News @ M-Media

Blog

  • အာဖဂန်နစ္စတန်တွင် ပြည်တွင်းစစ် ဖြစ်လာနိုင်ဟု ပါကစ္စတန်ဝန်ကြီးချုပ် သတိပေး

    အာဖဂန်နစ္စတန်တွင် ပြည်တွင်းစစ် ဖြစ်လာနိုင်ဟု ပါကစ္စတန်ဝန်ကြီးချုပ် သတိပေး

    စက်တင်ဘာ ၂၂၊ ၂၀၂၁
    M-Media

    -တာလီဘန်အနေနဲ့ အားလုံး ပူးပေါင်းပါဝင်တဲ့ အစိုးရမျိုး မဖွဲ့စည်းနိုင်ဘူးဆိုရင် ပြည်တွင်းစစ်ဖြစ်ကာ ပါကစ္စတန်ကိုပါ ရိုက်ခတ်လာနိုင်တယ်လို့ ပါကစ္စတန်ဝန်ကြီးချုပ် အင်မရန်းခန်းက သတိပေးလိုက်ပါတယ်။

    ဩဂုတ်လ အလယ်ပိုင်းမှာ တစ်နိုင်ငံလုံးကို သိမ်းပိုက်နိုင်ခဲ့တဲ့ တာလီဘန်ဟာ အခုလအစောပိုင်းမှာ အစိုးရအဖွဲ့ကို ကြေငြာခဲ့ပေမယ့် နိုင်ငံအတွင်းက လူမျိုးစုတွေ မပါဝင်ပါဘူး။ အခုတစ်ပတ်အစောပိုင်း ဒုဝန်ကြီးတွေ ခန့်အပ်ရာမှာလည်း လူနည်းစုတွေထဲက ၃ ဦးကို ထည့်ထားပေမယ့် ပါဝင်သင့်သလောက် မပါဝင်လာဘူးဆိုတဲ့ ဝေဖန်မှုတွေ ရှိနေပါတယ်။

    မနေ့က BBC သတင်းဌာနနဲ့ အင်တာဗျူးမှာ အင်မရန်းခန်းက တာလီဘန်အနေနဲ့ ​အားလုံးပါဝင်တဲ့အစိုးရမျိုး မဖွဲ့စည်းနိုင်ဘူးဆိုရင် ပြည်တွင်းစစ်ဖြစ်လာလိမ့်မယ်လို့ သတိပေးခဲ့ပါတယ်။

    “အားလုံးပါဝင်တဲ့ အစိုးရမျိုး မဖွဲ့စည်းနိုင်ဘူး၊ မတူညီတဲ့အဖွဲ့အစည်းတွေကလူတွေကို မထည့်ဘူးဆိုရင် တစ်ဖြည်းဖြည်းနဲ့ ပြည်တွင်းစစ်ဖြစ်လာမယ်။ အဲဒီပြည်တွင်းစစ်က ပါကစ္စတန်ကို ထိခိုက်လာပါလိမ့်မယ်”

    အာဖဂန်နစ္စတန်မှာ ပြည်တွင်းစစ်ဖြစ်လာရင် လူသားချင်း စာနာထောက်ထားမှုဆိုင်ရာ ပြဿနာတွေ၊ ဒုက္ခသည်ပြဿနာတွေ ဖြစ်လာမှာနဲ့ အာဖဂန်မြေကိုအသုံးချပြီး ပါကစ္စတန်အစိုးရကို တိုက်ခိုက်မယ့် လက်နက်ကိုင်အဖွဲ့အစည်းတွေ ပေါ်လာမှာ စိုးရိမ်တယ်လို့လည်း အင်မရန်းခန်းက ပြောပါတယ်။

    လက်ရှိ တာလီဘန်အစိုးရကို ပြင်ဆင်ဖွဲ့စည်းဖို့ အင်မရန်းခန်းက တိုက်တွန်းဆော်ဩဖူးပြီး တာလီဘန်ခေါင်းဆောင်တစ်ဦးဖြစ်တဲ့ မိုဟာမက် မိုဘင်းက အားလုံးပူးပေါင်းပါဝင်တဲ့အစိုးရ ဖွဲ့စည်းရေး တိုက်တွန်းဖို့ ဘယ်သူ့ကိုမှ မိမိတို့အဖွဲ့က အခွင့်အရေး မပေးထားဘူးလို့ တုန့်ပြန်ထားပါတယ်။

    ၁၉၉၆-၂၀၀၁ ခုနှစ်က တာလီဘန်အုပ်စိုးမှုတုန်းကလို အာဖဂန်နစ္စတန်မှာ လူ့အခွင့်အရေး ချိုးဖောက်မှုတွေ ရှိမှာကို နိုင်ငံကာအသိုင်းအ၀ိုင်းက စိုးရိမ်နေပြီး တာလီဘန်အဖွဲ့ပြောရေးဆိုခွင့်ရှိသူ ဇဘီဟွတ်လာ မူဂျာဟစ်က မိမိတို့ကို နိုင်ငံကာအသိုင်းအ၀ိုင်းက အသိအမှတ်ပြုပြီးနောက်ပိုင်းမှ ဒီစိုးရိမ်မှုတွေအတွက် အဖြေပေးမယ်လို့ တနင်္လာနေ့မှာ ပြောကြားခဲ့ပါတယ်။

    Ref: Aljazeera

  • ဖိနှိပ်ခံ ရိုဟင်ဂျာနှင့် အာဖဂန်ပြည်သူများကို ကူညီမည်ဟု ဖိလစ်ပိုင်သမ္မတ ကတိပြု

    ဖိနှိပ်ခံ ရိုဟင်ဂျာနှင့် အာဖဂန်ပြည်သူများကို ကူညီမည်ဟု ဖိလစ်ပိုင်သမ္မတ ကတိပြု

    စက်တင်ဘာ ၂၂၊ ၂၀၂၁
    M-Media

    -ဖိနှိပ်ခံရမှုကြောင့် ထွက်ပြေးလာရတဲ့ ရိုဟင်ဂျာတွေနဲ့ အာဖဂန်ပြည်သူတွေကို အကူညီပေးဖို့ ဆုံးဖြတ်ထားတယ်လို့ ဖိလစ်ပိုင်သမ္မတ ရော်ဒရီဂို ဒူတာတေးက ပြောကြားလိုက်ပါတယ်။

    ၇၆ ကြိမ်မြောက် ကုလသမဂ္ဂ အထွေထွေညီလာခံကို ပေးပို့တဲ့ ဗီဒီယိုသတင်းစကားမှာ ဒူတာတေးက ပြောလိုက်တာပါ။ ဒီလိုကူညီပေးဖို့ မိမိတို့မှာ ရင်းမြစ်တွေ အကန့်အသတ်ရှိပေမယ့် လူသားတန်ဖိုးကို မြှင့်တင်ပေးဖို့ အကောင်းဆုံးဆောင်ရွက်သွားမယ်လို့လည်း သူက ဆိုပါတယ်။

    “ကိုယ်လိုချင်သလို သူများကို သွတ်သွင်းတာဟာ ဘယ်လောက်ပဲ ရည်ရွယ်ချက်ကောင်းနေပါစေ အလုပ်မဖြစ်ပါဘူး။ အတိတ်ကလည်း ဒါမျိုး အလုပ်မဖြစ်သလို၊ အနာဂတ်မှာလည်း အလုပ်ဖြစ်မှာ မဟုတ်ပါဘူး”

    မြန်မာနိုင်ငံမှာ စစ်ပွဲတွေ၊ ညှင်းပမ်းနှိပ်စက်မှုတွေကြောင့် ထွက်ပြေးလာတဲ့ ရိုဟင်ဂျာတွေကို ဆက်လက် လက်ခံသွားမယ်လို့ ဒူတာတေးက မိန့်ခွန်းမှာ ထည့်သွင်းပြောဆိုခဲ့ပါတယ်။ ဖိလစ်ပိုင်နိုင်ငံက လုပ်ဆောင်ပေးနိုင်တဲ့ အကန့်အသတ်နဲ့အညီ ရိုဟင်ဂျာတစ်ချို့ကို လက်ခံနိုင်ရေး ကုလသမဂ္ဂ ဒုက္ခသည်များဆိုင်ရာအဖွဲ့ UNHCR နဲ့ အနီးကပ်ဆောင်ရွက်ဖို့ တရားရေးဌာနကို ညွှန်ကြားထားပြီးဖြစ်တယ်လို့လည်း သူက ဆိုပါတယ်။

    အာဖဂန်နစ္စတန်ကနေ ထွက်ပြေးလာတဲ့ အာဖဂန် ဒုက္ခသည်တစ်ချို့ကို ကြိုဆိုလက်ခံထားတယ်လို့ စက်တင်ဘာ ၈ ရက်နေ့မှာ ဖိလစ်ပိုင်နိုင်ငံခြားရေးဝန်ကြီးက ထုတ်ပြန်ထားပါတယ်။

    ဒူတာတေးက တာလီဘန်ရန်​ကြောင့် ထွက်ပြေးလာတဲ့ အာဖဂန်ပြည်သူတွေအတွက် တံခါးတွေ ဆက်လက်ဖွင့်ထားတယ်လို့ ဆိုပါတယ်။

    “အရင်ကတည်းကရှိခဲ့တဲ့ ဖိလစ်ပိုင်ရဲ့ လူသားချင်း စာနာထောက်ထားမှုဆိုင်ရာ ဓလေ့ထုံးတမ်းအရ အာဖဂန်ပြည်သူတွေအတွက် တံခါးတွေ ဖွင့်ထားပါတယ်။ အထူးသဖြင့် ပဋိပက္ခတွေကြောင့် ထွက်ပြေးလာရတဲ့ အမျိုးသမီးနဲ့ ကလေးငယ်တွေအတွက်ပါ”

    ဖိလစ်ပိုင်ဟာ ပထမကမ္ဘာစစ်၊ ဒုတိယကမ္ဘာစစ်၊ ၁၉၄၀ တရုတ်ပြည်တွင်းစစ်၊ ဗီယက်နမ်စစ် စတဲ့ စစ်ပွဲတွေ၊ပဋိပက္ခတွေမှာ ထွက်ပြေးလာရသူတွေကို လက်ခံကူညီပေးတဲ့ သမိုင်းတွေ ရှိနေပါတယ်။

    ဒူတာတေးရဲ့ မူးယစ်နှိမ်နှင်းရေးစစ်ပွဲအတွင်း လူထောင်ချီသေဆုံးခဲ့တဲ့ကိစ္စအတွက် နိုင်ငံတကာ ရာဇဝတ်ခုံရုံး ICC က စုံစမ်းစစ်ဆေးဖို့ ဆောင်ရွက်နေတဲ့အချိန် ဒူတာတေးရဲ့ ဒီလိုပြောကြားမှု ထွက်ပေါ်လာတာ ဖြစ်ပါတယ်။

    Ref: Reuters

  • IS နှင့် အလ်ကိုင်းဒါးအဖွဲ့များကို မိမိတို့ လက်ခံထားမည်မဟုတ်ဟု တာလီဘန်ပြော

    IS နှင့် အလ်ကိုင်းဒါးအဖွဲ့များကို မိမိတို့ လက်ခံထားမည်မဟုတ်ဟု တာလီဘန်ပြော

    စက်တင်ဘာ ၂၁၊ ၂၀၂၁
    M-Media

    တာလီဘန်ပြောရေးဆိုခွင့်ရှိသူ ဇဘီဟွတ်လာ မူဂျာဟစ်

    -အာဖဂန်နစ္စတန်မှာ IS နဲ့ အလ်ကိုင်းဒါး အကြမ်းဖက်အဖွဲ့တွေ လှုပ်ရှားနေတယ်ဆိုတဲ့သတင်းကို တာလီဘန်အဖွဲ့က ငြင်းဆိုလိုက်ပြီး ဒီအဖွဲ့အစည်းတွေကို လက်ခံထားမှာမဟုတ်ဘူးလို့ ထပ်မံပြောကြားလိုက်ပါတယ်။

    နိုင်ငံအရှေ့ပိုင်း ဂျလာလာဘတ်မြို့မှာ ပြီးခဲ့တဲ့ရက်ပိုင်းအတွင်း တာလီဘန်အဖွဲ့ဝင်တွေကို ပစ်မှတ်ထားတဲ့ ဗုံးခွဲတိုက်ခိုက်မှုဟာ သူတို့လက်ချက်ဖြစ်တယ်လို့ ခိုရာဆန်ဒေသ IS အကြမ်းဖက်အဖွဲ့က ကြေငြာပြီးတဲ့နောက်ပိုင်း တာလီဘန်ရဲ့ ဒီပြောဆိုချက် ထွက်ပေါ်လာတာပါ။

    တာလီဘန်ပြောရေးဆိုခွင့်ရှိသူ ဇဘီဟွလ္လာ မူဂျာဟစ်က အာဖဂန်နစ္စတန်မှာ အလ်ကိုင်းဒါးနဲ့ IS လို စစ်သွေးကြွအဖွဲ့အစည်းတွေ ရှိမနေဘဲ နောက်လည်း လက်ခံသွားမှာမဟုတ်ကြောင်း၊ ဒီလိုအဖွဲ့အစည်းတွေက အာဖဂန်မြေကို အသုံးပြုပြီး အခြားနိုင်ငံတွေအပေါ် တိုက်ခိုက်တာကို ခွင့်ပြုမှာမဟုတ်ဘူးဆိုတဲ့ အရင်က ကတိကဝတ်ကို ဆက်လက်စောင့်ထိန်းသွားမှာဖြစ်ကြောင်း ဒီကနေ့ သတင်းစာရှင်းလင်းပွဲမှာ ပြောကြားခဲ့ပါတယ်။

    တာလီဘန်ဟာ အရင်က အာဖဂန်နစ္စတန်မှာ အလ်ကိုင်းဒါးအဖွဲ့ကို လက်ခံထားဖူးပြီး ၂၀၀၁ ခုနှစ် ၉/၁၁ တိုက်ခိုက်မှုအတွက် အလ်ကိုင်းဒါးခေါင်းဆောင်ကို အမေရိကန်က တောင်းရာမှာ ဖမ်းမပေးတဲ့အတွက် အာဖဂန်ကို အမေရိကန်က ဝင်ရောက် ကျူးကျော် တိုက်ခိုက်ခဲ့တာ ဖြစ်ပါတယ်။

    လက်ရှိ တာလီဘန်က အာဖဂန်ကို အုပ်စိုးထားတာကြောင့် IS နဲ့ အလ်ကိုင်းဒါးလို အဖွဲ့အစည်းတွေဟာ အာဖဂန်နစ္စတန်ကို ခြေကုပ်ယူပြီး ကမ္ဘာတစ်ဝှမ်းမှာ အကြမ်းဖက်လုပ်ငန်းတွေ လုပ်ဆောင်မှာကို နိုင်ငံတကာအသိုင်းအ၀ိုင်းက စိုးရိမ်နေကြတာ ဖြစ်ပါတယ်။

    Ref: Alarabiya

  • ဆူဒန်တွင် အာဏာသိမ်းရန် ကြံစည်မှုဖြစ်

    ဆူဒန်တွင် အာဏာသိမ်းရန် ကြံစည်မှုဖြစ်

    စက်တင်ဘာ ၂၁၊ ၂၀၂၁
    M-Media

    -အင်္ဂါနေ့မနက်ပိုင်းမှာ အာဏာသိမ်းဖို့ကြိုးပမ်းမှုတစ်ခု ဖြစ်ပွားခဲ့ပြီး ဖော်ထုတ်တားဆီးနိုင်ခဲ့တယ်လို့ အာဖရိကနိုင်ငံတစ်ခုဖြစ်တဲ့ ဆူဒန်အစိုးရက ထုတ်ပြန်ပါတယ်။

    အာဏာသိမ်းမယ့်အဖွဲ့ဟာ ဝန်ကြီးများကောင်စီ ရုံးထိုင်ရာ အဆောက်အဦး၊ နိုင်ငံပိုင် ရေဒီယိုအပါအဝင် အဓိကကျတဲ့ အစိုးရအဆောက်အဦးတွေကို သိမ်းပိုက်ဖို့ ကြိုးစားစဉ်မှာ နှိမ်နှင်းခံလိုက်ရတာ ဖြစ်ပါတယ်။

    ဖမ်းဆီးခံထားရတဲ့ အာဏာရှင်ဟောင်း အိုမာ ဘရှီးကို ထောက်ခံတဲ့ စစ်ဖက်၊ အရပ်ဖက် အရာရှိတွေက ပူးပေါင်းကြံစည်တာဖြစ်ပြီး ခေါင်းဆောင်တွေကို ဖမ်းဆီးထားတယ်လို့ ဆူဒန်အစိုးရရဲ့ ပြန်ကြားရေးဝန်ကြီး ဟမ်ဇာ ဘာလူလ်က ပြောပါတယ်။

    အာဏာသိမ်းဖို့ ကြံစည်မှုနဲ့ ဖမ်းဆီးထားသူဟာ အယောက် ၄၀ လောက်ရှိနေပြီး ထွက်ပြေးနေသူတွေကိုလည်း လိုက်လံဖမ်းဆီးနေတယ်လို့ ပြည်တွင်းသတင်းဌာနတွေက ဖော်ပြပါတယ်။

    နှစ်ပေါင်း ၃၀ ကြာ တိုင်းပြည်ကို အုပ်စိုးလာတဲ့ အာဏာရှင် ဘရှီးကို ၂၀၁၉ ခုနှစ်မှာ စစ်တပ်က ဖြုတ်ချကာ အာဏာသိမ်းပြီးနောက်ပိုင်း ဆူဒန်နိုင်ငံရေးက တည်ငြိမ်မှု မရှိသေးပါဘူး။ ဘရှီးကို သစ္စာခံတဲ့အဖွဲ့က အာဏာသိမ်းဖို့ အကြိမ်ကြိမ်ကြိုးစားမှုဖြစ်ခဲ့တယ်လို့ အသွင်ကူးပြောင်းရေးအစိုးရက အရင်အကြိမ်တွေမှာ ထုတ်ပြန်ခဲ့ပါတယ်။

    ပြီးခဲ့တဲ့နှစ်မှာ ဝန်ကြီးချုပ် အလ်ဒဲလာ ဟမ်ဒေါ့ လုပ်ကြံခံခဲ့ရပေမယ့် အသက်ဘေးကနေ လွတ်မြောက်ခဲ့ပါတယ်။

    အာဏာရှင်ဟောင်း ဘရှီးကို ၂၀၀၀ ပြည့်နှစ်တွေက နိုင်ငံအနောက်ပိုင်း ဒါဖာဒေသမှာ စစ်ရာဇဝတ်မှုကျူးလွန်မှုတွေအတွက် ဆူဒန်အစိုးရက ဖမ်းဆီးထားပြီး နိုင်ငံတကာ ရာဇဝတ်ခုံရုံး ICC ကို လွှဲပေးဖို့ ပြင်ဆင်နေတာ ဖြစ်ပါတယ်။

    Ref: Reuters

  • ထန်တလန်မြို့တွင် တရားဟောဆရာတစ်ပါး အသတ်ခံရမှုအတွက် ခရစ်ယာန်နှစ်ခြင်းအသင်းတော်က ကန့်ကွက်ရှုတ်ချ

    ထန်တလန်မြို့တွင် တရားဟောဆရာတစ်ပါး အသတ်ခံရမှုအတွက် ခရစ်ယာန်နှစ်ခြင်းအသင်းတော်က ကန့်ကွက်ရှုတ်ချ

    စက်တင်ဘာ ၂၁၊ ၂၀၂၁
    M-Media

    အသတ်ခံခဲ့ရသည့် ခရစ်ယာန် တရားဟောဆရာ Cung Biak Hum

    -ပြီးခဲ့တဲ့တစ်ပတ်က ချင်းပြည်နယ် ထန်တလန်မြို့မှာ ဖြစ်ပွားခဲ့တဲ့ တိုက်ပွဲအတွင်း ခရစ်ယာန်တရားဟောဆရာ တစ်ယောက် သတ်ဖြတ်ခံရမှုကို ခရစ်ယာန် နှစ်ခြင်းအသင်းတော်က ကန့်ကွက်ရှုတ်ချလိုက်ပါတယ်။

    အသက် ၃၁ နှစ်အရွယ် တရားဟောဆရာ Cung Biak Hum ဟာ စစ်ကောင်စီတပ်တွေနဲ့ ဒေသခံ ကာကွယ်ရေးတပ်ဖွဲ့တွေအကြား တိုက်ပွဲဖြစ်ချိန်မှာ စစ်ကောင်စီတပ်တွေရဲ့ သတ်ဖြတ်မှုကို ခံလိုက်ရတာပါ။

    “တရားဟောဆရာနဲ့ လူငယ် ၄၊ ၅ ဦးဟာ အခင်းဖြစ်တဲ့အနေရာမှာ ကူညီဖို့အတွက် မော်တော်ဆိုင်ကယ်နဲ့ ရောက်လာတဲ့အချိန် စစ်သားတွေက သူတို့ကိုပစ်တယ်။ တရားဟောဆရာ အပစ်ခံရပြီး နေရာမှာတင် သေဆုံးသွားပါတယ်” လို့ အမည်မဖော်လိုသူတစ်ဦးက ပြောပါတယ်။

    “ပစ်ခတ်မှုတွေ အဆက်မပြတ်ဖြစ်နေတာ၊ လက်နက်ကြီးတွေနဲ့ ပစ်နေတာကြောင့် ဘယ်သူမှ သူ့ရဲ့အလောင်းကို ချက်ခြင်း သွားမယူနိုင်ကြပါဘူး။ နောက်ပိုင်း စေတနာ့ဝန်ထမ်းတွေက ​သွားယူပြီး သူ့ရဲ့အမေအိမ်မှာ ရေချိုးသန့်စင်ပေးတဲ့အချိန် လက်သူကြွယ်အဖြတ်ခံထားရတာကို တွေ့ရပြီး လက်ထပ်လက်စွပ်လည်း အခိုးခံခဲ့ရပါတယ်”

    တရားဟောဆရာ Cung Biak Hum ဟာ ထန်တလန်အခြေစိုက် နှစ်ခြင်းအသင်းတော် Thantlan Century က ဖြစ်ပြီး ကိုယ်ဝန်နဲ့ဇနီးသည်၊ ကလေးနှစ်ဦး ကျန်ရစ်ခဲ့ပါတယ်။

    ချင်း ခရစ်ယာန်နှစ်ခြင်းအသင်းတော် Chin Baptist Convention ရဲ့ အတွင်းရေးမှူး Lod Harlinrel က ဒေသခံ ကာကွယ်ရေးတပ်ဖွဲ့တွေနဲ့ တိုက်ခိုက်မှုအတွင်း စစ်ကောင်စီတပ်တွေရဲ့လုပ်ရပ်တွေဟာ ရိုင်းစိုင်းတဲ့၊ လက်မခံနိုင်စရာ လုပ်ရပ်တွေဖြစ်ပြီး အခြေအနေကို ပိုမိုဆိုးရွားစေလိမ့်မယ်လို့ ပြောကြားခဲ့ပါတယ်။

    “ပစ်တဲ့အခါမှာ ရန်သူလား၊ အရပ်သားလား စစ်တပ်က ဂရုတစ်စိုက် ခွဲခြားသင့်ပါတယ်။ လက်နက်တွေကို တွေ့ကရာလျှောက်မပစ်သင့်ပါဘူး။ စစ်တပ်ရဲ့ နမော်နမဲ့လုပ်ရပ်တွေ၊ ရိုင်းစိုင်းတဲ့လုပ်ရပ်တွေကို တောရော မြို့ပေါ်မှာပါ တွေ့ရပြီး ဒါတွေအားလုံးကို ရှောင်ရှားသင့်ပါတယ်”

    “ဒီလိုမျိုးတွေ ဆက်လုပ်နေမယ်ဆိုရင် တိုက်ပွဲတွေဟာ လူမျိုးရေး၊ ဘာသာရေး ပဋိပက္ခအဖြစ် ဦးတည်သွားနိုင်ပါတယ်။ ဒါ့ကြောင့် ဒီလုပ်ရပ်ကို ကျွန်တော်တို့ ပြင်းပြင်းထန်ထန် ရှုတ်ချတာပါ”

    ကချင်နှစ်ခြင်းအသင်းတော် Kachin Baptist Convention ရဲ့ ဥက္ကဌ Hkalam Samson ကလည်း စစ်ကောင်စီတပ်တွေ ဘုရားကျောင်းတွေမှာ တပ်စွဲပြီး သမ္မာကျမ်းနဲ့ အခြား ဘာသာရေးစာအုပ်စာတမ်းတွေ ဖျက်ဆီးတာ၊ ဘုရားကျောင်းတွေကို ပစ်မှတ်ထားတိုက်ခိုက်တာတွေကို ရှုတ်ချတဲ့ ချင်းနှစ်ခြင်းအသင်းတော်ရဲ့ ထုတ်ပြန်မှုကို ထောက်ခံတယ်လို့ ပြောပါတယ်။

    “ဘုရားရဲ့အစေခံတွေဖြစ်တဲ့အတွက် ပြည်သူတွေနဲ့အတူ ကျွန်တော်တို့ ရပ်တည်ရပါမယ်။ အုပ်ချုပ်သူတွေနဲ့ ဆန့်ကျင်တာမျိုး ဖြစ်သွားနိုင်ပါတယ်။ ဒါပေမယ့် ဘာပဲဖြစ်နေဖြစ်နေ တရားမျှတမှုအတွက် ကျွန်တော်တို့ ရပ်တည်သွားမှာပါ”

    တရားဟောဆရာ Cung Biak Hum အသတ်ခံရမှုကြောင့် ဘာသာရေးပဋိပက္ခဆီ ဦးတည်မသွားသင့်ဘဲ စစ်ကောင်စီတပ်တွေဟာ ခရစ်ယာန်၊ ဗုဒ္ဓဘာသာ မခွဲဘဲ အကုန်လုံးကို ဒုက္ခပေးနေတာဖြစ်တယ်လို့ ချင်းပြည်နယ် မင်းတပ်မြို့မှာ သီတင်းသုံးတဲ့ ဗုဒ္ဓဘာသာဘုန်းတော်ကြီး ဆရာတော် အရှင် မာဂါ၀က မိန့်ပါတယ်။

    “သူတို့လုပ်ချင်ရင်၊ ရန်သူလို့မြင်လာရင် စစ်ကောင်စီတပ်တွေဟာ ခရစ်ယာန် ဘုရားကျောင်း၊ ဗုဒ္ဓဘာသာဘုန်းကြီးကျောင်းမရွေး ဖျက်ဆီးတာပါ။ ခရစ်ယာန်ညီအစ်ကိုတွေအနေနဲ့ ဒါကို နားလည်စေချင်တယ်။ ဘာသာ၊ လူမျိုးကွဲတာကို အခြေခံပြီး ရန်သူတွေအဖြစ် မရှုမြင်ကြဖို့ ဘုန်းကြီး တိုက်တွန်းချင်ပါတယ်။ စစ်ကောင်စီရဲ့လုပ်ရပ်က တော်တော်ဆိုးရွားပါတယ်”

    Ref: RFA