Blog

နိုင်ငံတကာ သတင်းတို (မေ ၃၀၊ ၂၀၁၅)

မေ ၃၀၊ ၂၀၁၅
M-Media

မြောက်ကိုရီးယား ငတ်မွတ်ခေါင်းပါးမှုအန္တရာယ်ကို ကုလ သတိပေး
……………………………..
ပြီးခဲ့သည့်နှစ်က မိုးရွာနှုန်းမှာ နှစ် ၃၀ အတွင်း အနိမ့်ဆုံးသို့ရောက်ခဲ့ပြီး ယခုနှစ်တွင်လည်း ဆက်လက်မိုးခေါင်နေသောကြောင့် မြောက်ကိုရီးယားနိုင်ငံအတွင်း အစားအသောက်များ ပြတ်လတ်ကာ ငတ်မွတ်ခေါင်းပါးမှု ကပ်ဘေးဆီသို့ ဦးတည်သွားနိုင်သည်ဟု ကုလသမဂ္ဂက သတိပေးပြောကြားလိုက်သည်။ မြောက်ကိုရီးယား လယ်သမားများမှာ လောင်စာ၊ လက်ယာစိုက်ပျိုးရေးပစ္စည်းများ ပြတ်လတ်မှုနှင့်လည်း ကြုံနေရပြီး စိုက်ပျိုးရေးဆိုင်ရာ အခြေခံအဆောက်အဦးများမှာလည်း လုံလုံလောက်လောက်မရှိပေ။ ထို့ပြင် ၂၀၁၆ ခုနှစ်တွင် မိုးခေါင်မှုမှာ ပိုမိုဆိုးဝါးမည်ဟု ကုလက ပြောကြားခဲ့သည်။

အမေရိကန်မှာ မိမိတို့သမိုင်းကို အလေးမထားဟု တရုတ်ပြော
……………………………..
တောင်တရုတ်ပင်လယ် စိုးမိုးရေးလုပ်ငန်း လုပ်ကိုင်နေသည့် တရုတ်၏လုပ်ရပ်က ဒေသတွင်း မတည်မငြိမ်ဖြစ်စေသည်ဟု အမေရိကန်၏ ပြောကြားမှုကို တရုတ်နိုင်ငံက ပြန်လည်တုန့်ပြန်လိုက်ပြီး အမေရိကန်မှာ တရုတ်နိုင်ငံ၏ သမိုင်း၊ ဥပဒေဆိုင်ရာ စည်းမျဉ်းစည်းကမ်းများနှင့် အချက်အလက်များကို အလေးမထားဟု နိုင်ငံခြားရေးဝန်ကြီးဌာနမှ ပြောရေးဆိုခွင့်ရှိသူ ဟွာ
ချန်ယင်းက ပြောကြားခဲ့သည်။ ထို့ပြင် တောင်တရုတ်ပင်လယ်တွင် တရုတ်နိုင်ငံ အချုပ်အခြာနှင့် အခွင့်အရေးများမှာ နှစ်ပေါင်းများစွာ အရင်ကတည်းက တည်ဆောက်ပြီးဖြစ်သည်ဟု ထည့်သွင်းပြောကြားခဲ့သည်။

မန်ယူနောက်ခံလူဟောင်း ဖာဒီနန် အနားယူပြီ
…………………………..
တန်းဆင်းသွားခဲ့ရသည့် ကျူပီအာရ်အသင်းမှ လက်လွှတ်လိုက်သော မန်ယူ ဂန္တ၀င်နောက်လူဟောင်း ရီယိုဖာဒီနန်က ၎င်းအနေဖြင့် ကစားသမားဘ၀မှ အနားယူလိုက်ပြီဟု ကြေညာခဲ့သည်။ အသက် ၃၆ နှစ်အရွယ်ရှိပြီဖြစ်သည့် ဖာဒီနန်မှာ ကစားသမားသက်တမ်း ၁၉ နှစ်ရှိပြီဖြစ်ပြီး မန်ယူ အသင်းတွင် ၁၂ နှစ်ကြာ ကစားခဲ့ကာ ဆုဖလားပေါင်းများစွာကို ဆွတ်ခူးနိုင်ခဲ့သည်။

Ref: News Agencies

May 30, 2015
အရီဇိုးနားတွင် အစ္စလာမ်ဆန့်ကျင်ရေး ဆန္ဒပြသူများကို ဒေသတွင်းလူ့အဖွဲ့အစည်းက တန်ပြန်ဆန္ဒပြကာ နာဇီများဟု သမုတ်ခဲ့

မေ ၃၀၊ ၂၀၁၅
M-Media

– အမေရိကန်ပြည်ထောင်စု အရီဇိုးနားပြည်နယ် ဖီးနစ်မြို့ရှိ ဗလီဝတ်ကျောင်းတော်ရှေ့တွင် အစ္စလာမ်ဆန့်ကျင်ရေး ချီတက်ဆန္ဒပြသူများမှာ လူမျိုးရေးခွဲခြားမှုနှင့် အမုန်းတရား ဖြန့်ဝေမှု ဆန့်ကျင်သူများ၏ တန်ပြန်ဆန္ဒပြခြင်းကို ခံခဲ့ရသည်ဟု သိရသည်။

အစ္စလာမ်ဆန့်ကျင်ရေး ဆန္ဒပြပွဲကို အီရတ်စစ်ပြန် အမေရိကန် မရိန်းတပ်သားဟောင်းဖြစ်သော ဂျွန် ရစ်ဇိုင်းမားက ဆိုရှယ်မီဒီယာမှ လှုံ့ဆော်ကာ ပြုလုပ်ခဲ့ခြင်းဖြစ်သည်။ ဆိုရှယ်မီဒီယာတွင် လူ ၇၀၀၀ ခန့်ကို ဖိတ်ခေါ်ခဲ့သော်လည်း ၂၀၀ကျော်သာ တက်ရောက်ခဲ့သည်။

အစ္စလာမ့်ဆန့်ကျင်ရေးဆန္ဒပြသူများမှာ အစ္စလာမ်ကိုစော်ကားသည့် စာသားများကို ရေးသားထားသော တီရှပ်များကို ၀တ်ဆင်၍ အစ္စလာမ်ကို ရှုတ်ချသည့် ဆိုင်းဘုတ်များနှင့် တမန်တော်မိုဟာမက်၏ ရုပ်ပြောင်ပုံများကို ကိုင်ဆောင်လာခဲ့ကြသည်။ ထို့ပြင် ၎င်းတို့မှ သေနတ်များကိုပင် ယူဆောင်ခဲ့ကြသည်။

သို့သော်လည်း ၎င်းတို့ထက် အင်အားပိုမိုများပြားသော လူအုပ်ကြီးမှာ “အမုန်းကိုမလို မေတ္တာကိုသာလိုသည်” “ငြိမ်းချမ်းရေးကို ဖြန့်ဝေကြ” ဟူသော ကျွေးကျော်သံများကို ကျွေးကြော်ကာ ချီတက်လာခဲ့ကြပြီး ဖီးနစ် ဗလီဝတ်ကျောင်းတော်ရှေ့တွင် ၎င်းတို့နှစ်ဖွဲ့မှာ ထိပ်တိုက်တွေ့ခဲ့ကြသည်။

ရဲတပ်ဖွဲ့ဝင်များမှာ ဆန္ဒပြမှု မပြုလုပ်ခင်ကပင် ဗလီဝတ်ကျောင်းတော် အနီးတစ်ဝိုက်၌ လုံခြုံရေးယူထားခဲ့ပြီး နှစ်ဖွဲ့ဖြစ်လာသည့်အချိန်တွင် ပြဿနာမဖြစ်ပွားစေရန် ၎င်းတို့ အဖွဲ့နှစ်ခု၏ကြား တံတိုင်းအဖြစ် ကာပေးခဲ့သည်။

အမုန်းတရားဆန့်ကျင်ရေးအဖွဲ့သားများမှာ ငြိမ်းချမ်းရေးဆိုင်းဘုတ်များ၊ မွတ်စလင်လူ့အဖွဲ့အစည်းအား နှစ်သိမ့်အားပေးသည့် ဆိုင်းဘုတ်များကို ကိုင်ဆောင်လာခဲ့ကြကာ အစ္စလာမ်ဆန့်ကျင်ရေး ဆန္ဒပြသူများအား “နာဇီများ” ဟု ဟစ်အော် မောင်းထုတ်ခဲ့ကြသည်။

၎င်းတို့ ဆန္ဒပြခဲ့ရာ ဖီးနစ်ဗလီဝတ်ကျောင်းတော်မှာ ပြီးခဲ့သည့်နှစ်ကတည်းက အကြမ်းဖက်ဆန့်ကျင်ရေး၊ IS၊ အလ်ကိုင်းဒါးနှင့် ဘိုကိုဟရမ်ကဲ့သို့ အကြမ်းဖက်အဖွဲ့အစည်းများအား အစ္စလာမ်နှင့် မည်သို့မှ မသက်ဆိုင်သည့်အကြောင်းကို သောကြောဒေသနာများမှတစ်ဆင့် မွတ်စလင်များအား အသိပညာပေးမှုများ ပြုလုပ်နေသည့် ဗလီဝတ်ကျောင်းတော် ဖြစ်သည်။

ထိုကဲ့သို့ ဆန့်ကျင်ဆန္ဒပြမှုများမှာ ဒေသစံတ်ေချိန် ည ၇ နာရီခန့်တွင် ငြိမ်းချမ်းစွာ ပြီးဆုံးသွားခဲ့ပြီး ၉ နာရီကျော်တွင် လူစုကွဲသွားခဲ့သည်။ ရစ်ဇိုင်းမားကမူ မိမိအနေဖြင့် ထိုကဲ့သို့သော် ဆန္ဒပြမှုများကို ဆက်လက်လုပ်ဆောင်သွားမည်ဟု ပြောကြားခဲ့သည်။

Ref: Reuters, RT

May 30, 2015
အလ်ဂီရီကိုနိုင်ခဲ့သည့် အမီးရ်ခန်း မေ၀ယ်သာနှင့်ထိုးရန် မျက်စပစ်

မေ ၃၀၊ ၂၀၁၅
M-Media

– ယနေ့နံနက်က နယူးယောက်တွင် ထိုးသတ်ခဲ့သည့် ဗြိတိန်လက်ဝှေ့ကျော် အမီးရ်ခန်းနှင့် အမေရိကန် နာမည်ကြီး လက်ဝှေ့သမား ခရစ် အလ်ဂီရီတို့၏ပွဲတွင် အမီးရ်ခန်းက အမှတ်ဖြင့် အနိုင်ရရှိခဲ့သည်။

ပြီးခဲသည့် ၇ လ ပက်ကွီအိုနှင့်ပွဲတွင်တွင် ၆ ကြိမ်တိုင်တိုင် အလဲထိုးခြင်းခံခဲ့ရကာ အရှက်ရဖွယ် ရှုံးနိမ့်ခဲ့သည့် အလ်ဂီရီမှာ ပထမ ၆ ချီခန့်တွင် ခန်းအား အသာစီးဖြင့် ထိုးသတ်နိုင်ခဲ့သော်လည်း နောက်ပိုင်းတွင် ခန်း၏ လက်သီးချက်များကို အလူးအလဲ ခံခဲ့ရသည်။

၁၂ ချီပြီးနောက် မည်သူမှ အလဲမထိုးနိုင်ခဲ့သောကြောင့် အမှတ်ဖြင့် ဆုံးဖြတ်ခဲ့ရာ ဒိုင်လူကြီး ၃ ဦးစလုံးက အမီးရ်ခန်းအား အနိုင်ပေးခဲ့သည်။

“ကျွန်တော်တို့တစ်သင်းလုံး ဖလွိုက်မေ၀ယ်သာနဲ့ ထိုးချင်နေပါတယ်။ ဒါပေမယ့် တစ်ခုခုအတွက် ခင်ဗျားဟာ အချိန်အတော်ကြာ မျှော်လင့်နေတဲ့အခါ အဲဒါက နှောင့်နှေးတတ်ပါတယ်” ဟု ခန်းက ပွဲအပြီးတွင် ပြောကြားခဲ့သည်။

ထို့ပြင် မိမိအနေဖြင့် ယခုပွဲတွင် အမှားများ လုပ်ခဲ့မိသည်ဟုလည်း ၎င်းက ထည့်သွင်းပြောကြားခဲ့သည်။ အလ်ဂီရီကမူ ဒိုင်လူကြီး၏ ဆုံးဖြတ်ချက်အတွက် စိတ်ပျက်မိပြီး မိမိ၏ ထိုးချက်တော်တော်များများမှာ အမီးရ်ခန်း၏ ခန္ဓာယ်ကိုယ်ကို ထိခဲ့သည်ဟု ပြောကြားခဲ့သည်။

အမီးရ်ခန်းမှာ မိမိအနေဖြင့် အလ်ဂီရီအား အနိုင်ရပါက မေ၀ယ်သာနှင့် ထိုးသတ်ရန် မျှော်လင့်မိသည်ဟု စောစောပိုင်းက ပြောကြားခဲ့ဖူးသည်။

Ref: Dailymail

May 30, 2015
မြောက်ကိုရီးယား နျူအစီအစဉ်ကို အမေရိကန် ကွန်ပျူတာဗိုင်းရပ်စ်ဖြင့် တိုက်ခိုက်ခဲ့

မေ ၃၀၊ ၂၀၁၅
M-Media

– လွန်ခဲ့သည့် ၅ နှစ်ခန့်က မြောက်ကိုရီးယား၏ နျူကလီးယားအစီအစဉ်အား တိုက်ခိုက်ရန်အတွက် စတက်စ်နက် (Stuxnet) ကွန်ပျူတာဗိုင်းရပ်စ်ကို အမေရိကန်က မြောက်ကိုရီးယား၏ ကွန်ပျူတာ စနစ်ထဲသို့ ထည့်သွင်းရန် ကြိုးစားခဲ့ဖူးသော်လည်း အောင်မြင်မှုမရရှိခဲ့ဟု ထိုလှုပ်ရှားမှုနှင့် နီးစပ်သူများက ပြောကြားလိုက်သည်။

အဆိုပါ ကွန်ပျူတာဗိုင်းရပ်စ်ဖြင့် အမေရိကန်နှင့် အစ္စရေးတို့ ပူးပေါင်းကာ ၂၀၀၉ နှင့် ၂၀၁၀ ခုနှစ်များတွင် အီရန်၏ နျူကလီးယား အစီစဉ်များကိုလည်း တိုက်ခိုက်ခဲ့ဖူးသည်။

အမေရိကန် ထောက်လှမ်းရေးရင်းမြစ်၏ ပြောကြားမှုအရ အဆိုပါ စတက်စ်နက် ဗိုင်းရပ်ကို တီထွင်သူများမှာ ဗိုင်းရပ်စ်ရှိနေသော စက်အတွင်းမှ ကိုရီးယား ဘာသာစကားဖြင့် ရေးသားထားသော setting နှင့် ထိတွေ့အသည့်အခါ အသက်ဝင် အလုပ်လုပ်နိုင်သော စတက်စ်နက် ဗိုင်းရပ်စ်တစ်မျိုးကို တီထွင်ထုတ်လုပ်ခဲ့သည်ဟု သိရသည်။

သို့သော်လည်း အမေရိကန် အေးဂျင့်များမှာ အဆိုပါ ဗိုင်းရပ်စ်ဖြင့် မြောက်ကိုရီးယား၏ နျူကလီးယားလက်နက် အစီအစဉ် လည်ပတ်နေသော အဓိကကွန်ပျူတာများသို့ ၀င်ရောက်နိုင်ခြင်း မရှိခဲ့ဟု ထိုအစီအစဉ်တွင် အသေးစိတ်ပါဝင်ခဲ့သော အမေရိကန် အဆင့်မြင့်ထောက်လှမ်းရေး ၀န်ထမ်းဟောင်းက ပြောကြားခဲ့သည်။

အမေရိကန် အမျိုးသားလုံခြုံရေးအေဂျင်စီက ဦးဆောင်ပြုလုပ်သည့် အဆိုပါ တိုက်ခိုက်မှုမှာ မြောက်ကိုရီးယား၏ အလွန်လျှို့ဝှက်မှုနှင့် သီးခြားဖြစ်နေသော ဆက်သွယ်ရေးစနစ်ကြောင့် အောင်မြင်မှုမရခဲ့ဟု ၎င်းက ထည့်သွင်းပြောကြားခဲ့သည်။ အမေရိကန်ထောက်လှမ်းရေးတွင် ပါဝင်ခဲ့သော အခြားဝန်ထမ်းဟောင်း တစ်ယောက်ကမူ မိမိအနေဖြင့် မအောင်မြင်သော
ထိုတိုက်ခိုက်မှုအကြောင်းကို ကြားခဲ့သော်လည်း အသေးစိတ်မသိခဲ့ရဟု ဆိုသည်။

မြောက်ကိုရီးယားတွင် ကမ္ဘာပေါ်၌ တစ်သီးတစ်ခြားအဖြစ်ဆုံး ဆက်သွယ်ရေးကွန်ယက်များထဲမှ အချို့ရှိနေပြီး ကွန်ပျူတာပိုင်ဆိုင်မှုပင်လျှင် ရဲတပ်ဖွဲ့၏ ခွင့်ပြုချက် လိုအပ်သည်။ ထို့ပြင် ပြင်ပကမ္ဘာနှင့် အင်တာနက်သုံးစွဲမှုကိုလည်း တရုတ်နိုင်ငံမှတစ်ဆင့် ပြုလုပ်နေသည်။

အီရန်နိုင်ငံကမူ တစ်ကမ္ဘာလုံးကို ဖြန့်ကျက်၍ အင်တာနက်ကို ကျယ်ကျယ်ပြန့်ပြန့်သုံးစွဲပြီး ကမ္ဘာတစ်ဝှမ်းမှ ကုမ္ပဏီများနှင့်လည်း အဆက်အသွယ်ရှိနေသည်။

မြောက်ကိုရီးယားအား ကွန်ပျူတာဗိုင်းရပ်စ်ဖြင့် တိုက်ခိုက်သည်ဆိုသော ယခုသတင်းအတွက် အမေရိကန် အမျိုးသားလုံခြုံရေးအေဂျင်စီက မှတ်ချက်ပေးရန် ငြင်းဆိုခဲ့သည်။ အီရန်အား တိုက်ခိုက်မှုတွင်လည်း ၎င်းတို့က ယခုကဲ့သို့ပင် ငြင်းဆိုခဲ့သည်။

Ref: Reuters

May 30, 2015
ပိတ်ဆို့မှုကို တုန့်ပြန်သည့်အနေဖြင့် ဥရောပ နိုင်ငံရေးသမားများကို ရုရှား အမည်ပျက်စာရင်းသွင်း

မေ ၃၀၊ ၂၀၁၅
M-Media

– ခရိုးမီးယားနှင့် ယူကရိန်းပြဿနာအတွက် ဥရောပ၏ ပိတ်ဆို့မှုများကို တုံ့ပြန်သည့်အနေဖြင့် ရုရှားက ဥရောပမှ နိုင်ငံရေးသမားများအား အမည်ပျက်စာရင်းသွင်းလိုက်သည်ဟု နယ်သာလန်ဝန်ကြီးချုပ် မာ့ခ်ရူတီက ယမန်နေ့တွင် ပြောကြားခဲ့သည်။

“ရုရှားနိုင်ငံကို နောက်ထပ် ၀င်လို့မရတဲ့ လူတွေရဲ့စာရင်းကို ရုရှားက မနေ့မှာ ဥရောပသံရုံးတွေကို ဝေငှခဲ့ပါတယ်” ဟု ရူတီက ၎င်း၏ အပတ်စဉ် သတင်းစာရှင်းလင်ပွဲတွင် ပြောကြားခဲ့ပြီး ထိုစာရင်းထဲတွင် နယ်သာလန် ပါလီမန်အမတ် ၂ ဦးနှင့် ဥရောပပါလီမန်မှ နယ်သာလန် အမတ်တစ်ဦးတို့ ပါဝင်ခဲ့သည်ဟု ထည့်သွင်းပြောကြားခဲ့သည်။

အဆိုပါစာရင်းတွင် လူ ၈၉ ဦး၏ အမည်စာရင်းပါဝင်သည်ဟု ဘယ်လ်ဂျီယံ နိုင်ငံခြားရေးဝန်ကြီး ဒီဒီယာ ရေယန်ဒါ၏စာအရ သိရသည်ဟု ဥရောပပါလီမန်မှ ဘယ်လ်ဂျီယံအမတ် မာ့ခ် ဒီမက်စ်မေကာက Twitter စာမျက်နှာတွင် ရေးသားခဲ့သည်။ နိုင်ငံခြားရေးဝန်ကြီး၏ ထိုစာမှာ
အစစ်အမှန်ဖြစ်ပြီး ရုရှားက ထိုစာရင်းအား လူသိရှင်ကြား ထုတ်ပြန်ခြင်းမပြုရန် တောင်းဆိုခဲ့သည်ဟု ထည့်သွင်းဖြော်ပခဲ့သည်။

ထိုစာရင်းကို ရုရှားက ကြာသာပတေးနေ့တွင် ထုတ်ပြန်ခဲ့ခြင်းဖြစ်ပြီး ပြီးခဲ့သည့်နှစ်တွင် ခရိုင်းမီးယားအား သိမ်းပိုက်ခဲ့ခြင်း၊ ယူကရိန်းပြဿနာတွင် ပါဝင်သည်ဟု စွပ်စွဲခံရခြင်းတို့အတွက် ဥရောပမှ ပိတ်ဆို့မှုများ ပြုလုပ်ခဲ့မှုကို တုံ့ပြန်ခြင်းဖြစ်သည်ဟု ရူတီက ထည့်သွင်းပြောကြားခဲ့သည်

ဥရောပ သံတမန်ရေးဌာနမှ ပြောရေးဆိုခွင့်ရှိသူ တစ်ဦးကမူ ပြီးခဲ့သည့်လများအတွင်း ဥရောပ နိုင်ငံရေးသမားများအား နိုင်ငံအတွင်းသို့ ၀င်ရောက်မှုကို ရုရှားက တားမြစ်ခဲ့သည်ဟု AFP သတင်းဌာနသို့ ပြောကြားခဲ့သည်။

Ref: Channelnewsasia

May 30, 2015