အစ္စလာမ့်သရုပ်မှန်ပေါ်လွင်ရေး ယူအေအီး၏ ကြိုးပမ်းမှုကို အလ်-အဇ်ဟာရ် အီမာမ်ကြီး ချီးကျူး

မေ ၂၆၊ ၂၀၁၆
M-Media

– မွတ်စလင်အမည်ခံ အကြမ်းဖက်သမားတွေကြောင့် အထင်မှားအမြင်မှား ခံနေရတဲ့ အစ္စလာမ်သာသနာရဲ့ စစ်မှန်တဲ့ သွန်သင်မှုကို ပေါ်လွင်စေပြီး အလယ်အလတ်ကျမှုကို ပျံ့နှံ့အောင်ဆောင်ရွက်ရာမှာ ကမ္ဘာတစ်ဝှမ်း အဓိကကျတဲ့ အခန်းကဏ္ဍက ပါဝင်မှုအတွက် အာရဗ်စော်ဘွားများပြည်ထောင်စု UAE ပြည်သူတွေနဲ့ ခေါင်းဆောင်တွေကို အီဂျစ်နိုင်ငံ အလ်အဇ်ဟာရ် တက္ကသိုလ်ရဲ့ ရှေ့ဆောင်အီမာမ်ကြီး ရှိခ် အဟ်မဒ် အလ်-တိုင်ယစ်ဘ်က ချီးကျူးပြောဆိုလိုက်ပါတယ်။

ဘာသာပေါင်းစုံချစ်ကြည်ရေးနဲ့ ယဉ်ကျေးမှုဖလှယ်ရေး ဆွေးနွေးမှု မြှင့်တင်ဖို့ ရည်ရွယ်ကျင်းပတဲ့ အရှေ့-အနောက် ဆက်ဆံရေးဆိုင်ရာ ဒုတိယအကြိမ်မြောက်ဖိုရမ်ရဲ့ သီးခြားဆွေးနွေးပွဲတစ်ခုမှာ ထုတ်ပြန်တဲ့ ကြေညာချက်မှာ အီမာမ်ကြီးက ဒီလို ပြောကြားခဲ့တာပါ။

“ငြိမ်းချမ်းရေးအတွက် ကြိုးပမ်းဆောင်ရွက်ခဲ့ကြတဲ့ ယူအေအီးအစိုးရအဖွဲ့နဲ့ ခေါင်းဆောင်တွေကို ကျွန်တော့်အနေနဲ့ကျေးဇူးတင်စကား ပြောချင်ပါတယ်။ မွတ်စလင်နဲ့ ခရစ်ယာန်တွေအကြား ဆက်ဆံရေးကို ငြိမ်းချမ်းရေးသာ စိုးမိုးနိုင်မှာ ဖြစ်ပါတယ်။ ဒီဘာသာတရားနှစ်ခုအကြားက ၁၄ ရာစုကြာ တည်တံ့ခဲ့တဲ့ ညီရင်းအစ်ကိုဖြစ်မှု၊ အတူယှဉ်တွဲနေထိုင်မှုဟာ သမိုင်းသက်သေ ရှိနေပါတယ်။ ဒီကာလအတွင်းမှာ နှစ်ဖက်စလုံးဟာ ဘာသာရေးအခြေပြုတဲ့ စစ်ပွဲတွေမှာ မပါဝင်ခဲ့ကြပါဘူး။ ဒီအခြေအနေမျိုးပြန်ဖြစ်အောင် နှစ်ဖက်စလုံး ထိန်းသိမ်းရပါမယ်”

ယူအေအီးဟာ အစ္စလာမ့်သတင်းစကားပြန့်ပွားရေး လုပ်ငန်းမှာ ထိထိရောက်ရောက် အောင်အောင်မြင်မြင် ဆောင်ရွက်နိုင်တဲ့ နိုင်ငံတစ်ခုဖြစ်ပြီး နိုင်ငံအတွင်း နှစ်စဉ် အစ္စလာမ်ကို ပြောင်းလဲသက်ဝင်လာသူအရေအတွက်ဟာ ထောင်ချီ ရှိနေပါတယ်။

အကြမ်းဖက်ဝါဒရဲ့ သားကောင်ဖြစ်နေရသူတွေထဲမှာ ခရစ်ယာန်တွေထက် မွတ်စလင်အရေအတွက်က အဆမတန် များပြားတယ်လို့လည်း အလ်-တိုင်ယစ်ဘ်က ဆိုပါတယ်။

“အကြမ်းဖက်ဝါဒရဲ့ သားကောင်ဖြစ်နေရသူ မွတ်စလင်အရေအတွက်ဟာ ခရစ်ယာန်အရေအတွက်ထက် ၁၀ ဆလောက် ပိုများတယ်လို့ ကျွန်တော် ပုပ်ရဟန်းမင်းကြီး ဖရန်စစ်ကို ပြောကြားခဲ့ပါတယ်။ ခရစ်ယာန်နဲ့ မွတ်စလင်တွေ အားလုံးဟာ စက်ဆုပ်စရာကောင်းတဲ့ ဒီဝါဒကို အမြစ်ဖြတ်ရေး လက်တွဲဆောင်ရွက်သွားရပါမယ်”

အရှေ့-အနောက်ဆက်ဆံရေးဆိုင်ရာ နောက်ထပ်ဖိုရမ်တစ်ခုကိုတော့ ကိုင်ရို ဒါမှမဟုတ် ဗာတီကန်မှာ ကျင်းပဖို့ရှိပါတယ်။

Ref; IINA