Blog

ဖေဖော်ဝါရီလ ၄၊ ၂၀၁၄
M-Media

– ဆစ်ခ်ခွဲထွက်ရေးသမားများအား နှိပ်ကွပ်ရန်အတွက် အိန္ဒိယနိုင်ငံအနောက်ပိုင်း Amritsar မြို့ရှိ ဆစ်ခ် ဘာသာဝင်များ အထွဋ်အမြတ်ထားရာ Golden Temple ဘုရားကျောင်းတွင် ၁၉၈၄ ခုနှစ်ကဖြစ်ပွားခဲ့သည့် တိုက်ခိုက်မှုအား ပြုလုပ်ရန် ဗြိတိန်မှ အကြံဥာဏ်ပေးခဲ့ကြောင်း စုံစမ်းစစ်ဆေးမှုများအရ သိရှိရသည်ဟု ဗြိတိန် နိုင်ငံခြားရေးဝန်ကြီး ၀ီလီယံဟော့ဂ်က ယနေ့တွင် ပြောကြားခဲ့သည်။

ထိုစဉ်က ၀န်ကြီးချုပ်ဖြစ်သည် မာဂရက်သက်ချာက ထိုတိုက်ခိုက်မှုကိုပြုလုပ်ရန် အတွက် အိန္ဒိယကို အကြံပေးရန် ဗြိတိန် အထူးလေတပ်မှ အရာရှိ တစ်ယောက်အား စေလွှတ်ခဲ့သည်ဟု သတင်းများ ထွက်ပေါ်လာပြီးနောက် ထိုဘုရားကျောင်း တိုက်ခိုက်မှုအား ပြန်လည် စစ်ဆေးရန် ပြီးခဲ့သည့်လက ၀န်ကြီးချုပ် ကင်မရွန်းမှ အမိန့်ပေးခဲ့ခြင်းဖြစ်သည်။

“ယူကေရဲ့ ကူညီမှုကတော့ (အဆိုပါတိုက်ခိုက်မှု ပြုလုပ်ဖို့) အကြံပေးခဲ့ခြင်းပါ။ အဲဒီအကြံပေးမှုဟာ သုံးလကြာတဲ့အခါ အဲဒီဘုရားကျောင်းမှာ ဖြစ်ခဲ့တဲ့ ၀မ်းနည်းဖို့ကောင်းတဲ့ အဖြစ်အပျက် အတွက် အတိုင်းအတာ တစ်ခုအထိ သက်ရောက်ခဲ့ပါတယ်” ဟု ၀ီလီယံဟော့ဂ်က လွှတ်တော်သို့ ပြောကြားခဲ့သည်။

၁၉၈၄ ခုနှစ် ဇွန်လ ၃ ရက်မှ ၈ ရက်နေ့ အထိ ဖြစ်ပွားခဲ့သည့် Golden Temple ဆစ်ခ်ဘုရားကျောင်း တိုက်ခိုက်မှုအား ၀န်ကြီးချုပ် အင်ဒရာဂန္ဒီ၏ အမိန့်ဖြင့် အိန္ဒိယ အစိုးရမှ ပြုလုပ်ခဲ့ခြင်းဖြစ်ပြီး၊ ဆစ်ခ် ခွဲထွက်ရေးသမားများအား နှိမ်နင်းခြင်းဟု ခေါင်းစဉ် တပ်ခဲ့သည်။ ဘုရားကျောင်းအတွင်း ပွဲတော် ကျင်းပနေချိန် တင့်ကားများ၊ ရဟတ်ယာဉ်များ၊ အမြောက်များ အသုံးပြုကာ တိုက်ခိုက်ခဲ့သည့် အဆိုပါ တိုက်ခိုက်မှုတွင် အရပ်သား ၄၉၂ ဦး သေဆုံးခဲ့သည်ဟု အစိုးရက သတင်းထုတ်ပြန်ခဲ့သည်။ သို့သော် လွတ်လပ်သော စုံစမ်း စစ်ဆေးရေး အဖွဲ့၏ စစ်ဆေးမှုများအရ အရပ်သားသေဆုံးမှုမှာ ၅၀၀၀ ခန့်အထိ ရှိနိုင်သည်ဟု သိရသည်။