မတ် ၃၀၊ ၂၀၂၄
M-Media
-ရုရှားမွတ်စလင်အသင်းဟာ အသက် ၁၅ နှစ်အရွယ် အစ္စလာမ် ခါလီလော့ဗ်ကို ရုရှားမွတ်စလင်သူရဲကောင်းဆု ချီးမြှင့်လိုက်ပါတယ်။
ပြီးခဲ့တဲ့တစ်ပတ် မော်စကိုက Crocus ကပွဲရုံမှာ ဖြစ်ပွားတဲ့ အကြမ်းဖက်တိုက်ခိုက်မှုမှာ လူ ၁၀၀ ကျော်ကို ဘေးလွတ်ရာ ကယ်တင်ပေးခဲ့တဲ့ ခါလီလော့ဗ်ရဲ့ သူရသတ္တိကို ဂုဏ်ပြုတာ ဖြစ်ပါတယ်။
IS အကြမ်းဖက်အဖွဲ့က သေနတ်သမား ၄ ယောက်ရဲ့ တိုက်ခိုက်မှုအတွင်း သေဆုံးသူအနည်းဆုံး ၁၄၄ ဦး ရှိတယ်လို့ ရုရှားက ထုတ်ပြန်ပါတယ်။ ဒီအကြမ်းဖက်တိုက်ခိုက်မှုမှာ ယူကရိန်းစနက် မကင်းဘူးလို့လည်း ရုရှားသမ္မတ ဗလာဒီမီရ် ပူတင်က ဆိုပါတယ်။
သေနတ်ပစ်ခတ်မှုတွေ၊ မီလောင်ကျွမ်းမှုတွေ ဖြစ်နေတဲ့ ကပွဲရုံမှာ လူတွေ သွေးရူးသွေးတမ်းနဲ့ ဆောက်တည်ရမရ ဖြစ်နေတဲ့အချိန် ခါလီလော့ဗ်က အရေးပေါ်ပြေးပေါက်ကို အလျင်အမြန်ရှာဖွေပြီး လူ ၁၀၀ ကျော်ကို ကယ်ထုတ်ပေးခဲ့တာ ဖြစ်ပါတယ်။
“ကျွန်တော့်နေရာမှာ တစ်ခြားလူတွေဆိုလည်း ဒီလိုပဲ ကယ်တင်ပေးကြမှာပါ။ ဒါကတော့ သေချာပါတယ်” လို့ ခါလီလော့ဗ်က မတ်လ ၂၉ ရက်နေ့မှာ ပြုလုပ်တဲ့ မွတ်စလင်သူရဲကောင်းဆု ချီးမြှင့်ပွဲမှာ ပြောကြားခဲ့ပါတယ်။
ခါလီလော့ဗ်ဟာ စတိတ်ရှိုးလာသူတွေရဲ့ အ၀တ်အစားတွေကို စစ်ဆေးပေးရတဲ့တာ၀န် ယူထားသူဖြစ်ပါတယ်။
ရုရှးမွတ်စလင် သူရဲကောင်းဆုကို ရုရှား အစ္စလာမ့်ဓမ္မသတ်မှုးချုပ်(မွဖ်သီချုပ်)က ချီးမြှင့်ခဲ့ပါတယ်။ ကိုယ့်အသက်ကိုယ် မငဲ့ကွက်ပဲ သူတစ်ပါးရဲ့ အသက်တွေကို ကယ်တင်တဲ့ သူရဲကောင်းတို့ထုံးကို ခါလီလော့ဗ်က နှလုံးမူခဲ့တာလို့ မွဖ်သီချုပ်က မှတ်ချက်ပေးပါတယ်။
“လူတွေကို တတ်နိုင်သ၍ ကူညီရမယ်ဆိုတဲ့ သွန်သင်ဆုံးမမှုနဲ့ ကျွန်တော် လူလားမြောက်လာတာပါ” လို့ ခါလီလော့ဗ်က ဆိုပါတယ်။
သူရဲ့ သူရသတ္တိအတွက် ရုရှားအာဏာပိုင်တွေကလည်း ဂုဏ်ပြုဆု ချီးမြှင့်ခဲ့ပါတယ်။
Ref: Aljazeera
