Blog

ဧပြီ ၂၊ ၂၀၂၄

M-Media 

– ကမ္ဘာအကူအညီပေးရေးအဖွဲ့တစ်ခုဖြစ်တဲ့ World Central Kitchen ယာဥ်တန်းကို ဂါဇာမှာ အစ္စရေးက ဒုံးကျည်နဲ့ အကြမ်းဖက်တိုက်ခိုက်ခဲ့တာကြောင့် အနည်းဆုံး ၇ ဦး သေဆုံးခဲ့ပါတယ်။ 

အစားအသောက်တွေ အကူအညီပေးတဲ့ World Central Kitchen အဖွဲ့ကို နာမည်ကျော် အမေရိကန် စာဖိုမှူး ဟိုဆေး အန်ဒရက်စ်က တည်ထောင်ထားတာပါ။ 

ဂါဇာက World Central Kitchen အကူအညီပေးရေးယာဥ်တန်း တိုက်ခိုက်ခံရမှုဟာ ဧပြီလ ၂ ရက်နေ့ မနက်ပိုင်းက ဖြစ်ပွားခဲ့တာဖြစ်ပြီး အဖွဲ့၀န်ထမ်း ၇ ဦး သေဆုံးခဲ့ပါတယ်။ 

သေဆုံးသူတွေထဲမှာ သြစတေးလျ၊ ပိုလန်၊ ယူကေ၊ အမေရိကန်၊ ကနေဒါနဲ့ ပါလက်စတိုင်းနိုင်ငံသားတွေ ပါ၀င်ပါတယ်။ 

“ဂါဇာမှာ အစ္စရေးရဲ့တိုက်ခိုက်မှုကြောင့် ကျွန်တော်တိုအဖွဲ့၀င် ၇ ဦး သေဆုံးသွားတယ်ဆိုတဲ့ သတင်းဆိုးကို World Central Kitchen က အတည်ပြုပါတယ်” လို့ အဖွဲ့က ထုတ်ပြန်တဲ့ ကြေငြာချက်မှာ ဖော်ပြထားပါတယ်။ 

ဒီအကြမ်းဖက်မှုကြောင့် ဒေသတွင်း အကူအညီပေးရေးလုပ်ငန်းတွေကို ရပ်ဆိုင်းလိုက်တယ်လို့လည်း World Central Kitchen က ပြောပါတယ်။ 

တိုက်ခိုက်မှုတွေ မရှိတော့တဲ့နေရာကို အဖွဲ့တံဆိပ် ထင်ထင်ရှားရှား ကပ်ထားတဲ့ အစောင့်အရှောက် ကားနှစ်စီးနဲ့ သွားရောက်ကူညီစဥ်မှာ အခုလို ပစ်မှတ်ထားခံလိုက်ရတာလို့လည်း အဖွဲ့ရဲ့ ထုတ်ပြန်ချက်မှာ ထည့်သွင်းဖော်ပြထားပါတယ်။ 

“အစ္စရေးစစ်တပ်နဲ့ သဘောတူညီချက် ယူထားတာတောင်မှ ဒီ အလ်ဘာလာမြို့မှာ ကျွန်တော်တို့ယာဥ်တန်း တိုက်ခိုက်ခံလိုက်ရပါတယ်။ ရေကြောင်းကနေ ဂါဇာကို ရောက်လာတဲ့ ရိက္ခာ တန် ၁၀၀ ကျော်ကို ကျွန်တော်တို့အဖွဲ့က သွားချပေးအပြီးမှာ ဖြစ်သွားတာပါ”

အဖွဲ့တည်ထောင်သူ ဟိုဆေး အန်ဒရက်စ်က အဖွဲ့၀င်တွေ ဆုံးရှုံးသွားတဲ့အတွက် ၀မ်းနည်းမိကြောင်း ဆိုရှယ်မီဒီယာမှာ ရေးသားခဲ့ပါတယ်။ 

“ဂါဇာမှာ အစ္စရေးစစ်တပ်ရဲ့ လေကြောင်းတိုက်ခိုက်မှုကြောင့် ကျွန်တော်တို့ရဲ့ ညီအစ်ကိုမောင်နှမတွေကို ဆုံးရှုံးလိုက်ရပါတယ်။ သူတို့ရဲ့မိသားစု၊ မိတ်ဆွေသူငယ်ချင်းတွေနဲ့ WCK မိသားစုအတွက် ယူကြုံးမရ ဖြစ်မိပါတယ်” 

အစ္စရေးဟာ ဂါဇာမှာ ၅ လကျော်အတွင်း ကုလ ကူအညီပေးရေး၀န်ထမ်းတွေနဲ့ ပါလက်စတိုင်းလခြမ်းနီအဖွဲ့၀င် အမြောက်အများကိုလည်း သတ်ဖြတ်ထားပါတယ်။ 

Ref: Aljazeera 

(ဓာတ်ပုံ – WCK ယာဥ်တန်း တိုက်ခိုက်ခံရပြီးနောက် မြင်ကွင်း)

ဧပြီ ၁၊ ၂၀၂၄

M-Media 

-ဂါဇာက အကြီးဆုံးဆေးရုံနှစ်ခုက တစ်ခုဖြစ်တဲ့ အလ်ရှီဖာဆေးရုံကို အစ္စရေးစစ်တပ်က ဒုတိယအကြိမ် တိုက်ခိုက်ပြီးနောက် တွေ့ရတဲ့ မြင်ကွင်းတွေ ဖြစ်ပါတယ်။ 

ဒီအကြမ်းဖက်တိုက်ခိုက်မှုဟာ ၂ ပတ်တာ ကြာမြင့်ခဲ့ပါတယ်။ တနင်္လာနေ့မနက်ပိုင်း အစ္စရေးတပ်ဖွဲ့တွေ ထွက်ခွာသွားပြီးနောက် ဆေးရုံ၀င်းထဲမှာ အနည်းဆုံး အလောင်း ၆ လောင်းကို တွေရှိခဲ့ရတယ်လို့ မျက်မြင်တွေ့ရှိသူတွေက ပြောပါတယ်။ 

ဆေးရုံတစ်ခုလုံးနီးပါးက သုံးလို့မရအောင် ပျက်ဆီးသွားခဲ့ပါပြီ။ ဆေးရုံက လူနာတော်တော်များများကို အနားမှာရှိတဲ့ အဟ်လီအာရပ်ဆေးရုံကို ရွှေ့ခဲ့ရပြီး ဂါဇာ ကျန်းမာရေး၀န်ကြီးဌာနက ဆေးရုံထဲမှာ ၀င်ရောက်ပြီး အလောင်းကောက်တာတွေ ပြုလုပ်နေပါတယ်။ 

အစ္စရေးဟာ ပြီးခဲ့တဲ့နှစ် နို၀င်ဘာလမှာတစ်ကြိမ် အလ်ရှီဖာဆေးရုံကို အကြမ်းဖက်တိုက်ခိုက်ခဲ့ပါတယ်။ 

Ref: Aljazeera