facebook စာမျက်နှာကနေ ဖယ်ရှားသွားမှာဖြစ်ပြီး အဲဒီအထဲမှာ ဘီယာလုပ်ငန်း Kirin’s Myanmar Brewery လည်း ပါဝင်တယ်လို့ ဆိုပါတယ်။

Ref: Financial Times