IS အကြမ်းဖက်အဖွဲ့ကို မွတ်စလင်အားလုံးနီးပါး မုန်းတီးသည်ဟု စစ်တမ်းများက ဖော်ပြ

ဒီဇင်ဘာ ၅၊ ၂၀၁၅
M-Media

– ကမ္ဘာကျော် Pew သုတေသနစင်တာမှ မကြာသေးမီက ကောက်ယူခဲ့သည့် စစ်တမ်းများအရ မွတ်စလင်အများစုရှိရာ နိုင်ငံများမှ မွတ်စလင် အားလုံးနီးပါးမှာ အကြမ်းဖက် IS အဖွဲ့ကို ရွံ့ရွာစက်ဆုပ် မုန်းတီးကြသည်ဟု သိရှိခဲ့ရသည်။

မွတ်စလင် ၁၀ နိုင်ငံ၌ အဆိုပါ စစ်တမ်းကောက်ယူမှုကို ပြုလုပ်ခဲ့ခြင်းဖြစ်ပြီး လက်ဘနွန်နိုင်ငံတွင် စစ်တမ်းကောက်ယူခံရသူ မွတ်စလင်များမှ အားလုံး၊ ဂျော်ဒန်နိုင်ငံတွင် ၉၄ ရာခိုင်နှုန်းတို့မှာ IS အဖွဲ့အား မုန်းတီးကြသည်ဟု ဖြေကြားခဲ့သည်။

ပါလက်စတိုင်း၌ စစ်တမ်းကောက်ယူခံရသူများ၏ ၈၄ ရာခိုင်နှုန်းကလည်း အဆိုပါ အကြမ်းဖက်အဖွဲ့ကို မုန်းတီးကြောင်း ပြောကြားခဲ့သည်။ အင်ဒိုနီးရှား၊ တူရကီ၊ နိုက်ဂျီးရီးယား၊ ဘာကီနာဖာဆို၊ မလေးရှားနှင့် ဆီနီဂေါလ်နိုင်ငံများ၌ စစ်တမ်းကောက်ယူမှုများတွင်လည်း မွတ်စလင်အများစုက IS အဖွဲ့အား ရွံရှာသည်ဟု ဖြေကြားခဲ့သည်။

ပါကစ္စတန်နိုင်ငံနိုင်ငံတွင် ၆၂ ရာခိုင်နှုန်းမှာ တိတိကျကျ ဖြေကြားခြင်း မရှိသော်လည်း IS အဖွဲ့အား စိတ်ဝင်စားမှု မရှိသည်ကို ပြသခဲ့သည်။ ၂၈ ရာခိုင်နှုန်းကမူ လက်မခံကြောင်း ပြတ်ပြတ်သားသား ပြောကြားခဲ့သည်။

IS အစွန်းရောက်အကြမ်းဖက်အဖွဲ့မှာ လက်ရှိအချိန်တွင် ဆီးရီးယား၊ အီရတ်နှင့် လစ်ဗျားတို့ရှိ ဒေသအများအပြားကို သိမ်းပိုက်ထားပြီး အစုလိုက်အပြုံလိုက် သတ်ဖြတ်ခြင်း၊ ခေါင်းဖြတ်ခြင်းတို့ အပါအ၀င် စက်ဆုပ်ရွံ့ရှာဖွယ်ရာ ရာဇ၀တ်မှုများကို ကျူးလွန်နေကြသည်။

ထိုအဖွဲ့မှာ အစ္စလာမ်၏ အမည်နာမကို အလွဲသုံးစားပြု၍ အဆိုပါ ရာဇ၀တ်မှုများကို ကျူးလွန်နေကြခြင်းဖြစ်ပြီး မွတ်စလင်များကမူ ထိုအကြမ်းဖက်အဖွဲ့ကို လုံးဝ လက်မခံဘဲ ၎င်းတို့၏ လုပ်ရပ်များမှာလည်း အစ္စလာမ်နှင့် မည်သို့မှ သက်ဆိုင်ခြင်းမရှိဟု ဖြေရှင်းချက်အများအပြား ထုတ်ခဲ့ကြသည်။

IS အဖွဲ့မှာ အီရတ်တွင် အမေရိကန်၏ ကျူးကျော်မှုအား မကျေနပ်သူများကို စုစည်း၍ ဖြစ်လာခဲ့သော အလ်ကိုင်းဒါအဖွဲ့ခွဲမှ အသွင်ပြောင်းလာခြင်းဖြစ်ပြီး အီရတ်အား ကျူးကျော်မှုတွင် ထဲထဲဝင်ဝင်ပါဝင်ခဲ့သည့် ဗြိတိန်ဝန်ကြီးချုပ်ဟောင်း တိုနီဘလဲကလည်း ထောက်လှမ်းရေးသတင်းအချက်အလက် အမှားများဖြင့် ၎င်းတို့ဝင်ရောက်တိုက်ခိုက်ခဲ့သည့် အီရတ်ကျူးကျော်စစ်မှာ IS အကြမ်းဖက်အဖွဲ့ ပေါ်ထွက်လာခြင်း၏ အဓိက အကြောင်းအရင်းတစ်ခုဖြစ်သည်ဟု မကြာသေးမီက ၀န်ခံခဲ့သည်။

Ref: Press TV