အောက်တိုဘာ ၂၀၊ ၂၀၁၉
M-Media
-လူကုန်ကူးခံရသူများ ပြန်လည်လွှဲပြောင်းရေး နှစ်နိုင်ငံ သဘောတူညီချက်အရ ထိုင်းနိုင်ငံဟာ လူကုန်ကူးခံရသူ ၅၅ ဦးကို သောကြာနေ့က မြန်မာနိုင်ဖက်ကို လွှဲပြောင်း ပေးအပ်ခဲ့ပါတယ်။
၅၃ ဦးကို မဲဆောက်-မြ၀တီ နယ်စပ်ကနေ လွှဲပြောင်းပေးခဲ့တာဖြစ်ပြီး ၂ ယောက်ကိုတော့ ရှမ်းပြည်နယ် တာချီလိတ်နယ်စပ်ကနေ လွဲပြောင်းပေးခဲ့တာဖြစ်တယ်လို့ မြန်မာနိုင်ငံ ပြည်ထဲရေးဝန်ကြီးဌာနက သတင်းထုတ်ပြန်ပါတယ်။
ဩဂုတ်လက ရန်ကုန်မြို့မှာ ကျင်းပပြုလုပ်ခဲ့တဲ့ ၂၃ ကြိမမြောက် မြန်မာ-ထိုင်း Return and Reintegration of Trafficking Victim အစည်းအဝေးမှာ မြန်မာနိုင်ငံက လူကုန်ကူးခံရသူ ၆၀၀ လောက် ပြန်လည်လွှဲပြောင်းဖို့အတွက် ဆွေးနွေးခဲ့ကြပါတယ်။
လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာနလက်အောက်က ပြန်လည်ထူထောင်ရေး ဦးစီးဌာန လက်ထောက်ညွှန်ကြားရေးမှူး မခိုင်စုလွင်က ပြန်ရောက်လာတဲ့ သူတွေဟာ ထိုင်းနိုင်ငံက ထိန်းသိမ်းရေးစခန်းတွေ၊ ပြန်လည်ထူထောင်ရေးစခန်းတွေမှာ ၈ လလောက် နေထိုင်ခဲ့ရတယ်လို့ ပြောကြားခဲ့ပါတယ်။
ထိုင်းနိုင်ငံဟာ ပွဲစားတွေကနေတစ်ဆင့် တရားမဝင် နယ်စပ်ဖြတ်ကျော် ဝင်ရောက်လာတဲ့သူတွေကို ဖမ်းဆီးပြီးတဲ့နောက် လူဝင်မှုကြီးကြပ်ရေးဌာနရဲ့ ထိန်းသိမ်းရေးစခန်းမှာ ထိန်းသိမ်းထားပြီး လူကုန်ကူးခံရတယ်ဆိုတာ သေချာရင် ပြန်လည်ထူထောင်ရေးစခန်းတွေကို ပို့ဆောင်တာ ဖြစ်ပါတယ်။
မခိုင်စုလွင်က ထိုင်းနိုင်ငံ ပြန်လည်ထူထောင်ရေးစင်တာတွေမှာ ထိန်းသိမ်းခံထားရတဲ့ မြန်မာနိုင်ငံသား လူကုန်ကူးခံရသူအရေအတွက်ဟာ ၅၅၀ လောက်ရှိကြောင်း၊ အဲဒီအထဲက ၁၀၀ လောက်ကို မြန်မာနိုင်ငံသားအဖြစ် အတည်ပြုနိုင်ခဲ့ပြီး လူကုန်ကူးခံရတယ်ဆိုတဲ့ လူသက်သေ လိုအပ်တဲ့အတွက် စခန်းမှာ ဆက်လက်ရှိနေရတာဖြစ်ကြောင်း ထည့်သွင်း ပြောဆိုခဲ့ပါတယ်။
လူကုန်ကူးခံရသူတွေ လွှဲပြောင်းပေးရေးကိစ္စအတွက် မြန်မာနဲ့ ထိုင်းနိုင်ငံတို့ဟာ ၆ လတစ်ကြိမ် ဆွေးနွေးမှုတွေ လုပ်ဆောင်လေ့ရှိပါတယ်။ အလုပ်သမားစေလွှတ်ရေးအတွက် နားလည်မှု စာချွန်လွှာတစ်ခုကိုလည်း လက်မှတ်ရေးထိုးထားပြီး အဲဒီသဘောတူညီချက်အရ တစ်လကို မြန်မာနိုင်ငံသား ၂ သောင်းလောက် တရားဝင် သွားရောက်နေပါတယ်။
Ref: Irrawaddy
(ဧရာ၀တီသတင်းဌာန အင်္ဂလိပ်ပိုင်းမှသတင်းကို ကောက်နှုတ် ဘာသာပြန်ဆိုခြင်း ဖြစ်ပါသည်)
