Blog

ဖေဖော်၀ါရီ ၁၀၊ ၂၀၂၄

M-Media

-ဂါဇာကမ်းမြှောင်က ပါလက်စတိုင်းပြည်သူ ၆၀ ရာခိုင်နှုန်းလောက် ခိုလှုံနေရတဲ့ ရာဖာမြို့ကို အစ္စရေးက မြေပြင်တပ်တွေနဲ့ ၀င်ရောက်တိုက်ခိုက် သတ်ဖြတ်ဖို့ စီစဥ်နေပါတယ်။ 

ရာဖာဟာ ဂါဇာကမ်းမြှောင် တောင်ဘက်အစွန်ဆုံးက မြို့ဖြစ်ပါတယ်။ ဂါဇာမြောက်ပိုင်းမှာ ဟားမက်စ်အဖွဲ့ကို ရှင်းလင်းဖို့ လိုတယ်ဆိုပြီး ရွှေ့ပြောင်းခိုင်းတာကြောင့် ကမ်းမြှောင်တစ်ခုလုံးက ၂ ဒဿမ ၂ သန်းသော ပါလက်စတိုင်းပြည်သူတွေဟာ တောင်ပိုင်းမှာ လာစုနေကြရတာပါ။

ဒီလို လူစုမိတဲ့အချိန် အစ္စရေးက တောင်ပိုင်းမှာလည်း တိုက်ခိုက်မှုတွေ ပြုလုပ်လာတာကြောင့် ဂါဇာပြည်သူတွေဟာ တောင်ပိုင်း အစွန်ဆုံး ရာဖာမြို့ကို ထွက်ပြေးခဲ့ရပြီး လက်ရှိ ရာဖာမှာ ၁ ဒဿမ ၄ သန်း ရှိနေပါတယ်။ 

လူနေအိမ်တွေ၊ ဆေးရုံတွေ၊ စာသင်ကျောင်းတွေနဲ့ ဒုက္ခသည်စခန်းတွေအပါအ၀င် ရာဖာက အဆောက်အဦးကို အစ္စရေးက ဗုံးကြဲဖျက်ဆီးနေပြီး မြေပြင်တပ်တွေပါ ၀င်ရောက် တိုက်ခိုက်သတ်ဖြတ်ဖို့အထိ စီစဥ်နေတာပါ။ 

ကုလနဲ့ နိုင်ငံတကာအသိုင်းအ၀ိုင်းက အစ္စရေးရဲ့ ဒီအစီအစဥ်ကို ပြင်းပြင်းထန်ထန် သတိပေးပြောဆိုနေပါတယ်။ 

ဆော်ဒီအာရေဗျ နိုင်ငံခြားရေး၀န်ကြီးဌာနရဲ့ ထုတ်ပြန်ချက်မှာ ရာဖာကို အစ္စရေးက တိုက်ခိုက်မှုကြောင့် အလွန်အန္တရာယ်ရှိတဲ့ နောက်ဆက်တွဲရလဒ်မျိုးတွေ ဖြစ်လာလိမ့်မယ်လို့ သတိပေးခဲ့ပါတယ်။ 

အစ္စရေး ပါလက်စတိုင်းတွေကို နေရပ်က မောင်းထုတ်မှုတွေ၊ နိုင်ငံတကာဥပဒေတွေကို ချိုးဖောက်သတ်ဖြတ်မှုတွေကို ရှုတ်ချကြောင်း၊ ကုလ လုံခြုံရေးကောင်စီအနေနဲ့ အထူးအစည်းအ၀ေးခေါ်ကာ အစ္စရေးကို တားဆီးဖို့ လိုအပ်နေကြောင်း ဆော်ဒီအာရေဗျရဲ့ ထုတ်ပြန်ချက်မှာ ထည့်သွင်းဖော်ပြထားပါတယ်။ 

အစ္စရေးကို အစဥ်တစ်စိုက် ထောက်ခံလာတဲ့ ဂျာမနီကလည်း ရာဖာကိစ္စအတွက် သတိပေးချက် ထုတ်ပြန်ပါတယ်။ 

“ရာဖာမှာ အကူအညီတွေ လိုအပ်နေတာဟာ မယုံကြည်နိုင်လောက်စရာပါပဲ။ တိုက်ခိုက်မှုတွေကြောင့် ၁ ဒဿမ ၃ သန်းသော ပြည်သူတွေဟာ ဒီနေရာကျဥ်းကျဥ်းလေးမှာ လာခိုလှုံနေရတယ်။ အစ္စရေးစစ်တပ်က ရာဖာမှာ ထိုးစစ်ဆင်မှုလုပ်ရင် အလွန်ဆိုးရွားတဲ့ဒုက္ခတွေ ဖြစ်လာပါလိမ့်မယ်။ ဂါဇာပြည်သူတွေက ပျောက်ကွယ်သွားမှာ မဟုတ်ပါဘူး” လို့ ဂျာမန်နိုင်ငံခြားရေး၀န်ကြီး အန်နာလီနာ ဘာဘော့က ဆိုရှယ်မီဒီယာမှာ ရေးသားခဲ့ပါတယ်။  

Ref: Aljazeera 

ဖေဖော်၀ါရီ ၁၀၊ ၂၀၂၄

M-Media 

-ဂါဇာကမ်းမြှောင်မှာ အသက် ၆ နှစ်အရွယ် လူနာ သမီးငယ်တစ်ဦးနဲ့ လခြမ်းနီအဖွဲ့၀င် ၂ ဦးကို အစ္စရေးက အကြမ်းဖက် သတ်ဖြတ်ခဲ့တဲ့ စက်ဆုပ်ဖွယ်လုပ်ရပ်တစ်ခု ပေါ်ထွက်လာပါတယ်။ 

ဂါဇာစီးတီးမြို့မှာ လွန်ခဲ့တဲ့ ၁၂ ရက်က ဖြစ်ပွားခဲ့တာပါ။ အသက် ၆ နှစ်အရွယ် ဟင်ဒ် ရာဂျဘ်နဲ့ မိသားစု ၅ ဦး စီးနင်းလိုက်ပါလာတဲ့ ကားဟာ အစ္စရေးရဲ့ ဒုံးကျည်နဲ့ ပစ်ခတ်တိုက်ခိုက်ခြင်းကို ခံခဲ့ရပါတယ်။ 

မိသားစု ၅ ဦးစလုံး နေရာမှာ ပွဲချင်းပြီး သေဆုံးခဲ့ပြီး ရာဂျဘ်တစ်ယောက်သာ ဒဏ်ရာတွေနဲ့ အသက်ရှင်ကျန်ရစ်ပါတယ်။ ရာဂျဘ်လေးဟာ ဖုန်းနဲ့ ပါလက်စတိုင်း လခြမ်းနီအဖွဲ့ကို အကူအညီတောင်းခဲ့တာကြောင့် ကျန်းမာရေး၀န်ထမ်းနှစ်ဦးပါ၀င်တဲ့ လူနာတင်ယာဥ်တစ်စီးကို လခြမ်းနီအဖွဲ့က စေလွှတ်ခဲ့ပါတယ်။

အဲဒီလို စေလွှတ်ရာမှာ အန္တရာယ်ကင်းဖို့အတွက် အစ္စရေးစစ်တပ်ကို ကြိုတင်အကြောင်းကြား ခွင့်ပြုချက် ယူခဲ့ပါတယ်။ အခင်းဖြစ်ရာနေရာကို လူနာတင်ကား သွားနေစဥ်မှာ အဆက်အသွယ် ပြတ်တောက်သွားခဲ့တယ်လို့ ပါလက်စတိုင်း လခြမ်းနီအဖွဲ့က ထုတ်ပြန်ပါတယ်။

အစ္စရေးရဲ့ တိုက်ခိုက်မှုတွေကြောင့် နောက်ထပ် ၁၂ ရက်အကြာ ဖေဖော်၀ါရီ ၁၀ ရက်နေ့မှ အခင်းဖြစ်ရာနေရာကို သွားရောက်နိုင်ခဲ့ပြီး ကျန်းမာရေး၀န်ထမ်းနှစ်ဦးဖြစ်တဲ့ ယူစွတ်ဖ် ဇီနိုနဲ့ အဟ်မဒ် အလ်-မဒ်ဟွန်တို့ လိုက်ပါသွားတဲ့ကားဟာ ဒုံးကျည်နဲ့အပစ်ခံရကာ တစ်စစီ ပျက်ဆီးနေတာကို တွေ့ရပြီး သူတို့နှစ်ယောက်လည်း သေဆုံးသွားပါတယ်။

ပျက်ဆီးနေတဲ့ လူနာတင်ယာဥ်နဲ့ မီတာအနည်းငယ်အကွာမှာ ဒုံးကျည်နဲ့ တိုက်ခိုက်ခံထားရတဲ့ ကားအတွင်း သမီးငယ် ရာဂျဘ်နဲ့ မိသားစု၀င်တွေရဲ့ အလောင်းကို တွေ့ရှိခဲ့ရပါတယ်။

“ရာဂျဘ်ကို ကယ်တင်ဖို့အတွက် ခွင့်ပြုချက်တောင်းပြီး လူနာတင်ယာဥ် လွှတ်လိုက်တာကိုတောင် ကျူးကျော်သူတွေဟာ တင်မင် ပစ်မှတ်ထား တိုက်ခိုက်ခဲ့ပါတယ်” လို့ ပါလက်စတိုင်း လခြမ်းနီအဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။ 

၂၀၂၃ ခုနှစ် အောက်တိုဘာ ၇ ရက်နေ့ စတင်ခဲ့တဲ့ ဂါဇာက အစ္စရေးရဲ့ လူသတ်ပွဲအတွင်း အသတ်ခံရသူ ပါလက်စတိုင်းအရေအတွက်ဟာ ၂၈၀၀၀ ကျော်လာပြီဖြစ်ပါတယ်။ 

Ref: Aljazeera 

ဖေဖော်၀ါရီ ၉၊ ၂၀၂၄

M-Media 

-ပါလက်စတိုင်းတွေကို ပေးအပ်မယ့် လူသားချင်းစာနာထောက်ထားမှုဆိုင်ရာ အကူအညီတွေ မ၀င်ရောက်နိုင်ဖို့အတွက် ဂျူးအခြေချ နေထိုင်သူတွေက ပိတ်ဆို့ထားတယ်လို့ သိရပါတယ်။ 

အီဂျစ်ကနေ အစ္စရေးဖက်ကို ၀င်လာမယ့် အကူအညီပေးရေး ထရပ်ကားတွေကို တားဆီးထားတာဖြစ်ပါတယ်။ 

နိုင်ငံတကာက ပါလက်စတိုင်းတွေကို ပေးအပ်တဲ့ အကူအညီတွေကို အစ္စရေးက ကြားဖြတ်ဟန့်တား စစ်ဆေးပြီးမှ ဂါဇာထဲကို ၀င်ရောက်ခွင့်ပေးတာဖြစ်ပါတယ်။ 

ထရပ်ကားတွေရှေ့ ပိတ်ဆို့ထားတဲ့ ဂျူးအခြေချ နေထိုင်သူတွေဟာ ကုလရဲ့ ပါလက်စတိုင်းအကူအညီပေးရေးအဖွဲ့ UNRWA ကို ရန်ပုံငွေ ဖြတ်တောက်ဖို့လည်း ကျွေးကျော်ခဲ့ကြပါတယ်။ 

ပါလက်စတိုင်းပိုင်နက်က အစ္စရေးရဲ့ တရားမ၀င်အိမ်ယာတွေမှာ နေထိုင်တဲ့ ဂျူးအခြေချနေထိုင်သူတွေဟာ ဂါဇာကို သွားမယ့် အကူအညီပေးရေး ယာဥ်တန်းတွေကို ပြီးခဲ့တဲ့ သီတင်းပတ်အနည်းငယ်ကစပြီး ပိတ်ဆို့တားဆီးမှုတွေ တောက်လျှောက်ပြုလုပ်လာပါတယ်။ 

Ref: Aljazeera