မေ ၉၊ ၂၀၂၀
M-Media
-ကာကွယ်ရေးနယ်ပယ်မှာ ခိုင်မာတဲ့ မိတ်ဖက်ဆက်ဆံရေး ဆက်လက်တည်ရှိသွားမယ်လို့ အမေရိကန်နဲ့ ဆော်ဒီ ခေါင်းဆောင်တွေက ထပ်လောင်း အတည်ပြု ပြောကြားလိုက်ပါတယ်။
မနေ့က ဆော်ဒီဘုရင် ဆလ်မန်နဲ့ အမေရိကန်သမ္မတ ဒေါ်နယ်ထရမ့်တို့ဟာ လက်ရှိ ဖြစ်ပေါ်နေတဲ့ အခြေအနေတွေကို ဖုန်းနဲ့ ဆွေးနွေးခဲ့ကြပါတယ်။ ကိုရိုနာဗိုင်းရပ်စ် ပြန့်နှံ့ပြီးနောက်ပိုင်း ရေနံထုတ်လုပ်မှု လျှော့ချဖို့ ထရမ့်ရဲ့ ပြောကြားမှုကို ဆော်ဒီက နားမထောင်တဲ့အတွက် နှစ်နိုင်ငံ တင်းမာမှုတွေ ရှိနေတာပါ။
အဲဒီနောက်ပိုင်းမှာ ဆော်ဒီမှာ ချထားတဲ့ ပက်ထရီယော့ ဒုံးခွင်းစနစ် ၂ ခုကို ပြန်လည်ရုပ်သိမ်းသွားမယ်လို့ ထရမ့်က ပြောကြားထားပါတယ်။
မနေ့က ဆွေးနွေးမှုမှာတော့ ကမ္ဘာ့စွမ်းအင်စျေးတွက် တည်ငြိမ်ဖို့ အရေးကြီးတယ်ဆိုတာကို ခေါင်းဆောင် နှစ်ဦးက သဘောတူခဲ့ကြတယ်လို့ အိမ်ဖြူတော် ပြောရေးဆိုခွင့်ရှိသူ ဂျုဒ် ဒီရီက ပြောကြားခဲ့ပါတယ်။
“ကမ္ဘာ့စွမ်းအင်စျေးကွက်တွေမှာ တည်ငြိမ်ဖို့ အရေးကြီးတယ်ဆိုတာကို ခေါင်းဆောင် ၂ ဦးက သဘောတူခဲ့ကြပါတယ်။ ပြီးတော့ ကာကွယ်ရေးဆိုင်ရာမှာ အမေရိကန်-ဆော်ဒီ ခိုင်မာတဲ့ မိတ်ဆက်ဆံရေး ဆက်လက်ထားရှိဖို့လည်း ထပ်လောင်း သန္ဓိဌာန် ပြုခဲ့ကြပါတယ်”
အိမ်ဖြူတော်ရဲ့ ကြေငြာချက်မှာ ပက်ထရီယော့ ဒုံးခွင်းကိစ္စ မပါဝင်ဘဲ သတင်းထောက်တွေရဲ့ မေးမြန်းမှုကိုလည်း ဖြေကြားခဲ့ခြင်း မရှိပါဘူး။
ဆော်ဒီက ထုတ်ပြန်မှုမှာတော့ ထရမ့်ဟာ ဒေသတွင်း သူတို့ရဲ့ အကျိုးစီးပွားတွေကို ကာကွယ်ရေးနဲ့ မဟာမိတ်တွေရဲ့ လုံခြုံရေးအတွက် ထရမ့်က ထပ်မံ ကတိပြုခဲ့တယ်လို့ ဖော်ပြထားပါတယ်။
ပက်ထရီယော့ဒုံးခွင်းစနစ်တွေကို ပြန်ရုပ်သိမ်းမယ့်ကိစ္စဟာ ဆော်ဒီအပေါ် အမေရိကန်ရဲ့ ထောက်ခံမှုကို လျော့ချဖို့ မဟုတ်သလို၊ ရေနံကိစ္စ ဖိအားပေးဖို့လည်း မဟုတ်ဘူးလို့ အမေရိကန် နိုင်ငံခြားရေးဝန်ကြီး မိုက် ပွမ်ပီယိုက ပြောကြားခဲ့ပါတယ်။
Ref: Aljazeera
