ဇွန် ၂၅၊ ၂၀၁၈
M-Media
– ချေချင်းညာခေါင်းဆောင် ရမ်ဇာန် ကာဒီရော့ဗ်နဲ့ တွဲရိုက်ထားတဲ့ဓာတ်ပုံကို နိုင်ငံရေးအရ အသုံးချပြီး ဝေဖန်မှုတွေ ပြုလုပ်နေတဲ့အတွက် တိုက်စစ်မှူး မိုဟာမက် ဆာလာဟ်ဟာ အီဂျစ်လက်ရွေးစင်အသင်းက အနားယူတော့မယ်ဆိုတဲ့ သတင်းတွေ ထွက်လာပါတယ်။
ရုရှားကမ္ဘာ့ဖလားပြိုင်ပွဲကို ၀င်ရောက်ယှဉ်ပြိုင်နေတဲ့ အီဂျစ်အသင်းဟာ ရုရှားနိုင်ငံအနောက်ပိုင်းက ချေချင်းညာ ကိုယ်ပိုင်အုပ်ချုပ်ခွင့်ရဒေသ မြို့တော် ဂရို့ဇ်နီကို လေ့ကျင့်ရာနေရာအဖြစ် အသုံးပြုနေတာ ဖြစ်ပါတယ်။
ချေချင်းညာခေါင်းဆောင်ဟာ လေ့ကျင့်ကွင်းကိုလာရောက်ပြီး ဆာလာဟ်အပါအ၀င် အီဂျစ်ကစားသမားတွေနဲ့ တွဲကာ ဓာတ်ပုံတွေရိုက်ခဲ့သလို အီဂျစ်အသင်းကို တည့်ခင်းဧည့်ခံတဲ့ ဂုဏ်ပြုညစာစားပွဲမှာလည်း မိုဟာမက် ဆာလာဟ်ကို ချေချင်းညာရဲ့ ဂုဏ်ထူးဆောင်နိုင်ငံသားအဖြစ် သတ်မှတ်ခဲ့ပါတယ်။
၂၀၀၄ ခုနှစ်ကတည်းက ချေချင်းညာရဲ့ ခေါင်းဆောင်ဖြစ်လာတဲ့ ကာဒီရော့ဗ်ဟာ ရုရှားဖက်ကိုယိမ်းတဲ့ သဘောထားတင်းမာသူဖြစ်ပြီး သူ့ဒေသအပေါ် တင်းတင်းကျပ်ကျပ်အုပ်ချုပ်မှု၊ လိင်တူချစ်သူ အသိုင်းအ၀ိုင်းအပေါ် ရန်လိုတဲ့မှတ်ချက်တွေ ပေးမှုကြောင့် ဝေဖန်ခံရသူ ဖြစ်ပါတယ်။
ကာဒီရော့ဗ်နဲ့ ဆာလာဟ် အတူတွဲရိုက်တဲ့ဓာတ်ပုံ ပေါ်ထွက်လာပြီးနောက်ပိုင်း သူပါ ဝေဖန်ခံခဲ့ရတာကြောင့် ဆာလာဟ်ဟာ ကမ္ဘာ့ဖလားပြိုင်ပွဲပြီးရင် အီဂျစ်လက်ရွေးစင်အသင်းကနေ အနားယူဖို့ စဉ်းစားနေကြောင်း အီဂျစ်ဘောလုံးအသင်းနဲ့ နီးစပ်တဲ့ ရင်းမြစ်တွေက အတည်ပြုပါတယ်။
ဒါပေမယ့် အီဂျစ်ဘောလုံးအဖွဲ့ချုပ်က ဒီသတင်းကို ပယ်ချခဲ့ပြီး ဆာလာဟ်ဟာ အသင်းမှာပျော်ရွှင်နေတယ်လို့ ဆိုပါတယ်။
ဆာလာဟ်ရဲ့ ပုံရိပ်တွေကို အသုံးပြုမှုနဲ့ပတ်သက်ပြီး ဧပြီလကလည်း ဆာလာဟ်နဲ့ အီဂျစ်ဘောလုံးအဖွဲ့ချုပ်အကြား ပြဿနာ တက်ခဲ့ဖူးပါတယ်။
အီဂျစ်ပြည်သူတွေကတော့ ဆာလာဟ် လက်ရွေးစင်အသင်းကနေ နှုတ်မထွက်ရေး ဆိုရှယ်မီဒီယာကနေတစ်ဆင့် လှုပ်ရှားမှုတွေ ပြုလုပ်နေကြပါတယ်။
Ref: ESPN
