အောက်တိုဘာ ၁၇၊ ၂၀၂၁
M-Media
-ဖေဖော်ဝါရီ ၁ ရက် စစ်တပ်က အာဏာသိမ်းပြီးနောက်ပိုင်း မြန်မာနိုင်ငံမှာ ဖြစ်ပေါ်လာတဲ့ မတည်ငြိမ်မှုတွေကို ဖြေရှင်းရေး တစ်စိတ်တစ်ပိုင်းအဖြစ် ကိုယ်စားလှယ်အဖွဲ့ကို ထိုင်း၊ စင်ကာပူနဲ့ အင်ဒိုနီးရှားနိုင်ငံတို့ထံ စေလွှတ်သွားမယ်လို့ အမေရိကန်က ပြောကြားလိုက်ပါတယ်။
ကိုယ်စားလှယ်အဖွဲ့ကို အမေရိကန်အစိုးရ အကြံပေး ဒဲရစ် ခိုလက် ဦးဆောင်မှာပါ။ ခိုလက်ဟာ အမေရိကန်နိုင်ငံခြားရေးဝန်ကြီး အန်တိုနီ ဘလင်ကန်ရဲ့ မူဝါဒရေးရာ အကြံပေးလည်းဖြစ်ပါတယ်။
အမေရိကန် ကိုယ်စားလှယ်အဖွဲ့ရဲ့ အရှေ့တောင်အာရှ ခရီးစဉ်အတွင်း မဟာမိတ်တွေ၊ မိတ်ဖက်နိုင်ငံတွေနဲ့ ပူးပေါင်းဆောင်ရွက်မှု ချဲ့ထွင်သွားဖို့ ဆွေးနွေးမှာဖြစ်သလို၊ ဒေသတွင်း တည်ငြိမ်အေးချမ်းရေးမှာ အာဆီယံအဖွဲ့ရဲ့ အခန်းကဏ္ဍကို ပိုမိုအားကောင်းအောင် ဆောင်ရွက်ပေးသွားမယ်လို့ အမေရိကန်အစိုးရရဲ့ ထုတ်ပြန်ချက်မှာ ဖော်ပြထားပါတယ်။
မြန်မာအာဏာသိမ်းစစ်ကောင်စီရဲ့ အကြမ်းဖက် သတ်ဖြတ်မှုတွေ ရပ်တန့်ရေး၊ ဖမ်းဆီးထားတဲ့ နိုင်ငံရေးအကျဉ်းသားတွေ ပြန်လွှတ်ပေးရေး၊ ဒီမိုကရေစီ ပြန်လည်ထွန်းကားရေးတို့မှာ အိမ်နီးချင်းနိုင်ငံတွေအပါအဝင် နိုင်ငံတကာအသိုင်းအ၀ိုင်းရဲ့ အရေးကြီးမှုကို ထောက်ပြတာမျိုး ကိုယ်စားလှယ်အဖွဲ့က လုပ်ဆောင်သွားဖို့ ရှိနေပါတယ်။
ထိုင်းနိုင်ငံခရီးစဉ်မှာတော့ အမေရိကန်ကိုယ်စားလှယ်အဖွဲ့ဟာ နယ်စပ်ကိုဖြတ်ပြီး မြန်မာဖက်ကို လူသားချင်း စာနာထောက်ထားမှုဆိုင်ရာ အကူအညီတွေ ပေးနိုင်ရေး ဆွေးနွေးမှာ ဖြစ်ပါတယ်။
အာဏာသိမ်းပြီးနောက် ဖြစ်ပေါ်လာတဲ့ မတည်ငြိမ်မှုတွေကို ဖြေရှင်းရေး အာဆီယံအဖွဲ့နဲ့ ရရှိထားတဲ့ သဘောတူညီချက်တွေကို လိုက်နာခြင်းမရှိတဲ့အတွက် လာမယ့်တစ်ပတ်မှာလုပ်မယ့် ထိပ်သီးအစည်းအဝေးမှာ စစ်ကောင်စီအကြီးအကဲ ဗိုလ်ချုပ်မှူးကြီးမင်းအောင်လှိုင်ကို တက်ရောက်ခွင့်မပေးဖို့ အာဆီယံအဖွဲ့က သောကြာနေ့မှာ ဆုံးဖြတ်ခဲ့ပြီး ဒီဆုံးဖြတ်ချက်ကို အမေရိကန်ကလည်း ကြိုဆိုခဲ့ပါတယ်။
Ref: ANI
