မေ ၁၀၊ ၂၀၂၁
M-Media
-နိုင်ငံတစ်ဝှမ်းက ဆန္ဒပြသူတွေကို စောင့်ကြည့်ထောက်လှမ်းမှုနဲ့ တိုင်းရင်းသားဒေသတွေက စစ်ပွဲတွေမှာ စစ်ကောင်စီတပ်တွေဟာ တရုတ်ထုတ် တိုက်ခိုက်ရေးဒရုန်းတွေကို အသုံးပြုနေတယ်လို့ လေ့လာစောင့်ကြည့်သူတွေက ပြောကြားလိုက်ပါတယ်။
ဖေဖော်ဝါရီ ၁ ရက်နေ့ အာဏာသိမ်းပြီးနောက်ပိုင်း ဖြစ်ပေါ်လာတဲ့ နိုင်ငံတစ်ဝှမ်းက ဆန္ဒပြမှုတွေမှာ စစ်ကောင်စီတပ်တွေရဲ့လက်ချက်ကြောင့် အနည်းဆုံး လူ ၇၅၀ လောက် အသတ်ခံခဲ့ရပါတယ်။
ဆန္ဒပြသူအများအပြားကို စစ်ကောင်စီ စနိုက်ပါတပ်သားတွေက သတ်ဖြတ်ခဲ့တဲ့ မန္တလေးမှာ ဆန္ဒပြပွဲတွေကို ဒရုန်းနဲ့ ပျံသန်းကြည့်ရှုတာမျိုး တွေ့ရပြီး စနိုက်ပါသမားတွေဟာ ဒရုန်းထောက်လှမ်းရေးစနစ်က ပေးပို့တဲ့ အချက်အလက်တွေကို အသုံးပြုကာ ပစ်ခတ်တာမျိုး ရှိနိုင်တယ်လို့ ကျွမ်းကျင်သူတွေက သုံးသပ်ပါတယ်။
လက်ရှိ တိုက်ပွဲတွေဖြစ်နေပြီး လေကြောင်းက ဗုံးကြဲတိုက်ခိုက်တာမျိုးတွေ ရှိနေတဲ့ ကချင်ပြည်နယ်နဲ့ ကရင်ပြည်နယ်တွေမှာလည်း စစ်ကောင်စီက တရုတ်ဒရုန်းတွေ အသုံးပြုနေတာကို တွေ့ရပါတယ်။
ယူကေအခြေစိုက် တတ်သိပညာရှင်များအဖွဲ့ Janes International Defense Review နဲ့ အမေရိကန်အခြေစိုက် တတ်သိပညာရှင်များအဖွဲ့ Center for Strategic and International Studies (CSIS) က စစ်ကောင်စီတပ်တွေ အသုံးပြုနေတဲ့ တရုတ်ဒရုန်းဟာ CH-3A အမျိုးအစား ဖြစ်တယ်လို့ အတည်ပြုပါတယ်။
မေလ ၆ ရက်နေ့ CSIS က ထုတ်ပြန်တဲ့ စာတမ်းမှာ မိတ္ထီလာက ရှမ်းတဲ လေတပ်စခန်းဌာနချုပ်အတွင်း CH-3A ဒရုန်းတွေ ချထားတာကို ဂြိုဟ်တုဓာတ်ပုံတွေနဲ့တကွ ဖော်ပြထားပါတယ်။
အဲဒီလေတပ်စခန်းဟာ ဧပြီလ ၂၉ ရက်နေ့က ရှော့တိုက်ဒုန်း ၅ လုံးနဲ့ အထုခံရတဲ့စခန်းလည်း ဖြစ်ပါတယ်။ ထိခိုက်ဒဏ်ရာရတာ၊ စစ်သုံးပစ္စည်းတွေ ပစ္စည်းတာ စတဲ့ သတင်းတွေတော့ ထွက်မလာပါဘူး။ တိုက်ခိုက်သူတွေဟာ တရုတ်ဒရုန်းတွေကို ပစ်မှတ်ထားတာလားဆိုတာကိုလည်း တိတိကျကျ မသိရပါဘူး။
CH-3A ဒရုန်းတွေမှာ ဂြိုဟ်တုအချက်အလက်ပေးပို့မှုစနစ် ပါဝင်ပြီး ဒုံးကျည်အပါအဝင် အလေးချိန် ၁၈၀ ကီလိုဂရမ် သယ်ဆောင်နိုင်ပါတယ်။ အကွာအဝေး ၉၆၀ ကီလိုမီတာလောက်အထိ ပျံသန်းနိုင်ပြီး ၆ နာရီကြာ အသုံးပြုနိုင်ပါတယ်။ AR-1 လေဆာပဲ့ထိန်း ဝေဟင်ကမြေပြင်ပစ် ဒုံးကျည်၊ YC-200 ပဲ့ထိန်းဗုံးတွေကိုလည်း အဲဒီဒရုန်းမှာ တပ်ဆင်နိုင်ပါတယ်။
CH-3A ဒရုန်းကို တရုတ်နိုင်ငံပိုင် လေကြောင်းကိုပိုရေးရှင်း CASC ရဲ့ အခွဲတစ်ခုဖြစ်တဲ့ Long-March International က ထုတ်လုပ်တာပါ။
တရုတ်ဟာ ၂၀၁၄-၂၀၁၅ ခုနှစ်အတွင် CH-3A ဒရုန်းလေယာဉ် တစ်ဒါဇင်လောက်ကို ရှမ်းတဲလေတပ်စခန်းဌာနချုပ်ကို ပေးပို့ခဲ့တယ်လို့ စောင့်ကြည့်ရေးအဖွဲ့တစ်ခုဖြစ်တဲ့ Stockholm International Peace Institute (SIPRI) က ရရှိခဲ့တဲ့ အချက်အလက်တွေမှာ တွေ့ရပါတယ်။ စစ်တပ်ရဲ့ ဒီဝယ်ယူမှုဟာ နယ်စပ်ဒေသမှာရှိတဲ့ တိုင်းရင်းသားတပ်တွေကို တိုက်ခိုက်ရာမှာ အသုံးပြုဖို့ ရည်ရွယ်ပုံ ရပါတယ်။
ဒီဒရုန်းကို ကချင်ပြည်နယ်မှာ အသုံးပြုတာ တွေ့ရသလို၊ ရခိုင်ပြည်နယ်က AA နဲ့ဖြစ်တဲ့ တိုက်ပွဲမှာလည်း ထောက်လှမ်းရေးအတွက် CH-3A ဒရုန်းကို အသုံးပြုတယ်လို့ အနောက်ပိုင်းတိုင်းစစ်ဌာနချုပ်က ဗိုလ်မှူးကြီး ဝင်းဇော်ဦးက ဇန်နဝါရီလမှာ Myanmar Now သတင်းဌာနကို ပြောကြားခဲ့ပါတယ်။
CH-3A ဒရုန်းကို တရုတ်က အလ်ဂျီးရီးယားကို ရောင်းထားသလို ဒီထက်ပိုပြီး အဆင့်မြင့်တဲ့ CH-4 ဒရုန်းတွေကို ပါကစ္စတန်၊ အင်ဒိုနီးရှား၊ အီဂျစ်၊ နိုက်ဂျီးရီးယားနဲ့ အီသီယိုးပီးယားတို့အပါအဝင် နိုင်ငံတော်တော်များများရဲ့ စစ်တပ်တွေက ဝယ်ယူထားကြပါတယ်။ ဒါပေမယ့် အဲဒီနိုင်ငံတွေက ဆန္ဒပြမှုတွေ၊ လူထုအုံကြွမှုတွေမှာ ဒီဒရုန်းကိုသုံးပြီး စောင့်ကြည့်တာမျိုး မရှိပါဘူး။
စစ်ကောင်စီရဲ့ လေတပ်မှာ ရုရှားထုတ် MiG-29 တိုက်လေယာဉ်နဲ့ တိုက်ခိုက်ရေးရဟတ်ယာဉ်တွေကလွဲရင် ကျန်တဲ့ လေယာဉ်တွေ၊ လေတပ်သုံးစနစ်တွေအားလုံးဟာ တရုတ်ထုတ်တွေ ဖြစ်ပါတယ်။
တရုတ်ထုတ်တွေဖြစ်တဲ့ မြေပြင်တိုက်ခိုက်ရေးယာဉ် Nanchang Q-5၊ တိုက်လေယာဉ် Chengdu J-7 fighters နဲ့ Shenyang J-6၊ ပို့ဆောင်ရေးလေယာဉ် Y-8 ကို စစ်ကောင်စီတပ်တွေက လက်ရှိမှာ အသုံးပြုနေပါတယ်။
မြန်မာစစ်တပ်မှာ CH-3A က အဆင့်အမြင့်ဆုံး တရုတ်ဒရုန်းဖြစ်ပေမယ့် အခြားတစ်ခုဖြစ်တဲ့ Sky 02A ကိုလည်း အသုံးပြုနေပါတယ်။ တရုတ်ထုတ် ဒရုန်းကို ပြည်တွင်းမှာ အသွင်ပြောင်း ထုတ်လုပ်ထားတဲ့ Yellow Cat A2 ဒရုန်းလေယာဉ် အနည်းဆုံး ၂၂ စီး စစ်ကောင်စီတပ်မှာ ရှိနေပါတယ်။
မြန်မာနိုင်ငံမှာ တရုတ်ထုတ်ဒရုန်းရှိတဲ့ နောက်ထပ်လက်နက်ကိုင်အဖွဲ့ တစ်ခုကတော့ ၀,တပ်ဖွဲ့ UWSA ဖြစ်ပါတယ်။ ၂၀၁၈ ပန့်ဆန်းမှာပြုလုပ်တဲ့ စစ်ရေးပြအခမ်းအနားမှာ ၀,တပ်ဖွဲ့က ဒီဒရုန်းတွေကို ထုတ်ပြခဲ့ပါတယ်။
၀,မှာ တရုတ်ထုတ် ပခုံးထမ်း လေယာဉ်ပစ်ဒုံး MANPADS တွေလည်း ရှိနေပါတယ်။
တရုတ်ဟာ မြန်မာစစ်တပ်ကို အဓိက လက်နက်ရောင်းချတဲ့ နိုင်ငံဖြစ်ပြီး စစ်အာဏာသိမ်းပြီးနောက်ပိုင်း လက်နက်တွေ ထပ်ပြီး ထောက်ပံ့နေလားဆိုတာ တိတိကျကျ မသိရပါဘူး။
Ref: Asia Times
