Blog

ဒီဇင်ဘာ ၁၈၊ ၂၀၁၉
M-Media

-စစ်အာဏာရှင်ဟောင်း ပါရ်ဗက်ဇ် မူရှာရက်ဖ်ကို နိုင်ငံတော် သစ္စာဖောက်ဖျက်မှုနဲ့ ပါကစ္စတန်အထူးခုံရုံးက မနေ့မှာ သေဒဏ်ချမှတ်လိုက်ပါတယ်။

စစ်ခေါင်းဆောင်အဖြစ် ၁၉၉၉ ခုနှစ်မှာ အာဏာသိမ်းခဲ့တဲ့ မူရှာရက်ဖ်ဟာ ၂၀၀၁ ခုနှစ်ကနေ ၂၀၀၈ ခုနှစ်အထိ ပါကစ္စတန်သမ္မတအဖြစ် တာ၀န်ထမ်းဆောင်ခဲ့တာ ဖြစ်ပါတယ်။ အာဏာ ဆက်လက်တည်မြဲရေးအတွက် ၂၀၀၇ ခုနှစ်က အခြေခံဥပဒေကို ဖျက်သိမ်းပြီး အရေးပေါ်အခြေအနေ ကြေငြာခဲ့တဲ့လုပ်ရပ်ကြောင့် အခုလို ပြစ်ဒဏ် ချမှတ်ခံခဲ့ရတာပါ။

ပါကစ္စတန်စစ်တပ်က ဒီပြစ်ဒဏ်ကို ပြင်းပြင်းထန်ထန် ဝေဖန်ခဲ့ပြီး ဥပဒေကြောင်းအရ မှန်မှန်ကန်ကန် ဆောင်ရွက်ခဲ့ခြင်းမရှိဘူးလို့ ထုတ်ပြန်ခဲ့ပါတယ်။

အသက် ၇၆ နှစ်အရွယ် ရှိပြီဖြစ်တဲ့ မူရှာရက်ဖ်ဟာ ၂၀၁၆ ခုနှစ်မှာ နိုင်ငံကနေ ဒူဘိုင်းကို ထွက်သွားပြီး လက်ရှိ ဒူဘိုင်းမှာပဲ ဆေးကုသမှု ခံယူနေပါတယ်။ အခုလအစောပိုင်းက ထုတ်ပြန်တဲ့ ဗီဒီယိုမှာတော့ နိုင်ငံတော် သစ္စာဖောက်မှုနဲ့ သူ့ကို တရားစွဲဆိုထားမှုဟာ အခြေအမြစ်မရှိဘူးလို့ ပြောကြားခဲ့ပါတယ်။

၁၉၉၉ ခုနှစ်မှာ မူရှာရက်ဖ်ရဲ့ အာဏာသိမ်းဖြုတ်ချမှုကို ခံခဲ့ရတဲ့ ဝန်ကြီးချုပ်ဟောင်း နာဝဇ်ရှရစ်ဖ်ဟာ ၂၀၁၃ ခုနှစ် အာဏာပြန်ရပြီးတဲ့နောက် ၂၀၁၄ ခုနှစ်မှာ မူရှာရက်ဖ်ကို နိုင်ငံတော် သစ္စာဖောက်ဖျက်မှုနဲ့ ပြန်လည် တရားစွဲဆိုခဲ့တာ ဖြစ်ပါတယ်။ မူရှာရက်ဖ်ကတော့ ဒီတရားစွဲမှုဟာ နိုင်ငံရေးလှုံ့ဆော်မှုတွေ ပါဝင်တယ်လို့ ‌ပြောကြားခဲ့ပါတယ်။

တရားသူကြီး ၃ ဦးပါ အထူးခုံရုံးက အခုလို သေဒဏ်ချမှတ်ခဲ့ပေမယ့် တကယ့်လက်တွေ့မှာ မူရှာရက်ဖ်ဟာ ပြစ်ဒဏ်ခံရဖွယ် မရှိပါဘူး။

Ref: BBC

ဒီဇင်ဘာ ၁၇၊ ၂၀၁၉
M-Media

-အမေရိကန်က နာမည်ကျော် ခရီးသွားမဂ္ဂဇင်း Condè Nast ရဲ့ ၂၀၂၀ ခုနှစ် ခရီးသွားလာဖို့ အကောင်းဆုံး နိုင်ငံများစာရင်းထဲမှာ ပါကစ္စတန်နိုင်ငံက ထိပ်ဆုံးကနေ ပါဝင်လာခဲ့ပါတယ်။

ဝန်ကြီးချုပ် အင်မရန်းခန်းဦးဆောင်တဲ့ ပါကစ္စတန်အစိုးရသစ်ဟာ နိုင်ငံရဲ့ ခရီးသွားလာရေးကဏ္ဍ ဖွံ့ဖြိုးတိုးတက်စေဖို့ အားစိုက်ဆောင်ရွက်နေပြီး အခုလို ထိပ်တန်းမဂ္ဂဇင်းမှာ ပါဝင်လာတာဟာ တိုးတက်မှု လက္ခဏာလည်း ဖြစ်ပါတယ်။

Condè Nast မဂ္ဂဇင်းက ပါကစ္စတန်ဟာ စွန့်စွန့်စားစား ခရီးသွားလာလိုသူတွေအတွက် သင့်တော်တဲ့‌ ‌နိုင်ငံဖြစ်တယ်လို့ သမုတ်ခဲ့ပါတယ်။

“ပါကစ္စတန်မှာ ပေ ၂၂၉၆၅ ထက်ပိုတဲ့ တောင်အရေအတွက်ဟာ တရုတ်နဲ့ နီပေါ နှစ်နိုင်ငံပေါင်း အရေအတွက်ထွက် ပိုများပြီး စွန့်စွားခရီးသွားလာလိုသူတွေ၊ စွန့်စားတောင်တက်လိုသူတွေတွေ မျက်စိကျရာနိုင်ငံတစ်ခု ဖြစ်လာပါတယ်” လို့ မဂ္ဂဇင်းမှာ ရေးသားဖော်ပြခဲ့ပါတယ်။

ကမ္ဘာ့အမြင့်ဆုံး ပိုလိုကစားကွင်းရှိပြီး ပေပေါင်း ၁၂၂၅၀ မြင့်တဲ့ Shandur Pass တောင်ပေါ်ကို တက်ရောက်အပန်းဖြေနိုင်သလို၊ အရောင်အသွေးစုံတဲ့ ကိုယ်တိုင်လုပ် ခေါင်းပေါင်း၊ အဝတ်အထည်တွေကြောင့် နာမည်ကျော်ကြားတဲ့ Hindu Kush လူမျိုးတွေကို တွေ့ဆုံနိုင်တယ်လို့ မဂ္ဂဇင်းက ဆိုပါတယ်။

ဗြိတိန်က နာမည်ကျော် ဟာသသရုပ်ဆောင် မိုက်ကယ် ပါလင်း၊ ဗြိတိန်တော်မင်းသား ဟယ်ရီတို့ ဇနီးမောင်နှံ ပါကစ္စတန်ကိုသွားရောက်အပန်းဖြေမှု၊ ပါကစ္စတန်အစိုးရက ဗီဇာဖြေလျော့ပေးထားမှုတွေကိုလည်း မဂ္ဂဇင်းမှာ ထည့်သွင်းဖော်ပြခဲ့ပါတယ်။

Ref: Khaleej Times