ဧပြီ ၂၁၊ ၂၀၂၁
M-Media

-မြန်မာ့အရေး အာဆီယံခေါင်းဆောင်တွေနဲ့ သီးခြား တွေ့ဆုံဆွေးနွေးဖို့အတွက် ကုလသမဂ္ဂ အတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ် ခရစ္စတင်း ရှာရ်နာ ဘာဂီနာဟာ မနက်ဖြန်မှာ ဂျကာတာကို သွားရောက်မယ်လို့ သိရပါတယ်။

​အာဆီယံ အတွေးရေးမှူးရုံးရှိတဲ့ ဂျကာတာမှာ စနေနေ့ကျရင် အာဆီယံခေါင်းဆောင်တွေ တွေ့ဆုံပြီး မြန်မာနိုင်ငံက ပြဿနာအတွက် ဆွေးနွေးကြမှာ ဖြစ်ပါတယ်။ ဒီအစည်းအ​ဝေးကို စစ်ကောင်စီ အကြီးအကဲ ဗိုလ်ချုပ်မှူးကြီး မင်းအောင်လှိုင်လည်း လူကိုယ်တိုင် တက်ရောက်မယ်လို့ သတင်းထွက်နေပါတယ်။

ဘာဂီနာက ဒီ ထိပ်သီးအစည်းအဝေးကို တက်ရောက်မှာ မဟုတ်ဘဲ အာဆီယံအဖွဲ့ တာဝန်ရှိသူတွေနဲ့ သီးခြားစီ တွေ့ဆုံမှာဖြစ်ပါတယ်။ အင်ဒိုနီးရှား၊ စင်ကာပူ၊ ဘရူးနိုင်းတို့က နိုင်ငံခြားရေးဝန်ကြီးတွေနဲ့ တွေ့ဆုံဖို့ စီစဉ်ထားတယ်လို့ ကုလသမဂ္ဂက အမည်မဖော်လိုတဲ့ တာဝန်ရှိသူတစ်ဦးက ပြောကြားခဲ့ပါတယ်။

ဂျကတာကို လာဖို့ရှိတဲ့ ဗိုလ်ချုပ်မှူးကြီး မင်းအောင်လှိုင်နဲ့တွေ့ဖို့ ဘာဂီနာက တောင်းဆိုထားတယ်လို့လည်း Nikkei Asia သတင်းဌာနက ဖော်ပြပါတယ်။

ဘာဂီနာဟာ မြန်မာနိုင်ငံမှာ စစ်ကောင်စီရဲ့ အကြမ်းဖက်မှုတွေ ရပ်တန့်ပြီး ဒီမိုကရေစီ ပြန်လည်​ဖော်ဆောင်ရေး သက်ဆိုင်သူတွေနဲ့ ဆွေးနွေးဖို့အတွက် ပြီးခဲ့တဲ့ ၂ ပတ်ကတည်းက ထိုင်းနိုင်ငံကို ရောက်ရှိနေတာပါ။ စစ်ကောင်စီခေါင်းဆောင်တွေနဲ့ စကားပြောခွင့်ရဖို့ ကြိုးစားခဲ့ပေမယ့် မအောင်မြင်ခဲ့ပါဘူး။

Ref : Reuters

ဧပြီ ၂၁၊ ၂၀၂၁
M-Media

-အာဏာသိမ်းစစ်ကောင်စီဟာ ဖေဖော်ဝါရီလအတွင်းက ရုရှားထံကနေ ရေဒါပစ္စည်းတွေ ရယူခဲ့တယ်လို့ သိရပါတယ်။

အာဏာမသိမ်းခင် ပြီးခဲ့တဲ့ဇန်နဝါရီလ ရုရှားကာကွယ်ရေးဝန်ကြီး ဆာဂျီရှိုဂူရဲ့ မြန်မာနိုင်ငံခရီးစဉ်မှာ ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံစဉ်အတွင်း မြေပြင်ကဝေဟင်ပစ် ဒုံးကျည်စနစ် Pantsir-S1၊ ထောက်လှမ်းရေးဒရုန်း Orlan-10E နဲ့ ရေဒါပစ္စည်းတွေ ရောင်းချဖို့ သဘောတူခဲ့တာပါ။

ဖေဖော်ဝါရီလက မြန်မာနိုင်ငံကိုရောက်လာတဲ့ ဒေါ်လာ ၁၄.၇ သန်းတန် ရေဒါပစ္စည်းတွေဟာ ဒီရောင်းချမှုက တစ်စိတ်တစ်ပိုင်းလားဆိုတာ တိတိကျကျ မသိရပါဘူး။

ဒီကိစ္စအတွက် မေးမြန်းမှုကို ရုရှားအကောက်အခွန်ဌာန FCS က မဖြေခဲ့ဘူးလို့ The Moscow Times က ဖော်ပြပါတယ်။

အာဏာသိမ်းမှုကြောင့် နိုင်ငံတကာက ဖယ်ကျဉ်ခံလာရတဲ့ မြန်မာစစ်တပ်ကို ထောက်ပံ့မှုတိုးမြှင့်ဖို့ ရုရှားက ဆောင်ရွက်နေတာဖြစ်ပါတယ်။

ပြီးခဲ့တဲ့မတ်လ ၂၇ ရက်နေ့ စစ်ကောင်စီရဲ့ တပ်မတော်နေ့အခမ်းအနားကို ရုရှာ ဒုတိယကာကွယ်ရေးဝန်ကြီး အလက်ဇန်းဒါး ဖိုမင် တက်ရောက်ခဲ့ပြီး နှစ်နိုင်ငံ စစ်ရေး ပူးပေါင်းဆောင်ရွက်မှု တိုးမြှင့်သွားမယ်လို့ ကတိပြုခဲ့ပါတယ်။

ပြီးခဲ့တဲ့ ၁၀ နှစ်အတွင်း မြန်မာစစ်တပ်ဟာ ရုရှားကနေ ကန်ဒေါ်လာ ၈၀၇ သန်းဖိုး လက်နက်တွေ ဝယ်ယူခဲ့ပြီး တရုတ်ထံကပြီးရင် ဒုတိယအများဆုံး ဝယ်ယူမှုဖြစ်တယ်လို့ ၂၀၁၉ ခုနှစ် Stockholm International Peace Research Institute က ထုတ်ပြန်ခဲ့ပါတယ်။

ဒီဇင်ဘာလတုန်းကလည်း ရုရှားဟာ ‘လျှို့ဝှက်’ ဆိုတဲ့ခေါင်းစဉ်နဲ့ ကန်ဒေါ်လာ ၉၆ သန်း တန်ဖိုးရှိတဲ့ ပစ္စည်းတွေကို မြန်မာစစ်တပ်ဆီ တင်ပို့ခဲ့ပါတယ်။ စစ်လက်နက်ပစ္စည်းတွေကို ရုရှားက ‘လျှို့ဝှက်’ ဆိုပြီး တံဆိပ်တပ်ထားလေ့ ရှိပါတယ်။

Ref: The Moscow Times

ဧပြီ ၂၀၊ ၂၀၂၁
M-Media

-လက်ရှိ မြန်မာနိုင်ငံမှာ ဖြစ်ပွားနေတဲ့ ပြဿနာကို မဖြေရှင်းတဲ့အပေါ် အဖွဲ့ရဲ့ ကြား၀င်မစွက်ရေး မူ၀ါဒနဲ့ ကာကွယ်ဆင်ခြေပေးတာမျိုး မလုပ်သင့်ဘူးလို့ ကုလအတွင်းရေးမှူးချုပ်ဟောင်း ဘန်ကီမွန်က တိုက်တွန်းလိုက်ပါတယ်။
မြန်မာ့အရေးနဲ့ပတ်သက်ပြီး ဧပြီလ ၂၄ ရက်နေ့ကျရင် အာဆီယံက ထိပ်သီးအစည်းအ၀ေး ကျင်းပပြုလုပ်မှာပါ။ ဒီပွဲကို အာဏာသိမ်းစစ်ကောင်စီအကြီးအကဲ ဗိုလ်ချုပ်မှူးကြီးမင်းအောင်လှိုင် အွန်လိုင်းကနေ တက်ရောက်ဖို့ ရှိနေပါတယ်။
ဘန်ကီမွန်က ဆိုးရွားတဲ့ လူ့အခွင့်အရေးချိုးဖောက်မှုတွေနဲ့ပတ်သက်ပြီး ထိထိရောက်ရောက် တားဆီးဆောင်ရွက်မှု မရှိတာကို ကြား၀င်မစွက်ရေး မူ၀ါဒဗန်းပြပြီး အာဆီယံက ဆင်ခြေမပေးသင့်ဘူးလို့ လုံခြုံရေးကောင်စီ အစည်းအ၀ေးမှာ ပြောကြားခဲ့ပါတယ်။
“မြန်မာနိုင်ငံကအခြေအနေကို ဒေသတွင်းကဦးဆောင်ပြီး ထိထိရောက်ရောက် ကိုင်တွယ်ဆောင်ရွက်ရာမှာ စည်းလုံးညီညွတ်ဖို့နဲ့ အရေးယူတာမျိုးရှိဖို့ လိုအပ်ပါတယ်။ အလွန်ဆိုးရွားနေတဲ့ လက်ရှိအခြေအနေကို ပြည်တွင်းရေးအဖြစ် မှတ်ယူလို့ မရဘူးဆိုတာ မြန်မာစစ်တပ်ကို အာဆီယံက ရှင်းရှင်းလင်းလင်း ပြောကိုပြောရပါမယ်”
မြန်မာနိုင်ငံကို လာရောက်ဖို့ မကြာသေးခင်က တောင်းဆိုခဲ့ပေမယ့် စစ်ကောင်စီက ခွင့်မပြုခဲ့ဘူးလို့လည်း ဘန်ကီမွန်က ထည့်သွင်းပြောကြားခဲ့ပါတယ်။
စစ်ကောင်စီရဲ့ အကြမ်းဖက်သတ်ဖြတ်မှုတွေ၊ သွေးချောင်းစီးမှုတွေ ချက်ခြင်းရပ်တန့်ရေး၊ မြန်မာနိုင်ငံမှာ ငြိမ်းချမ်းရေးနဲ့ ဒီမိုကရေစီ ဖော်ဆောင်ရေး ဆောင်ရွက်ဖို့ လုံခြုံရေးကောင်စီကို ဘန်ကီမွန်က တိုက်တွန်းခဲ့သလို ကုလအတွင်းရေးမှူး အန်တိုနီယို ဂူတာရက်စ်ကို စစ်ကောင်စီနဲ့ ဆွေးနွေးဖို့လည်း ဆော်သြခဲ့ပါတယ်။
Ref: Nikkei Asia