ဒီဇင်ဘာ ၁၉၊ ၂၀၁၉
M-Media
-ယူကိန်းနိုင်ငံနဲ့ ဆက်သွယ်ဆောင်ရွက်မှုတွေမှာ အာဏာအလွဲသုံးစားလုပ်မှု၊ လွှတ်တော်ရဲ့ ဆောင်ရွက်ချက်ကို ဟန့်တားမှုတွေအတွက် သမ္မတ ဒေါ်နယ်ထရမ့်ကို စုံစမ်းစစ်ဆေး အရေးယူမှု (impeachment) လုပ်ဆောင်ဖို့ အမေရိကန်အောက်လွှတ်တော်က မနေ့မှာ မဲခွဲဆုံးဖြတ်ခဲ့ပါတယ်။
ထရမ့်ဟာ အမရိကန်သမိုင်းမှာ အောက်လွှတ်တော်က စုံစမ်းစစ်ဆေးအပြစ်ပေးဖို့ တစ်ညီတစ်ညွတ်တည်း ဆုံးဖြတ်ခံရတဲ့ တတိယမြောက်သမ္မတ ဖြစ်လာပါတယ်။ ဒီမိုကရက်တွေကြီးစိုးတဲ့ အောက်လွှတ်တော်က ဒီလို ဆုံးဖြတ်လိုက်တာကြောင့် ထရမ့်ဟာ အစောဆုံး ဇန်နဝါရီလကျရင် ရီပက်ဘလစ်ကန်ကြီးစိုးတဲ့ အထက်လွှတ်တော်မှာ စုံစမ်းမေးမြန်းခံရဖို့ ရှိနေပါတယ်။
အောက်လွှတ်တော်ဥက္ကဌ နန်စီပီလိုစီက ထရမ့်ရဲ့ အဆင်ခြင်မဲ့ လုပ်ရပ်တွေကြောင့် အခုလို စုံစမ်းစစ်ဆေးအပြစ်ပေးဖို့ ဆောင်ရွက်ရတဲ့အထိ ဖြစ်လာတာဖြစ်ကြောင်း မိမိတို့မှာ အခြား ရွေးစရာမရှိကြောင်း မဲမခွဲခင်မှာ ပြောကြားခဲ့ပါတယ်။
ထရမ့်က အောက်လွှတ်တော်ဟာ မျိုးချစ်အမေရိကန်တွေရဲ့ သန်းနဲ့ချီတဲ့မဲတွေကို ပယ်ဖျက်တော့မယ်လို့ မဲမခွဲခင် မီချီဂန်က လူထုထောက်ခံပွဲမှာ ပြောကြားခဲ့ပါတယ်။ ရီပက်ဘလစ်ကန်ပါတီ တာဝန်ရှိသူအချို့ကလည်း အောက်လွှတ်တော်ရဲ့ မဲခွဲမှုဟာ လှည့်စားမှုတစ်ခုဖြစ်တယ်လို့ ဝေဖန်ထားပါတယ်။
အင်္ဂါနေ့က အောက်လွှတ်တော်ကို ပေးပို့တဲ့ ထရမ့်ရဲ့စာထဲမှာ ဒီလုပ်ရပ်ဟာ အာဏာသိမ်းဖို့ ကြိုးစားမှု၊ အမေရိကန်ဒီမိုကရေစီအပေါ် စစ်ကြေငြာမှု ဖြစ်တယ်လို့ ဖော်ပြထားပါတယ်။
ပြဿနာအစ
ဒုတိယသမ္မတဟောင်း ဂျိုးဘိုင်ဒန်နဲ့ သားဖြစ်သူ ဟန်တာတို့ရဲ့အကြောင်းကို စုံစမ်းကာ သတင်းပေးဖို့အတွက် ထရမ့်က ယူကရိန်းသမ္မတသစ် ဗိုလိုဒီမာ ဇီလန်စကီးကို ဇူလိုင်လမှာ ဖုန်းဆက်ပြောဆိုခဲ့တယ်ဆိုတဲ့ သတင်းထွက်လာပြီးတဲ့နောက် ဒီလို စုံစမ်းစစ်ဆေးမှုလုပ်ဖို့ ကန်လွှတ်တော်က ဆောင်ရွက်လာတာ ဖြစ်ပါတယ်။
ဘိုင်ဒန်ဟာ ၂၀၂၀ သမ္မရွေးကောက်ပွဲမှာ ဒီမိုကရက်တစ်ပါတီရဲ့ သမ္မတလောင်း ဖြစ်လာဖို့ ရေပန်းစားနေသူလည်း ဖြစ်ပါတယ်။ ဘိုင်ဒန်နဲ့ သားဖြစ်သူတို့ဟာ ယူကရိန်း ဓာတ်ငွေ့ကုမ္ပဏီတစ်ခုရဲ့ ဘုတ်အဖွဲ့ဝင်တွေလည်း ဖြစ်ပါတယ်။ အခုအချိန်အထိ သူတို့နှစ်ယောက် ဥပဒေပ လုပ်ဆောင်မှုရှိတယ်ဆိုတဲ့ သတင်းမျိုး ထွက်မလာသေးပါဘူး။
ယူကရိန်းစစ်တပ်ကို ပေးအပ်မယ့် ကန်ဒေါ်လာ ၃၉၁ သန်း ထောက်ပံ့ကြေးကို အခြေခံပြီး သမ္မတ ဇီလန်စကီးထံကနေ ထရမ့်က ကတိကဝတ်တောင်းခဲ့ကာ ဒါဟာ အာဏာအလွဲသုံးစားမှုဖြစ်တယ်လို့ ဒီမိုကရက် အမတ်တွေက စွပ်စွဲခဲ့ပါတယ်။
ဒီကိစ္စအတွက် အောက်လွှတ်တော် ထောက်လှမ်းရေးကော်မတီက သက်သေ ၁၇ ယောက်ကို ၅ ရက်ကြာ လူသိရှင်ကြား မေးမြန်းမှု လုပ်ဆောင်ခဲ့ပြီး စာမျက်နှာ ၃၀၀ ပါဝင်တဲ့ အစီရင်ခံစာတစ်စောင်လည်း ထုတ်ပြန်ခဲ့ပါတယ်။
စုံစမ်းမှုမှာ သွားရောက်ဖြေကြားခြင်းမပြုဖို့ အိမ်ဖြူတော်ဟာ တာဝန်ရှိသူ ၉ ယောက်ကို ဟန့်တားခဲ့ပြီး ဒါဟာ လွှတ်တော်လုပ်ငန်းကို နှောက်ယှက်မှုဖြစ်တယ်လို့ အောက်လွှတ်တော် တရားရေးကော်မတီဥက္ကဌ ဂျာရိုလ် နဒ်လာက ပြောကြားခဲ့ပါတယ်။
မနေ့က မဲခွဲမှုဟာ ထရမ့်ရဲ့ အာဏာအလွဲသုံးစားလုပ်မှု ရှိ၊ မရှိ၊ လွှတ်တော်ရဲ့ လုပ်ငန်းကို နှောက်ယှက်မှု ရှိ၊ မရှိ မဲခွဲတာဖြစ်ပြီး ဒီလိုရှိခဲ့တယ်လို့ လွှတ်တော်အမတ်တွေက မဲပေးခဲ့တာကြောင့် စုံစမ်းစစ်ဆေးမှု (impeachment) စတင်မှာ ဖြစ်ပါတယ်။
Impeachment လုပ်ငန်းစဉ်အရ အပြစ်ရှိကြောင်းထင်ရှားရင် ရာထူးကနေ ဆင်းပေးရမှာဖြစ်ပါတယ်။ အမေရိကန်သမိုင်းမှာ အရင်က သမ္မတ ၂ ဦး ဒီလိုအခြေအနေမျိုး ရင်ဆိုင်ခဲ့ရပေမယ့် ရာထူးက ဆင်းပေးရတာမျိုး မဖြစ်ခဲ့ပါဘူး။
Ref: Aljazeera
