ဇွန် ၂၇၊ ၂၀၁၅
M-Media
– ယမန်နေ့က တူနီးရှားနှင့် ကူဝိတ်တို့တွင် အကြမ်းဖက်တိုက်ခိုက်မှုများ ဖြစ်ပွားခဲ့ပြီး လူအများအပြား သေဆုံးခဲ့ကာ အစွန်းရောက်အဖွဲ့များ၏ လက်ချက်ဖြစ်သည်ဟု အာဏာပိုင်များက ပြောကြားခဲ့သည်။
တူနီးရှား ကမ်းရိုးတမ်းမြို့ ဆော့စီမှ အပမ်းဖြေကမ်းခြေရှိ ဟိုတည် ၂ ခုတွင် အမည်မသိ သေနတ်သမားတစ်ဦးက ၀င်ရောက်ပစ်ခတ်မှုကြောင့် နိုင်ငံခြားသားများအပါအ၀င် လူပေါင်း ၃၇ ဦး သေဆုံးခဲ့သည်။ သေဆုံးသူများတွင် ဗြိတိန်နိုင်ငံသား ၅ ဦး အိုင်ယာလန်နိုင်ငံသားတစ်ဦးတို့ ပါဝင်ပြီး ယူကေ နိုင်ငံခြားရေးဝန်ကြီးကလည်း အတည်ပြုခဲ့သည်။
ထိုတိုက်ခိုက်မှုအတွင်း ၃၆ ဦး ဒဏ်ရာရရှိခဲ့ပြီး သေနတ်သမားအား ရဲတပ်ဖွဲ့က သုတ်သင်နိုင်ခဲ့ကာ အခြားတစ်ဦးလည်း တိုက်ခိုက်မှုတွင် ပါဝင်သည်ဟု သတင်းများက ဖော်ပြကြသည်။ သေနတ်သမားမှာ ရဲတပ်ဖွဲ့ ယူနီဖောင်း ၀တ်ဆင်ကာ ၀င်ရောက်ပစ်ခတ်ခဲ့ခြင်းဖြစ်ပြီး နိုင်ငံခြားသားများကို အဓိက ပစ်မှတ်ထားခဲ့သည်ဟု တူနီးရှား မီဒီယာများက ဖော်ပြခဲ့သည်။
တူနီးရှားနိုင်ငံ မြို့တော်တူနစ်ရှိ ဘာဒို ပြတိုက်အတွင်း ပြီးခဲ့သည့် မတ်လက သေနတ်သမားတစ်ဦး ၀င်ရောက်ပစ်ခတ်မှုကြောင့် ကမ္ဘာ့လှည့်ခရီးသွားများ သေဆုံးခဲ့ရပြီးနောက် ယခုတိုက်ခိုက်မှုက ကမ္ဘာ့လှည့်ခရီးသွားစီးပွားရေးတွင် မှီခိုနေရသည့် တူနီးရှား၏ စီးပွားရေးကဏ္ဍကို ထိခိုက်စေမည်ဖြစ်သည်။
ကူဝိတ်နိုင်ငံ ကူဝိတ်စီးတီးမြို့ရှိ အီမာမ်ဆာဒစ် ရှီယိုက် ဗလီဝတ်ကျောင်းတော်တွင် ယမန်နေ့ သောကြာနေ့ဝတ်ပြုချိန် ဗုံးခွဲတိုက်ခိုက်မှုတစ်ခု ဖြစ်ပွားခဲ့ပြီး လူ ၂၅ ဦး သေဆုံးခဲ့ကာ အများအပြား ဒဏ်ရာရရှိခဲ့သည်။
IS အဖွဲ့ကမူ ၎င်းတို့လုပ်သည်ဟု ကြေညာခဲ့ပြီး အသေခံဗုံးခွဲသမားက ဗုံးဖောက်ခွဲခဲ့ခြင်းဟု ပြောကြားခဲ့သည်။
ထိုတိုက်ခိုက်မှုအတွက် ကူဝိတ်ပါလီမန်က အရေးပေါ်အစည်းအဝေး ခေါ်ခဲ့ပြီး တရားရေးဝန်ကြီး အောင်ကက်ဖ်နှင့် အစ္စလာမ့်ရေးရာဝန်ကြီး ယာကွဘ် အလ်-ဆာနီအာတို့မှာ ထို အကြမ်းဖက်တိုက်ခိုက်မှုအား ရှုတ်ချခဲ့ကာ တိုင်းပြည်၏ လုံခြုံရေးနှင့် စည်းလုံးညီညွတ်မှုကို ပျက်ပြားအောင် လုပ်ဆောင်ခြင်းဖြစ်သည်ဟု ပြောကြားခဲ့သည်။
ယခုတိုက်ခိုက်မှုကြောင့် ၀တ်ပြုမှုများနှင့် ဗလီဝတ်ကျောင်းတော်များအား ကာကွယ်ရန်အတွက် စီမံမှု အများပြားကို ဆောင်ရွက်နေသည်ဟုလည်း အလ်-ဆာနီအာက ထည့်သွင်းပြောကြားခဲ့သည်။
IS အဖွဲ့ ပေါ်လာခဲ့ပြီးနောက် အရှေ့အလယ်ပိုင်းရှိ မွတ်စလင်လူ့အဖွဲ့အစည်း၏ လုံခြုံရေးမှာ ခြိမ်းခြောက်ခံနေရပြီး အစ္စလာမ့် သာသနိကအဆောက်အအုံးများအား ပစ်မှတ်ထားသည့် တိုက်ခိုက်မှုများလည်း တိုးလာခဲ့သည်။ ထို့ပြင် IS မှာ ၎င်းတို့ထိန်းချုပ်သည့် ဒေသများအတွင်း အစ္စလာမ့်သမိုင်းဝင်နေရာများကိုလည်း ဖျက်ဆီးဖျောက်ဖျက်လျက် ရှိနေကြသည်။
Ref: Aljazeera
Leave a Reply
You must be logged in to post a comment.