Blog

အောက်တိုဘာ၊ ၂၃၊ ၂၀၁၂
M-Media
ရေးသူ- မေကြည်

ဒီနေ့ မြန်မာသံရုံးမှာ ပထမနှစ်ဝက်စာမေးပွဲ ကျင်းပပါတယ်။ သားလေးက ပထမတန်း၊ သမီးလေးက ဆဌမတန်း။ သားလေးက ဖြေပြီးသွားတော့ စာမေးပွဲအချိန်မှာ ဘေးမှာ အတူထိုင်ဖြေတဲ့ မိန်းကလေးလဲဖြစ်၊ မနှစ်ထဲကလည်း သိပြီးသားဖြစ်တဲ့ ကလေးမလေးအပါအ၀င် အခြားသူ့သူငယ်ချင်းတွေနဲ့ အတူတူ ကစားနေတာတွေ့ရပါတယ်။ ကျမကလည်း သမီးကြီးနား ကြည့်နေမိတာကော၊ မြန်မာကလေးတွေချည်းဘဲ ဖြစ်တာကောမို့ ဂရုမစိုက်ခဲ့မိပါဘူး။ (နိုင်ငံခြားကလေးတွေနဲ့ ဆိုရင်တော့ အနိုင်ကျင့်ခံရမှာဆိုးလို့ မျက်စေ့တောက် ထောက်ကြည့်တတ်ပါတယ်။) ခဏနေတော့ အဲဒီမိန်းကလေးက (သူအပါအ၀င် အခြား ၂ယောက်ပါ) ကျမကိုလာတိုင်ပါတယ်။

မိန်းကလေး။    ။အန်တီ.. အန်တီသားက သမီးတို့ကစားနေတာကို နောက်ကတကောက်ကောက်လိုက် နေတယ်။

ကျမ။              ။ သမီးတို့နဲ့ သူလဲကစားချင်လို့ပါသမီးရယ်။

မိန်းကလေး။    ။ ဟင့်အင်း သမီးတို့သူနဲ့မကစားချင်ဘူး။ ပြောပေးပါ။သမီးတို့ဘယ်လောက်ပြောပြောလဲမရဘူး။

ကျမလည်းချက်ချင်း သူတို့အုပ်စုထဲက ကျန်တဲ့ အခြားသူငယ်ချင်းယောကျာင်္းလေးတွေနဲ့ပါ ပျော်ရွှင်စွာ ကစားနေတဲ့ သားလေးကိုလှမ်းခေါ်လိုက်ပြီး သူတို့နဲ့မကစားဖို့ပြောလိုက်တယ်။ သားကဘာလို့လဲဆိုတဲ့ အမေးကို စိတ်မကောင်းစွာဘဲ သူတို့ကသားနဲအတူတူ မကစားချင်ဘူးတဲ့။ လာ နေ့လည်စာ စားလိုက်ဦး ဆိုပြီး ကျမပါလာတဲ့ သူ့အကြိုက်စားစရာများကို ကျွေးပါတယ်။

ခနနေတော့ သားလဲသူ့ဘာသာသူ သူ့အိုင်ပက်ထုတ်ပေးပါဆိုပြီး အိုင်ပက်နဲ့ ဂိမ်းကစားလိုက် အစားစားလိုက် လုပ်နေပါတယ်။

ကျမသမီးက ရေသောက်ချင်တယ်ဆိုလို့ ရေဘူးယူပေးဖို့ စားစရာတွေနားပြန်အသွား သားနားမှာ စောစောက ကလေးမလေးကလဲ ထမင်းလာ စားနေတာ တွေ့ပါတယ်။ သူက ကျမသားနားမှာ အနီးကပ်ထိုင်ပြီး သားကိုကြည့်ရင်းနဲ့ နောက်ကလေးမလေး တယောက်ကို “ဟဲ့ နင်ဝက်သားကြိုက်လား။ ငါကတော့ ၀က်သားဆိုကြိုက်မှကြိုက်” လို့ ပြောပါတယ်။ သူ့ရဲ့အကြည့် နဲ့အပြောကို ကျမခံစားလိုက်ရတယ်။ အကြည့်မပါရင်တော့ တမျိုးဖြစ်မှာပေါ့လေ။ သူ့အမေးခံရတဲ့ကလေးမလေးက “ငါကလုံးဝမကြိုက်ဘူ။ ကြက်သားဘဲ ကြိုက်တယ်” တဲ့။ သူက “၀က်သားစားမှအားရှိတာ..ဒါကြောင့် နင်ပိန်…” ဆိုပြီးပြောနေတုန်း ကျမအလာကိုမြင်ရင်းစကားရပ်သွားပါတယ်။ ဟိုမိန်းကလေးတယောက်ကတော့ ပုံမပျက်ပါဘဲ။

သားကလဲ သူ့ဂိမ်းနဲ့သူမို့ကော ဘာမှ မသိတာကောနဲ့ သူတို့ပြောတဲ့ စကားကို သိပုံတောင်မရပါဘူး။ မြန်မာပြည်မှာ ကျောင်းနေဘူးရင်တော့ ကုလားကုလား ၀က်သားစားတို့ ဘာတို့တွေနဲ့ ဒါဟာ သူ့ကို ရန်စမှန်းသတိထားမိနေမှာပါ။

ဒီမိန်းကလေးလဲသူငယ်တန်းထဲက သားနဲ့အတူ သံရုံးမှာ စာမေးပွဲဖြေတာပါ။ အဲလို ၆နှစ်အရွယ်လူမမယ်ကလေးတောင် ဒီလိုစိတ်ဓါတ်တွေရှိနေရင် သူ့ပတ်ဝန်းကျင်က လူတွေရဲ့စိတ်ဓါတ် ဘယ်လိုရှိမယ်ဆိုတာကို ခန့်မှန်းကြည့်နိုင်ပါတယ်။

ဒီလိုလူမျိုးတွေ ကျမတို့ပတ်ဝန်းကျင်မှာ ဘယ်လောက်များနေပြီလဲ။ ဘာလို့ဒီလိုစိတ်ဓါတ်တွေ သင်ကြားမွေးမြူနေကြတာလဲ။ နားမလည်နိုင်တော့ပါဘူး။ ကလေးကို ကျမအပြစ်မမြင်ပါဘူး။ ကလေးဆိုတာ ရေလိုဘဲ ထည့်တဲ့အရောင်ပြောင်းတယ်တဲ့။ ဒီတော့ ဒီလိုကလေးတွေ အရွယ်ရောက်လာတဲ့အထိ နိုင်ငံခြားမှာ ကြီးပြင်းရရင်လဲ နိုင်ငံခြားသားများနဲ့ ကင်းရှင်းစွာ အမျိုးဂုဏ် စောင့်ထိန်းနိုင်အောင် သင်ယူနိုင်တဲ့ အုပ်ထိန်းသူများ ဖြစ်ကြပါစေလို့ ဆန္ဒပြုမိပါတော့တယ်။