၆-၇-၂၀၁၃ ရက်နေ့ထုတ် ဆဲဗင်းဒေးနေ့စဉ်သတင်းစာ
နေလင်းထွန်း
ရန်ကုန် ။ ။ ဗြိတိန်နိုင်ငံ လန်ဒန်မြို့တွင်ပြုလုပ်မည့် ဗုဒ္ဓဘာသာဘုန်းတော်ကြီးကျောင်း ရေစက်ချအလှူနှင့် တရားပွဲသို့ သွားရောက်ကြမည့် ဆရာတော်ကြီးများ ဗြိတိန်ပြည်ဝင်ခွင့် (ဗီဇာ) ငြင်းပယ်ခံလိုက်ရကြောင်း သတင်းရရှိသည်။ တိပိဋက ဆရာတော်များအပါအ၀င် သံဃာနာယကဆရာတော်နှစ်ပါး၊ ကမ္မဌာန်းရိပ်သာဆရာတော်နှစ်ပါးတို့သည် ဇွန်လဆန်းတွင် ဗြိတိန်ပြည်ဝင်ခွင့်လျှောက်ထားခဲ့ပြီး ဇွန်လကုန်တွင် ပြည်ဝင်ခွင့်ငြင်းပယ်သည့် အကြောင်းပြန်စာ ရရှိခဲ့ခြင်းဖြစ်ကြောင်း
ပြည်တွင်း၊ ပြည်ပနယ်လှည့် ဓမ္မကထိက ဆရာတော်တစ်ပါးက မိန့်သည်။
“ဘဏ်အကောင့်တွေ၊ စပွန်ဆာတွေ အကုန်ဖြည့်ပြီးသား ပြည့်စုံလို့ သူတို့လက်ခံတာပေါ့။ ခုမှ သွားမယ့်နေရာတွေကို ဘယ်နေ့၊ ဘယ်ရက် အတိအကျမပါလို့ဆိုပြီးအကြောင်းပြတာပေါ့။ နောက်ပြီး တစ်လလျှောက်တဲ့အခါ တစ်လနဲ့ ပြန်မလာလောက်ဘူးဆိုတဲ့ အကြောင်းပြချက်ပေးတယ်။ အင်္ဂလန်ဗီဇာတော့ မလျှောက်ဖူးဘူး။ အမေရိကန်နဲ့ အခြားနိုင်ငံတွေတော့ အစုံရောက်ဖူးပါတယ်”ဟု အထက်ပါ ဆရာတော်က မိန့်ကြားသည်။
လန်ဒန်မြို့တွင် ကျင်းပပြုလုပ်မည့် ကျောင်းရေစက်ချအလှူနှင့် တရားပွဲသို့ မြန်မာနိုင်ငံမှ နိုင်ငံတော် သံဃမဟာနာယက ဥက္ကဌ ဗန်းမော်ဆရာတော်ကြီးအပါအ၀င် နယ်လှည့်ဓမ္မကထိက ဆရာတော်များကို ဖိတ်ကြားခဲ့ခြင်းဖြစ်သည်။ “ဇူလိုင် ၆-ရက်မှာ ဗန်းမော်ဆရာတော်ကြီးရဲ့ တရားပွဲ ဆောင်ရွက်ဖို့ စီစဉ်ထားတာကိုလည်း မြန်မာနိုင်ငံက ဆရာတော်တွေ မကြွရောက်နိုင်တော့လို့ဆိုပြီး အစီအစဉ်ပြောင်းလိုက်တယ်လို့ အီးမေလးလ်ဝင်လာတယ်”ဟု အထက်ပါ ဆရာတော်က မိန့်သည်။
ပြည်တွင်း၌ အကြမ်းဖက်လှုပ်ရှားမှုများနှင့်အတူ ဗုဒ္ဓဘာသာ ရဟန်းသံဃာတော်ပုံများ အင်တာနက်စာမျက်နှာများပေါ်တွင် ပျံ့နှံ့နေခြင်း၊ ၉၆၉ လှုပ်ရှားမှုနှင့် မျိုးစောင့် ဥပဒေ၊ တိုင်းမ်မဂ္ဂဇင်း၏ သတင်းဆောင်းပါး ရေးသားဖော်ပြမှုတို့သည် ဗုဒ္ဓဘာသာဘုန်းတော်ကြီးများ ဗြိတိန်ဝင်ခွင့် ငြင်းပယ်ခံရမှုနှင့် ဆက်စပ်နိုင်ကြောင်း ဆရာတော်များက သုံးသပ်သည်။
“သံရုံးတိုင်းရဲ့ထုံးစံကတော့ ပြည်ဝင်ခွင့် လျှောက်တဲ့အခါ ဘယ်သွားမယ်၊ ဘယ်လာမယ်ဆိုတာ အတိအကျရေးရတာပါပဲ။ သံရုံးက ပြည်ဝင်ခွင့် ငြင်းပယ်တာကို တိုက်ရိုက်ကြီးပြောဖို့တော့ ခဲယဉ်းပါတယ်။ ဒါပေမယ့် မီဒီယာတွေရဲ့ ဖော်ပြမှုကတော့ တော်တော် သက်ရောက်မှုရှိနေပါတယ်”ဟု ပြည်ပတွင် သာသနာပြုနေသော မြန်မာဘုန်းတော်ကြီးတစ်ပါးက မိန့်သည်။
မြန်မာနိုင်ငံမှ ဗြိတိန်ပြည်ဝင်ခွင့် လျှောက်ထားသူများအတွက် ထိုင်းနိုင်ငံ၊ ဘန်းကောက်မြို့ရှိ ဗြိတိန်သံရုံးက ကိုင်တွယ် ဆောင်ရွက်ခြင်းဖြစ်သည်။
