Blog

ဧပြီ ၂၃၊ ၂၀၂၁
M-Media

-မနက်ဖြန်ပြုလုပ်မယ့် အာဆီယံ ထိပ်သီးအစည်းအဝေးဟာ မြန်မာ့အရေးကို ငြင်ငြင်သာသာဖြေရှင်းနိုင်ရေး လမ်းစဖော်ဆောင်ပေးလိမ့်မယ်လို့ မျှော်လင့်ကြောင်း တရုတ်နိုင်ငံခြာရေးဝန်ကြီး ဝမ်ယီက ပြောကြားလိုက်ပါတယ်။

အင်ဒိုနီးရှားနိုင်ငံ ဂျကာတာမှာလုပ်မယ့် ဒီအစည်းအဝေးဟာ ဖေဖော်ဝါရီ ၁ ရက်နေ့ အာဏာသိမ်းပြီးတဲ့နောက် မြန်မာနိုင်ငံမှာ ဖြစ်ပေါ်နေတဲ့ မတည်ငြိမ်မှုတွေကို ဖြေရှင်းဖို့အတွက် နိုင်ငံတကာအသိုင်းအဝိုင်းရဲ့ ပထမဆုံး ကြိုးပမ်းမှုပါ။

ဝမ်ယီဟာ ဘရူနိုင်း၊ ထိုင်းနိုင်ငံခြားရေးဝန်ကြီးတို့နဲ့ မနေ့က ဆွေးနွေးခဲ့ပါတယ်။ ဘရူနိုင်းဟာ လက်ရှိ အာဆီယံဥက္ကဌဖြစ်ပြီး ထိုင်းကတော့ ဘရူနိုင်းပြီးရင် ဥက္ကဌအဖြစ် တာဝန်ယူရမှာပါ။

“အစည်းအဝေးဟာ မြန်မာနိုင်ငံအခြေအနေကို ငြင်ငြင်သာသာဖြေရှင်းရမယ်ဆိုတဲ့ အသိမျိုးရရှိဖို့ ဦးတည်ဆဲ့ ကောင်းမွန်တဲ့စတင်ခြင်း ဖြစ်လာမယ်လို့ တရုတ်နိုင်ငံက မျှော်လင့်ပါတယ်”

အာဆီယံထိပ်သီးအစည်းအဝေးကို တရုတ်က တက်မလားဆိုတာ တိတိကျကျ မသိရသေးပါဘူး။

နိုင်ငံကာက မသင့်လျော်တဲ့ ကြားဝင်ဆောင်ရွက်မှုမျိုးကို ရှောင်ရှားရမယ်လို့လည်း ဝမ်ယီက ထည့်သွင်းပြောဆိုခဲ့ပါတယ်။

“နိုင်ငံတကာအဖွဲ့တွေက ဘာမသိညာမသိနဲ့ ပြင်းပြင်းထန်ထန် ဖိအားပေးတာမျိုးဟာ နိုင်ငံတစ်နိုင်ငံရဲ့ ပြည်တွင်းရေးပြဿနာကို ပြေလည်စေဖို့ အထောက်အကူ မဖြစ်ဘူးဆိုတာ လက်တွေ့အဖြစ်အပျက်တွေက သက်သေပြနေပါတယ်။ မငြိမ်မသက်ဖြစ်စေတာ၊ အခြေအနေကို ပိုမိုဆိုးရွားစေကာ ဒေသတွင်းကို ထိခိုက်တာ၊ မတည်မငြိမ်ဖြစ်တာမျိုးပဲ ဖြစ်စေတာပါ”

​မြန်မာနိုင်ငံက တင်းမာမှုတွေ လျော့ကျရေး ဆောင်ရွက်ရာမှာ နိုင်ငံတကာအသိုင်းအ၀ိုင်းဟာ ဆန့်ကျင်ဖက်နေရာက ရှိတာထက် ဓမ္မဓိဌာန်ကျပြီး မျှတရဲ့ရပ်တည်ချက်မျိုးရှိဖို့ တရုတ်နိုင်ငံက တိုက်တွန်းတယ်လို့လည်း ဝမ်ယီက ထည့်သွင်းပြောဆိုခဲ့ပါတယ်။

“တရုတ်နိုင်ငံဟာ အာဆီယံအဖွဲ့နဲ့ ဆက်လက်ပြီး နီးနီးကပ်ကပ် ဆက်ဆံသွားဖြစ်သလို၊ မြန်မာ့အရေး အာဆီယံလမ်းကြောင်းနဲ့ ဆက်နွယ်တဲ့ ဘယ်လိုလုပ်ငန်းမျိုးကိုမဆို ကိုင်တွယ် ဆောင်ရွက်ပေးသွားမှာ ဖြစ်ပါတယ်”

Ref: KFGO

ဧပြီ ၂၂၊ ၂၀၂၁
M-Media

-စစ်အာဏာသိမ်းမှု နောက်ဆက်တွဲ ဂယက်တွေကြောင့် မြန်မာနိုင်ငံမှာ နောက်ထပ် ၆ လအတွင်း လူ ၃ သန်းကျော် စားနပ်ရိက္ခာပြတ်လတ်မှုနဲ့ ကြုံတွေ့ရနိုင်တယ်လို့ ကုလသမဂ္ဂ စားနပ်ရိက္ခာအဖွဲ့ WFP က သတိပေးလိုက်ပါတယ်။

ရန်ကုန်မြို့နဲ့ အနီးတစ်၀ိုက်က မြို့နယ်တွေမှာတောင် လူတွေဟာ ခြို့ခြံ စားသုံးရတာ၊ အဟာရနည်းတဲ့ အစားအသောက်တွေ စားရတာ၊ အကြွေးမြင့်တက်လာတာတွေ ဖြစ်နေပြီး နိုင်ငံတစ်ဝှမ်းက အခြားဒေသတွေရဲ့ အခြေအနေတွေကိုလည်း စောင့်ကြည့်နေတယ်လို့ WFP က ပြောပါတယ်။

“အလုပ်အကိုင်ဆုံးရှုံးသူတွေ ပိုပိုများလာပြီး စားနပ်ရိက္ခာဝယ်ယူဖို့ မတတ်နိုင်တော့ပါဘူး။ ချက်ခြင်းဖြစ်ပေါ်လာမယ့် ထိခိုက်ခံစားမှုကို လျော့ပါးစေဖို့နဲ့ စားနပ်ရိက္ခာဖူလှုံရေးမှာ စိုးရိမ်ဖွယ်ရာ ဆိုးဆိုးရွားရွား ဖြစ်လာတာကို တားဆီးဖို့အတွက် ထိရောက်တဲ့ ဆောင်ရွက်မှုတွေ ချက်ခြင်း လိုအပ်နေပါတယ်” လို့ WFP ရဲ့ မြန်မာနိုင်ငံဆိုင်ရာ ဌာနေကိုယ်စားလှယ် စတီဖင် အန်ဒါဆန်က ပြောကြားခဲ့ပါတယ်။

WFP ဟာ မြို့ကြီးတွေနဲ့ မကြာသေးခင်က အိုးအိမ်စွန့်ခွာထွက်ပြေးရတဲ့ ချို့တဲ့မြို့နယ်တွေက ထိခိုက်ခံစားလွယ်သူ စုစုပေါင်း ၂ သန်းအတွက် စားနပ်ရိက္ခာထောက်ပံ့ရေး တိုးမြှင့်ဆောင်ရွက်ဖို့ ကြိုးစားနေပါတယ်။

နိုင်ငံတစ်ဝှမ်း ကုန်စျေးနှုန်းတွေ မြင့်တက်လာတာကိုလည်း WFP က ထောက်ပြခဲ့ပါတယ်။ ဆန်စျေးဟာ ဇန်နဝါရီလကထက်စာရင် ၅ ရာခိုင်နှုန်း မြင့်တက်လာခဲ့ပြီး၊ ဟင်းချက်ဆီစျေးက ၁၈ ရာခိုင်နှုန်းကနေ ၂၅ ရာခိုင်နှုန်းအထိ၊ နယ်စပ်ဒေသတွေမှာ ဒီထက်ပိုပြီး တက်လာတာကို တွေ့ရတယ်လို့ WFP က ဆိုပါတယ်။

မြန်မာနိုင်ငံမှာ မိမိတို့ စားနပ်ရိက္ခာ ကူညီထောက်ပံ့ပေးနေတဲ့ လူဦးရေ ၁.၃ သန်း ရှိပြီး နောက်ထပ် လအနည်းငယ်အတွင်းမှာ ၃.၃ သန်းအထိ ရှိလာမှာဖြစ်ကာ ကန်ဒေါ်လာ ၁၀၆ သန်း အရေးတကြီး လိုအပ်နေတယ်လို့ WFP က ထည့်သွင်းပြောဆိုခဲ့ပါတယ်။

Ref: Relief Web

ဧပြီ ၂၂၊ ၂၀၂၁
M-Media

-နိုင်ငံမြောက်ပိုင်းက အဖိုးတန် ကျောက်မြတ်ရတနာထွက်ရာ ဒေသတွေကို စစ်ကောင်စီတပ်တွေက ပိုမိုထိန်းချုပ်လာနေပြီး သယံဇာတတွေကို ပိုမိုအမြတ်ထုတ်လာနိုင်တဲ့အန္တရာယ် ရှိနေတယ်လို့ ကျွမ်းကျင်သူတွေက သတိပေးခဲ့ပါတယ်။

ကမ္ဘာ့အကြီးဆုံး ကျောက်မြတ်တွင်းတစ်ခုဖြစ်ပြီး၊ တန်ဖိုးအကြီးဆုံး ရတနာတွေထွက်တဲ့ ကချင်ပြည်နယ် ဖားကန့်မှာ စစ်ကောင်စီက တပ်တွေကို အများအပြား ချထားကာ တစ်နိုင်တစ်ပိုင် တူးဖော်သူတွေ၊ ရေမဆေးကျောက် ရှာသူတွေကို တူဖော်ခွင့်၊ လုပ်ကိုင်ခွင့်မပေးတော့သလို ဒေသတွင်း ကျောက်မြတ်စျေးလည်း ဖွင့်လို့မရတော့ဘူးလို့ ဒေသခံတွေက ပြောပါတယ်။

“နေရာတော်တော်များများက ကျောက်တူးဖို့ အန္တရာယ်ရှိတဲ့နေရာတွေ ဖြစ်ကုန်ပြီ။ လက် ဒါမှမဟုတ် စက်ငယ်တွေနဲ့ တူးလို့ရတဲ့နေရာ နည်းနည်းလေးပဲ ကျန်ပါတော့တယ်” လို့ Sut Naw (အမည်လွှဲ)က ပြောပါတယ်။

စစ်သားတွေ၊ ရဲတွေဟာ ကုမ္ပဏီကြီးတွေကို စောင့်ကြပ်နေပြီး လမ်းတွေမှာလည်း နေ့ရောညပါ လှည့်လည်ကာ လူတွေ၊ ကားတွေကို ရပ်တန့်ပြီး ကျောက်တွေ၊ အခြား တန်ဖိုးရှိပစ္စည်းတွေ ပါမပါ စစ်ဆေးကာ၊ ဖုန်းကိုလည်း ယူကြည့်တယ်လို့ သူက ပြောပါတယ်။

“သွေးစုပ်ဖုတ်ကောင်ကားတွေ ကျွန်တော် ကြည့်ဖူးတယ်ဗျ။ အဲဒီလို အနေအထားမျိုးမှာ ကျွန်တော် နေထိုင်ရလိမ့်မယ်လို့ ဘယ်တုန်းကမှ မထင်ထားဘူး”

မြန်မာနိုင်ငံရဲ့ ကျောက်မြတ်လုပ်ငန်းကို စစ်တပ်က အုပ်စီး လုပ်ကိုင်နေတာဖြစ်ပါတယ်။ ဒီလုပ်ငန်းကရတဲ့ဝင်ငွေဟာ တစ်နှစ်ကို ကန်​ဒေါ်လာ ၃၁ ဘီလီယံလောက် ရှိတယ်လို့ ၂၀၁၅ ခုနှစ်မှာ နိုင်ငံတကာစောင့်ကြည့်အဖွဲ့ Global Witness က ထုတ်ပြန်ခဲ့ပါတယ်။

ဒီအကျိုးစီးပွားတွေကို စစ်ခေါင်းဆောင်တွေကသာ ရယူခံစားနေပြီး မြန်မာနိုင်ငံရဲ့ ဒီမိုကရေစီနဲ့ ငြိမ်းချမ်းရေးကို ခြိမ်းခြောက်နိုင်တဲ့ အမြတ်ထုတ်မှုလို့လည်း Global Witness က သမုတ်ခဲ့ပါတယ်။

အာဏာသိမ်းပြီးနောက်ပိုင်း စစ်တပ်ဟာ တိုင်းပြည်ရဲ့ သယံဇာတ ထုတ်ယူမှုလုပ်ငန်းကို လုံး၀ ထိန်းချုပ်ထားလိုက်ပြီး အမြတ်ထုတ်မှုလည်း ပိုမို မြင့်တက်လာလိမ့်မယ်လို့ Global Witness ရဲ့ မြန်မာနိုင်ငံဆိုင်ရာ မူဝါဒအကြံပေး ကီလ်ဒီယက်ဇ်က ပြောကြားခဲ့ပါတယ်။

“တိုင်းပြည်ရဲ့ သယံဇာတ ကြွယ်မှုဟာ လက်နက်ဝယ်ဖို့၊ ချမ်းသာအောင်နဲ့ အာဏာသက်ဆိုးရှည်အောင်လုပ်ဖို့ အချက်ပဲလို့ ရှုမြင်ပြီး ဒီလုပ်ငန်းကို ပိုထိန်းချုပ်ဖို့ စစ်တပ်က ထင်ရာစိုင်းတော့မယ့်အန္တရာယ် ကြီးကြီးမားမား ရှိနေပါပြီ”

Ref: Aljazeera