ဒီဇင်ဘာ ၇၊ ၂၀၂၀
ကလေးများအပေါ်လိင်အမြတ်ထုတ်မှုကို ကာကွယ်ပေးရန် ဟောလီးဝုဒ်မင်းသားက ဥရောပသမဂ္ဂကို တောင်းဆို
Facebook နဲ့ Google လို နည်းပညာကုမ္ပဏီတွေက သူတို့ရဲ့ ပလက်ဖောင်းမှာ ကလေးညစ်ညမ်းကား ဖြန့်ဝေမှုနဲ့ပတ်သက်ပြီး အနီးကပ်စောင့်ကြည့်တာကို ဆက်လက်ခွင့်ပြုပေးဖို့ လူကုန်ကူးမှု၊ ကလေးများအပေါ် လိင်မြတ်ထုတ်မှု တိုက်ဖျက်ရေး ဆောင်ရွက်နေတဲ့ အမေရိကန်မင်းသား အက်ရှ်တန် ကက်ချာက ဥရောပသမဂ္ဂကို တိုက်တွန်းလိုက်ပါတယ်။
ဆိုရှယ်မီဒီယာကုမ္ပဏီတွေဟာ သူတို့ရဲ့ ပလက်ဖောင်းမှာ ကလေးညစ်ညမ်းကားတွေ တင်တာ၊ ကလေးငယ်တွေအပေါ် လိင်အမြတ်ထုတ်ဖို့ ကြိုးပမ်းတာတွေကို တားဆီးဖို့ အလိုအလျောက် အသိပေးတဲ့စနစ် ထည့်သွင်းကာ စောင့်ကြည့်နေတာပါ။
ဒီဇင်ဘာ ၂၁ ရက်နေ့မှာ သက်ရောက်မယ့် ဥရောပသမဂ္ဂရဲ့ အီလက်ထရောနစ် ဥပဒေအသစ်အရ ဒီစောင့်ကြည့်မှုတွေကို တားမြစ်ပိတ်ပင်ထားပါတယ်။
ကက်ချာကတော့ ဒီလိုပိတ်ပင်တာကြောင့် ကလေးငယ်တွေအပေါ် လိင်အမြတ်ထုတ်သူတွေကို ခြေရာခံနိုင်တော့မှာမဟုတ်ဘဲ ကလေးငယ်တွေရဲ့ဘ၀ကလည်း အမှောင်ကမ္ဘာထဲမှာ ပျက်ဆီးသွားလိမ့်မယ်လို့ သတိပေးခဲ့ပါတယ်။
တရုတ်ကဖန်တီးထားသည့်နေအတု နေအစစ်ထက် ၁၀ ဆ အပူထုတ်နိုင်
နိုင်ငံရဲ့ စွမ်းအင်လိုအပ်ချက်ကို ဖြေဆည်းပေးနိုင်မယ့် ‘နျူကလီးယား ဖျူးရှင်း ဓာတ်ပေါင်းဖို’ (Nuclear Fusion Reactor) ကို တရုတ်နိုင်ငံက သောကြာနေ့မှာ အောင်မြင်စွာ ပါဝါပေး လည်ပတ်နိုင်ခဲ့ပါတယ်။
ဧရာမအပူအချိန်ကို ထုတ်ပေးနိုင်တာကြောင့် ဒီဓာတ်ပေါင်းဖိုကို ‘နေအတု’ လို့ အမည်ပြောင်ပေးထားပါတယ်။ သောကြာနေ့က စမ်းသပ်မှုမှာ အပူချိန် သန်း ၁၅၀ ဒီဂရီဆဲလ်စီးယက်စ်အထိ ဓာတ်ပေါင်းဖိုက ထုတ်နိုင်ခဲ့ပြီး ဒါဟာ နေကထုတ်တဲ့ အပူချိန်ရဲ့ ၁၀ ဆ ဖြစ်ပါတယ်။
ဟိုက်ဒရိုဂျင်နဲ့ ဒီထီရီယမ်ဓာတ်ငွေ့တွေ ပေါင်းစပ်လောင်ကျွမ်းပြီး အပူထွက်တဲ့ နေရဲ့အခြေအနေကို တုပဖန်တီးထားတဲ့ နျူကလီးယား Nuclear Fusion နည်းပညာဟာ သန့်ရှင်းတဲ့ စွမ်းအင်ရင်းမြစ်ရရှိရေးမှာ အရေးပါတဲ့ သုတေသနတစ်ခု ဖြစ်ပါတယ်။ ရေဒီယိုသတ္တိကြွတာလို ဘေးထွက်ဆိုးကျိုးတွေလည်း လုံး၀ မရှိပါဘူး။
ကမ္ဘာ့အကြီးဆုံး Nuclear Fusion ဓာတ်ပေါင်းဖိုကို ပြင်သစ်နိုင်ငံမှာ ဆောက်လုပ်နေပြီး ၂၀၂၅ ခုနှစ်ရောက်ရင် လည်ပတ်နိုင်မှာ ဖြစ်ပါတယ်။
တရုတ်နိုင်ငံ၏ သမိုင်းဝင် လသွားခရီးစဉ် အောင်မြင်
တရုတ်ရဲ့ လူမဲ့အာကာသယာဉ် Chang’e 5 ဟာ အခုတစ်ပတ်အစောပိုင်းက လပေါ်ကို အောင်မြင်စွာဆင်းသက်ကာ လမြေကြီး နမူနာကို ရယူနိုင်ခဲ့ပါတယ်။ ၏
ဒီခရီးစဉ်ဟာ နှစ်ပေါင်း ၄၄ နှစ်အတွင်း ပထမဆုံးအကြိမ် လူသားတွေ လမြေကြီးကို ယူဆောင်နိုင်တာပါ။ လူလိုက်ပါခြင်းမရှိဘဲ ဂြိုဟ်ဆင်းယာဉ်နဲ့ လပတ်လမ်းက အာကာယာဉ်တို့ ပထမဆုံးအကြိမ် အောင်မြင်စွာ ချိတ်ဆက်နိုင်တဲ့ မှတ်တမ်းကိုလည်း တရုတ်က ရခဲ့ပါတယ်။
Chang’e 5 အာကာသယာဉ်ဟာ ကမ္ဘာမြေကို ဒီဇင်ဘာလအလယ်ပိုင်းလောက်မှာ ပြန်ရောက်မှာဖြစ်ပြီး ပါလာတဲ့ လမြေကြီးနမူနာတွေကို ပညာရှင်တွေက လေ့လာစူးစမ်းမှာ ဖြစ်ပါတယ်။
Chang’e 5 အာကာသယာဉ်ဟာ လမျက်နှာပြင်ပေါ်မှာ တရုတ်အလံလွှင့်ခဲ့ပြီး အမေရိကန်ပြီးရင် လပေါ်မှာ အလံလွှင့်နိုင်တဲ့ ဒုတိယမြောက်နိုင်ငံအဖြစ် မှတ်တမ်းဝင်ခဲ့ပါတယ်။
လက်ရှိမှာ အင်္ဂါဂြိုဟ်ကို လူမဲ့ အာကာသယာဉ်တွေလွှတ်ပြီး လေ့လာမှုတွေ ပြုလုပ်နေပါတယ်။
Ref: BBC, Reuters
