အောက်တိုဘာ ၁၉၊ ၂၀၁၉
M-Media
-အေဒီ ၉ ရာစုကနေ ၁၅ ရာစုလောက်အထိ တည်တံ့ခဲ့တဲ့ ‘ခမာအင်ပါယာ’ လက်ထက်က မြို့တော်တစ်ခုကို နိုင်ငံတကာ သုတေသနပညာရှင်တွေက ရှာဖွေဖော်ထုတ်နိုင်ခဲ့ပါတယ်။
Mahendraparvata လို့ အမည်တွင်တဲ့ အဲဒီမြို့တော်ဟာ ခမာအင်ပါယာရဲ့ အစောဆုံး မြို့တော်တွေထဲက တစ်ခုလည်းဖြစ်ပါတယ်။ အရင်က ဒီမြို့တော်အကြောင်းကို အခြား ရှေးဟောင်းနေရာတွေမှာ တွေ့ရတဲ့ ကျောက်စာ၊ ပေစာတွေကနေတစ်ဆင့်သာ သိရှိခဲ့ရတာ ဖြစ်ပါတယ်။
ရှေးဟောင်း သုတေသနပညာရှင်တွေက ဒီရှေးဟောင်းမြို့ဟာ အပန်းဖြေမြို့ဖြစ်တဲ့ Siem Reap ရဲ့ မြောက်ဖက် မိုင် ၃၀ အကွာလောက်မှာ တည်ရှိမယ်လို့ ခန့်မှန်းခဲ့ပြီး ပျောက်ဆုံးနေသောမြို့တော်အဖြစ် သတ်မှတ်ခဲ့ပါတယ်။
နောက်ပိုင်းမှာ နိုင်ငံတကာက သိပ္ပံပညာရှင်တွေ ပူးပေါင်းပြီး ဝေဟင်လေဆာစကန်စနစ်၊ မြေပြင်လေ့လာဆန်းစစ်မှုတွေအပါအဝင် နည်းလမ်းမျိုးစုံနဲ့ ရှာဖွေမှုတွေ ပြုလုပ်ခဲ့ပြီးတဲ့နောက် Mahendraparvata မြို့ရဲ့ တည်နေရာကို ဖော်ထုတ်နိုင်ခဲ့ပါတယ်။
“၈ ရာစုကနေ ၉ ရာစုအထိ တည်တံ့ခဲ့ပြီး ခမာအင်ပါယာရဲ့ မြို့တော်လည်းဖြစ်တဲ့ Mahendraparvata မြို့ဟာ Phnom Kulen တောင်ကြောမှာ တည်ရှိခဲ့တယ်ဆိုတာကို ရရှိထားတဲ့ အထောက်အထားများစွာကို အခြေခံကာ အတည်ပြုနိုင်ခဲ့ပါတယ်” လို့ သုတေသနအဖွဲ့က အင်္ဂါနေ့က ထုတ်ပြန်တဲ့ အစီရင်ခံစာမှာ ပြောကြားခဲ့ပါတယ်။
ရှာဖွေတွေ့ရှိမှုကို ပုံပေါ်ထားတဲ့ မြေပုံမှာ လေးထောင့်ကျကျမြို့ရဲ့ လမ်းမတွေ၊ ရေကန်တွေ၊ ကျုံးတွေ၊ ဆည်တွေ၊ ဘုရားကျောင်းနံရံတွေနဲ့ နန်းတော်တစ်ခု ပါဝင်ပါတယ်။
Grid စနစ်နဲ့ ခေတ်သစ်မြို့တည်မှုရဲ့ အစောပိုင်းပုံစံကို ဒီမြို့မှာတွေ့ရပြီး မြို့ပြစီမံကိန်းတွေ၊ အဲဒီခေတ်အခါက ဆန်းသစ်လွန်းတဲ့ ဟိုက်ဒရောလစ်စနစ်တွေကို တွေ့ရတယ်လို့ အစီရင်ခံစာမှာ ဖော်ပြထားပါတယ်။
ဒီတွေ့ရှိမှုဟာ ခမာအင်ပါယာ၊ အန်းကားဒေသနဲ့ပတ်သက်ပြီး ပိုမိုလေ့လာသိရှိနိုင်ဖို့ တံခါးဖွင့်ပေးလိုက်တာ ဖြစ်တယ်လို့လည်း သုတေသနပညာရှင်တွေက သုံးသပ်ခဲ့ကြပါတယ်။
၈ ရာစုမတိုင်ခင်က ခမာဒေသမှာ စနစ်တက မြို့တည်ထားတဲ့ အထောက်အထားမျိုး မတွေ့ရဘဲ Mahendraparvata မြို့ဟာ သိရှိထားသမျှ ခမာသမိုင်းမှာ Grid စနစ်နဲ့ ပထမဆုံး တည်ဆောက်ထားတဲ့မြို့ ဖြစ်မယ်လို့လည်း ပညာရှင်တွေက မှတ်ယူထားပါတယ်။
တစ်ချိန်က ခမာအင်ပါယာမှာ ယနေ့ခေတ် ထိုင်း၊ ဗီယက်နမ်၊ လာအိုနိုင်ငံတွေ၊ တရုတ်တောင်ပိုင်းနဲ့ မြန်မာနိုင်ငံက ဒေသအချို့ပါဝင်ခဲ့ပြီး မြို့တော်က Angkor ဖြစ်ပါတယ်။
Ref : CNN
