Blog

ဇွန် ၅၊ ၂၀၂၁
M-Media

-​မြန်မာ့အရေး အာဆီယံကဖြေရှင်းဖို့ ကြိုးပမ်းမှုအပေါ် အယုံအကြည်မရှိဘူးလို့ အာဏာသိမ်းစစ်ကောင်စီကို ဆန့်ကျင်တဲ့အဖွဲ့တွေက ပြောကြားလိုက်ပါတယ်။

အာဆီယံဥက္ကဌအဖြစ် တာဝန်ယူထားတဲ့ ဘရူနိုင်းနိုင်ငံက ဒုတိယ နိုင်ငံခြားရေးဝန်ကြီး အီရီဝမ် ယူဆွဖ်၊ အာဆီယံအတွင်းရေးမှူး ဘရူနိုင်းနိုင်ငံသား လင်မ် ဂျော့ဟွီတို့ဟာ ဇွန်လ ၃ ရက်နေ့ညပိုင်းက မြန်မာနိုင်ငံကို ရောက်ရှိလာခဲ့ပြီး ၄ ရက်နေ့မှာ စစ်ကောင်စီ ဥက္ကဌ၊ စစ်ကောင်စီကခန့်ထားတဲ့ ရွေးကောက်ပွဲကော်မရှင်ဥက္ကဌ၊ နိုင်ငံခြားရေးဝန်ကြီး၊ လူကယ်ပြန်ဝန်ကြီးတို့နဲ့ တွေ့ဆုံခဲ့ပါတယ်။

စစ်ကောင်စီဥက္ကဌ ဗိုလ်ချုပ်မှူးကြီးမင်းအောင်လှိုင်က တိုင်းပြည်တည်ငြိမ်သွားတဲ့အခါ ရွေးကောက်ပွဲ ပြန်လုပ်ပေးမယ်လို့ အာဆီယံတာဝန်ရှိသူနှစ်ဦးနဲ့ တွေ့ဆုံပွဲမှာ ထပ်လောင်း ပြောကြားခဲ့ပါတယ်။

၂၀၂၀ ခုနှစ် နိုဝင်ဘာရွေးကောက်ပွဲမှာ အနိုင်ရခဲ့ပြီး ဖေဖော်ဝါရီ ၁ ရက်နေ့မှာ စစ်တပ်က ဖြုတ်ချခြင်းကို ခံလိုက်ရတဲ့ လွှတ်တော်အမတ်တွေနဲ့ ဖွဲ့စည်းထားတဲ့ အမျိုးသားညီညွတ်ရေးအစိုးရ (NUG) က အာဆီယံရဲ့ အခုကြိုးပမ်းမှုအပေါ် အယုံအကြည် သိပ်မရှိဘူးလို့ ပြောကြားခဲ့ပါတယ်။

“အာဆီယံရဲ့ ကြိုးပမ်းမှုတွေပေါ်မှာ ကျွန်တော်တို့ ယုံကြည်မှု သိပ်မရှိပါဘူး။ ကျွန်တော်တို့ရဲ့ မျှော်လင့်ချက်တွေ ပျောက်ဆုံးသွားပါပြီ။ ယုံကြည်လို့ရမယ့် ခိုင်မာတဲ့ အစီအစဉ်မျိုး သူတို့မှာ မရှိဘူးလို့ ကျွန်တော်ထင်ပါတယ်” လို့ NUG ရဲ့ ဒုတိယနိုင်ငံခြားရေးဝန်ကြီး ဦးမိုးဇော်ဦးက ပြောကြားခဲ့ပါတယ်။

ဇွန်လ ၄ ရက်နေ့ ဦးမိုးဇော်ဦးက ဦးဆောင်ပြုလုပ်တဲ့ NUG ရဲ့ ပထမဆုံး ၁ နာရီကြာ သတင်းစာရှင်းလင်းပွဲ အွန်လိုင်းကနေ ကျင်းပချိန်မှာ စစ်ကောင်စီက တစ်နိုင်ငံလုံးကို အင်တာနက်ဖြတ်တောက်ခဲ့ပါတယ်။

အာဆီယံအဖွဲ့က တာဝန်ရှိသူတွေ မြန်မာနိုင်ငံကို လာရောက်မှုဟာ ဧပြီလက အင်ဒိုနီးရှားနိုင်ငံ ဂျကာတာမြို့မှာ ပြုလုပ်ခဲ့တဲ့ မြန်မာ့အရေး အာဆီယံထိပ်သီးအစည်းအဝေးကသဘောတူညီချက် ၅ ချက်ကို အကောင်အထည်ဖော်နိုင်ရေး ကြိုးပမ်းမှု တစ်စိတ်တစ်ပိုင်းဖြစ်ပါတယ်။

စစ်ကောင်စီတာဝန်ရှိသူတွေနဲ့ တွေ့ဆုံမှုကို အာဆီယံဖက်က ထုတ်ပြန်တာမျိုး မရှိသေးသလို စစ်ကောင်စီကိုဆန့်ကျင်တဲ့ အတိုက်အခံတွေနဲ့ တွေဆုံဖို့ အစီအစဉ်ရှိလားဆိုတာလည်း ရှင်းရှင်းလင်းလင်း မသိရသေးပါဘူး။

ဖေဖော်ဝါရီလ ၁ ရက် အာဏာသိမ်းပြီးတဲ့နောက် စစ်ကောင်စီတပ်တွေရဲ့ အကြမ်းဖက်သတ်ဖြတ်မှုကြောင့် နိုင်ငံတစ်ဝှမ်း လူပေါင်း ၈၄၀ ကျော် သေဆုံးခဲ့ပြီ ဖြစ်ပါတယ်။

Ref: CNA, Aljazeera

ဇွန် ၃၊ ၂၀၂၁
M-Media

-နိုင်ငံတကာက ဝေဖန်မှုတွေရှိနေပေမယ့် အာဏာသိမ်းစစ်ကောင်စီအပေါ် စီးပွားရေးပိတ်ဆို့မှုတွေ ပြုလုပ်သွားမှာမဟုတ်ဘူးလို့ ဩစတေးလျ နိုင်ငံခြားရေးဝန်ကြီးက ပြောကြားလိုက်ပါတယ်။

ဖေဖော်ဝါရီ ၁ ရက်နေ့ အာဏာသိမ်းပြီးနောက်ပိုင်း ပြည်သူလူထုအပေါ် အကြမ်းဖက်သတ်ဖြတ်မှုတွေကြောင့် စစ်ကောင်စီကို ဩစတေးလျရဲ့ မဟာမိတ်နိုင်ငံတွေဖြစ်တဲ့ အမေရိကန်၊ ယူကေ၊ ကနေဒါနဲ့ ဥရောပသမဂ္ဂတို့က ပိတ်ဆို့အရေးယူမှုတွေ ပြုလုပ်ထားတာပါ။

ဩစတေးလျအနေနဲ့ ဒီလမ်းစဉ်ကိုလိုက်ဖို့ နိုင်ငံတကာအသိုင်းအ၀ိုင်းက တိုက်တွန်းမှုတွေရှိနေပြီး၊ မြန်မာနိုင်ငံအတွင်းက အရပ်ဖက်အဖွဲ့အစည်း ၄၀၀ နီးပါးကလည်း စစ်ကောင်စီအပေါ် အရေးယူခြင်းမရှိတဲ့ ဩစတေးလျရဲ့လုပ်ရပ်ဟာ ရှက်ဖွယ်ဖြစ်တယ်လို့ ပြီးခဲ့တဲ့လမှာ ကြေငြာချက် ထုတ်ပြန်ခဲ့ပါတယ်။

ဩစတေးလျ နိုင်ငံခြားရေးဝန်ကြီး မာရီစီ ပေနီက ဩစတေးလျဟာ မြန်မာနိုင်ငံပြဿနာမှာ အာဆီယံအဖွဲ့က ဦးဆောင်ဖြေရှင်းတာကို ထောက်ခံပြီး စီးပွားရေးပိတ်ဆို့မှု လုပ်ဆောင်လိုက်ခြင်းအားဖြင့် စစ်ကောင်စီအပေါ် လွှမ်းမိုးနိုင်မှုကို အကန့်အသတ် ဖြစ်သွားစေလိမ့်မယ်လို့ ဒီကနေ့ လွှတ်တော်အစည်းအဝေးမှာ ပြောကြားခဲ့ပါတယ်။

“အခုအချိန်မှာ စီးပွားရေးပိတ်ဆို့မှုလုပ်ဖို့ စဉ်းစားထားတာမျိုး မရှိသေးပါဘူး။ စီးပွားရေးပိတ်ဆို့မှုက ကျွန်မတို့ရဲ့ အကျိုးစီးပွား၊ အာဆီယံကဦးဆောင်ပြီး အဖြေရှာရေးမှာ ကျွန်မတို့ရဲ့ အားပေးထောက်ခံမှု၊ လက်ရှိ အာဆီယံက ဆောင်ရွက်နေတဲ့ ကိစ္စတွေအပေါ် အထောက်အကူဖြစ်မယ်လို့ ကျွန်မတို့ မယူဆပါဘူး”

မိမိတို့အစိုးရဟာ နိုင်ငံရဲ့အကျိုးစီးပွား၊ ဒေသတွင်းနဲ့ မြေပြင်က အခြေအနေတွေကို သုံးသပ်ပြီး ဆုံးဖြတ်ချက်ချတာလို့လည်း နိုင်ငံခြားရေးဝန်ကြီးက ထည့်သွင်းပြောဆိုခဲ့ပါတယ်။

“လုပ်နိုင်ဖွယ်ရှိတဲ့ တုန့်ပြန်မှုတွေထဲမှာ စီးပွားရေးပိတ်ဆို့မှုပါတယ်။ ဒါပေမယ့် ဒါဟာ အရာအားလုံးအတွက်အဖြေ မဟုတ်ပါဘူး”

အရပ်သားအစိုးရကို ဖြုတ်ချပြီး အာဏာသိမ်းလိုက်တဲ့ မြန်မာစစ်တပ်နဲ့ စစ်ရေးဆိုင်ရာ အဆက်အသွယ် ဖြတ်တောက်လိုက်ပြီး၊ စစ်ကောင်စီလက်အောက်ခံ အစိုးရအဖွဲ့အစည်းတွေကနေတစ်ဆင့် ကူညီထောက်ပံ့တာမျိုး မလုပ်တော့ဘူးလို့ ဩစတေးလျက ထုတ်ပြန်ကြေငြာထားတာပါ။

နိုင်ငံခြားရေးဝန်ကြီး ပေနီက မြန်မာနိုင်ငံက တင်းမာမှုတွေကိုလျော့ချရေး ဒေသတွင်းနိုင်ငံတွေရဲ့ ကြိုးပမ်းမှုတွေကို တစ်စိုက်မတ်မတ် အားပေးထောက်ခံပြီး၊ အဖြေတစ်ခု ပေါ်ထွက်လာရေးအတွက် ပူးပေါင်းလုပ်ဆောင်သွားမယ်လို့လည်း ထည့်သွင်းပြောဆိုခဲ့ပါတယ်။

Ref: SBS News