ဇူလိုင် ၂၄၊ ၂၀၁၉
M-Media
-အစိုးရသစ်ဟာ ခေတ်သစ်ဗြိတိန်ရဲ့ မတူကွဲပြားမှုကို ရောင်ပြန်ဟပ်မှာဖြစ်ပြီး၊ Brexit နဲ့ တိုင်းပြည်ညီညွတ်ရေးကို အဓိကထား လုပ်ဆောင်သွားမယ်လို့ ဗြိတိန်ဝန်ကြီးချုပ်သစ်ဖြစ်လာမယ့် ဘောရစ်ဂျွန်ဆင်က ပြောကြားလိုက်ပါတယ်။
လန်ဒန်မြို့တော်ဝန်ဟောင်း ဂျွန်ဆင်ဟာ မနေ့က ကွန်ဆာဗေးတစ်ပါတီ အကြီးအကဲအဖြစ် ရွေးချယ်ခံခဲ့ရပြီး ဒီကနေ့မှာတော့ ဗြိတိန်ဝန်ကြီးချုပ် ရာထူးကို တရားဝင်ရယူကာ အစိုးရဖွဲ့မှာ ဖြစ်ပါတယ်။ အစိုးရအဖွဲ့မှာ ဂျွန်ဆင်ဟာ အမျိုးသမီတွေနဲ့ တိုင်းရင်းသား လူနည်းစုတွေ ပါဝင်မှုကို တိုးမြှင့်သွားဖို့ ရှိနေတယ်လို့ ကျွမ်းကျင်သူတွေက သုံးသပ်ထားပါတယ်။
ပါတီခေါင်းဆောင်ယှဉ်ပြိုင်မှာ နိုင်ငံခြားရေးဝန်ကြီး ဂျယ်ရီမီဟန့်ကို အနိုင်ရခဲ့ပြီးတဲ့နောက် ဂျွန်ဆင်က သူဟာ ဗြိတိန် ဥရောပသမဂ္ဂကနေထွက်ရေး၊ တိုင်းပြည် စည်းလုံးညီညွတ်ရေးနဲ့ အတိုက်အခံ လေဘာပါတီ ဂျယ်ရီမီ ကွရ်ဘာန်ကို အနိုင်ရရှိရေး အဓိကထား လုပ်ဆောင်သွားမယ်လို့ ပြောကြားခဲ့ပါတယ်။
“ကျွန်တော့်ကို မယုံတဲ့သူတွေကို ပြောချင်တာက – ကျွန်တော်တို့ဟာ တိုင်းပြည်ကို အားဖြည့်ကာ၊ အောက်တိုဘာ ၃၁ ရက်နေ့ နောက်ဆုံးထားပြီး Brexit ကိစ္စကို ပြီးအောင် လုပ်သွားမယ် ဆိုတာပါ”
လက်ရှိဝန်ကြီးချုပ် ထရီဇာမေဟာ ဒီကနေ့ ဘက်ကင်ဟမ် နန်းတော်မှာ ဘုရင်မကြီးထံ နှုတ်ထွက်စာ တင်သွင်းမှာဖြစ်ပြီး၊ အဲဒီနောက်မှာတော့ ဂျွန်ဆင်ကို ၀န်ကြီးချုပ်သစ်အဖြစ် ဘုရင်မကြီးက ခန့်အပ်မှာ ဖြစ်ပါတယ်။
အစိုးရသစ်မှာ ပါတီအတွင်းက အရည်အချင်းရှိသူတွေအားလုံး ပါဝင်လာမှာဖြစ်ပြီး ခေတ်သစ်ဗြိတိန်ကို ရောင်ပြန်ဟပ်လိမ့်မယ်လို့ ဂျွန်ဆင်နဲ့ နီးစပ်တဲ့ ရင်းမြစ်တစ်ခုက Reuters သတင်းဌာနကို ပြောကြားခဲ့ပါတယ်။ အမျိုးသမီးတွေ၊ မတူကွဲပြားတဲ့ လူ့အဖွဲ့အစည်းက လူတွေလည်း အစိုးရသစ်မှာ ပိုမိုပါဝင်လာဖို့ ရှိနေပါတယ်။
ဥရောပသမဂ္ဂကနေ ဗြိတိန်နှုတ်ထွက်ရေး (Brexit) ကိစ္စမှာ ချောချောမွေ့မွေ့ ဖြစ်စေဖို့အတွက် ညှိနှိုင်းဆွေးနွေးသွားမယ်လို့ ဂျွန်ဆင်က ကတိပြုထားပါတယ်။
Ref: BBC, Reuters
