Blog

သြဂုတ် ၁၂ ၊ ၂၀၁၄

M-Media

ရေးသူ- ဦးဦးမှော်ဆရာ

နိုင်ငံရေးရှုထောင့်ကနေ ကမ္ဘာ့သမိုင်းကိုလေ့လာတဲ့ အခါ အစ္စလာမ့် သမိုင်းကလည်း မဖြစ်မနေလေ့လာ ရတာပဲ။ အဲဒီလိုလေ့လာရာမှာ အစ္စလာမ်ရဲ့ သွန်သင်မှု၊ အစ္စလာမ့် ယဉ်ကျေးမှုက ဒီမိုကရတစ် အလေ့အထတွေနဲ့ အဟန့်အတား ဖြစ်စေသလားဆိုတဲ့ မေးခွန်း ကိုလည်း ဖြေစမ်းကြည့်ကြတယ်။ ဒါနဲ့ပက်သက်လို့ ပညာရှင်တစ်ယောက် နဲ့ တစ်ယောက် အမြင်တွေတော့မတူကြပါဘူး။

Islam အယူဝါဒကို စတင်ဟောကြားသူ Prophet Mohammed က သူ့ရဲ့မွေးရပ် ဇာတိ မက္ကာမြို့မှာ သူ့ကို ဆန့်ကျင်တိုက်ခိုက်သူ၊ ဒုက္ခပေးသူတွေ အလွန်များလာတဲ့ အတွက် Yathrib (`မဒီနာ´လို့လည်းခေါ်တဲ့)မြို့ကို ပြောင်းရွေ့ သွားတယ်။ သူဟာ သူစိမ်းဖြစ်ပေမဲ့ မဒီနာမြို့ကို အောင်နိုင်သူ ခေါင်းဆောင်ကြီးသဖွယ် ၀င်လာခဲ့တာ ဖြစ်တယ်။ အဲဒီမှာ သူ့ကို ထောက်ခံတဲ့လူတွေ၊ စောင့်မျှော်ကြိုဆိုတဲ့လူတွေ အံ့မခန်း များပြားလှတယ်။ မဒီနာမြို့ကို ရောက်ပြီးနောက်မှာ ကမ္ဘာ့သမိုင်းမှာ ပထမဆုံးသော Islamic State ကို တည်ထောင်ခဲ့တယ်။

အဲဒီကာလတုန်းက မဒီနာမြို့မှာ Prophet Mohammed ရဲ့ Islam အယူဝါဒကို ယုံကြည်လက်ခံလာသူ အစ္စလာမ် ဘာသာဝင်တွေချည်းပဲ ရှိနေတာတော့မဟုတ် ဘူး။ အစ္စလာမ်ကို အင်မတန် ဒုက္ခပေးလေ့ရှိတယ် ဆိုတဲ့၊ ဒီနေ့ခေတ်ထိ အစ္စလာမ် တွေနဲ့ ရန်ဘက်ဖြစ်နေတဲ့ ဂျူးလူမျိုးတွေလည်း အများအပြားရှိခဲ့ကြတယ်။ ဂျူးလူမျိုးနဲ့ မွတ်ဆလင် ဆိုတာ တစ်ယောက်ကို တစ်ယောက် လုံးဝကြည့်မရ၊ ပေါင်းစပ်လို့ မရနိုင်လောက်အောင်ကို တကယ့် ရန်ဘက်တွေလို့တောင် ဆိုကြတာကိုး။ ဒါပေမဲ့ ထူးခြားတယ်လို့ပဲ ပြောရမလား မသိဘူး .. အဲဒီလောက် အင်အားကြီးမားခဲ့စဉ် Prophet Mohammed အုပ်ချုပ်မှုအောက်မှာ သူတို့နဲ့ ရာသက်ပန် ရန်သူတွေပါ လို့ဆိုတဲ့ ဂျူးလူမျိုးတွေဟာ ဟစ်တလာရဲ့ နာဇီဂျာမနီခေတ်မှာလိုမျိုး အစုလိုက် အပြုံလိုက် သတ်ဖြတ်ခြင်း မခံခဲ့ရဘူး။ မဒီနာမြို့က စတင်ပြီး အစ္စလာမ် အယူဝါဒ တဟုန်တိုး ထွန်းကားလာတဲ့ နောက်ပိုင်း နှစ်ပေါင်းမြောက်မြားစွာကြာတဲ့ထိ ဂျူးလူမျိုးတွေဟာ အစ္စလာမ်တွေကို ယှဉ်နိုင်တဲ့ အနေအထား လုံးဝ မရှိကြတော့ဘူး။ နောက်ပိုင်းမှာ သမိုင်းပညာရှင်တွေ၊ နိုင်ငံရေး ပညာရှင်တွေ သြချရလောက်အောင် ကို ပြောင်မြောက်လှတဲ့ အစ္စလာမ် အင်ပါယာကြီး တစ်ခုကို တည်ထောင်နိုင်ခဲ့တယ်။

နောက်ပြီး Prophet Mohammed ရဲ့ အင်မတန်ချီးကျူးစရာကောင်းတဲ့ နိုင်ငံရေး အရစွမ်းဆောင်မှု တစ်ခုကို ပြောရရင် အေဒီ(၆၂၂)မှာ မဒီနာဒေသခံ လူမျိုးစုတွေ အပြင် ဂျူးလူမျိုးတွေ၊ ခရစ်ယာန်ဘာသာဝင်တွေ နဲ့ ရိုးရာအစဉ်အလာ ကိုးကွယ် ယုံကြည်သူ ဗာဟီရ၀ါဒီတွေပါ လက်မှတ်ထိုးရတဲ့ ဒီနေ့ခေတ် အခေါ် Constitution (လို့ပြောလို့ရတဲ့) တစ်ခုလုပ်ခဲ့တယ်လို့ သမိုင်းအထောက်အထားအရ သိရတယ်။ မတူကွဲပြားတဲ့ လူမျိုးဘာသာ အားလုံးရဲ့ နိုင်ငံရေးအရသဘောတူညီမှု(Consensus) ကို ရယူနိုင်ခဲ့တာပါ။ ဒါဟာ Constitution of Madina (သို့) Charter of Madina ဆိုပြီး ကမ္ဘာ့သမိုင်းမှာ ထင်ရှားခဲ့တယ်။ အဲဒီ Constitution အရ မျိုးနွယ်စုအချင်းချင်း ကြားမှာဖြစ်ခဲ့တဲ့ စစ်ပွဲတွေ အားလုံးကို ငြိမ်းချမ်းစွာဖြေရှင်းဖို့ သဘောတူခဲ့ကြတယ်။

တကယ်လည်း ငြိမ်းချမ်းမှုကို ဆောင်ကျဉ်းပေးနိုင်ခဲ့တဲ့အပြင် အလွန်ထူးခြားတဲ့ အချက် တစ်ချက်အနေနဲ့ မွတ်ဆလင်၊ ဂျူး၊ ခရစ်ယာန် နဲ့ အခြားကိုးကွယ်သူတွေ အားလုံးပါဝင်တဲ့ လူ့အဖွဲ့အစည်းတစ်ရပ်ကိုပါ တည်ထောင်နိုင်ခဲ့တယ်လို့ ဆိုတယ်။ အဲဒါကို (Ummah) လို့ သုံးထားတယ်။ ဒါကိုကြည့်ရင် Prophet Mohammed တည်ထောင်ခဲ့တဲ့ Islam က မတူကွဲပြားတဲ့ လူတွေကို (exclusive)ဖယ်ထုတ်လေ့ရှိတဲ့ အယူဝါဒ မဟုတ်ဘဲ (inclusive) အားလုံးကိုလွှမ်းခြုံနိုင်တဲ့ ဘာသာတရားတွေထဲက တစ်ခု အပါအ၀င်ဖြစ်ကြောင်း သိသာပါတယ်။

အဲဒီ Constitution အရ – လူ့အဖွဲ့အစည်းရဲ့လုံခြုံမှု၊ မွတ်ဆလင် မဟုတ်သူတွေရဲ့ နိုင်ငံရေး နဲ့ ဘာသာရေးလွတ်လပ်ခွင့်၊ မဒီနာမြို့ဟာ စစ်မက်နဲ့အကြမ်းဖက်မှုတွေ တားမြစ်ဒေသ (Haram လို့သုံးထားတယ်) အဖြစ်သတ်မှတ်မှု၊ အမျိုးသမီးများရဲ့ လုံခြုံရေး၊ လူမျိုးစုတွေ ဘာသာမတူသူတွေကြားက ယုံကြည်မှုတည်ဆောက်ရေး၊ အပြန်အလှန်ဆက်ဆံရေး၊ လူမျိုးစုတွေကြား နိုင်ငံရေးအရမဟာမိတ်ဖွဲ့ရေး၊ စစ်မက် ဖြစ်ပွားတဲ့အချိန်မှာ လူများစုအစ္စလာမ်တွေက လူနည်းစုတွေကို အကာကွယ်ပေး ရေး၊ မွတ်ဆလင်မဟုတ်သူတွေရဲ့ ကိုယ်ပိုင်အုပ်ချုပ်ခွင့်၊ အခွန်အကောက်စနစ်၊ ဘယ်လူမျိုး ဘယ်ဘာသာဝင်မဆို လူတစ်ယောက်ချင်းစီရဲ့ လုံခြုံမှုအပေါ် အာမခံမှု၊ ပြဿနာတွေကို ဖြေရှင်းရာမှာ ကျင့်သုံးတဲ့ တရားစီရင်ရေး စနစ် စတဲ့ အချက်တွေနဲ့ ပက်သက်ပြီး မဒီနာဒေသခံ လူမျိုးစုတွေ အားလုံးရဲ့ သဘောတူညီချက် ယူနိုင်ခဲ့ တယ်။ အဲဒီ Constitution အတိုင်း တကယ်လည်း ဂျူးတွေ၊ ခရစ်ယာန်တွေနဲ့ မွတ်ဆလင်တွေကြားမှာ ဘာသာရေးအရ တန်းတူရပ်တည်နိုင်ခွင့်ကို အပြည့်အ၀ ပေးခဲ့တယ်။ တကယ်ဆိုရင် အဲဒီအချိန်တုန်းက အစ္စလာမ်တွေဟာ ဂျူးတွေကို တိုက်စရာ မလိုဘဲတောင် နိုင်နေပြီးသားဖြစ်ပေမဲ့ ဒီလိုစာချုပ်ချုပ် သဘောတူညီမှု ရယူပြီး အခွင့်အရေးပေးခဲ့တာကို ကြည့်ခြင်းအားဖြင့် Prophet Mohammed တည်ထောင်ခဲ့တဲ့ Islam ဘာသာက တခြားဘာသာတွေအပေါ် နားလည်သည်းခံ နိုင်စွမ်း(tolerant) မရှိဘူးဆိုတာ မဟုတ်ကြောင်း အကောင်းဆုံး သက်သေသာဓကတစ်ခုလို့ ပြောနိုင်တယ်။

ဒါနဲ့ဆက်စပ်မိလို့ ကျနော့်အမြင်ကိုပြောရရင် ယနေ့ခေတ် အစ္စလာမ်နိုင်ငံတွေမှာ ဒီလို ဘာသာမတူသူတွေကို ဖယ်ထုတ်မှုတွေ၊ ခွဲခြားဖိနှိပ်မှုတွေရှိတယ်ဆိုရင် အဲဒါဟာ အစ္စလာမ်ဘာသာရဲ့ သင်ကြားမှုက လာတာမဟုတ်ဘဲ၊ အုပ်စိုးသူတွေ ရဲ့ဘာသာရေး အစွန်းရောက်မှုကြောင့် ဖြစ်နိုင်တယ်။ ဒါမှမဟုတ် သူတို့ကိုယ်တိုင် က အများပြည်သူ လက်ခံမှုနဲ့ ရွေးကောက်ပွဲတွေကတဆင့် တက်လာသူတွေ မဟုတ်တဲ့အတွက် သူတို့မှာ Legitimacy မရှိတဲ့အတွက် ပြည်သူကို ဖိနှိပ်အကြမ်း ဖက်ပြီး အာဏာရယူထားသူတွေရဲ့ ထုံးစံအတိုင်း လူအများစု ကိုးကွယ်ယုံကြည်တဲ့ ဘာသာရေးကို ခုတုံး လုပ်နေတာလည်း ဖြစ်နိုင်တယ်။ မြန်မာပြည်က ဦးနေ၀င်း အပါအ၀င် ခုလက်ရှိ ဦးသိန်းစိန် အစိုးရထိ လုပ်နေတဲ့ပုံစံမျိုးပဲ။ အစ္စလာမ်ယဉ်ကျေးမှု ထွန်းကားခဲ့တဲ့ အာဖဂန်နစ္စတန်မှာ ဆိုရင် ဆိုဗီယက်တပ်တွေ ၀င် မသိမ်းခင်အချိန်က ဘာသာရေး လွတ်လပ်ခွင့်ရှိခဲ့တဲ့အပြင် အစ္စလာမ့်သွန်သင်ချက် တစ်ရပ်လို့ဆိုတဲ့ Mashwara လို့ခေါ်တဲ့ စုပေါင်းဆွေးနွေး တိုင်ပင်တဲ့၊ အများစု သဘောတူဆုံးဖြတ် တဲ့ ဓလေ့လည်းရှိခဲ့တယ်လို့ သိရတယ်။ ဒါဟာ Democratic Assembly နဲ့ သွားတူတယ်။ အပေါ်ယံသဘောပြောရရင် ဒါဟာ ဒီမိုကရေစီနည်းကျ  ကျင့်ဆောင်မှုတွေထဲက အရေးကြီးတဲ့ လုပ်ရပ်တစ်ခုပဲ။ နောက်ပိုင်း အာဏာရှင်တွေအုပ်စိုးတဲ့ အခါကျမှ နိုင်ငံရေးပယောဂတွေ အများကြီးဝင်လာပြီး ဒါမျိုး ဒီမိုကရက်တစ်ဆန်တဲ့ အလေ့အထတွေလည်း ပျောက်ကွယ်သွားတယ်။ အဲဒီနောက် တာလီဘန်အစိုးရ တက်လာပြီးနောက်ပိုင်းမှာမှ အခြားကိုးကွယ်ယုံကြည်မှုတွေကို ပိတ်ပင်တားမြစ် ယုံတင်မက ဖျက်ဆီးပစ်တဲ့ အဆင့်ထိရောက်ခဲ့တယ်။ တခြားဘာသာဝင်တွေရဲ့ နိုင်ငံရေးအရရော၊ ဘာသာရေးအရ လွတ်လပ်ခွင့်တွေပါ ဆုံးရှုံးသွားခဲ့ရတယ်။

ဆိုခဲ့ပြီးတဲ့ အကြောင်းအရာတွေကိုပြန်ကြည့်ရင် ဒီမိုကရေစီစနစ် တစ်ရပ်အတွက် အတားအဆီးတွေက ဘာသာရေးအခြေခံ သွန်သင်မှု၊ ယဉ်ကျေးမှုတွေကလာတာ မဟုတ်ဘဲ အာဏာရှင်တွေရဲ့ ဘာသာရေးပေါ် အသုံးချမှုကြောင့်လို့ပဲ နောက်ပိုင်း မှာ ပညာရှင်တွေက တဖြေးဖြေးလက်ခံလာကြတယ်။ အဲဒါက အစ္စလာမ်ဝါဒနဲ့ ကွန်ဖြူးရှပ်စ်ဝါဒ (ကတ်သလစ်ခရစ်ယာန်ဝါဒတွေ အပါအ၀င်)ဟာ ဒီမိုကရေစီစနစ်နဲ့ မအပ်စပ်တဲ့၊ အဟန့်အတားဖြစ်စေတဲ့ အယူဝါဒတွေလို့ ပြောဆိုတာတွေ (အထူးသဖြင့် ပါမောက္ခ ဆင်မြူရယ် ဟန်တင်တန်ရဲ့ သုံးသပ်ချက်) ကို ပြန်လှန်ချေပရင်း ထွက်ပေါ်လာတဲ့ ရှုထောင့်တစ်ခုလည်း ဖြစ်ပါတယ်။ ကျနော်နိုင်ငံရေးအရ သမိုင်း သက်သက်ကိုပဲ လေ့လာဖူးတဲ့ အတွက် ခုရေးနေတာကလည်း နိုင်ငံရေးရှုထောင့်က အလွန်ယေဘုယျဆန်ဆန် ရေးထားတာဖြစ်တယ်။ ဘာသာရေးသမိုင်း ရေးနေတာ မဟုတ်ပါဘူး။ စာရေးသူပေးချင်တဲ့ မတ်ဆေ့ခ်ျနဲ့ လွှတ်နေမှာစိုးလို့ ပြောတာပါ။