ဖေဖော်ဝါရီ ၂၈ ၊ ၂၀၁၄
M-Media
ဆောင်းပါးရှင်- ဟာဂျီ-၀င်းအောင်
ကျနော်စိတ်ကူးထားတဲ့ စီစဉ်ထားတဲ့ ရန်ကုန်တက္ကသိုလ် မွတ်စလင်အသင်းအား တမ်းတခြင်း ဆောင်းပါးကို ခဏထားကာ ပင်လုံ ဦးဖေခင်နှင့် ဘက်မလိုက် အကြောင်းရေးဖို့ ဖန်လာလို့ပါ။ ထုံးစံအတိုင်း ဖေဖေါ်ဝါရီလ (၁၂) ရက်နေ့ နီးလာပြီဆို၊ ပင်လုံကိုသတိရကြ ပြောကြဆို ရေးကြသားကြတယ်။
မွတ်စလင် ကလောင်ရှင် နှစ်ယောက်ရေးသားကြတဲ့ ဆောင်းပါးနှစ်ပုဒ်ကိုလည်း မကြာသေးခင်က ဖတ်လိုက်ရလို့ အဲဒီဆရာနှစ်ယောက်ကို အကြောင်းပြုကာ အနာဂတ်အတွက် ကျနော်မျှော်လင့်ထားတဲ့ မွတ်စလင်လူငယ်များအား ရည်းစူးကာ ဒီဆောင်းပါးရေးသားရခြင်းဖြစ်တယ်။
ပင်လုံဆိုတာ
ပင်လုံမြို့လေးမှာ ၁၉၄၆ ခု၊ဖေဖေါ်ဝါရီလ (၁၂)ရက်နေ့က လက်မှတ်ရေးထိုးတဲ့အတွက် ပင်လုံစာချုပ်လို့တွင်ပြီး လွတ်လပ်ရေးရတဲ့အခါ အဲဒီနေ့လည်း ပြည်ထောင်စုနေ့ ဖြစ်လာတယ်။
လွတ်လပ်ရေးတောင်းဆိုရာမှာ တောင်းတန်းဒေသ ပါဝင်ဖို့အတွက် ရှမ်း၊ကချင်၊ ချင်းကိုယ်စားလှယ်များနဲ့ ဗိုလ်ချုပ်အောင်ဆန်း ဦးဆောင်တဲ့ ဖဆပလ ကိုယ်စားလှယ်အဖွဲ့တို့ ဆွေးနွေးညှိနှိုင်း သဘောတူခဲ့ကြတာဖြစ်တယ်။ ပင်လုံစာချုပ် အပြည့်အစုံနဲ့ ထိုးထားတဲ့လက်မှတ်တွေကို လေ့လာကြည့်၊ လူအချို့ထင်မှတ်မှားနေသလို တိုင်းရင်းသားလူမျိုးပေါင်းစုံ ညီလာခံကြီးမဟုတ်ဆိုတာ ခွဲခြားသိမြင်ဖို့ သိပ်အရေးကြီးတယ်။
ပင်လုံစိတ်ဓါတ်ဆိုတာ အဓိပ္ပါယ်လေးနက်လို့ ဦးဖေခင်ရေးသားတဲ့ ကိုယ်တွေ့ပင်လုံစာစာအုပ်ကို (ဖြစ်နိုင်ရင် မူရင်း အင်္ဂလိပ်)၊ဦးပုကလေးရေးတဲ့ ငါတို့ဗိုလ်ချုပ် ဘာတွေလုပ်ခဲ့သလဲစာအုပ်တို့နဲ့အတူ ဗိုလ်ချုပ်အောင်ဆန်း မိန့်ခွန်းများ၊ တက္ကသိုလ်နေ၀င်းဆောင်းပါးများ ဖတ်ကြည့်ရင် တိုင်းရင်းသား ယဉ်ကျေးမှု အဆိုအကတွေကို ပြည်ထောင်စုနေ့မှာကြည့်ပုံ၊ တိုင်းရင်းသားလို ၀တ်ပြီး မဲသွားဆွယ်ပုံတွေလို အပေါ်ယံခပ်တိမ်တိမ် မဟုတ်ဆိုတာတွေ့ရပေလိမ့်မယ်။
ပင်လုံအစ ရွှေတိဂုံညီလာခံက
ပင်လုံစာချုပ် အထမြောက်စေတဲ့ မျိုးစေ့ကို ၁၉၄၆ ခုဇန်န၀ါရီလ ဖဆပလ ရွှေတိဂုံညီလာခံကချမှတ်ပေးခဲ့ပုံ၊ တင်သွင်းဆုံးဖြတ်ခဲ့တဲ့ အဆိုများအနက် ဗမက(ဗမာမူစလင်ကွန်ဂရက်) ကိုယ်စားလှယ်အဖွဲ့ ဒုတိယခေါင်းဆောင် ဦးဖေခင် တင်သွင်းတဲ့ မြန်မာနိုင်ငံကို လွတ်လပ်ရေးပေးသောအခါ ရှမ်းအပါအ၀င် တောင်တန်းဒေသအားလုံးကိုပါ တစ်စုတစ်စည်းတည်းပေး ရန်ဟူသော အဆိုအမှတ်(၇)လည်းပါဝင်ပုံ၊ ၁၉၄၆ ခုမတ်လ (၁)ရက်နေ့မှ (၁၂)ရက်နေ့အထိ ကျင်းပခဲ့သော ပင်လုံပထမ စည်းဝေးပွဲမှ အားနည်းချက်များကို သုံးသပ်ကာ၊ ၁၉၄၇ ခုနှစ် ဖေဖေါ်ဝါရီလ(၃) ရက်နေ့မှ (၁၃)ရက်နေ့အထိကျင်းပသည့် ဒုတိယစည်းဝေးပွဲသို့ ဗိုလ်ချုပ်အောင်ဆန်း ကိုယ်တိုင်ဦးဆောင်ပြီး ခက်ခက်ခဲခဲနှင့်ကြိုးပမ်း ကာ သဘောတူညီချက်ရယူခဲ့ပုံ၊ တို့ကိုလေ့လာကြည့်ပါက တွေ့ရပေလိမ့်မယ်။
တောင်တန်းဒေသဌာနခွဲ
ဖဆပလအဖွဲ့ချုပ်မှာ အသစ်ဖွင့်လိုက်တဲ့ တောင်တန်းဒေသဌာနခွဲကို ဦးဆောင်ဖို့လူ စဉ်းစားကြရာ ဦးဖေခင်ကို ဗိုလ်ချုပ်အောင်ဆန်းက မျက်စိကျတယ်။ ရန်ကုန်တက္ကသိုလ် ရှမ်းပြည်ကျောင်းသူ ကျောင်းသားများအသင်းရဲ့ ပထမဆုံး အတွင်းရေးမှုးဖြစ်ခဲ့တာကို ပဲခူးဆောင်မှာအတူနေခဲ့လို့သိတာရယ်၊ ရှမ်းလူငယ်ခေါင်းဆောင်များနဲ့ရင်းနှီးတာရယ်၊ ပြီးတော့ တောင်ကြီးသား တပိုင်းမို့ ဒေသနိုင်ငံရေးကို နှံ့စပ်တာရယ်တို့ကြောင့်လို့ ယူဆစရာ အကြောင်း များစွာရှိတယ်။
ဖဆပလအဖွဲ့ချုပ် အမှုဆောင် အစည်းဝေးမှာ ဥက္ကဌ ဗိုလ်ချုပ်အောင်ဆန်း အဆိုတင်သွင်းတဲ့ ဦးဖေခင်ကို အထွေထွေ အတွင်းရေးမှူး သခင်သန်းထွန်းက ထောက်ခံတယ်။ တွဲဖက်အတွင်းရေးမှူး ဦးကျော်ငြိမ်း အဆိုတင်သွင်းတဲ့ ဗိုလ်ခင်မောင်ကလေးနဲ့ စဉ်းစားကြပြီးနောက် ဦးဖေခင်ကိုတောင်တန်းဒေသဌာနခွဲ အတွင်းရေးမှူးအဖြစ် ခန့်ထားလိုက်တယ်။ ဒီနေရာမှာ စာဖတ်သူလူငယ်များ အထူးသဖြင့် စာရေးနေကြတဲ့ ကလောင်ရှင်များ သတိထားစေချင်တာကို တင်ပြပါရစေ။ အမျိုးသားခေါင်းဆောင်ကြီးအဖြစ် ရှမ်းရှမ်းတောက်သြဇာကြီးမားနေပေမယ့် အစည်းအဝေးကိုတင်ပြဆွေးနွေးစေတယ်၊ တွဲဖက်အတွင်းရေးမှူး ဦးကျော်ငြိမ်းကလည်း အပြိုင်အဆို တင်သွင်းတယ် ဆိုတဲ့ လုပ်ထုံးလုပ်နည်း၊ အရွေးမခံရတဲ့ ဗိုလ်ခင်မောင်ကလေးကို ပင်လုံသွားတဲ့ အခါ ခေါ်သွားတာတို့ကို ဒီကနေ့နိုင်ငံရေးနဲ့ ယှဉ်ပြီးလေ့လာကြစေချင်တယ်။
ပင်လုံသွား ကိုယ်စားလှယ်အဖွဲ့
ဗိုလ်ချုပ်အောင်ဆန်းနဲ့အတူ ပင်လုံကိုလိုက်ပါသွားကြသူ အားလုံးကို ကိုယ်စားလှယ်အဖွဲ့ထဲပါဝင်တာမဟုတ်ဘူး။ ဥပမာ၊ ဒေါ်ခင်ကြည်၊ အပါးတော်မြဲ ဗိုလ်ထွန်းလှ၊ ဓာတ်ပုံဆရာ ဦးပုကလေး။ ကိုယ်စားလှယ်အဖွဲ့ထဲ ပါဝင်ကြသူတွေ တစ်ဦးချင်းမှာ ဘာဖြစ်လို့ လိုက်သွားရသလဲ ဆိုတာအကြောင်းကိုယ်စီနဲ့ပါ။ အဲဒီအချိန်က သူတို့တာဝန်ယူထားတာနဲ့ လေ့လာကြည့်ရင် သိနိုင်တယ်။
ဖဆပလ ခေါင်းဆောင်များဖြစ်ကြတဲ့ ဗိုလ်ချုပ်အောင်ဆန်း၊ ဦးအောင်ဇံဝေ၊ ဦးဖေခင်၊ဗိုလ်ခင်မောင်ကလေးတို့နဲ့ ဖဆပလ ခေါင်းဆောင်မဟုတ်တဲ့ ဦးတင်ထွဋ် ဘာဖြစ်လို့ အရေးပါတဲ့ ကိုယ်စားလှယ် အဖွဲ့ဝင်ဖြစ်ရသလဲလေ့လာကြည့်ပါ။ ဗြိတိသျှ အစိုးရ ဓနသဟာယနှင့်နိုင်ငံခြားရေး ဌာနမှ မစ္စတာဘော်တွန်လေလို မြန်မာကိုယ်စားလှယ်အဖွဲ့နဲ့ မသက်ဆိုင်တဲ့ ပုဂ္ဂိုလ်တွေလည်း အတူ လိုက်ပါသွားကြတယ်။ အောင်ဆန်း အက်တလီစာချုပ်နဲ့ယှဉ်ပြီး လေ့လာရင် အဖြေရလိမ့်မယ်။
ဦးဖေခင်နဲ့ ဦးအောင်ဇံဝေ
ဒီဆောင်းပါးရေးရခြင်း အကြောင်းရင်းထဲ ပါဝင်တဲ့ကိစ္စကို ပြန်ကောက်ပါ့မယ်။ ဦးဖေခင်ဟာ ဖဆပလအဖွဲ့ချုပ် တောင်တန်းဒေသဌာနခွဲ အတွင်းရေးမှူးအဖြစ် လိုက်ပါသွားရတာပါ။ ပင်လုံစာချုပ် အထမြောက်သွားလို့ အထိမ်းအမှတ် ကျောက်တိုင်ဆောက်ဖို့ တောင်တန်းဒေသဌာနခွဲ အတွင်းရေးမှူးအဖြစ် ငွေထုတ်ပေးရတဲ့ မှတ်တမ်းကိုကြည့်ပါ။ ဦးဖေခင် ဗမာမူစလင် ကွန်ဂရက် ဒုဥက္ကဌအဖြစ် ဆက်ဖြစ်နေဆဲပါပဲ။ ဒါပေမယ်လို့ ပင်လုံနဲ့ ဗ.မ.က တိုက်ရိုက်မပတ်သက်ဘူး။
အလားတူပဲ ဦးအောင်ဇံဝေလည်း ရခိုင် အမျိုးသားမို့ ဗိုလ်ချုပ်အောင်ဆန်းက ခေါ်သွားတာမဟုတ်ဘူး၊ ဖဆပလ ခေါင်းဆောင်အနေနဲ့ ဗိုလ်ခင်မောင်ကလေးလို လိုက်ပါသွားခြင်းတာဖြစ်တယ်။ ပင်လုံမှာ ကရင်၊ ကရင်နီ၊ ကချင်၊ ချင်း၊ ရှမ်းစတဲ့ တိုင်းရင်းသား ကိစ္စရပ်များသာ ဆွေးနွေးကြောင်း မှတ်တမ်းများ တွေ့ရပြီး ရခိုင်ကိစ္စဝေးလို့ ရခိုင်ဆိုတဲ့ စကားလုံး ဘယ်နေရာမှ မတွေ့မိဘူး။
ဗိုလ်ချုပ်အောင်ဆန်းနဲ့ဘာသာရေး
လတ်တလော ရခိုင်နဲ့ မွတ်စလင်ကြား ဖြစ်ပွါးနေတာကို ပင်လုံမှာ ရခိုင်ဦးအောင်ဇံဝေနဲ့ မွတ်စလင်ဦးဖေခင်တို့ အဆင်ပြေပြေ လုပ်ဆောင်ကြပုံကို သတိရထောက်ပြတဲ့ စိတ်ကူးက အဖိုးတန်ကောင်းမွန်လို့ ချီးကျူးစရာပါ။ သို့သော်လည်း အထက်မှာ ရှင်းပြခဲ့သလို ကိုယ့်တာဝန်နဲ့ကိုယ် လိုက်ပါသွားကြခြင်းဖြစ်တယ်။ လူမျိုးစွဲ ဘာသာစွဲ အကင်းဆုံးခေါင်းဆောင်မို့ ဗိုလ်ချုပ်အောင်ဆန်းက ရခိုင်အမျိုးသားဦးအောင်ဇံဝေနဲ့ မူစလင်ခေါင်းဆောင် ဦးဖေခင်တို့ကို ခေါ်သွားတာလို့ဆိုရင်တော့ လုံးဝမှားပါလိမ့်မယ်။ သတင်းဆောင်းပါးမို့ တိကျမှန်ကန်တဲ့ အကြောင်းအရာ အချက်အလက်ပေါ် အခြေခံရပါ့မယ်။
ပင်လုံခရီးစဉ်အတွင်း ဘာသာရေးကိစ္စ ပြောဆိုဆွေးနွေးကြခြင်းမရှိပဲ၊ ၁၉၄၇ ခု၊ နိုင်ငံတော်ဖွဲ့စည်းအုပ်ချုပ်ပုံ အခြေခံဥပဒေ ထဲမှာ ဗုဒ္ဓဘာသာကို နိုင်ငံတော်ဘာသာအဖြစ် ထည့်သွင်းဖို့ ဒီးဒုတ်ဦးဘချိုက အဆိုတင်သွင်းတဲ့အခါကျမှ ကန့်ကွက်ရင်း ဗိုလ်ချုပ်အောင်ဆန်းရဲ့ ပြောကြားချက်ဟာ အင်မတန် အဖိုးတန်လှပါတယ်။ပါးစပ်ပြော မဟုတ်ဘဲ ပုံနှိပ်စာကို ရအောင်ရှာကြပါ။ ဦးနုကသူ့ “ စနေတာတေသား” စာအုပ်ထဲမှာ ခပ်ဖော့ဖော့နဲ့ မရေမရာရေးထားတယ်။ ထိုင်းနိုင်ငံထုတ် တင်မောင်ဝင်းရဲ့ “ နိုင်ငံရေးသမားနှင့်နိုင်ငံရေး” စာအုပ်ထဲမှာတော့ အတော်များများကို မူရင်းအတိုင်းထည့်ထားတယ်။ သုတေသီ ကိုအောင်ထွန်းကို အားကိုးကြရမယ်။
ဖဆပလ အစ
သတိထားမိတဲ့ နောက်တချက်ကတော့ ဖဆပလကို ဒုတိကမ္ဘာစစ်ပြီးတော့မှ ဖွဲ့တယ်ဆိုတာပါ။ တော်လှန်ရေး ကာလအတွင်း ဗမာပြည်ကွန်မြူနစ်ပါတီ၊ တပ်မတော်နဲ့ ပြည်သူ့အရေးတော်ပုံပါတီ(နောက် ဆိုရှယ်လစ်ပါတီ) တို့ပေါင်းပြီး ဖက်ဆစ်တိုက်ဖျက်ရေး ပြည်သူ့ လွတ်မြောက်ရေး ဖတပလ ကိုဖွဲ့တယ်၊ စစ်ရေးခေါင်းဆောင်က ဗိုလ်ချုပ်အောင်ဆန်း၊ နိုင်ငံရေးခေါင်းဆောင်က သခင်စိုးပါ။ အဆင့်ဆင့်ပြောင်းလဲ ဖြစ်ထွန်းတာတွေကို ရှာဖွေလေ့လာကြည့်ရင် စိတ်ဝင်စားစရာ ရေးစရာကုန်ကြမ်းတွေ အများကြီးရလို့၊ နောက်ရေးဖို့ အထောက်အထား အကိုးအကား စိတ်ကူးစိတ်သန်းရလာကြမယ် မဟုတ်ပါလား?
ဘက်မလိုက်နှင့်မြန်မာ
ဘက်မလိုက်လှုပ်ရှားမှု ( Non-Alignment Movement အဖွဲ့ကြီး ) ပေါ်ပေါက်လာစေဖို့ ကနဦးကြိုးပမ်းစဉ်ကပင် မြန်မာနိုင်ငံဟာ အဓိကနေရာကပါခဲ့တယ်။ ၁၉၅၅ ခုနှစ် အင်ဒိုနီးရှားသမ္မတ ဆူကာနို (စစ်အာဏာရှင် ဆူဟာတို မဟုတ်) အိမ်ရှင်အဖြစ် ကျင်းပတဲ့ အာရှအာဖရိက ထိပ်သီးစည်းဝေးပွဲသို့အသွား တရုတ်ဝန်ကြီးချုပ် ချူအင်လိုင်း၊ အိန္ဒိယ၀န်ကြီးချုပ် နေရူး၊အီဂျစ်သမ္မတ နတ်ဆာတို့ ရန်ကုန်ဝင်လာပြီး ၀န်ကြီးချုပ် ဦးနုနဲ့ သင်္ကြန်ရေကစားကြတာ ကျနော်မှတ်မိသေးတယ်။ အဲဒီဘန်ဒေါင်းညီလာခံက ချမှတ်လိုက်တဲ့ မူငါးချက်ဟာ ဘက်မလိုက်လှုပ်ရှားမှု ( Non-Alignment Movement ) အဖွဲ့ အတွက် အခြေခံဖြစ်သွား သလို မြန်မာနိုင်ငံကလည်း ဘက်မလိုက်နိုင်ငံခြားရေး ၀ါဒ ကျင့်သုံးလာခဲ့တယ်။
၁၉၆၁ ခုနှစ်က ယူဂိုစလားဗီးယားနိုင်ငံ ဘဲလ်ဂရိတ်မမြို့မှာ ပထမဆုံးအကြိမ် ဘက်မလိုက်လှုပ်ရှားမှု ညီလာခံသို့ ၀န်ကြီးချုပ် ဦးနုတက်ရောက် အရေးပါတဲ့အခန်းကပါဝင်ခဲ့တယ်။ နောက်နှစ်မှာ ဗိုလ်ချုပ်ကြီးနေ၀င်း အာဏာသိမ်းပြီးနောက် မြန်မာကိုယ်စားလှယ်အဖွဲ့ကို နိုင်ငံခြားရေးဝန်ကြီးကပဲ ဦးဆောင်တယ်။ ၁၉၇၉ ခုနှစ် ကျူးဘားနိုင်ငံ ဟာဗာနားမြို့က (၆)ကြိမ်မြောက် ညီလာခံသို့ နိုင်ငံခြားရေးဝန်ကြီး ဗိုလ်ချုပ်မြင့်မောင် ဦးဆောင်တဲ့ ကိုယ်စားလှယ်အဖွဲ့ရောက်ရှိသွားတယ်။
မြန်မာလည်းထွက် ၀န်ကြီးလည်းပြုတ်
ညီလာခံစနေတော့မှ ဘက်မလိုက်လှုပ်ရှားမှု ( Non-Alignment Movement ) အဖွဲ့ကြီးက နှုတ်ထွက်ကြောင်း ကြေညာကာ ပြန်လာခဲ့ကြ ဆိုတဲ့သံကြိုးစာ ရောက်လာတော့ သိနားလည်တဲ့ နိုင်ငံခြားရေး ၀န်ကြီးဌာန အရာရှိကြီးတွေက ရှင်းလင်းထောက်ပြလို့ သဘောပေါက်သွားတဲ့ ဗိုလ်ချုပ်မြင့်မောင်က အကျိုးသင့်အကြောင်းသင့် အစီရင်ခံစာပို့လိုက်တယ်။ ချက်ချင်း ပြန်လာခဲ့ကြဆိုတဲ့ ဒုတိယ သံကြိုးစာနဲ့အတူ ရန်ကုန်ပြန်ရောက်လာကြတယ်။
အဲဒီ ၁၉၇၉ ခု၊ စက်တင်ဘာလမှာပဲ ဗိုလ်ချုပ်မြင့်မောင် ရာထူးကပြုတ်သွားပြီး ထောက်လှမ်းရေးက ဦးလေးမောင် နိုင်ငံခြားရေးဝန်ကြီးဖြစ်လာတယ်။ ပြည်ပြေးလို့ ပြောဆိုတိုက်ခိုက် ရေးသားခံနေရတဲ့ ၀န်ကြီးချုပ်ဟောင်း ဦးနုက နိုင်ငံရေး မလုပ်တော့ဘူးဆိုကာ အိန္ဒိယနိုင်ငံမှာ တရားအးထုတ်နေတယ်။ ဦးဖေခင်က အငြိမ်းစားသံအမတ်ကြီးအဖြစ် ရန်ကုန်မှာပါ။ စိတ်ကူးပေါက်ရာထလုပ် ပါးစပ်ထဲတွေ့ရာ ပြောတတ်တဲ့ စစ်အာဏာရှင် ဗိုလ်ချုပ်ကြီးနေ၀င်းရဲ့ အဲဒီလုပ်ရပ်ကြောင့် မြန်မာ အရှက်ရ၊ နိုင်ငံတကာမှာလည်း ဂယက်ရိုက်သွားတယ်။ အဲဒီလို နိုင်ငံတကာ ညီလာခံကြီးသို့ တက်ရောက် မိန့်ခွန်းပေးနိုင်ဖို့ အရည်အချင်းမရှိလို့ လုပ်တာဆိုကာ တီးတိုး ထင်ကြေးပေးသံတွေလည်း ထွက်လာတယ်။ ဘက်မလိုက်လှုပ်ရှားမှုဆိုတာကို သိထားဖို့ လိုအပ်လာပြီ။
ဗိုလ်ချုပ်ကြီးနေ၀င်းနှင့်ဦးဖေခင်
ဘက်မလိုက်လှုပ်ရှားမှုအကြောင်း ပြည့်ပြည့်စုံစုံရေးပေးပါလို့ ဦးနေ၀င်းက မေတ္တာရပ်ခံတဲ့အတိုင်း ဦးဖေခင်ကရေး ကြောင်းဖတ်လိုက်ရတယ်။ စဉ်းစားကြည့်ရအောင်။ စစ်အာဏာရှင် ဗိုလ်ချုပ်ကြီးနေ၀င်းဟာ သူ့ဆရာအရင်း ဦးန၊ဦးဗဆွေ၊ ဦးကျော်ငြိမ်းတို့ကို ထောင်သွင်းအကျဉ်းချ၊ ကွယ်လွန်သွားတဲ့ မြန်မာ့ဂုဏ်ဆောင် ဦးသန့်ကိုလည်း ရုပ်ပျက်ဆင်းပျက်လုပ်၊ သူအကြီးအကျယ် မုန်းတဲ့ ဗိုလ်ချုပ်အောင်ဆန်းနဲ့ ရင်းနှီးသူဦးဖေခင်ကို မေတ္တာရပ်ခံပါ့မလား? ပြီးတော့ မွတ်စလင်လေ။
ဆက်စဉ်းစားကြဖို့ ကျနော်ကြားဖူးတာကို ပြောပြပါ့မယ်။ ရန်ကုန်ဂေါက်ကွင်းမှာ ဒေါက်တာလှဟန်ကို ဦးဖေခင်က ဘက်မလိုက်လှုပ်ရှားမှု ( Non-Alignment Movement ) အကြောင်း ပြောပြဖြစ်တယ်။ ဖဆပလမှာ ဦးနုနဲ့အတူလုပ်ခဲ့တာ၊ ၁၉၄၇ ခုနှစ်ကတည်း ဆက်တိုက်သံအမတ်ကြီးလုပ်လာစဉ် အီဂျစ်မှာတာဝန်ကျတော့ သမ္မတနတ်ဆာနဲ့ရင်းနှီးတာကြောင့် အများကြီးသိထားတယ်။ နိုင်ငံခြားရေးဝန်ကြီးဟောင်း ဒေါက်တာလှဟန်က တိုက်တွန်းတော့ ဦးဖေခင်က တိကျ မှန်ကန်ဖို့ ဦးနု အခန်းချန်ထားလို့ မရဘူးဆိုတာ ထောက်ပြပြီးနောက် ရေးဖြစ် သွားတာပါ။ အဲဒီအချိန်က နိုင်ငံရေးနဲ့ ပုဂ္ဂိုလ်ရေး အခြေအနေများကို ကြည့်ရင် ဦးနေ၀င်းကမေတ္တာရပ်ခံတဲ့အတိုင်း ဦးဖေခင်ကရေးတယ်ဆိုတာ မဖြစ်နိုင်ပါ။
အပြစ်ရှာခြင်းမဟုတ်
မိမိထက် အသက်လေးဆယ်လောက်ငယ်တဲ့ လူငယ်စာရေးဆရာ နှစ်ယောက်အား မထောက်မထား အပြစ်ရှာဟု ဆိုသူများရှိနိုင်သလို၊ ဘာမဟုတ်တာလေးတွေကို ပုံကြီးချဲ့တယ်လို့ ပြောချင် သူတွေကလည်း ပြောချင်ကြပေ လိမ့်မယ်။ သတင်းနောက်ခံ ဆောင်းပါး ဆိုတာ တိကျမှန်ကန်ရမယ်၊ ဖြစ်စေချင်တာရယ်၊ ဖြစ်နိုင်တာရယ်၊ တကယ်ဖြစ်တာရယ်တို့ကို ခွဲသိရမယ်၊ ရေရှည်ရေးဖို့ အထောက်အထား အကိုးအကားတွေ စုဆောင်းထား ရမယ်ဆိုတဲ့ အတွေ့အကြုံကို ဝေငှချင်လို့ ခုလိုအပင်ပန်းခံကာ ရေးသားရခြင်းဖြစ်ပါတယ်။
ဖော်ပြပါဆရာနှစ်ယောက်သာမက တခြားလူငယ်ကလောင်ရှင်များ အတွက်ပါရည်ရွယ်တယ်၊ မြန်မာ့မွတ်စလင် သမိုင်းမှာ မကြုံစဖူးအဖြစ်ဆိုးနေတဲ့ကာလရဲ့ အနာဂတ်ဟာ လူငယ်တွေလက်ထဲရှိတာပါ။ ဒီဆောင်းပါးရေးခြင်းအားဖြင့် ကျနော့လို သက်ကြီးကလောင်အို အဖို့စေတနာ ပီတိကလွဲလို့ နာမည်ကျော်စရာ အကြောင်းမရှိပါဘူး။ အဖြစ်သဘော ပေါ့ပေါ့တန်တန် မရေးကြပဲ အဆင့်မီကလောင်ရှင် (Professional Writer) ဖြစ်စေချင်တဲ့ စေတနာကိုသိမြင်လာကြလို့ လိုလားကြတယ်ဆိုရင် ရေးပြစရာတွေ အများကြီး၊ကျနော့ထံ တိုက်ရိုက်ဆက်သွယ်ကြရင် နွေးထွေးစွာကြိုဆိုပါတယ်။
ဟာဂျီ-၀င်းအောင်
Email: [email protected]
