News @ M-Media

Blog

  • ထိရောက်မှုရှိသည့် ရုရှားထုတ် ကိုဗစ်ဆေးကို ဆော်ဒီတွင် စမ်းသပ်မည်

    ထိရောက်မှုရှိသည့် ရုရှားထုတ် ကိုဗစ်ဆေးကို ဆော်ဒီတွင် စမ်းသပ်မည်

    ဇွန် ၁၊ ၂၀၂၀
    M-Media

    -ရုရှားနိုင်ငံမှာထုတ်လုပ်ပြီး ကိုဗစ်ကုသရမှာ ထိရောက်မှုရှိနေတဲ့ ဆေးတစ်မျိုးကို ဆော်ဒီအာရေဗျမှာ စသင်စမ်းသပ် အသုံးပြုတော့မှာ ဖြစ်ပါတယ်။

    Avifavir လို့ အမည်ပေးထားတဲ့ အဲဒီဆေးဝါးကို ရုရှားရဲ့ နိုင်ငံပိုင်လုပ်ငန်း RDIF ကနေ ဦးဆောင်ပြီးဖန်တီးထုတ်လုပ်ထားတာပါ။ ဒီဆေးကို ဇွန်လ ၁ ရက် ဒီနေ့မှာ ထုတ်ပြဖို့ ရှိနေပါတယ်။

    RDIF အကြီးအကဲ ကီရ်ရီလ် ဒီမီထရီဗ်က ဒီဆေးဟာ ရုရှား ကျန်းမာရေးဝန်ကြီးဌာနရဲ့ အသိအမှတ်ပြုလက်မှတ်ရရှိထားပြီး၊ ဆေးဘက်ဆိုင်ရာ စမ်းသပ်မှုအတွင်း ရလဒ်ကောင်းရခဲ့တယ်လို့ ပြောကြားခဲ့ပါတယ်။

    ဆော်ဒီမှာ စမ်းသပ်အသုံးပြုဖို့အတွက် ဆော်ဒီနဲ့ ရုရှားအာဏာပိုင်တွေ သဘောတူညီချက် ရရှိထားပြီး ဖြစ်ပါတယ်။

    Avifavir ဆေးဝါးဟာ ကိုရိုနာဗိုင်းရပ်စ်ရဲ့ လုပ်ငန်းစဉ်ကို ဖျက်ဆီးတဲ့ ဆေးဝါးမျိုးဖြစ်ပြီး ရုရှားကထုတ်လုပ်ကာ ကုသရာမှာ ထိရောက်မှုရှိကြောင်း တွေ့ရတဲ့ ပထမဆုံး ဆေးဝါးလည်း ဖြစ်ပါတယ်။

    ဒီမီထရီဗ်ကတော့ ကိုဗစ်ကုသရေး ရုရှားက ထုတ်လုပ်တဲ့ဆေးဝါးတွေထဲမှာ ဒီဆေးက ပထမဆုံးမဟုတ်ပေမယ့် ထိရောက်မှုမှာတော့ အခြားဆေးဝါးတွေထက် သာလွန်တယ်လို့ ပြောကြားခဲ့ပါတယ်။

    Ref: Arab News

  • မဒီနာမှ နဗဝီဗလီကို ဆော်ဒီက ပြန်ဖွင့်မည်

    မဒီနာမှ နဗဝီဗလီကို ဆော်ဒီက ပြန်ဖွင့်မည်

    မေ ၃၀၊ ၂၀၂၀
    M-Media

    -အစ္စလာမ်သာသနာကို စတင်တည်ထောင်သူ တမန်တော် မုဟမ္မဒ် တည်ဆောက်ခဲ့တဲ့ မဒီနာက ‘မစ်တ်ဂျစ်ဒ်နဗဝီ’ ဗလီဝတ်ကျောင်းတော်ကို တနင်္ဂနွေ​နေ့ကနေစပြီး ဖွင့်ပေးတော့မယ်လို့ ဆော်ဒီအာဏာပိုင်တွေက ဒီကနေ့မှာ ကြေငြာလိုက်ပါတယ်။

    Covid-19 ပြန့်နှံ့မှုကြောင့် တိုင်းပြည်ကို ၂ လတာ တံခါးပိတ်ကာ ရွေ့လျားသွားလာမှုကန့်သတ်မိန့် ထုတ်ပြန်ခဲ့ပြီးတဲ့နောက် မြင့်မြတ်ရာနေရာတွေတည်ရှိရာ မက္ကာမြို့ကလွဲပြီး နိုင်ငံတစ်ဝှမ်းက ဗလီတွေကို မေလ ၃၁ ရက်နေ့ကနေ စတင်ဖွင့်ပေးဖို့ ဆော်ဒီက ပြင်ဆင်နေတာပါ။

    အစ္စလာမ်သာသနာမှာ ဒုတိယအမြင့်မြတ်ဆုံး ဗလီဝတ်ကျောင်းတော်ဖြစ်တဲ့ ‘နဗဝီ’ ဗလီဝတ်ကျောင်းတော်လည်း ဖွင့်ပေးမယ့်အထဲမှာ ပါဝင်ပါတယ်။

    ဆော်ဒီ အစ္စလာမ့်ရေးရာဝန်ကြီးဌာနဝန်ကြီး အဘ်ဒူလတစ်ဖ် ဘင် အဘ်ဒူလ်အဇစ် အလ်-ရှိခ်က ဖွင့်ပေးဖို့အတွက် ပြင်ဆင်မှုတွေ လုပ်ဆောင်ခဲ့ပြီး ဗလီတွေဟာ အကောင်းဆုံးအနေအထားမှာ ရှိနေတယ်လို့ ပြောကြားခဲ့ပါတယ်။

    ဗလီတွေကို ဖွင့်လှစ်ပေးခဲ့ပေမယ့် ဝတ်ပြုဆုတောင်းသူတွေဟာ အစိုးရက ထုတ်ပြန်ထားတဲ့ ကိုဗစ်ကာကွယ်ရေး စည်းမျဉ်းစည်းကမ်းတွေကို လိုက်နာရမှာ ဖြစ်ပါတယ်။

    Ref : Arab News

  • စိတ်ကျန်းမာရေးချို့ယွင်းနေသူ ပါလက်စတိုင်းတစ်ဦးကို အစ္စရေးရဲတပ်ဖွဲ့က ပစ်ခတ်သတ်ဖြတ်

    စိတ်ကျန်းမာရေးချို့ယွင်းနေသူ ပါလက်စတိုင်းတစ်ဦးကို အစ္စရေးရဲတပ်ဖွဲ့က ပစ်ခတ်သတ်ဖြတ်

    မေ ၃၀၊ ၂၀၂၀
    M-Media

    -အစ္စရေးက ကျူးကျော် သိမ်းပိုက်ထားတဲ့ ပါလက်စတိုင်းပိုင် အနောက်ဖက်ကမ်းမှာ ပါလက်စတိုင်းအရပ်သားတစ်ဦးဟာ အစ္စရေးရဲတပ်ဖွဲ့ရဲ့ ပစ်ခတ်သတ်ဖြတ်မှုကြောင့် ဒီကနေ့မှာ သေဆုံးသွားခဲ့ပါတယ်။

    သေဆုံးသွားသူဟာ အသက် ၃၂ နှစ်အရွယ် အီယာ့ဒ် အလ်-ဟာလက်ဆိုသူဖြစ်ပြီး အရှေ့ဂျေရုစလင် မြို့ဟောင်းက စာသင်ကျောင်းတစ်ကျောင်းမှာ ကျောင်းတက်ကာ အလုပ်လုပ်နေသူ ဖြစ်ပါတယ်။ အဲဒီစာသင်ကျောင်းနဲ့ မနီးမဝေးမှာပဲ အစ္စရေးရဲတပဖွဲ့ရဲ့ ပစ်ခတ်သတ်ဖြတ်မှုကို ခံခဲ့ရတာပါ။

    အလ်-ဟာလက်ဟာ စိတ်ကျန်းမာရေး အနည်းငယ်ချို့ယွင်းနေသူတစ်ယောက်ဖြစ်တယ်လို့ မိသားစုဝင်တစ်ဦးက ပြောကြားခဲ့ပါတယ်။

    အစ္စရေးရဲတပ်ဖွဲ့ ပြောရေးဆိုခွင့်ရှိသူ မစ်ကီ ရိုဆန်ဖဲလ်ဒ်က တပ်ဖွဲ့ဝင်တွေဟာ ပစ္စတိုနဲ့ သဏ္ဍာန်တူတဲ့ သံသယဖြစ်ဖွယ် အရာ၀တ္ထုတစ်ခုကို အလ်-ဟာလက်မှာတွေ့ခဲ့ရပြီး လိုက်ဖမ်းရာမှာ သေနတ်နဲ့ ပစ်ခဲ့မိတာဖြစ်တယ်လို့ ပြောကြားခဲ့ပါတယ်။ အခင်းဖြစ်ရာနေရာမှာ ဘယ်လိုလက်နက်မျိုးမှ မတွေ့ခဲ့ဘူးလို့လည်း ရိုဆန်ဖဲလ်ဒ်က ဆိုပါတယ်။

    ဒီအဖြစ်အပျက်အဖြစ်ပွားပြီးတဲ့နောက် အစ္စရေးရဲတပ်ဖွဲ့ဟာ မြို့ဟောင်းကို ပိတ်ပစ်ခဲ့ပြီး ကျန်းမာရေးဝန်ထမ်းတွေ၊ ဂျာနယ်လစ်တွေကို ဝင်ခွင့် မပေးခဲ့ပါဘူး။ ဒါ့အပြင် အလ်-ဟာလက်ရဲ့အိမ်ကို ဝင်ရောက်ရှာဖွေကာ မိသားစုတွေိကို စစ်ဆေးမေးမြန်းခဲ့ပါတယ်။

    သောကြာနေ့ကလည်း အနောက်ဖက်ကမ်းက ရာမာလာမြို့မှာ ပါလက်စတိုင်းတစ်ဦးကို အစ္စရေးလုံခြုံရေးတပ်ဖွဲ့တွေက ပစ်သတ်ခဲ့ပြီး သေဆုံးသူဟာ ကားနဲ့ဝင်တိုက်ဖို့ ကြိုးစားတဲ့အတွက် ပစ်ခဲ့ရတာလို့ ထုတ်ပြန်ပါတယ်။

    Ref: Aljazeera

  • အိန္ဒိယတွင် ကိုဗစ်ကူးစက်မှု သိသိသာသာ မြင့်တက်လာပြီး သေဆုံးမှုတွင် တရုတ်ထက်ပိုများ

    အိန္ဒိယတွင် ကိုဗစ်ကူးစက်မှု သိသိသာသာ မြင့်တက်လာပြီး သေဆုံးမှုတွင် တရုတ်ထက်ပိုများ

    မေ ၂၉၊ ၂၀၂၀
    M-Media

    -အိန္ဒိယနိုင်ငံမှာ Covid-19 သေဆုံးသူအရေအတွက်ဟာ ၄၇၀၆ ဦး ရှိလာခဲ့ပြီး ဗိုင်းရပ်စတင်ရာ တရုတ်နိုင်ငံထက် သေဆုံးသူ ပိုမိုများပြားလာတာ ဖြစ်ပါတယ်။

    ပြီးခဲ့တဲ့ရက်ပိုင်းအတွင်း အိန္ဒိယနိုင်ငံမှာ ကိုဗစ်ကူးစက်မှုအရေအတွက် အလွန်မြင့်တက်လာခဲ့ပြီး မနေ့ကဆိုရင တစ်ရက်တည်းကူးစက်မှုဟာ ၈ ထောင်နီးပါးအထိ ရှိလာပါတယ်။ စုစုပေါင်း ကူးစက်သူအရေအတွက်ဟာ ၁၆၅၇၉၉ ဦး ရှိလာပါပြီ။

    နိုင်ငံအနောက်ပိုင်း မဟာရက်ရှ်ထရာပြည်နယ်ဟာ ကူးစက်မှုအများဆုံးဒေသ ဖြစ်ပါတယ်။

    ကူးစက်မှု မြင့်တက်လာတာနဲ့အမျှ ဆေးရုံမှာ ကုတင်မလုံလောက်တာ၊ ဆေးဝါး၊ ကျန်းမာရေးဝန်ထမ်း မလုံလောက်တာ စတာတွေကိုလည်း အိန္ဒိယက ကြုံတွေ့လာရပါတယ်။

    တိုင်းပြည်စီးပွားရေး ထိခိုက်လာတာကို လျော့ပါးစေဖို့အတွက် အိန္ဒိယအစိုးရက ရွေ့လျားကန့်သတ်ချက်အမိန့် ထုတ်ပြန်ထားတာကို တစ်ဖြည်းဖြည်း ဖြေလျော့နေပါတယ်။ မတ်လ ၂၅ ရက်နေ့က စတင်ခဲ့တဲ့ ရွေ့လျားသွားလာမှု ကန့်သတ်မိန့်ကြောင့် အိန္ဒိယနိုင်ငံမှာ လူပေါင်း သန်း ၁၀၀ ကျော်လောက် အလုပ်လက်မဲ့ဖြစ်ခဲ့ပါတယ်။

    Ref: Aljazeera

  • နိုင်ငံတစ်ဝှမ်း ဗလီ ၉ သောင်းကျော်ကို ဆော်ဒီက ပြန်ဖွင့်မည်

    နိုင်ငံတစ်ဝှမ်း ဗလီ ၉ သောင်းကျော်ကို ဆော်ဒီက ပြန်ဖွင့်မည်

    မေ ၂၉၊ ၂၀၂၀
    M-Media

    -ဆော်ဒီအာရေဗျနိုင်ငံမှာ တနင်္ဂနွေနေ့ကစတင်ကာ ဗလီဝတ်ကျောင်းတော်ပေါင်း ၉ သောင်းကျော်ကို ပြန်လည်ဖွင့်လှစ်ပေးမှာဖြစ်ပြီး ဒီဗလီတွေကို ပိုးသတ်တာ၊ သန့်ရှင်းတာတွေ လုပ်ဆောင်ထားတယ်လို့ ဆော်ဒီအာဏာပိုင်တွေက မနေ့မှာ ထုန်ပြန်ခဲ့ပါတယ်။

    ဒါပေမယ့် ဝတ်ပြုသူတွေဟာ အစိုးရရဲ့ ကျန်းမာရေးဆိုင်ရာ လမ်းညွှန်ချက်တွေကိုတော့ လိုက်နာရမှာ ဖြစ်ပါတယ်။ ဘုရားဝတ်ပြုဖို့အတွက် ကိုယ်လက်သန့်စင်တာကို အိမ်မှာ ပြုလုပ်ခဲ့ရမှာဖြစ်ပြီး၊ ဗလီထဲမဝင်ခင် လက်ကို ပိုးသတ်ဂျယ်နဲ့ ပိုးသတ်ရမှာ ဖြစ်ပါတယ်။

    ကုရ်အာန်ကျမ်းစာရွတ်ဖတ်မယ်ဆိုရင်တော့ ဗလီက ကျမ်းစာအုပ်ကို အသုံးမပြုဘဲ မိမိတို့ရဲ့ဖုန်းက ကျမ်းစာ အက်ပလီကေးရှင်းကနေ ဖတ်ရှုတ်ဖို့ အာဏာပိုင်တွေက တိုက်တွန်းထားပါတယ်။ ဗလီအတွင်း ဝတ်ပြုတဲ့အချိန်မှာလည်း တစ်ယောက်နဲ့တစ်ယောက် ၆ ပေ ခွာထားရမှာ ဖြစ်ပါတယ်။

    သက်ကြီးရွယ်အိုတွေ၊ နာတာရှည်ရောဂါ ရှိသူတွေနဲ့ အသက် ၁၅ နှစ်အောက် ကလေးငယ်တွေကိုတော့ နေအိမ်မှာပဲဝတ်ပြုဖို့ အစိုးရက ပန်ကြားထားပါတယ်။

    ၂ လတာ ကြာမြင့်နေ့ပြီဖြစ်တဲ့ ရွေ့လျားသွားလာမှု ကန့်သတ်မိန့်ကို ဆော်ဒီက အခုတစ်ပတ်မှာ စတင်ဖြေလျော့ပေးခဲ့ပါတယ်။

    နိုင်ငံတစ်ဝှမ်း ဗလီတော်တော်များများမှာ တနင်္ဂနွေနေ့ကစလို့ ဝတ်ပြုဆုတောင်းခွင့် ပေးပေမယ့် မြင့်မြတ်ရာနေရာတွေရှိရာ မက္ကာမြို့ကိုတော့ ဆက်လက်ပိတ်ထားမှာ ဖြစ်ပါတယ်။

    Ref : Arab News