Blog

ဒီဇင်ဘာ ၈ ၊ ၂၀၁၃
M-Media

– ဗြိတိန်နိုင်ငံရှိ လေကြောင်းထိန်းချုပ်ရေး စနစ်တွင် ယမန်နေ့က ဖြစ်ပေါ်သည့် နည်းပညာပိုင်းဆိုင်ရာ ပြဿနာအနည်းငယ်ကြောင့် လေယာဉ်ခရီးစဉ် ရာပေါင်းများးစွာအား ဖျက်သိမ်းခဲ့ရပြီး ခရီသည်များမှာလည်း ဒေါသ ထွက်ခဲ့ကြသည်။ အင်္ဂလန်တောင်ပိုင်း ဆွမ်ဝစ်က်ရှိ ထိန်းချုပ်ရေးစခန်းမှ နေ့ပိုင်းနှင့် ညပိုင်း ထိန်းချုပ်ရေးစနစ်များအကြား ခလုပ်များမှားယွင်းမှုကြောင့် ဖြစ်ပေါ်ခဲ့ရခြင်းဖြစ်ပြီး လန်ဒန်ရှိ ဟီသရိုးလေဆိအပါဝင် အဓိကလေဆိပ်များအား ထိခိုက်ခဲ့ရခြင်းဖြစ်သည်ဟု အမျိုးသားလေကြောင်းလမ်းထိန်းသိမ်းရေးအဖွဲ့ NATS က ပြောကြားခဲ့သည်။

– ၂၀၁၄ ခုနှစ်နောက်ပိုင်း အာဖဂန်တွင် အမေရိကန်တပ်များရှိနေမည့် လုံခြုံရေးဆိုင်ရာ သဘောတူညီချက်အား လက်မှတ်ထိုးရန် နှောင့်နှေးနေခဲ့ပြီးနောက် အမေရိကန်က အာဖဂန်နစ္စတန်နိုင်ငံတွင် ပြုလုပ်မည့် ပရောဂျက် ၆ ခုအား ရပ်ဆိုင်းလိုက်သည်ဟု သိရသည်။ ထိုလုံခြုံရေးဆိုင်ရာ သဘောတူညီချက်နှင့် ပက်သက်၍ အာဖဂန် မျိုးနွယ်စုခေါင်းဆောင်များနှင့် ဆွေးနွေးညှိနှိုင်းပြီးနောက် သမ္မတဟာမစ်ကာဇိုင်းက လာမည်နှစ်တွင် ပြုလုပ်မည့် ရွေးကောက်ပွဲမတိုင်မီအထိ လက်မှတ်ထိုးမည်မဟုတ်ဟု ပြောဆိုထားသည်။

– နှစ်နိုင်ငံ မဟာဗျူဟာကျသော မိတ်ဖက်နိုင်ငံဖြစ်လာစေရန်အတွက် ယူကရိန်းသမ္မတ ဗစ်တာယန်ကိုဗစ်ခ်ျမှာ ရုရှားသမ္မတ ဗလာဒီမာပူတင်နှင့် ကုန်သွယ်ရေးဆိုင်ရာ ပူးပေါင်းဆောင်ရွက်ရေး ကိစ္စရပ်များကို သောကြာနေ့က ဆွေးနွေးခဲ့ကြသည်ဟု သိရသည်။ ယန်ကိုဗစ်ခ်ျမှာ ရုရှားနှင့် မိတ်ပျက်မည်ကို စိုးရိမ်သောကြောင့် ဥရောပယူနီယံ၏ ကုန်သွယ်မှုဆိုင်ရာ သဘောတူညီချက်ကို လက်မှတ်ထိုးရန်ငြင်းဆိုခဲ့ပြီး၊ ထိုလုပ်ရပ်ကြောင့် ယူကရိန်းပြည်သူများမှာ မြို့တော်ကိဗ်တွင် အစိုးရဆန့်ကျင်ဆန္ဒပြမှုများကို အဆက်မပြတ်ပြုလုပ်နေကြသည်။

– နိုင်ငံတော်မှ တရားဝင်ပြုလုပ်သည့် ညစာစားပွဲများတွင် ငါးမန်းတောင်၊ ငှက်သိုက်နှင့် တေားရိုင်းတိရစ္ဆာန်များအား ချက်ပြုတ်ထားသေား ဟင်းလျာများ မပါဝင်စေရန် တိကျသော ဥပဒေတစ်ခုကို တရုတ်နိုင်ငံ ယမန်နေ့တွင် ထုတ်ပြန်လိုက်သည်။ တရုတ်ကွန်မြူနစ်ပါတီ ဗဟိုကော်မတီနှင့် နိုင်ငံတော်ကောင်စီတို့မှ ပူးပေါင်းထုတ်ပြန်လိုက်သည့် အဆိုပါဥပဒေတွင် အစိုးရ သို့မဟုတ် ပါတီမှ တာဝန်ရှိသူများ နိုင်ငံအတွင်းရှိဒေသများသို့ သွားရောက်လည်ပတ်ရာတွင် ဒေသခံအာဏာပိုင်များမှ ပြုလုပ်သော တည့်ခင်းဧည်ခံမှုများအပေါ် ပြည်သူ့ဘဏ္ဍာများ သုံးစွဲရေးနှင့်ပက်သက်ပြီး တိကျသော ဥပဒများကိုလည်း အသေးစိတ်ဖော်ပြထားသည်။ တရုတ်နိုင်ငံ၏ ကြီးကျယ်သော ညစာစားပွဲများတွင် တောရိုင်းတိရစ္ဆာန်များအား ချက်ပြုတ်ထားသော ဟင်းလျာများမှာ အလွန်လူကြိုက်များသည်။

– အသက်အန္တရာယ်စိုးရိမ်ရသည့် ငှက်တုပ်ကွေး H7N9 ရောဂါအား လူတွင်ဖြစ်ပွားမှုကို တွေ့ရှိခဲ့ရသည်ဟု ဟောင်ကောင် ကျန်းမာရေးဆိုင်ရာ တာဝန်ရှိသူများက သောကြာနေ့တွင် ပြောကြားခဲ့သည်။ နိုင်ငံတောင်ပိုင်းရှိ အသက် ၈၀ အရွယ်အဖိုးအို တစ်ဦးတွင် တွေ့ရှိခဲ့ရခြင်းဖြစ်ပြီး ဆေးကုသမှုများ ပြုလုပ်နေသည်ဟု ဟောင်ကောင် ကျန်မာရေးကာကွယ်စောင့်ရှောက်သူ  Leung Ting-hung က သတင်းစာရှင်းလင်းပွဲတွင် သတင်းထောက်များအား ပြောကြားခဲ့သည်။ ထိုကဲ့သို့တွေ့ရှိရမှုမှာ ငါးရက်အတွင်း ဒုတိယအကြိမ်လည်းဖြစ်သည်။

– ဆူဒန်နိုင်ငံ ဒုတိယသမ္မတ အမှတ် ၁ အလီတာဟာမှာ ရာထူးက နှုတ်ထွက်သွားကြောင်း ဆူဒန် သမ္မတ အိုမာ အလ်-ဘရှီးရ်က ကြေညာခဲ့သည်ဟု ဒေသတွင်း မီဒီယာများက ယနေ့တွင် ဖော်ပြခဲ့ကြသည်။ တာဟာမှာ ဆူဒန်ပြည်တွင်းစစ်အား အဆုံးသတ်နိုင်ခဲ့သည့် ၂၀၀၅ ခုနှစ် ငြိမ်းချမ်းရေး သဘောတူညီချက်ရရှိရန် အတွက် အဓိက စေ့စပ်ဆွေးနွေးသူဖြစ်ခဲ့သည်။

– နျူးကလီးယား အစီအစဉ်အား ထိန်းချုပ်ဟန့်တားရန် အီရန်နိုင်ငံနှင့်ပြုလုပ်ခဲ့သည့် သဘောတူညီချက်အား ဘာရက်အိုဘားမားက ကာကွယ်ခဲ့ပြီး၊ အစ္စရေးနိုင်ငံ၏ သံသယအား ပျောက်စေရန်အတွက် အီရန်နိုင်ငံအနေဖြင့် သဘောတူညီချက်အား မလိုက်နာပါက ပိတ်ဆို့မှုများ ပြုလုန်ရန်နှင့် စစ်ရေးအရ အရေးယူမှုများ အတွက် ပြင်ဆင်မှုများပြုလုပ်ရန် ကတိပေးခဲ့သည်။ အမေရိကန်အပါအ၀င် အင်အားကြီး ၆နိုင်ငံက အီရန်နှင့် သဘောတူညီခဲ့ပြီးနောက် အစ္စရေးနိုင်ငံက ထိုသဘောတူညီချက်အား ကန့်ကွက်ခဲ့ပြီး အမေရိကန်နှင့် အစ္စရေးတို့၏ ဆက်ဆံရေးမှာ အက်ကြောင်းလိုက်လာခဲ့သည်။

– တောင်ကိုရီးယားနိုင်ငံက နိုင်ငံ၏တောင်ဘက်ရှိ လေကြောင်းကာကွယ်ရေးဇုံအား တိုးချဲ့မည်ဟု ကြေညာခဲ့ပြီး တိုးချဲ့မည့်ထိုဇုံအတွင်း ယခင်ကရှိနေသည့် တောင်ကိုရီးယားနိုင်ငံနှင့် တရုတ်နိုင်ငံတို့၏ စီးပွားရေးဆိုင်ရာ လေပိုင်နက်အချို့ ပါဝင်မည်ဖြစ်သည်။ လေကြောင်း ဥပဒေနှင့် နိုင်ငံတကာ၏ ကျင့်သုံးမှုများအောက်တွင် အထူးသဖြင့်လေတပ် ဆိုင်ရာ ဆောင်ရွက်မှုများအား ထည့်သွင်း စဉ်းစားပြီးနောက် လေကြောင်း ကာကွယ်ရေးဇုံကို တိုးချဲ့ခဲ့ခြင်းဖြစ်ကြောင်း တောင်ကိုရီးယား ကာကွယ်ရေးဝန်ကြီးဌာန ပြောရေးဆိုခွင့်ရှိသူ ကင်မင်ဆွတ်က သတင်းစာရှင်းလင်းပွဲတွင် ပြောကြားခဲ့သည်။ ထိုသို့ပြုလုပ်ခြင်းမှာ ၁၉၅၁ ခုနှစ် ကိုရီးယားစစ်ပွဲအတွင်း အမေရိကန်လေတပ်က သတ်မှတ်ခဲ့သည့် လေကြောင်းကာကွယ်ရေးဇုံအား နှစ် ၆၀ အတွင်း ပထမဦးဆုံးအကြိမ် ပြောင်းလဲခြင်းလည်းဖြစ်သည်။