အစွန်းရောက်များ၏ ဓမ္မသတ်များမှာ အစ္စလာမ်နှင့် ဆန့်ကျင်သည်ဟု အီဂျစ် အစ္စလာမ့်ဓမ္မသတ်မှူးချုပ်ပြော

ဧပြီ ၁၊ ၂၀၁၇
M-Media

– နိုင်ငံအတွင်းရှိ ခရစ်ယာန် ဘုရားကျောင်းများကို ဖျက်ဆီးရန် ဘာသာရေးအစွန်းရောက်များက ဖသ်ဝါဓမ္မသတ်ထုတ်ပြန်မှု ၃၀၀၀ ကို မိမိတို့က စီစစ်တွေ့ရှိခဲ့ပြီး အစ္စလာမ့်သွန်သင်ချက်နှင့် ဆန့်ကျင်သည့် ထို ဓမ္မသတ်များကို လက်မခံ ပယ်ချသည်ဟု အီဂျစ် အစ္စလာမ့်ရေးရာ ဓမ္မသတ်မှူးချုပ် မွဖ်သီ ဒေါက်တာ ရှော်ကီ အာလမ်က ပြောကြားလိုက်သည်။

“လူသားတွေရဲ့ မတူကွဲပြားမှုဟာ မလွဲဧကန် ရှိနေမယ့်အရာဖြစ်ပြီး ဒါဟာ ဘုရားသခင်ရဲ့ အလိုတော်လည်း ဖြစ်ပါတယ်။ လူတစ်ဦးနဲ့တစ်ဦး ဆက်နွယ်ပတ်သက်မှုဆိုတာ အတူယှဉ်တွဲနေထိုင်နိုင်အောင်၊ သဘောထားမတိုက်ဆိုင်တာတွေကို ဖယ်ရှားနိုင်အောင် ဘုရားသခင်က ဖန်တီးပေးထားတဲ့ နည်းလမ်းတစ်ခု ဖြစ်တာကြောင့် ဘာသာတရားတွေကို ဖိနှိပ်ချုပ်ချယ်တာကို တရားဥပဒေနဲ့ တားမြစ်ထားတာပါ” ဟု မွဖ်သီကြီးက ဆိုသည်။

ထို့ပြင် အစွန်းရောက်များ၏ အဆိုပါဓမ္မသတ်များက အီဂျစ်ရှိ မွတ်စလင်များနှင့် ခရစ်ယာန်များ ငြိမ်းချမ်းစွာ အတူယှဉ်တွဲနေထိုင်မှုကို ထိခိုက်သည်ဟုလည်း ဒေါက်တာက ထည့်သွင်းပြောဆိုခဲ့သည်။

၂၀၁၆ ခုနှစ် နှစ်ကုန်ပိုင်းတွင် ကိုင်ရိုရှိ ရှင်မာကု ကက်သလစ် ခရစ်ယာန်ဘုရားကျောင်းကို ဗုံးခွဲတိုက်ခိုက်မှုကြောင့် ၂၅ ဦး သေဆုံးခဲ့ပြီး ၃၁ ဦး ဒဏ်ရာရရှိခဲ့သည်။

“အီဂျစ်က မွတ်စလင်တွေနဲ့ ခရစ်ယာန်တွေကြားထဲမှာ သွေးကွဲအောင်ရည်ရွယ်တဲ့ ကြိုးပမ်းမှုတွေအားလုံး အောင်မြင်မှာ မဟုတ်ပါဘူး။ သမိုင်းမှာ နိုင်ငံခြားတိုင်းပြည်တွေအပေါ် မွတ်စလင်တွေရဲ့ အောင်ပွဲတွေမှာ ဘယ်လို သမိုင်းအမွေအနှစ်ကိုမှ မဖျက်ဆီးခဲ့ပါဘူး။ လက်ရှိ IS နဲ့ အခြား အစွန်းရောက်အဖွဲ့တွေရဲ့ လုပ်ရပ်တွေကတော့ တလွဲတွေပါပဲ”

ထို့ပြင် ကိုင်ရိုနှင့် ဂီဇာတို့ရှိ သမိုင်းဝင်နေရာများကို ဖျက်ဆီးရန် ဖသ်ဝါဓမ္မသတ်များကိုလည်း တွေ့ရှိခဲ့ရပြီး ထိုဓမ္မသတ်များမှာ အစ္စလာမ်က သမိုင်းအမွေအနှစ်များနှင့်ပတ်သက်၍ သွန်သင်ထားမှုကို ပြောင်ပြောင်တင်းတင်း ချိုးဖောက်ခြင်းဖြစ်သည်ဟုလည်း ဓမ္မသတ်မှူးချုပ်က ထပ်လောင်းပြောကြားခဲ့သည်။

Ref: Alarabiya