ဇူလိုင် ၂၀၊ ၂၀၁၄
M-Media
ချမ်းငြိမ်းအေး
ပဲခူးမြို့ရှိ ပသီကဘာရ်စတာန်ဟု အမည်ရသည့် မွတ်စလင်သုဿာန်(ကဘာရ်စတာန်)အား အာဏာပိုင်များက မနေ့က မနက် ၈-နာရီခန့်က စတင်ကာ ဘူဒိုဇာဖြင့် ထိုး၍ ဖျက်ဆီးခဲ့သည်ဟု သိရှိရသောကြောင့် ပဲခူးမြို့ခံများအား ဆက်သွယ်မေးမြန်းခဲ့ပါတယ်။ ကိုဂျမားက ဖြေကြားပေးထားတာ ဖြစ်ပါတယ်။
M-Media – ပဲခူးမြို့ ကဘာရ်စတာန်ကိစ္စ အခြေအနေကို ပြောပြပေးပါလား။
ဖြေ – ပဲခူး ကဘာရ်စတာန် အခုလောလောဆယ်အခြေအနေက တိုင်းဒေသကြီးအစိုးရက ဥပဒေမဲ့ အတင်းအဓမ္မ ကဘာရ်စတာန်ထဲကို ဘူဒိုဇာနဲ့ ၀င်ထိုးနေတာပေါ့ဗျာ။
M-Media – ဘယ်အချိန်က စပြီး အဲ့လို လုပ်တာပါလဲ။
ဖြေ – ဇူလိုင် ၁၈-ရက် မနက် ၈-နာရီခွဲ ၀န်းကျင်က စလုပ်တာပါ။
M-Media – ကဘာရ်စတာန်အကြောင်း ပြောပြပေးလို့ ရမလား။
ဖြေ – ဟုတ်ကဲ့ ဒီကဘာရ်စတာန်က ၁၉၈၇-ခုနှစ်တုန်းက သိမ်းတယ်ဆိုတဲ့စကားလုံးကြောင့် စည်ပင်နဲ့ ကျွန်တော်တို့ အစ္စလာမ်ဘာသာဝင် မွတ်စလင်လူကြီးတွေ အမှုဖြစ်ခဲ့တယ်။ အစ္စလာမ်ဘာသာဝင် လူကြီးတွေက အနိုင်ရရှိခဲ့တယ်။ အစ္စလာမ်ဘာသာဝင်တွေထဲက အမှုဆောင်အရာရှိ ဦးဘထူးကိုယ်တိုင်က ဒီသုဿာန်မြေသည် အစ္စလာမ်ဘာသာဝင် သုဿာန်မြေဖြစ်ကြောင်း တရားရုံးမှာ တရားဝင် ထွက်ဆိုခဲ့တယ်။ အဲ့ဒါက တစ်ချက်။ နောက်တစ်ချက်က ဒီသုဿာန်ဝင်းထဲမှာ တခြား အဆောက်အဦးတွေ ဗလီ၊ ဇရပ်၊ ရှေးဟောင်းရေတွင်းတွေ ရှိတယ်ဆိုတာလည်း ထည့်သွင်းထားတယ်။ ဒီလို တရားရုံးမှာ တရားဝင် ထွက်ဆိုထားတဲ့အတွက် အစ္စလာမ်ဘာသာဝင်တွေ ပိုင်တယ်ဆိုတာကို ဖော်ညွှန်းနေတယ်။ ဒါကြောင့် တိုင်းဒေသကြီး အစိုးရအဖွဲ့အနေနဲ့ ဒီလိုလုပ်တာဟာ မတရားသဖြင့် လုပ်တယ်လို့ မြင်တယ်။ အဲ့ဒါက တစ်ချက်ပါ။ နောက်တစ်ချက်က ရှေးဟောင်းယဉ်ကျေးမှု အမွေအနှစ်ဆိုင်ရာ ဥပဒေမှာ ၁၉၉၈-ခုနှစ် စက်တင်ဘာလ ၁၀-ရက်နေ့ မြန်မာ့အလင်း သတင်းစာမှာ ဥပဒေအမှတ် ၉/၉၈ မှာ တရားဝင် ဖော်ပြထားတယ်။ ၁၈၈၆-ခုနှစ် မတိုင်မီက တည်ရှိသော မြန်မာနိုင်ငံအတွင်းရှိ ရှေးဟောင်းသုဿာန် ယဉ်ကျေးမှု အမွေအနှစ်များကို ထိန်းသိမ်းစောင့်ရှောက်ရမည်ဟု ပြဋ္ဌာန်းထားတယ်။ အခု လက်ရှိဖျက်နေတဲ့ ပသီသုဿာန်ဟာ ၁၈၈၆-ခုနှစ် မတိုင်မီကတည်းက သုဿာန်ဖြစ်တဲ့အတွက် ဒါဟာ ရှေးဟောင်း ယဉ်ကျေးမှု သုဿာန်တစ်ခု ဖြစ်ပါတယ်။ ဒါကြောင့် တိုင်းဒေသကြီးအဖွဲ့ကြီးက အခုလို မတရားသဖြင့် ဘူဒိုဇာဖြင့် ၀င်ရောက်ထိုး ဖျက်ဆီးခြင်းဟာ ရှေးဟောင်း ဥပဒေ ၉/၉၈ ကို ပြောင်ပြောင်တင်းတင်း ဆန့်ကျင်ခြင်းသာဖြစ်တယ်လို့ ကျွန်တော်တို့ ယူဆပါတယ်။ ဒါဟာ ဒုတိယအချက်ပါ။
M-Media – ဟုတ်ကဲ့ အခု ပသီသုဿာန်က မွတ်စလင်တွေရဲ့ ပိုင်ဆိုင်ခွင့် အထောက်အထား ဘယ်လိုရှိပါသလဲ။
ဖြေ – ဒီသုဿာန်က မွတ်စလင်တွေကို ချပေးထားတဲ့ သုဿာန်မဟုတ်ပါဘူးခင်ဗျ။ ၁၉၈၇-ခုနှစ် ဦးဘထူးရဲ့ ထွက်ဆိုချက်မှာ ဒီသုဿာန်သည် ဦးအဘူဟတ်ဆိုတဲ့ ပုဂ္ဂိုလ်က ၀ယ်ယူလှူဒါန်းထားတဲ့ သုဿာန်ဖြစ်တယ်။ ဒီအတွက်ကြောင့် နှစ်နဲ့ပြောရင် နှစ်ပေါင်း ၁၅၀ ၀န်းကျင်ရှိပါပြီ။
M-Media – သူဝယ်ယူထားတဲ့ ပိုင်ဆိုင်မှု အထောက်အထားရှိပါသလား။
ဖြေ – ပိုင်ဆိုင်မှုက မြေပုံရှိပါတယ်။ မြေပုံမှာ ၀ယ်ယူတဲ့အချိန်က ဘိုးဘွားပိုင်မြေအဖြစ်နဲ့ ၀ယ်ယူထားတယ်။ မြှုပ်နှံတဲ့အချိန်မှာ စည်ပင်သာယာက သုဿာန်ဥပဒေ အစိမ်းပေါက်အနေနဲ့ အခွန်ကင်းလွတ်ခွင့်ရရှိထားတဲ့ မြေဖြစ်တယ်။ မြေအမျိုးအစား ၃-မျိုး ရှိတယ်ခင်ဗျ။ တစ်မျိုးက သာသနာ့မြေ၊ သာသနာ့မြေ အစိမ်းပေါက် အခွန်ကင်းလွတ်ခွင့်၊ နောက်တစ်မျိုးက သုဿာန်မြေ အခွန်ကင်းလွတ်ခွင့်၊ နောက်ဆုံးတစ်မျိုးက ဆောက်လုပ်ရေး လုပ်ပိုင်ခွင့် အဲ့ဒါက တစ်မျိုးပေါ့။ ကျွန်တော်တို့ ရရှိထားတဲ့မြေက အစိုးရအာဏာပိုင်အဖွဲ့အစည်းက ၀င်ရောက် ဖျက်ဆီးခွင့်မရှိတဲ့ သာသနာ့မြေ အမျိုးအစားဖြစ်တယ်။ ဒီထဲမှာ ဗလီတွေရှိတဲ့အတွက် ၀င်ရောက်ဖျက်ဆီးခွင့် မရှိဘူး။
M-Media – ဟုတ်ကဲ့ အခုလို ဖျက်ဆီးနေတာကို ပဲခူးမြို့က တာဝန်ရှိသူ မွတ်စလင်တွေဘက်ကရော တိုင်းဒေသကြီးအစိုးရ ဘယ်လိုဆက်သွယ်ပြီး ဆောင်ရွက်နေပါသလဲ။
ဖြေ – ကျွန်တော်တို့ ဒီသုဿာန်နဲ့ပတ်သက်ပြီး မြန်မာနိုင်ငံမှာ အသိအမှတ်ပြု အစ္စလာမ်ဘာသာရေးအဖွဲ့ကြီး ၅-ဖွဲ့ရှိတယ်။ သုဿာန်သော့ကိုလည်း ကျွန်တော်တို့လက်ဝယ်မှာ မထားပဲ အဲ့ဒီအဖွဲ့ကြီး ၅-ဖွဲ့ကို ၂၀၁၀-ခုနှစ်ကတည်းက ကျွန်တော်တို့ အပ်နှံထားတာဖြစ်တယ်။ ဒီအဖွဲ့ကြီးကလည်း ၂၀၁၀-ခုနှစ် ဇူလိုင်လ ၂၀-ရက်နေ့က စာအမှတ်နဲ့ ကျွန်တော်တို့ကို ညွှန်ကြားထားတယ်။ အစ္စလာမ်ဘာသာရေးအဖွဲ့ကြီးမသိပဲ အဖွဲ့ကြီးရဲ့သဘောတူညီမှု မရပဲ မည်သည့်တစ်စုံတစ်ရာမှ မပြုလုပ်ရလို့ ညွှန်ကြားထားတာ ရှိပါတယ်။
M-Media – ဟုတ်ကဲ့ ဒီလိုဆိုရင် အစ္စလာမ်ဘာသာရေးအဖွဲ့ကြီးအနေနဲ့က အခုကိစ္စအတွက် ဘယ်လို လုပ်ဆောင်ပေးနေပါသလဲ။
ဖြေ – အစ္စလာမ်ဘာသာရေးအဖွဲ့ကြီးအနေနဲ့ ဇူလိုင် ၁၈-ရက်နေ့မှာ အစည်းအဝေးထိုင်ပါတယ်။ ပထမရက်တွေတုန်းကလည်း တိုင်းဒေသကြီးလွှတ်တော် ဆောက်လုပ်မယ့်ကိစ္စနဲ့ပတ်သက်ပြီး နိုင်ငံတော် သမ္မတကို ကန့်ကွက်စာပို့တယ်။ ဇူလိုင် ၁၈-ရက်နေ့မှာလည်း ကန့်ကွက်စာတွေ ပို့ပါတယ်။ အခု ဖျက်နေတဲ့နေ့မှာလည်း တိုင်းဒေသကြီးအဖွဲ့ကို အမျိုးမျိုး အကြောင်းကြားပြီး သူတို့အနေနဲ့ အတတ်နိုင်ဆုံး ကူညီလုပ်ဆောင်ပေးနေပါတယ်။
နောက်ပြီးတော့ ကျွန်တော်တို့ ပဲခူးမြို့ အစ္စလာမ်ဘာသာဝင်တွေကလည်း လက်မှတ်တွေထိုးပြီးတော့ ဇူလိုင်လ ၁၈-ရက် မနက်မှာပဲ ပဲခူးတိုင်းဝန်ကြီးချုပ် ဦးဥာဏ်ဝင်းကို လိပ်မူပြီးတော့ စာတင်ထားပါတယ်။ သုဿာန်မြေကို တိုင်းဒေသကြီးလွှတ်တော် ဆောက်လုပ်မည့်ကိစ္စကို ကန့်ကွက်စာတင်ထားပါတယ်။ စာတင်ထားတဲ့ကြားထဲက အခုလို အတင်းအဓမ္မ၀င်ရောက် ဖျက်ဆီးတာဟာ ၂၀၀၈-ခုနှစ် ဖွဲ့စည်းပုံအခြေခံဥပဒေအရ ဘာသာရေးဆိုင်ရာ လွတ်လပ်စွာ ကိုးကွယ်ယုံကြည်ခွင့်ကို ပြောင်ပြောင်တင်းတင်း ချိုးဖောက်လိုက်တယ်လို့ ကျွန်တော့်အနေနဲ့ ခံစားမိပါတယ်။
