Blog

ဇူလိုင် ၁၅၊ ၂၀၂၁
M-Media

-ကမ္ဘာ့အကြီးဆုံး နေစွမ်းအင်သုံး ရေပေါ် လျှပ်စစ်ဓာတ်အားပေး စက်ရုံတစ်ခုကို စင်ကာပူနိုင်ငံက ဗုဒ္ဓဟူးနေ့မှာ ထုတ်ပြလိုက်ပါတယ်။

ဘောလုံးကွင်း ၄၅ ကွင်းစာအကျယ်ရှိတဲ့ အဲဒီဓာတ်အာပေး စီမံကိန်းဟာ နိုင်ငံအတွင်းရှိနေတဲ့ သောက်သုံးရေသန့်စင်စက်ရုံ ၅ ခုကို ဓာတ်အား လုံလုံလောက်လောက် ပေးနိုင်မှာ ဖြစ်ပါတယ်။

ရာသီဥတုဖောက်ပြန်မှုကို တိုက်ဖျက်နိုင်ရေး တစ်စိတ်တစ်ပိုင်းအဖြစ် ၂၀၂၅ ခုနှစ်ရောက်ရင် နေစွမ်းအင်သုံး ဓာတ်အားထုတ်လုပ်မှုကို အခုထက် ၄ ဆ တိုးမြှင့်နိုင်အောင် စင်ကာပူက ရည်မှန်းထားပါတယ်။

နိုင်ငံအနောက်ပိုင်း ရေလှောင်ကန်မှာ တည်ဆောက်ထားတဲ့ အခု ​နေစွမ်းအင်သုံး ဓာတ်အားပေးစီမံကိန်းဟာ ဓာတ်အား ၆၀ မီဂါဝပ် ထုတ်လုပ်နိုင်မှာဖြစ်ပြီး တစ်နှစ်ကို ကာဘွန်ထုတ်လွှတ်မှု ၃၂ ကီလိုတန်လောက် လျှော့ချပေးနိုင်မှာပါ။ ဒါဟာ မော်တော်ကား ၇ ထောင်လောက် လမ်းပေါ်က ဖယ်ရှားလိုက်တဲ့ ပမာဏဖြစ်ပါတယ်။

ရေရဲ့အေးမြမှုကြောင့် ဆိုလာပြားတွေဟာ ၅ ရာခိုင်နှုန်းကနေ ၁၅ ရာခိုင်နှုန်းအထိ စွမ်းဆောင်ရည်ပိုကောင်းနိုင်မှာဖြစ်ပြီး ဘေးကအဆောက်အဦးတွေရဲ့ အရိပ်ကျမှုလည်း မရှိဘူးလို့ စီမံကိန်းဖော်ဆောင်တဲ့ ကုမ္ပဏီနဲ့ စင်ကာပူ ရေပေးဝေရေးဌာနတို့က ထုတ်ပြန်တဲ့ ကြေငြာချက်မှာ ဖော်ပြထားပါတယ်။

၄၅ ဟက်တာကျယ်တဲ့ အဲဒီစီမံကိန်းမှာ ဆိုလာပြား ၁၂၂၀၀၀ အသုံးပြုထားပြီး စင်ကာပူဟာ ရေသန့်စင်ရေးစက်ရုံအားလုံးကို နေစွမ်းအင်သုံးဓာတ်အားနဲ့ အပြည့်အ၀လည်ပတ်တဲ့ ကမ္ဘာပေါ်က အနည်းငယ်သော နိုင်ငံတွေထဲမှာ ပါဝင်လာပါတယ်။

စီမံကိန်းကြောင့် သဘာ၀ပတ်ဝန်းကျင်နဲ့ ရေလှောင်တမံက ရေအရည်အသွေးကို မထိခိုက်ဘူးလို့လည်း တာဝန်ရှိသူတွေက ထည့်သွင်း ပြောဆိုခဲ့ပါတယ်။

Ref: Reuters

ဇူလိုင် ၁၄၊ ၂၀၂၁
M-Media

-ကိုဗစ်ကပ်ကူးစက်မှုနဲ့ သေဆုံးမှု မြင့်တက်လာတာကြောင့် မြန်မာနိုင်ငံသားတွေ၊ လတ်တလော မြန်မာနိုင်ငံကို သွားရောက်ထားသူတွေအားလုံးကို ဇူလိုင် ၁၆ ရက်နေ့ကစပြီး ပြည်ဝင်ခွင့်ပိတ်မယ်လို့ စင်ကာပူက ကြေငြာပါတယ်။

စင်ကာပူမှာ ကာလရှည်ဗီဇာနဲ့ နေထိုင်သူတွေ၊ ကာလတိုဗီဇာနဲ့ လာရောက်လည်ပတ်သူတွေ၊ ဒီမတိုင်ခင်က စင်ကာပူဝင်ရောက်ခွင့် ဗီဇာရထားသူတွေ၊ လွန်ခဲ့တဲ့ ၂၁ ရက်အတွင်း မြန်မာနိုင်ငံကိုသွားထားသူတွေ၊ ဒါမှမဟုတ် မြန်မာနိုင်ငံမှာ ခရီးတစ်ထောက်နားဖူးသူ ခရီးသွားတွေအားလုံး ဒီပိတ်ပင်မှုမှာ အကျုံးဝင်မှာဖြစ်ပါတယ်။

ဒီလူတွေဟာ စင်ကာပူကို ဝင်ရောက်ခွင့်ရမှာမဟုတ်သလို၊ ခရီးတစ်ထောက်နားခွင့်လည်း ရမှာမဟုတ်ပါဘူး။

“ကမ္ဘာတစ်ဝှမ်း ဖြစ်ပေါ်တိုးတက်မှုတွေအရ အန္တရာရှိနိုင်ချေ၊ လူထုအပေါ် ကူးစက်နိုင်ချေတို့ကိုလိုက်ပြီး နယ်စပ်ရေးရာကိစ္စတွေကို ဆက်လက် ချိန်ဆစီမံသွားမှာဖြစ်ကာ ပြောင်းလဲမှုတွေကို SafeTravel ဝဘ်ဆိုက်တွင်မှာ တင်ပေးသွားမှာ ဖြစ်ပါတယ်” လို့ စင်ကာပူ ကျန်းမာရေးဝန်ကြီးဌာနက ​ပြောပါတယ်။

မကြာသေးခင်က မြန်မာနိုင်ငံကို သွားခဲ့ဖူးတဲ့ ခရီးသွားတွေကို ရောက်ရောက်ချင်းမှာ ကိုဗစ်စစ်ဆေးမှာဖြစ်ပြီး၊ ဗီဇာပိတ်မှုမတိုင်ခင် ရောက်လာတဲ့သူတွေလည်း နေအိမ်မှာ ၁၄ ရက် ကွာရန်တင်းဝင်ရမှာ ဖြစ်ပါတယ်။

ပုံပြောင်းကိုဗစ်ဗိုင်းရပ်စ်နဲ့ပတ်သက်တာတွေကို ဆက်လက်သုံးသပ်သွားမှာဖြစ်ပြီး လိုအပ်တဲ့ အရေးယူဆောင်ရွက်မှုတွေကို အခါအားလျော်စွာ လုပ်ဆောင်သွားမယ်လို့ စင်ကာပူကျန်းမာရေးဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။

Ref: CNA