Blog

ဇွန် ၂၆ ၊ ၂၀၁၅
M-Media
သတင်း- ဖြိုးသူရ

ယခုတလောတွင် အင်တာနက် လူမှုကွန်ရက်ဆိုဒ်များတွင် ပျော်ဘွယ်မြို့ရှိ အာရဗီ တက္ကသိုလ်မှာ ယခုနှစ်များ အတွင်းကမှ တရားမဝင် ဆောက်လုပ် ဖွင့်လှစ်ထားကြောင်း ဝါဒဖြန့် လှုံဆော်သည့် သတင်းများ ပြန့်နှံ့နေလျက်ရှိရာ M-Media မှ အဆိုပါကိစ္စနှင့် ပတ်သက်ပြီး အဖြစ်မှန်သိရှိစေဖို့ ပျော်ဘွယ် အာရဗီ တက္ကသိုလ်၏ ကျောင်းအုပ် ဆရာကြီးကို တိုက်ရိုက်ဆက်သွယ်မေးမြန်းခဲ့ပါသည်။
.
မေး – ဆရာကြီးရဲ့ နာမည်၊ ဘွဲ့နဲ့ ပျော်ဘွယ်အာရဗီတက္ကသိုလ်မှာ ဘာတာဝန်ယူထားတယ်ဆိုတာ သိပါရစေ။
ကျောင်းအုပ်ဆရာကြီး- ဆရာ့နာမည်က ဦးဟာမြင်ပါ။ အပြည့်အစုံဆိုရင်တော့ အလ်ဟဂ်ျ မော်လနာ ဦးဟာမြင်ပါ။ ပျော်ဘွယ်အာရဗီ တက္ကသိုလ်မှာ ကျောင်းအုပ်ကြီးတာဝန်ယူထားတာ ၁၂နှစ်ရှိပါပြီ။
.
မေး-  ဒီတက္ကသိုလ်ကြီးကို မနေ့တစ်နေ့ကမှ တရားမဝင် ဆောက်တဲ့ ပုံစံမျိုးတွေနဲ့ အင်တာနက်မှာ ကောလဟာလဖြန့်ဝေမှုတွေ ရှိနေတော့ ဒီကျောင်းကြီးရဲ့ ဖြစ်တည်လာပုံနဲ့ တည်ထောင်တဲ့ ခုနှစ် သိပါရစေ။
ကျောင်းအုပ်ကြီး- ဒီတက္ကသိုလ်ကြီးကို ၁၉၅၅ ခုနှစ်ကတည်းက မဇွာဟေရိုလ်အိုလူမ် အာရဗီကျောင်းဆိုပြီး စတင်တည်ထောင်ခဲ့တာပါ။ ၁၉၆၄ ခုနှစ်မှာ ပညာရေးအဆင်မြှင့်လိုက်ပြီး အာရဗီ အထက်တန်းကျောင်း ဆိုပြီး ပြောင်းလဲ ခေါ်ဝေါ်ခဲ့ပါတယ်။ ၁၉၆၇ ခုနှစ်မှာ ဘွဲ့ပေးနိုင်တော့မှ ဂျာမေအာအဖြစ် အာရဗီတက္ကသိုလ်အဖြစ် အမည်ပြောင်းခဲ့တာပါ။ ဆရာက ၁၉၆၄ ခု အထက်တန်းကျောင်းအဖြစ် ပြောင်းတဲ့နှစ်မှာ ဒီကိုစရောက်ခဲ့တာပါ။
.
မေး- တက္ကသိုလ်အဆောက်အဦးထိပ်မှာ ရေးထိုးထားတဲ့ ခုနှစ်က…။
ကျောင်းအုပ်ကြီး- အဲ့ဒီ့ခုနှစ် ၁၉၇၃က လက်ရှိ တက္ကသိုလ်အဆောက်အဦး ဆောက်လုပ်ပြီးစီးတဲ့ နှစ်ပါ။

.
မေး – ဒီကျောင်းကြီးရဲ့ ပိုင်ဆိုင်မှု အထောက်အထား၊ အုပ်ချုပ်ပုံနဲ့ သက်ဆိုင်ရာအာဏာပိုင်တွေနဲ့ ဆက်ဆံရေးလေး သိပါရစေ။
ကျောင်းအုပ်ကြီး- ဒီကျောင်းကြီးက ဂျမအသ်ဝကားဖ် (စေတနာရှင် မွတ်စလင်မ်အများက စုပေါင်းလှူဒါန်းထားတာ) ပါ။ စေတနာရှင်တာဝန်ခံ ဟာဂျီတစ်ဦးရဲ့ အမည်နဲ့ ဂရမ်လည်း လုပ်ထားပါတယ်။ ကျောင်းကြီးကို အဖွဲ့ဝင် ရှစ်ဦးပါတဲ့ အုပ်ချုပ်ရေးကော်မတီနဲ့ ကျောင်းရှူရာ(ညှိုနှိုင်းတိုင်ပင်ရေး)အဖွဲ့တို့ တာဝန်ယူအုပ်ချုပ်ပါတယ်။ ကျောင်းရှူရာအဖွဲ့က အထွေထွေစီမံခန့်ခွဲမှုအားလုံးကို တာဝန်ယူထားပြီး အုပ်ချုပ်ရေးကော်မတီကတော့ ဘဏ္ဍာရေးပိုင်းကိုအဓိက တာဝန်ယူထားပါတယ်။
အစိုးရဖက်က တိုက်ရိုက်ကူညီပံ့ပိုးတာမျိုးတော့ မရှိပါပေမယ့် အစိုးရအဆက်ဆက် သက်ဆိုင်ရာ အာဏာပိုင် အဖွဲ့အစည်းတွေနဲ့ ဆက်ဆံရေးကောင်းမွန်ပါတယ်။ ဥပမာ-၈၈ အရေးအခင်းကာလတုန်းကဆို စစ်တပ်က အရာရှိတွေက ဆရာနဲ့ အခြားရပ်မိရပ်ဖ သုံးဦးကို ခေါ်တွေ့ပြီး အမိန့်အရ တပ်ပြန်သိမ်းရမှာဖြစ်လို့ ဆရာကြီးတို့ ရပ်မိရပ်ဖတွေကို မြို့ကို စောင့်ရှောက်ဖို့ အပ်ခဲ့ပါတယ်ဆိုပြီး ခေါ်တွေ့တာမျိုးတွေရှိပါတယ်။ နောက်ပိုင်းနဲ့ အခုလည်း သက်ဆိုင်ရာတာဝန်ရှိသူတွေက လိုအပ်ရင် မွတ်စလင်မ်တွေအရေးနဲ့ပတ်သက်ပြီး ခေါ်ယူ ညှိနှိုင်းတိုင်ပင်တာမျိုးတွေ ရှိပါတယ်။
.
မေး – ဒီကျောင်းကြီးမှာ ပညာသင်ကြားနေတဲ့ ကျောင်းသားအရေအတွက်နဲ့ သင်ကြားပေးနေတဲ့ ဆရာအရေအတွက်လေး သိပါရစေ။
ကျောင်းအုပ်ကြီး- အခုပညာသင်နှစ်မှာ ကျောင်းမကြီးမှာ ကျောင်းသား ၂၅၀၊ အမျိုးသမီးဆောင်မှာ ကျောင်းသူ ၅၈ယောက်ပါ။ ဆရာကတော့ ဆရာ ၂၀ နဲ့ ဆရာမ ၆ ဦးပါ။
.
မေး– ဘယ်လိုအရည်အချင်းနဲ့ ကျောင်းအပ်လက်ခံတယ်၊ ဘာတွေ သင်ပေးတယ်ဆိုတာ သိပါရစေ။
ကျောင်းအုပ်ကြီး- အနည်းဆုံး အခြေခံပညာ ရှစ်တန်းအောင်ပြီးသားမှ လက်ခံပါတယ်။ ချွင်းချက်အနေနဲ့ လက်ခံပေးတဲ့ ဟာဖိဇ် (ကုရ်အာန်ကျမ်းတော် အာဂုံဆောင်)ဖတ်ပြီး လာကြတဲ့ ကျောင်းသားတွေကျတော့ အတန်းပညာ အားနည်းတော့ မြန်မာစာ၊ အင်္ဂလိပ်စာနဲ့ သင်္ချာတွေပါ သင်ပေးပါတယ်။ ဘာသာစကားအနေနဲ့ အာရဗီကို အဓိကထားသင်ပြီး အူရ်ဒူကိုတော့ အခြေခံအဆင့်သင်ပေးပါတယ်။ ဘာသာရေး ပညာရပ်တွေ အနေနဲ့ကတော့ ကုရ်အာန်၊ ဟဒီးစ် (တမန်တော်မြတ် မုဟမ္မဒ်၏ ဆုံးမသြဝါဒများ)နဲ့ ဖိကာဟ် (အစ္စလာမ့်ဓမ္မသတ်) က အစရှိလို့သင်ပေးပါတယ်။ အမျိုးသားတွေအတွက်သင်ရိုးက ၉နှစ်ဖြစ်ပြီး အမျိုးသမီးတွေ အတွက်ကတော့ ၆နှစ်ပါ။ အမျိုးသမီးတွေကျတော့ ရှစ်တန်းအောင်ထားမှသာ လက်ခံထားတာမို့ အတန်းပညာ အတွက် အချိန်ယူစရာ မလိုတော့လို့ပါ။ အောင်မြင်လို့ ကျောင်းပြီးရင် မော်လဝီဘွဲ့ပေးပါတယ်။ ကျောင်းသားတွေ အတွက် တစ်ပတ်ကို တစ်ရက် ဆရာတွေကြီးကြပ်မှုနဲ့ တရားဟောပြောလေ့ကျင့်မှု အစီအစဉ်လုပ်ပေးတာမျိုးရှိပါတယ်။
.
မေး– အခြားရော ဘာသင်တန်းတွေ ရှိပါသေးသလဲ သိပါရစေ။
ကျောင်းအုပ်ကြီး- ဒီကျောင်းထွက် ဘွဲ့ရကျောင်းသားဟောင်းတွေ အတွက် ၂နှစ်သင်ရိုးနဲ့ မွမ်းမံ သင်တန်း ဖွင့်ပေးနေပါပြီ။ သူတို့ကို ခေတ်စနစ်နဲ့ ညီအောင်၊ အဆင့်မြင့် အကီဒဟ် (အစ္စလာမ့် ယုံကြည်ချက်)၊ မြန်မာမွတ်စလင်မ်တွေရဲ့ သမိုင်းကြောင်း၊ အီမာန်(ခေါင်းဆောင်)ဖြစ်သင်တန်းနဲ့ ဖဿဝါ (ဓမ္မသတ်ဆုံးဖြတ်ချက်)တွေကို ကိုယ်တိုင် လေ့လာဖတ်ခိုင်းပြီး ဆရာတွေက လမ်းညွှန်ပေးတာမျိုးတွေ သင်ပေးနေပါတယ်။ ဒီမွမ်းမံသင်တန်းမှာ ကွန်ပျူတာသင်ပေးနိုင်ဖို့၊ ကိုယ့်နိုင်ငံအတွက် အသုံးကျမယ့် မြန်မာစာ၊ အင်္ဂလိပ်စာနဲ့ သင်္ချာတွေပါ ထပ်သင်ပေးနိုင်ဖို့ စီစဉ်နေပါတယ်။
.
မေး- ဆရာကြီးတို့ အာရဗီတက္ကသိုလ်အနေနဲ့ အခြားဘာသာတရားတွေက ငြိမ်းချမ်းရေးကို လိုလားတဲ့ ဘာသာရေးခေါင်းဆောင်တွေနဲ့ လက်တွဲဆောင်ရွက်နေတာမျိုးတွေ ရှိပါသလား သိပါရစေ။
ကျောင်းအုပ်ကြီး- ရှိပါတယ်။ ခရိုင်နဲ့ မြို့နယ်အဆင့် ဘာသာပေါင်းစုံချစ်ကြည်ရေး လှုပ်ရှားမှုတွေမှာ ပါဝင်ဆောင်ရွက်နေပါတယ်။ ဆရာကိုယ်တိုင် မြို့နယ်ဘာသာပေါင်းစုံ ချစ်ကြည်ရေးအဖွဲ့မှာ နာယကပါ။ မြို့နယ်သံဃနာယက အဖွဲ့၊ ပြီးတော့ ခရစ်ယာန်၊ ဟိန္ဒူနဲ့ ဆစ်(ခ်)ဘာသာ ခေါင်းဆောင်တွေနဲ့ ချစ်ကြည်ရေး ငြိမ်းချမ်းရေးတွေ ပူးပေါင်းဆောင်ရွက်နေပါတယ်။