အစ္စရေး၏ တရားမ၀င်အိမ်ယာများက ငြိမ်းချမ်းရေးကို ခြိမ်းခြောက်မှုဟု ကုလပြော

ဧပြီ ၁၊ ၂၀၁၇
M-Media

ပါလက်စတိုင်းမြေပေါ်ရှိ ကျူးကျော်အိမ်ယာမှ မြင်ကွင်းတစ်ခု

– ပါလက်စတိုင်းပိုင် အနောက်ဖက်ကမ်းတွင် တရားမ၀င်အခြေချအိမ်ယာ ဆောက်လုပ်ရန် အစ္စရေးအစိုးရက ကြာသာပတေးနေ့တွင် အတည်ပြုမှုကို ကုလသမဂ္ဂက ရှုတ်ချလိုက်ပြီး ငြိမ်းချမ်းရေးအတွက် အတားအဆီးဖြစ်သည်ဟု ပြောကြားခဲ့သည်။

ကုလအထွေထွေအတွင်းရေးမှူး အန်တိုနီယို ဂူတာရက်စ်၏ ပြောရေးဆိုခွင့်ရှိသူ စတီဖိန်း ဒူဂျာရစ်က အစ္စရေးအစိုးရ လုံခြုံရေးကက်ဘိနတ်၏ ထိုဆုံးဖြတ်ချက်မှာ ‘စိတ်ပျက်ဖွယ်ရာနှင့် စိုးရိမ်ဖွယ်ရာ’ ဖြစ်သည်ဟု ဆိုပြီး ငြိမ်းချမ်းစွာ၊ လုံခြုံစွာ အတူယှဉ်တွဲနေထိုင်ရေးနည်းလမ်မှလွဲ၍ ပါလက်စတိုင်းများနှင့် အစ္စရေးပြည်သူများအတွက် အခြားနည်းလမ်းမရှိဟု အတွင်းရေးမှူးချုပ်က အခိုင်အမာ ပြောကြားကြောင်း ကြေငြာချက်ထုတ်ပြန်ခဲ့သည်။

“အထွေထွေအတွင်ရေးမှူးက ဒီတစ်ခုလို အစ္စရေးရဲ့ တစ်ဖက်သတ်ဆုံးဖြတ်ချက်အားလုံးကို ရှုတ်ချပါတယ်။ ဒါဟာ ငြိမ်းချမ်းရေးကို ခြိမ်းခြောက်ပြီး နှစ်နိုင်ငံတည်ရှိရေးအဖြေကို ပျက်ဆီးစေပါတယ်” ဟု ကြေငြာချက်တွင် ဖော်ပြထားသည်။

ကြာသာပတေးနေ့က အစ္စရေးကက်ဘိနတ်မှ အတည်ပြုသော ဆုံးဖြတ်ချက်မှာ ပါလက်စတိုင်းပိုင် အေမက်ရှီလိုဒေသတွင် အခြေချအိမ်ယာများ ဆောက်လုပ်ရန်ဖြစ်ပြီး နိုင်ငံတကာ ဥပဒေအရ တရားမ၀င်သော အဆိုပါ အိမ်ယာများကို ရပ်တန့်ရေး အစ္စရေးက မဆောင်ရွက်သည့်အတွက် ကုလက ဝေဖန်ပြီး တစ်ပတ်အကြာတွင် ပေါ်ထွက်လာခြင်းဖြစ်သည်။

နိုင်ငံတကာ အသိုင်းအ၀ိုင်းက ရှုတ်ချကန့်ကွက်ထားသော်လည်း အစ္စရေးမှာ ပါလက်စတိုင်းပိုင်နက်များဖြစ်သည့် အနောက်ဖက်ကမ်း၊ အရှေ့ဂျေရုစလင်နှင့် ဂါဇာကမ်းမြှောင်တို့တွင် တရားမ၀င်အခြေချ အိမ်ယာများကို ဆက်လက်ဆောက်လုပ်နေသည်။

Ref : Aljazeera