ဇန်န၀ါရီ ၂၄၊ ၂၀၂၄
M-Media
-အရှေ့အလယ်ပိုင်းမှာ မတည်မငြိမ်မှုတွေ ထပ်ပြီး တိုးမလာအောင် ဆောင်ရွက်ဖို့ သဘောတူညီချက်ရခဲ့တယ်လို့ အီရန်နဲ့ တူရကီခေါင်းဆောင်တွေက ထုတ်ပြန်ပါတယ်။
အောက်တိုဘာ ၇ ရက်နေ့ကစပြီး ဂါဇာမှာ အစ္စရေးက တစ်ကျော့ပြန်လူသတ်ပွဲ ပြုလုပ်လာတဲ့ နောက်ဆက်တွဲအဖြစ် အရှေ့အလယ်ပိုင်းမှာ မတည်ငြိမ်မှုတွေ မြင့်တက်လာတာပါ။
ပါလက်စတိုင်းနိုင်ငံတည်ရှိရေး မူလသဘောတူညီချက်ကို အစ္စရေး၀န်ကြီးချုပ် နေတန်ယာဟုက ပြောင်ပြောင်တင်းတင်းငြင်းပယ်ကာ တိုက်ခိုက်သတ်ဖြတ်မှုတွေ တိုးမြှင့် လုပ်ဆောင်လာပြီးနောက် အရှေ့အလယ်ပိုင်းမှာ မတည်ငြိမ်မှုတွေ ထပ်မံမြင့်တက်လာမှာကို ကမ္ဘာ့ခေါင်းဆောင်တွေက စိုးရိမ်လာကြတာ ဖြစ်ပါတယ်။
အရှေ့အလယ်ပိုင်းက လက်နက်အင်အားကြီးနိုင်ငံ နှစ်ခုဖြစ်တဲ့ အီရန်နဲ့ တူရကီသမ္မတတို့ဟာ မနေ့က တွေ့ဆုံခဲ့ပြီး ဒေသတွင်းအရေး ဆွေးနွေးခဲ့ကြပါတယ်။
အစ္စရေးရဲ့ လူမဆန်တဲ့ သတ်ဖြတ်မှုတွေ အဆုံးသတ်ရေး၊ ဒေသတွင်း ရေရှည်တည်တံ့မယ့် ငြိမ်းချမ်း၊ တရားမျှတမှု ရရှိရေး အရေးကြီးပုံတွေကို အီရန်သမ္မတ အီဘရာဟင် ရိုင်စီနဲ့ ဆွေးနွေးခဲ့တယ်လို့ တူရကီသမ္မတ အာဒိုဂန်က သတင်းစာရှင်းလင်းပွဲမှာ ပြောကြားခဲ့ပါတယ်။
“ဒေသတွင်း တည်ငြိမ်ရေးနဲ့ လုံခြုံရေးကို ပိုမို ထိခိုက်လာစေမယ့် ခြေလှမ်းမျိုးတွေ မလှမ်းမိအောင် လုပ်ဆောင်ဖို့ အရေးကြီးတယ်ဆိုတာ ကျွန်တော်တို့ သဘောတူခဲ့ကြပါတယ်”
နယ်စပ်ဖြတ်ကျော် ခြိမ်းခြောက်မှုတွေကို တုန့်ပြန်ရေး ပူးပေါင်းဆောင်ရွက်ဖို့လည်း ခေါင်းဆောင် နှစ်ဦးက သဘောတူခဲ့ကြပါတယ်။
အီရန်နဲ့ တူရကီတို့ဟာ ပါလက်စတိုင်းနယ်မြေတွေကို အစ္စရေးက ခိုးယူ သိမ်းပိုက်မှုနဲ့ ပါလက်စတိုင်းပြည်သူတွေအပေါ် အကြမ်းဖက်သတ်ဖြတ်မှုတွေကို ပြင်းပြင်းထန်ထန် ကန့်ကွက်ရှုတ်ချတဲ့ နိုင်ငံတွေလည်း ဖြစ်ပါတယ်။
Ref: Aljazeera
