News @ M-Media

Blog

  • မတ်စ်ဂျစ်ဒ်ဟရမ်ဗလီ ကြီးကြပ်ရေးအဖွဲ့တွင် အမျိုးသမီးဝန်ထမ်း တစ်ထောင်ကျော် ထပ်မံခန့်အပ်

    မတ်စ်ဂျစ်ဒ်ဟရမ်ဗလီ ကြီးကြပ်ရေးအဖွဲ့တွင် အမျိုးသမီးဝန်ထမ်း တစ်ထောင်ကျော် ထပ်မံခန့်အပ်

    ဒီဇင်ဘာ ၂၀၊ ၂၀၂၀
    M-Media

    -ဘုရားဖူးလာကြတဲ့ အမျိုးသမီးတွေကို ပိုမိုကောင်းမွန်တဲ့ ဝန်ဆောင်မှုပေးဖို့အတွက် မက္ကာမြို့က မတ်စ်ဂျစ်ဒ် ဟရမ် ဗလီဝတ်ကျောင်းတော် ကြီးကြပ်ကွပ်ကဲရေးအဖွဲ့မှာ အမျိုးသမီးဝန်ထမ်း နောက်ထပ် ၁၅၀၀ ကို ဆော်ဒီအစိုးရက ခန့်အပ်လိုက်ပါတယ်။

    လက်ရှိ မတ်စ်ဂျစ်ဒ်ဟရမ် ဗလီမှာ အမျိုးသမီးဝန်ထမ်း ၆၀၀ လောက်ရှိပြီး စီမံခန့်ခွဲမှုအပိုင်းနဲ့ ဝန်ဆောင်မှုပိုင်းမှာ တာဝန်ထမ်းဆောင်နေကြတာပါ။

    အခု ထပ်မံခန့်အပ်လိုက်တဲ့ အမျိုးသမီးဝန်ထမ်းတွေဟာ နည်းပညာဌာန၊ ဇမ်ဇမ်ရေ စီမံခန့်ခွဲရေးဌာန၊ အုပ်ချုပ်ရေးဌာန၊ ပြည်သူ့ဆက်ဆံရေးဌာန၊ မီဒီယာနဲ့ ဆက်သွယ်ရေးဌာန၊ လမ်းညွှန်ဌာနနဲ့ စာရင်းစစ်ဌာနတို့မှာ တာဝန်ထမ်းဆောင်ကြမှာ ဖြစ်ပါတယ်။

    ဒီဆောင်ရွက်ချက်ဟာ မြင့်မြတ်ရာဝတ်ကျောင်းတော် အုပ်ချုပ်ရေးအဖွဲ့ရဲ့ ပြုပြင်ပြောင်းလဲရေးစီမံကိန်း (၂၀၂၄) အရ ဆောင်ရွက်တာဖြစ်တယ်လို့ အမျိုးသမီး ဖွံ့ဖြိုးတိုးတက်ရေးဌာန ဒုတိယ ဥက္ကဌ ဒေါက်တာ အလ်-အာနွဒ် ဘင်သီ ခါလဒ် အလ်-အာဘွဒ်က ပြောကြားခဲ့ပါတယ်။

    ဆော်ဒီရဲ့ ၂၀၃၀ စီမံကိန်းမှာလည်း နိုင်ငံအတွင်းက အမျိုးသမီးတွေရဲ့ စွမ်းဆောင်ရည်ကို မြှင့်တင်ရေးနဲ့ ဘုရားဖူးလာရောက်ကြတဲ့ အမျိုးသမီးတွေကို အကောင်းဆုံး ဝန်ဆောင်မှုပေးနိုင်ရေး ပါဝင်တယ်လို့ သူမက ဆိုပါတယ်။

    Ref: Arab News

  • ရုရှား၏ ကိုဗစ်ကာကွယ်ဆေးကို အိန္ဒိယတွင်ထုတ်မည်

    ရုရှား၏ ကိုဗစ်ကာကွယ်ဆေးကို အိန္ဒိယတွင်ထုတ်မည်

    ဒီဇင်ဘာ ၁၉၊ ၂၀၂၀
    M-Media

    -ရုရှားက ဖန်တီးထားတဲ့ Sputnik V ကိုဗစ်ကာကွယ်ဆေးကို လာမယ့်နှစ်အတွင်း အိန္ဒိယမှာ အလုံးရေ သန်း ၃၀၀ လောက် ထုတ်လုပ်ဖို့ ရှိနေပါတယ်။

    Sputnik V ဟာ ကမ္ဘာမှာ အစိုးရက တရားဝင်ခွင့်ပြုတဲ့ ပထမဆုံး ကိုဗစ်ကာကွယ်ဆေးဖြစ်ပြီး ယူအေအီး၊ ဗင်နီဇွဲလား၊ အိန္ဒိယနဲ့ ဘီလာရုဇ်နိုင်ငံတွေမှာ စမ်းသပ်အသုံးပြုနေကာ ၉၁ ရာခိုင်နှုန်း ထိရောက်မှုရှိတယ်လို့ ရုရှားအစိုးရက ထုတ်ပြန်ထားပါတယ်။

    အိန္ဒိယဆေးကုမ္ပဏီ Hetero Biopharma က သူတို့ဟာ Sputnik V အလုံးရေ သန်း ၁၀၀ လောက်ထုတ်လုပ်မယ်လို့ တရားဝင်ပြောကြားထားတာပါ။ နောက်ထပ် သန်း ၂၀၀ လောက်ကို တစ်ခြား ဘယ်ကုမ္ပဏီတွေက ထုတ်ပေးမလဲဆိုတာ အတိအကျ မသိရသေးပါဘူး။

    နယူးဒေလီမှာရှိတဲ့ ရုရှားသံရုံးကတော့ အိန္ဒိယမှာထုတ်ထားတဲ့ ကာကွယ်ဆေးကို စမ်းသပ်အသုံးပြုနေတယ်လို့ ဒီဇင်ဘာ ၁၈ ရက်နေ့က Twitter စာမျက်နှာမှာ လွှင့်တင်ခဲ့ပါတယ်။

    ရုရှားအစိုးရ ရင်းနှီးမြှုပ်နှံမှုအဖွဲ့ RDIF အကြီးအကဲ ကီရီရ် ဒီမီထရီဗ်က အိန္ဒိယကဆေးကုမ္ပဏီကြီး ၄ ခုလောက်နဲ့ စာချုပ်ချုပ်ထားပြီး နောက်နှစ်အတွင်း အလုံးရေ သန်း ၃၀၀ ကျော်လောက် ထုတ်လုပ်ဖို့ရှိတယ်လို့ ရုရှားသတင်းဌာနတစ်ခုကို ပြောပါတယ်။

    အိန္ဒိယဟာ ကမ္ဘာ့အကြီးဆုံး ကာကွယ်ဆေးထုတ်လုပ်တဲ့နိုင်ငံဖြစ်ပြီး ကိုဗစ်ကာကွယ်ဆေး အကြီးအကျယ် ထုတ်လုပ်နိုင်ဖို့အတွက်လည်း ပြင်ဆင်ထားပါတယ်။ အိန္ဒိယအစိုးရ တာဝန်ရှိသူတွေက လာမယ့် သီတင်းပတ်​အနည်းငယ်အတွင်း ကိုဗစ်ကာကွယ်ဆေးတစ်ချို့ကို အရေးပေါ်အသုံးပြုဖို့ ခွင့်ပြုပေးသွားမယ်လို့ ပြောကြားထားပါတယ်။

    လက်ရှိမှာ အောက်စဖို့ဒ်ထုတ် Oxford-AstraZeneca၊ အမေရိကန်ထုတ် Pfizer-BioNTech နဲ့ အိန္ဒိယကုမ္ပဏီ Bharat Biotech ထုတ် ကာကွယ်ဆေးတွေက အရေးပေါ်အသုံးပြုခွင့်ပေးဖို့ လျှောက်ထားပါတယ်။

    Ref: CNA

  • ရိုဟာနာ ဂျူပရီ (သို့) မလေးရှားရေတပ်ရဲ့ ပထမဆုံး အမျိုးသမီးဗိုလ်ချုပ်ကြီး

    ရိုဟာနာ ဂျူပရီ (သို့) မလေးရှားရေတပ်ရဲ့ ပထမဆုံး အမျိုးသမီးဗိုလ်ချုပ်ကြီး

    ဒီဇင်ဘာ ၁၉၊ ၂၀၂၀
    M-Media

    -မလေးရှားရေတပ်က ဗိုလ်ကြီး ရိုဟာနာ ဂျူပရီဟာ မနေ့က ရေတပ်ဗိုလ်ချုပ်ကြီး(Admiral) အဖြစ် ခန့်အပ်ခံခဲ့ရပြီး မလေးရှားရေတပ်သမိုင်းမှာ ပထမဆုံး အမျိုးသမီးရေတပ်ဗိုလ်ချုပ်ကြီး ဖြစ်လာတာပါ။

    ရိုဟာနာဟာ ၂၀၁၇ ခုနှစ်က ဗိုလ်ကြီးအဖြစ် ခန့်အပ်ခံခဲ့ရတာဖြစ်ပြီး ဒါဟာလည်း မလေးရှားရေတပ်သမိုင်းမှာ အမျိုးသမီးတစ်ဦး ပထမဆုံး ဗိုလ်ကြီးအဖြစ် ခန့်အပ်ခံရတာ ဖြစ်ပါတယ်။

    ရေတပ်ရဲ့ ပထမဆုံး အမျိုးသမီး Admiral ဖြစ်ဖို့ဟာ သူရဲ့ ရည်မှန်းချက်ဖြစ်တယ်လို့ ရိုဟာနာက အဲဒီအချိန်တုန်းက ပြောကြားခဲ့ပါတယ်။

    မလေးရှားတော်ဝင်ရေတပ်သက်တမ်းဟာ ၈၆ နှစ်ရှိပြီ ဖြစ်ပါတယ်။

    “သူမဟာ တော်ဝင်ရေတပ်ရုံးချုပ်က စစ်ဖက်ပစ္စည်းဆိုင်ရာ ဒါရိုက်တာ၊ ဒုတိယစစ်ဦးစီးအရာရှိချုပ် (ထောက်ပို့) ရာထူးတွေကို ထမ်းဆောင်နေသူပါ။ အရင်က အမျိုးသားတွေကြီးစိုးတဲ့ ရေတပ်ဗိုလ်ချုပ်ကြီးများကော်မတီမှာ ပါဝင်နိုင်ဖို့အတွက် ဒီရာထူးတွေက သွယ်ဝိုက်ပြီး အထောက်အကူပြုခဲ့တာ ဖြစ်ပါတယ်” လို့ ကာကွယ်ရေးဦးစီးချုပ် (ရေ) ဗိုလ်ချုပ်ကြီး တန်ဆရီ မိုဟာမက် ရီဇာ မိုဟာမက် ဆန်နီက ပြောကြားခဲ့ပါတယ်။

    အသက် ၅၇ နှစ်အရွယ် ကလေး ၄ ဦးရဲ့မိခင် ရိုဟာနာဟာ ရေတပ်မှာ အမှုထမ်းသက် ၃၆ နှစ်ရှိပြီ ဖြစ်ပါတယ်။

    ရိုဟာနာကို ဗိုလ်ချုပ်အကြီးအဆင့် တိုးမြှင့်ပေးလိုက်တာဟာ နှစ်ပေါင်း ၃၀ ကျော် တာဝန်ထမ်းဆောင်မှု၊ ကြိုးပမ်းအားထုတ်မှုတွေကို အသိအမှတ်ပြုတာမျိုးအပြင်၊ အမျိုးသမီးတွေရဲ့ စွမ်းဆောင်ရည်နဲ့ ယုံကြည်စိတ်ချရမှုကို တော်ဝင်ရေတပ်က အသိအမှတ်ပြုတယ်ဆိုတာ ပြသတာဖြစ်တယ်လို့လည်း ဗိုလ်ချုပ်ကြီး ရီဇာက ထည့်သွင်းပြောကြားခဲ့ပါတယ်။

    ဗိုလ်ချုပ်ကြီး ရိုဟာနာက လူငယ်အမျိုးသမီးတွေ သူမရဲ့လမ်းကြောင်းမျိုး လျှောက်လှမ်းလာဖို့ မျှော်လင့်တယ်လို့ ပြောကြားခဲ့ပါတယ်။

    “ရေတပ်မှာ အမျိုးသမီးတွေအတွက် နေရာရှိတယ်၊ သူ့တို့ရဲ့အရည်အချင်းကို ထိပ်ပိုင်းက အသိအမှတ်ပြုတယ်ဆိုတာကို ပြသတာလည်း ဖြစ်ပါတယ်။ ပေးအပ်လာတဲ့တာဝန်ကို ကျွန်မတို့အမျိုးသမီးတွေ ကျေပွန်အောင် ထမ်းဆောင်နိုင်မယ်လို့လည်း ယုံကြည်ပါတယ်”

    တောင်ဝင်ရေတပ်မှာ ထူးချွန်ရင် ထူးချွန်သလောက် နေရာပေးပြီး မိမိကိုယ်တိုင်က ကြိုးစားအားထုတ်ဖို့ပဲ လိုအပ်တယ်လို့ ဗိုလ်ချုပ်ကြီး ရိုဟာနာက ထည့်သွင်း ပြောကြားခဲ့ပါတယ်။

    “စိန်ခေါ်မှုတွေကြုံလာရတိုင်း ကျွန်မ ဆင်ခြေတွေနဲ့ မသာယာနေပါဘူး။ အမှုထမ်းရင်း တစ်ဖက်ကလည်း ကျောင်းတက်ပြီး မာစတာဘွဲ့ရအောင် ယူခဲ့ပါတယ်။ စိတ်ပြင်းပြမှု၊ ဆုံးဖြတ်ချက်ပြတ်သားမှု၊ အသိပညာနဲ့ အတွေ့အကြုံကောင်းကောင်းသာရှိရင် ဣထိယတွေလည်း ထူးချွန်ပြောင်မြောက်နိုင်ပါတယ်”

    Ref: New Straits Times

  • ကြာသာပတေးနေ့ ဘောလုံးသတင်းများ

    ကြာသာပတေးနေ့ ဘောလုံးသတင်းများ

    ဒီဇင်ဘာ ၁၇၊ ၂၀၂၀
    M-Media

    ဆိုရှယ်မီဒီယာပို့စ်တစ်ခုအတွက် မန်ယူတိုက်စစ်မှူးကို FA တရားစွဲ

    နိုဝင်ဘာ ၂၉ ရက်နေ့ ဆောက်သက်တမ်ကို အနိုင်ရတဲ့ပွဲအပြီး ဆိုရှယ်မီဒီယာမှာ မျှဝေခဲ့တဲ့ ပို့စ်တစ်ခုအတွက် မန်ယူတိုက်စစ်မှူး ကာဗာနီကို အင်္ဂလိပ်ဘောလုံးအဖွဲ့ချုပ် FA က တရားစွဲဆိုလိုက်ပါတယ်။
    ကာဗာနီရဲ့ ကစားပုံကိုချီးကျူးထားတဲ့ အဲဒီပို့စ်မှာ လူမည်းတွေအပေါ် လူမျိုးရေးစော်ကားတဲ့စကားလုံး ပါဝင်နေတာပါ။ ကာဗာနီက အဲဒီပို့စ်ကို နောက်ပိုင်းမှာ ဖြုတ်ချခဲ့သလို၊ စကားလုံးမသိတဲ့အတွက် မျှဝေမိတာလို့ ပြန်တောင်းပန်ခဲ့ပါတယ်။
    မန်ယူက FA ရဲ့ အခုစွဲချက်ကို မိမိတို့ သိရှိပြီး ပြန်လည်လျှောက်လဲှသွားမယ်လို့ ထုတ်ပြန်ခဲ့ပါတယ်။
    ကာဗာနီနဲ့မန်ယူဟာ ဇန်နဝါရီ ၄ ရက်နေ့မတိုင်မီ လျှောက်လှဲရမှာပါ။ FA ရဲ့ လူမျိုးရေးခွဲခြားမှုစည်းကမ်းကို ချိုးဖောက်ကြောင်း အပြစ်ရှိရင် ၃ ပွဲပယ်ခံရမှာ ဖြစ်ပါတယ်။

    ပရီးမီးယားလိဂ်မှာ မိမိကို ခွဲခြားဆက်ဆံဟု မော်ရင်ဟိုပြော

    ပရီးမီးယားလိဂ်မှာ သူဟာ တစ်ခြားနည်းပြတွေလို တန်းတူ ဆက်ဆံမခံရဘူးလို့ စပါးနည်းပြ မော်ရင်ဟိုက လီဗာပူးလ်ကို ၂ ဂိုး ၁ ဂိုးနဲ့ ရှုံးနိမ့်တဲ့ပွဲအပြီးမှာ ပြောပါတယ်။
    ကွင်းဘေး လီဗာပူးလ်နည်းပြ ကလော့ပ်ရဲ့ ဒိုင်အပေါ် စောဒကတက်မှုမျိုး မိမိသာ လုပ်မယ်ဆိုရင် တန်းပြီး အထုတ်ခံရမယ်လို့ ဒိုင်တွေကို ဝေဖန်ခဲ့တာပါ။
    ပွဲအပြီးမှာ မော်ရင်ဟိုဟာ ကလော့ပ်နဲ့လည်း အခြေအတင် ဖြစ်ခဲ့ပါတယ်။ အကောင်းဆုံးအသင်းက ရှုံးသွားတယ်လို့ ကလော့ပ်ကိုပြောခဲ့ပေမယ့် ကလော့ပ်က သူစကားကို လက်မခံဘူးလို့ ဆိုပါတယ်။

    ဘိုင်ယန်တိုက်စစ်မှူး လီဝမ်ဒေါ့စကီး ဘွန်ဒစ်လီဂါတွင် သမိုင်းသစ်ရေးထိုး

    ဘိုင်ယန်မြူးနစ်တိုက်စစ်မှူး လီဝမ်ဒေါ့စကီးဟာ ဘွန်ဒစ်လီဂါသမိုင်းမှာ ဂိုး ၂၅၀ ကျော်သွင်းနိုင်တဲ့ တတိယမြောက်တိုက်စစ်မှူးအဖြစ် မှတ်တမ်းဝင်ခဲ့ပါတယ်။
    မနေ့က ဝုလ်ဖ်ဘာ့ဂ်ကိုနိုင်တဲ့ပွဲမှာ လီဝမ်ဒေါ့စကီး ၂ ဂိုးသွင်းခဲ့ပြီး ဒါဟာ သူ့ရဲ့ ဘွန်လီဂါ ၂၅၀ နဲ့ ၁၅၂ ဂိုးမြောက် ဖြစ်ခဲ့တာပါ။ သူ့အရင် ဘွန်ဒစ်လီဂါမှာ ဂိုး ၂၅၀ ပြည့်တဲ့ကစားသမား ၂ ဦးသာ ရှိပြီး ဘိုင်ယန်တိုက်စစ်မှူးဟောင်း ဂျရဒ်မူလာနဲ့ ရှော်လ်ကာတိုက်စစ်မှူးဟောင်း ကလော့စ် ဖစ်ရှာတို့ ဖြစ်ပါတယ်။
    ဘွန်ဒစ်လီဂါသမိုင်းတစ်လျှောက် ဂိုးအများဆုံးသွင်းထားသူက မူလာဖြစ်ပြီး ၄၂၇ ပွဲကစား ၃၆၅ ဂိုးသွင်းထားပါတယ်။
    Ref: BBC, Goal

  • သောကြာနေ့ ဘောလုံးသတင်းများ

    သောကြာနေ့ ဘောလုံးသတင်းများ

    ဒီဇင်ဘာ ၁၈၊ ၂၀၂၀
    M-Media

    ဖီဖာ၏ တစ်နှစ်တာအကောင်းဆုံး ကစားသမားအဖြစ် လီဝမ်ဒေါ့စကီး ရွေးချယ်ခံရ

    ဘိုင်ယန်မြူးနစ်တိုက်စစ်မှူး ရောဘတ် လီဝမ်ဒေါ့စကီးဟာ ကမ္ဘာ့ဘောလုံးအဖွဲ့ချုပ် Fifa ရဲ့ တစ်နှစ်တာအကောင်းဆုံး ဘောလုံးသမားအဖြစ် ရွေးချယ်ခံခဲ့ရပါတယ်။

    အသက် ၃၂ နှစ်အရွယ် သူဟာ ဘာစီလိုနာတိုက်စစ်မှူး မက်ဆီ၊ ဂျူဗင်တပ်စ်တိုက်စစ်မှူး ရော်နယ်ဒိုတို့ကို ကျော်ဖြတ်ပြီး ဆွတ်ခူးခဲ့တာပါ။

    မနှစ်က ဖလား ၃ လုံးရတဲ့ ဘိုင်ယန်မှာ အဓိကကစားသမားဖြစ်ခဲ့ပြီး ၄၇ ပွဲကစားကာ ၅၅ ဂိုး သွင်းယူပေးနိုင်ခဲ့ပါတယ်။

    မက်ဆီ၊ ရော်နယ်ဒိုတို့နဲ့ တစ်တန်းတည်းဖြစ်တဲ့အတွက် မယုံကြည်နိုင်လောက်အောင်ဖြစ်ရပြီး ဒီဆုဟာ အလွန်အဓိပ္ပါယ်ရှိကြောင်း၊ မိမိအနေနဲ့ အရမ်းမျှော်လင့်ခဲ့ရတဲ့ ဆုတစ်ခုဖြစ်ကြောင်း လီဝမ်ဒေါ့စကီးက ပြောကြားခဲ့ပါတယ်။

    ဖီဖာရဲ့ အကောင်းဆုံးနည်းပြဆုကို လီဗာပူးလ်နည်းပြ ယာဂန်ကလော့ပ်က ရရှိခဲ့ပြီး၊ အကောင်းဆုံးသွင်းဂိုးဆုကို စပါးတိုက်စစ်မှူး ဆွန်ဟွန်မင်က ရရှိခဲ့ပါတယ်။

    အသင်းဘုတ်အဖွဲ့က မိမိကို ထောက်ခံဆဲဟု အာတီတာပြော

    မိမိကို အသင်းဘုတ်အဖွဲ့ဝင်တွေက အပြည့်အ၀ထောက်ခံတယ်လို့ အာဆင်နယ်နည်းပြ မီခေးလ် အာတီတာက ဒီကနေ့သတင်းစာရှင်းလင်းပွဲမှာ ပြောပါတယ်။

    အာဆင်နယ်ဟာ လက်ရှိမှာ အဆင့် ၁၅ နေရာနဲ့ ၃၉ နှစ်အတွင်း အဆိုးရွားဆုံး ရာသီအစခြေအနေကို ရင်ဆိုင်နေရတာပါ။

    အာတီတာက အသင်းကစားပုံ ဆိုးရွားနေတာကို ဝန်ခံခဲ့ပေမယ့် လက်ရှိအနေအထားကို တည်ငြိမ်အောင်လုပ်ဖို့ လိုအပ်တယ်လို့ ဆိုပါတယ်။ ဒါပေမယ့် အသင်းကြုံတွေ့နေရတဲ့ ပြဿနာတွေဟာ အချိန်တိုတိုအတွင်းမှာ ပြေလည်မှာ မဟုတ်ဘူးလို့လည်း သူက ထည့်သွင်းပြောကြားခဲ့ပါတယ်။

    ရူနီ၏သား မန်ယူနှင့် စာချုပ်ချုပ်

    မန်ယူတိုက်စစ်မှူးဟောင်း ဝိန်းရူနီရဲ့ သားဖြစ်သူဟာ မန်ယူလူငယ်အသင်းနဲ့ စာချုပ် ချုပ်ဆိုလိုက်ပါတယ်။

    အသက် ၁၁ နှစ်အရွယ် ကီယာဖြစ်ပြီး သားဖြစ်သူရဲ့ လက်မှတ်ထိုးမှုပုံကို ရူနီက Twitter စာမျက်နှာ တင်ခဲ့ပါတယ်။ ကီယာဟာ ရူနီရဲ့ ကလေး ၄ ယောက်ထဲက အကြီးဆုံး ဖြစ်ပါတယ်။

    ရူနီဟာ မန်ယူမှာ ၁၃ ရာသီမှာ ပွဲ ၅၀၀ ကျော်ကစား ၂၅၃ ဂိုးသွင်းကာ ပရီးမီးယားလိဂ် ၅ လုံး၊ ချန်ပီယံလိဂ် ၁ လုံး အပါအဝင် စုစုပေါင်း ဆုဖလား ၁၆ လုံးအထိ ရရှိခဲ့ပါတယ်။ ရူနီဟာ မန်ယူသမိုင်းမှာ ဂိုးအများဆုံးသွင်းတဲ့ ကစားသမားအဖြစ်လည်း မှတ်တမ်းဝင်ပါတယ်။ လက်ရှိမှာတော့ ဒါဘီကောင်တီမှာ ကစားသမားနည်းပြအဖြစ် ဆောင်ရွက်နေပါတယ်။

    Ref: BBC