Blog
-
တနင်္ဂနွေနေ့ ဘောလုံးသတင်းများ
ဒီဇင်ဘာ ၂၇၊ ၂၀၂၀
M-Media
လာမယ့်တစ်ပတ်က တန်းဆင်းဇုန်မှလွတ်ရေး အရေးကြီးကာလဟု အာတီတာပြော
မိမိတိုအသင်း တန်းဆင်းဇုန်ကလွတ်မြောက်ရေးအတွက် လာမယ့်တစ်ပတ်ဟာ အရေးပါလိမ့်မယ်လို့ အာဆင်နယ်နည်းပြ အာတီတာက ပြောကြားလိုက်ပါတယ်။
မနှစ်က FA ဖလား၊ အခုနှစ်အစမှာ ကွန်မြူနတီဒိုင်းတို့ ရရှိခဲ့တဲ့ အာဆင်နယ်ဟာ ပြီးခဲ့တဲ့ ၉ ပွဲမှာ နိုင်ပွဲပျောက်ကာ ပရီးမီးယားလိဂ်မှာ အဆင့် ၁၅ အထိ ရောက်ခဲ့ပါတယ်။ မနေ့ကပွဲမှာတော့ ဇယားထိပ်ပိုင်းက ချယ်ဆီးကို ၃ ဂိုး ၁ ဂိုးနဲ့ နိုင်ခဲ့ပါတယ်။
အာတီတာက လက်တလော အရှုံးတွေအတွက် ဆင်ခြေမပေးလိုဘဲ တာဝန်အပြည့်ယူကြောင်း၊ ပရီးမီးယားလိဂ်မှာ ပြန်လည်ဦးမော့နိုင်ရေး လာမယ့် ၈ ရက်က အရေးကြီးကြောင်း မနေ့ကပွဲအပြီးမှာ ထည့်သွင်းပြောဆိုခဲ့ပါတယ်။ လာမယ့်တစ်ပတ်မှာ အာဆင်နယ်ဟာ ဘရိုက်တန်၊ ဝက်စ်ဘရွန်းတို့နဲ့ ကစားရမှာ ဖြစ်ပါတယ်။
မန်ယူကွင်းလယ်လူ ဖာနန်ဒ်ဇ် ပရီးမီးယားလိဂ်မှတ်တမ်းသစ်တစ်ခု ရရှိ
မန်ယူကွင်းလယ်လူ ဘရူနိုဖာနန်ဒက်ဇ်ဟာ ခရစ္စတီယာနိုရော်နယ်ဒိုနောက်ပိုင်း ပရီးမီးယားလိဂ်မှာ တစ်ရာသီအတွင်း ၁၀ ဂိုးသွင်းတဲ့ ပထမဆုံး ပေါ်တူဂီကစားသမား ဖြစ်လာပါတယ်။
လက်စတာနဲ့ ၂ ဂိုးစီသရေကျတဲ့ မနေ့ကပွဲမှာ ဖာနန်ဒက်စ်က ဒုတိယဦးဆောင်ဂိုး သွင်းခဲ့ပြီး ဒီရာသီ ပရီးမီးယားလိဂ်သွင်းဂိုး ၁၀ ဂိုး ရှိလာပါပြီ။ ၂၀၀၈-၀၉ ပရီးမီးယားလိဂ်မှာ ၁၈ ဂိုးသွင်းခဲ့တဲ့ ခရစ္စတီယာနို ရော်နယ်ဒိုနောက်ပိုင်း တစ်ရာသီအတွင်း ၁၀ ဂိုးသွင်းတဲ့ ပထမဆုံး ပေါ်တူဂီကစားသမားအဖြစ် မှတ်တမ်းဝင်ခဲ့ပါတယ်။
ဖာနန်ဒက်ဇ်က ကစားသမားကောင်းတွေနဲ့ တွဲကစားရပြီး သူတို့ရဲ့ ဖေးမမှုကြောင့် ကိုယ့်ကိုယ်ကို ယုံကြည်မှုရကာ အခုလိုခြေစွမ်းမျိုးပြနိုင်တာဖြစ်တယ်လို့ ပြောကြားခဲ့ပါတယ်။ ဖာနန်ဒက်ဇက်ဟာ မန်ယူကိုရောက်လာပြီးနောက်ပိုင်း စုစုပေါင်း ၁၈ ဂိုးသွင်း ာ၁၃ ဂိုး ဖန်တီးပေးထားပါတယ်။
ထိပ်ဆုံး ၄ သင်းစာရင်းဝင်ရေး မလွယ်သေးဟု ဂွါဒီယိုလာပြော
လက်ရှိ အသင်းရဲ့ စွမ်းဆောင်ရည်ကို ကျေနပ်မိပေမယ့် အဆင့် ၄ အတွင်းဝင်ရေး မိမိရည်မှန်းချက် အောင်မြင်ဖို့အတွက် လွယ်ကူမှာမဟုတ်ဘူးလို့ မန်စီးတီးနည်းပြ ပက်ပ်ဂွါဒီယိုလာက ဖွင့်ဟလိုက်ပါတယ်။
မန်စီးတီးဟာ မနေ့က နယူးကာဆယ်ကို ၂ ဂိုးပြတ်နဲ့ အနိုင်ရခဲ့ပြီး အဆင့် ၅ နေရာကို ရောက်လာပါတယ်။ ရာသီအစမှာ ရလဒ်တွေဆိုးခဲ့တဲ့ မန်စီးတီးဟာ အခုနောက်ပိုင်းမှာတော့ ခြေစွမ်းကောင်းတွေ ပြသလာပါတယ်။
ဂွါဒီယိုလာက အခုနှစ် ပရီးမီးယားလိဂ်မှာ အသင်းတိုင်းဟာ မထင်မှတ်တဲ့ရလဒ်တွေ ရတတ်တဲ့အတွက် တည်ငြိမ်ဖို့ လိုအပ်ကြောင်း၊ ပြိုင်ပွဲ ၃ ခု ဝင်ပြိုင်နေရတဲ့ မိမိတို့အသင်းဟာ ၃ ရက်ကို တစ်ပွဲနှုန်းကစားရတာကြောင့် မျှော်လင့်ချက်ကို အများကြီးမထားကြောင်း မနေ့ကပွဲအပြီးမှာ ပြောကြားခဲ့ပါတယ်။
Ref: BBC, Goal
-
၂၀၂၈ ခုနှစ်တွင် တရုတ်က ကမ္ဘာ့စီးပွားရေး၌ အင်အားအကြီးဆုံးနိုင်ငံ ဖြစ်လာမည်
ဒီဇင်ဘာ ၂၇၊ ၂၀၂၀
M-Media
-၂၀၂၈ ခုနှစ်ရောက်ရင် တရုတ်နိုင်ငံဟာ အမေရိကန်ကိုကျော်ပြီး ကမ္ဘာ့ စီးပွားရေးအင်အား အကြီးဆုံးနိုင်ငံ ဖြစ်လာလိမ့်မယ်လို့ အမေရိကန်ရဲ့ ထိပ်တန်း စီးပွားရေးသုတေသနအဖွဲ့ Centre for Economics and Business Research (CEBR) က ခန့်မှန်းလိုက်ပါတယ်။
CEBR ဟာ ကမ္ဘာ့စီးပွားရေးဆိုင်ရာ အစီရင်ခံစာကို မနေ့က ထုတ်ပြန်ခဲ့တာပါ။ ၂၀၃၃ လောက်မှ တရုတ်က စီးပွားရေးမှာ အမေရိကန်ကိုကျော်မယ်လို့ အရင်က ခန့်မှန်းထားတာပါ။
ကိုဗစ်ကပ်ရောဂါနဲ့ အမေရိကန်ရဲ့ စီးပွားရေး ကျဆင်းမှုတွေက တရုတ်ကို အသာရစေခဲ့ပြီး ၂၀၂၁ ခုနှစ်ကနေ ၂၀၂၅ ခုနှစ်အတွင်း တစ်နှစ်ကို တရုတ်နိုင်ငံရဲ့ စီးပွားရေးတိုးတက်မှု ၅.၇ ရာခိုင်နှုန်း ရှိတယ်လို့ အစီရင်ခံစာမှာ ဖော်ပြပါတယ်။ နောက်ထပ် ၅ နှစ်မှာတော့ ၄.၅ ရာခိုင်နှုန်း ရှိမယ်လို့ ဆိုပါတယ်။
ကိုဗစ်အလွန် ၂၀၂၁ ခုနှစ်မှာ အမေရိကန်ရဲ့စီးပွားရေး ပြန်လည်ဦးမော့လာနိုင်ပေမယ့် တစ်နှစ်အတွင်း စီးပွားရေးတိုးတက်မှုနှုန်းကတော့ ၂ ရာခိုင်နှုန်းလောက်သာ ရှိမယ်လို့ CEBR က ပြောပါတယ်။
ဂျပန်က စီးပွားရေးမှာ တတိယအင်အားအကြီးဆုံးနိုင်ငံဖြစ် ၂၀၃၀ အကျော်အထိ ဆက်ရှိနေမှာဖြစ်ပြီး၊ လက်ရှိ စတုတ္ထနေရာရှိနေတဲ့ အိန္ဒိယ အဲဒီနောက်ပိုင်း ဂျပန်နေရာကို ရယူနိုင်မှာဖြစ်ကြောင်း၊ ဂျာမနီက အဆင့် ၃ ကနေ ၅ ကို ကျဆင်းကာ ယူကေက ၅ ကနေ ၆ ကို ကျဆင်းမှာဖြစ်ကြောင်း အစီရင်ခံစာမှာ ခန့်မှန်းထားပါတယ်။
ကိုဗစ်ကပ်ရောဂါ ရိုက်ခတ်မှုကြောင့် ငွေကြေးဖောင်းပွမှုလောက်သာ ကမ္ဘာက ကြုံတွေ့ရမှာဖြစ်ပြီး စီးပွားရေးတိုးတက်မှုကိုတော့ ထိခိုက်မှာမဟုတ်ဘူးလို့လည်း CEBR က သုံးသပ်ခဲ့ပါတယ်။
Ref: Aljazeera
-
ဆော်ဒီမှဗလီတစ်လုံး ၂၀၂၀ ခုနှစ်အတွက် အကောင်းဆုံး ဗိသုကာလက်ရာဆု ရရှိ
ဒီဇင်ဘာ ၂၇၊ ၂၀၂၀
M-Media
-ဆော်ဒီအာရဗျနိုင်ငံ ရီယာ့ဒ်မြို့ ကင်းအဘ်ဒူလာဘဏ္ဍာရေးရပ်ကွက်မှာရှိတဲ့ ဂျာမေဗလီ KAFD Grand Mosque ဟာ ၂၀၂၀ ခုနှစ်အတွက် ဗိသုကာလက်ရာမြောက် ဘာသာရေးအဆောက်အဦးဆုကို ရရှိသွားပါတယ်။
အမေရိကန်ပြည်ထောင်စု ချီကာဂိုအခြေစိုက်Athenaeum ဗိသုကာပြတိုက်က ဒီဆုကို ရွေးချယ် ချီးမြှင့်တာပါ။ ကမ္ဘာတစ်ဝှမ်းက ဗိသုကာလက်ရာမြောက် အဆောက်အဦးတွေကို ရွေးချယ်ချီးမြှင့်တဲ့ ဒီဆုဟာ ဗိသုကာနယ်ပယ်မှာ ဂုဏ်သိက္ခာရှိတဲ့ ဆုလည်း ဖြစ်ပါတယ်။
ကန္တာရနှင်းဆီသဏ္ဍာန် အဆောက်အဦးကို အလယ်ထောက်တိုင် လုံး၀မပါဘဲ တည်ဆောက်ထားတဲ့ အင်ဂျင်နီယာဆိုင်ရာ တီထွင်ဆန်းသစ်မှုကြောင့် ဒီလိုချီးမြှင့်တာဖြစ်တယ်လို့ ဆုရွေးချယ်ရေးအဖွဲ့က ပြောပါတယ်။
ကမ္ဘာတစ်ဝှမ်းက အင်ဂျင်နီယာနဲ့ ဗိသုကာလက်ရာမှာ ထူးခြားဆန်းသစ်တဲ့ ခေတ်ပေါ်အဆောက်အဦးတွေကို ဂုဏ်ပြုတဲ့အနေနဲ့ ချီကာဂိုက ဗိသုကာအဖွဲ့ Athenaeum of Architecture နဲ့ ဥရောပ ဗိသုကာနဲ့ အနုပညာဆိုင်ရာအဖွဲ့ Center for Architecture Art Design တို့ ပူးပေါင်းကာ ၂၀၀၄ ခုနှစ်ကစပြီး ဒီဆုကို ရွေးချယ်ချီးမြှင့်ခဲ့တာ ဖြစ်ပါတယ်။
KAFD Grand Mosque ဗလီကို ဆော်ဒီဗီသုကာကုမ္ပဏီ Omrania and Associates က တည်ဆောက်ပြီး ၂၀၁၇ ခုနှစ်မှာ ဖွင့်လှစ်နိုင်ခဲ့ပါတယ်။ ၂ ထပ်အဆောက်အဦးအဖြစ်ကာ တစ်ကြိမ်တည်း လူ ၁၅၀၀ လောက် ဝတ်ပြုနိုင်ပါတယ်။
ဒီဗလီဟာ ခေတ်သစ်အစ္စလာမ်ဗိသုကာလက်ရာ ထိပ်တန်းအဆောက်အဦး ၁၀ ခုစာရင်းမှာ ပါဝင်ပြီး ကမ္ဘာ့ဗိသုကာလက်ရာဆိုင်ရာ ဆုအချို့မှာလည်း အမည်စာရင်းတင်သွင်းခံခဲ့ရပါတယ်။
Ref: Saudi Gazette
-
ဥရောပ ၂၇ နိုင်ငံတွင် ကိုဗစ်ကာကွယ်ဆေး စထိုး
ဒီဇင်ဘာ ၂၇၊ ၂၀၂၀
M-Media
EU Coronavirus vaccine, Europe. Covid-19 vaccination, flu prevention, immunization concept. Vial dose and medical syringe, European Union flag background. 3d illustration -Pfizer-BioNTech ကာကွယ်ဆေးကို တစ်ပြိုင်နက်တည်း ရရှိခဲ့ပြီးတဲ့နောက် ဥရောပ ၂၇ နိုင်ငံမှာ မနေ့ကစတင်ပြီး ပြည်သူတွေကို ကာကွယ်ဆေး ထိုးပေးနေပါတယ်။
ဥရောပမှာ ကိုဗစ်ကြောင့်သေဆုံးသူ ၃၃၅၀၀၀ ဦး ရှိပြီး ကူးစက်သူက ၁၄ သန်းလောက် ရှိခဲ့တာပါ။ လက်ရှိအချိန်အထိ အဖွဲ့ဝင်နိုင်ငံအားလုံးနီးပါးမှာ တင်းကြပ်တဲ့ ကိုဗစ်ကန့်သတ်ချက် စည်းမျဉ်းစည်းကမ်းတွေကို ထုတ်ထားဆဲ ဖြစ်ပါတယ်။
“ခက်ခဲတဲ့နှစ်မှာ စာမျက်နှာသစ်တစ်ခု ဒီကနေ့ စဖွင့်နိုင်ပါပြီ။ Covid-19 ကာကွယ်ဆေးကို အဖွဲ့ဝင်နိုင်ငံအားလုံးထံ ကျွန်တော်တို့ ပေးပို့ခဲ့ပါတယ်။ ဥရောပတစ်ဝှမ်းမှာ မနက်ဖြန်ကစတင်ပြီး ကာကွယ်ဆေးထိုးတော့မှာ ဖြစ်ပါတယ်။ ဥရောပရဲ့ ကာကွယ်ဆေးထိုးမှုဟာ စည်းလုံးညီညွတ်မှု ဖြစ်သလို၊ ကာကွယ်ဆေးကလည်း ကိုဗစ်ကပ်ရောဂါ လုံး၀ပပျောက်ေရး စိတ်ချရတဲ့နည်းလမ်း ဖြစ်ပါတယ်” လို့ ဥရောပကော်မရှင်ဥက္ကဌ
Ursula von der Leyen က Twitter စာမျက်နှာမှာ မနေ့က ရေးသားခဲ့ပါတယ်။တစ်ချို့ဥရောပနိုင်ငံတွေဟာ တနင်္ဂနွေနေ့အထိ မစောင့်ဘဲ ကာကွယ်ဆေးရရခြင်းပဲ စတင်ထိုးပေးခဲ့ပါတယ်။ ဥရောပမှာ လူဦးရေ ၄၄၆ သန်းရှိနေပြီး ကာကွယ်ဆေးကုမ္ပဏီတွေကနေ အလုံးရေ သန်း ၂ ထောင်ကျော်လောက် ဥရောပကော်မရှင်က မှာထားပါတယ်။
ဂျာမနီ ကျန်းမာရေးဝန်ကြီး Jens Spahn က ကာကွယ်ဆေး ထိုးပေးတော့မယ်ဆိုတဲ့သတင်းဟာ ပျော်ရွှင်စရာ ခရစ္စမတ်သတင်းစကားတစ်ခု ဖြစ်တယ်လို့ ပြောကြားခဲ့ပြီး၊ အီတလီနိုင်ငံခြားရေးဝန်ကြီး Luigi Di Maio က မိမိတို့အနေနဲ့ လွတ်လပ်မှုကို ပြန်ရပြီလို့ ပြောဆိုခဲ့ပါတယ်။
Ref: BBC