စစ်တပ်ကိုဝေဖန်ခဲ့သော ဦးဝင်းထိန် ဆေးရုံတက်ရသည့်ကိစ္စ၏ နောက်ကွယ်…..

သြဂုတ် ၂၊ ၂၀၁၇
M-Media

– အာဏာရ NLD ပါတီက ပြောရေးဆိုခွင့်ရှိသူ ဦ၀င်းထိန်တစ်ယောက် ဇမ္ဗူသီရိ အထူးကုဆေးရုံမှာ တက်ရောက်ကုသနေပြီး သတင်းထောက်တွေကို ၀င်ရောက်ခွင့်မပေးဘူးလို့ သူနဲ့ နီးစပ်သူရင်းမြစ်တွေက ပြောကြားခဲ့ပါတယ်။

ဦးဝင်းထိန်ဟာ လွန်ခဲ့တဲ့ ၂ ပတ်ကျော်ကျော်လောက်ကတည်းက ဆေးရုံတက်ခဲ့ရတာဖြစ်ပေမယ့် သူ့ရဲ့အခြေအနေနဲ့ ပတ်သက်ပြီး အများပြည်သူသိအောင် တရားဝင်ကြေငြာချက်မထုတ်ပြန်ပါဘူး။ NLD ရင်းမြစ်တွေက ဆေးစစ်ဖို့အတွက် ဒေါ်အောင်ဆန်းစုကြည်ကိုယ်တိုင် အကြံပေးခဲ့တာဖြစ်ပြီး နောက်ပိုင်းမှာတော့ ဆေးရုံတက်လိုက်ရတယ်လို့ ဧရာဝတီသတင်းဌာနကို ပြောကြားခဲ့ပါတယ်။

နိုင်ငံတော်အတိုင်ပင်ခံ ဒေါ်အောင်ဆန်းစုကြည်ရဲ့ နီးကပ်သူတစ်ဦးဖြစ်တဲ့ ဦးဝင်းထိန်ဟာ ဆေးရုံမှာ ၂ လလောက် အချိန်ကုန်ဆုံးရမယ်လို့ ထင်ရပါတယ်။ ဒါပေမယ့် ဇူလိုင် ၂၂ ရက်နေ့က နေပြည်တော်မှာပြုလုပ်တဲ့ NLD အမှုဆောင်ကော်မတီအစည်းဝေးကို ဦးဝင်ထိန် တက်ရောက်ခဲ့ရာမှာ ကျန်းမာတဲ့ ပုံစံ ရှိပါတယ်။

အမည်မဖော်လိုတဲ့ NLD ရင်းမြစ်တွေက ဆေးစစ်မှုအတွင်းမှာ ဆရာဝန်တွေက ဦးဝင်းထိန်ကို အနားယူဖို့ အကြံပြုခဲ့ပြီး ရုပ်သံလိုင်းတွေ တပ်ပေးထားတဲ့ တီဗီရှီရာ အခန်းတစ်ခုကို ပြသခဲ့ကာ ကာလရှည်အနည်းယူဖို့ ဖြစ်တယ်လို့ ဆိုပါတယ်။

ဦးဝင်းထိန့်နဲ့ နီးစပ်သူ သတင်းထောက်တွေက သူတို့ဟာ ဦးဝင်းထိန်ကို သွားတွေ့ဖို့ ကြိုးစားတဲ့အခါ ပုံမှန်မဟုတ်တဲ့ ပုံစံမျိုးနဲ့ မောင်းထုတ်ခံခဲ့ရတယ်လို့လည်း ဧရာဝတီကို ပြောကြားခဲ့ပါတယ်။

အသက် ၇၅ နှစ်အရွယ်ရှိပြီဖြစ်တဲ့ ဦးဝင်းထိန်ဟာ တော်တော်လေးကျန်းမာတယ်လို့ ထင်ရပြီး ပြီးခဲ့တဲ့လအနည်းငယ်အတွင်း သူ့ရဲ့ ပြဿနာက မီဒီယာ၊ စစ်တပ်တို့နဲ့ ထိပ်တိုက်တွေ့ခဲ့တာပါ။

ဒေါ်အောင်ဆန်းစုကြည်ရဲ့ အနီးကပ်မိတ်ဆွေဖြစ်ပြီး NLD က ရွေးချယ်ခန့်အပ်ထားတဲ့ သမ္မတ ဦးထင်ကျော်ဟာ နှုတ်ထွက်တော့မယ်ဆိုတဲ့ ကောလဟာလတွေ အခုနှစ်အစောပိုင်း ဆိုရှယ်မီဒီယာမှာ ပြန့်နှံ့ခဲ့ပေမယ့် မမှန်သတင်းသာဖြစ်ခဲ့ပါတယ်။

ဒီကောလဟာလတွေနဲ့ပတ်သက်ပြီး ဦးဝင်းထိန်က “ကြံ့ခိုင်ရေးကပဲ လုပ်သလား၊ တချို့တပ်မတော်အဖွဲ့အစည်းတွေကပဲ လုပ်သလား၊ ကျွန်တော်တို့ကို မလိုလားတဲ့ အုိုင်တီကျွမ်းကျင်သူတွေကပဲ လုပ်သလားဆိုတာ မှန်းရခက်တယ်” လို့ ပြောကြားခဲ့ပါတယ်။

စစ်တပ်ကပါဝင်တယ်ဆိုပြီး အာဏာရပါတီ ပြောရေးဆိုခွင့်ရှိသူတစ်ဦးက ပြောကြားမှုကို စစ်တပ်က ပြင်းပြင်းထန်ထန် ရှုတ်ချခဲ့ပါတယ်။

စစ်တပ်သတင်းအချက်အလက်အဖွဲ့က ထုတ်ပြန်တဲ့ ကြေငြာချက်မှာ “အခြေအမြစ်ခိုင်လုံခြင်းမရှိပဲ သံသယစိတ်ပေါ် အခြေခံပြီး တပ်မတော်အား ထည့်သွင်းပြောဆိုခြင်းဟာ တပ်မတော်ရဲ့ ဂုဏ်သိက္ခာကို ထိခိုက်စေတယ်” လို့ ဖော်ပြခဲ့ပါတယ်။

ဒီလိုလုပ်ရပ်တွေဟာ ‘အထူးသဖြင့် အမျိုးသား ပြန်လည်ရင်ကြားစေ့ရေးကို အစဉ်တစ်စိုက် ဦးတည်ဆောင်ရွက်နေတဲ့ကာလမှာ အမျိုသားစည်းလုံးညီညွတ်ရေးကို ထိခိုက်စေနိုင်တယ်’ လို့ စစ်တပ်က ပြောကြားခဲ့ပြီး ‘လိုအပ်တဲ့ တုန့်ပြန်မှုတွေ လုပ်သွားမယ်’ လို့လည်း ဖော်ပြခဲ့ပါတယ်။

ဒီလို ထိပ်တိုက်တွေ့မှုကို ဦးဝင်းထိန်အပါအ၀င် NLD ခေါင်းဆောင်တွေအနေနဲ့ ဘယ်လို ဖြေရှင်းခဲ့လဲဆိုတာ ရှင်းရှင်းလင်းလင်း မသိရပေမယ့် မေလက ပြုလုပ်ခဲ့တဲ့ ပြည်ထောင်စုငြိမ်းချမ်းရေး ညီလာခံမှာတော့ ဗိုလ်ချုပ်မှူးကြီးမင်းအောင်လှိုင်ကို ဦးဝင်းထိန်တစ်ယောက် အပြေးအလွှား သွားရောက်နှုတ်ဆက်ခဲ့ပါတယ်။

စစ်တပ်အရာရှိဟောင်းဖြစ်ပြီး ၁၉၈၈ ခုနှစ် NLD ပါတီကို ၀င်ရောက်ပြီးတဲ့နောက်ပိုင်း နှစ်များစွာ ထောင်းနန်းစံခဲ့ရတဲ့ ဦးဝင်ထိန်းဟာ ဒေါ်အောင်ဆန်းစုကြည်အပေါ်မှာ သစ္စာရှိသူဖြစ်ပြီး ပါတီရဲ အဓိကအဖွဲ့ဝင်တစ်ယောက်လည်း ဖြစ်ပါတယ်။ ဒေါ်အောင်ဆန်းစုကြည်၊ သူမရဲ့ပါတီနဲ့ စစ်တပ်ခေါင်းဆောင်တွေအကြား ဆက်ဆံရေး တင်းမာမှုတွေ မြင့်တက်လာချိန်မှာ ဦးဝင်းထိန် ဆေးရုံတက်ရတဲ့ကိစ္စ ပေါ်လာတာဖြစ်ပါတယ်။

ဇူလိုင်လအစောပိုင်း ရန်ကုန်တိုင်းဝန်ကြီးချုပ် ဦးဖြိုးမင်းသိန်းက ဗိုလ်ချုပ်မှူးကြီးမင်းအောင်လှိုင်ဟာ ပရိုတိုကောလ်အရ အစိုးရအဖွဲ့မှာ ညွှန်ကြားရေးမှူးချုပ်ရာထူးသာရှိပြီး၊ သူ့ကို ခေါင်းဆောင်တစ်ယောက်လို ဆက်ဆံနေတာဟာ ဒီမိုကရေစီနည်းမကျဘူးလို့ ပြောကြားခဲ့ကာ စစ်တပ်နဲ့ အရပ်သားအစိုးရအကြား ပွတ်တိုက်မှုကို ဖြစ်စေခဲ့ပါတယ်။

စစ်တပ်က ချက်ခြင်းဆိုသလိုပဲ NLD အစိုးရကို ဒီကိစ္စအတွက် တိုင်ကြားခဲ့ပြီး ၀န်ကြီးချုပ်ကို ‘လိုအပ်တဲ့ အရေးယူမှုတွေ လုပ်ဖို့’ တောင်းဆိုခဲ့ပါတယ်။

ဦးဖြိုးမင်းသိန်းကလည်း လျင်လျင်မြန်မြန်ပဲ စစ်တပ်ကို တောင်းပန်စာပေးခဲ့ပြီး ပြည်သူ့လွှတ်တော်ဥက္ကဌဖြစ်သူ NLD အကြီးတန်းအဖွဲ့ဝင် ဦးဝင်းမြင့်ရဲ့ ခေါ်ယူဆုံးမမှုကိုလည်း ခံခဲ့ရပါတယ်။

ဒီအငြင်းပွားစရာကိစ္စတွေက ဒေါ်အောင်ဆန်းစုကြည်နဲ့ သူမရဲ့အစိုးရတို့ဟာ တစ်နှစ်တာ အုပ်ချုပ်မှုကာလမှာ အမျိုးသား ပြန်လည်ရင်ကြားစေ့ရေး အားထုတ်မှု တစ်စိတ်တစ်ပိုင်းအဖြစ် စစ်တပ်နဲ့ ကောင်းမွန်တဲ့ဆက်ဆံရေး ထူထောင်ဖို့ ကြိုးစားနေချိန်မှာ ဖြစ်ပေါ်လာတာပါ။

နိုဘယ်ဆုရှင် ဒေါ်အောင်ဆန်းစုကြည်ဟာ ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နဲ့ လတ်လောနှစ်တွေမှာ အကြိမ်တော်တော်များများ တွေ့ဆုံခဲ့ပြီး ယုံကြည်မှုတည်ဆောက်ဖို့ဖြစ်တယ်လို့ ယူဆရပါတယ်။

ထောင်ထဲမှာ နှစ်တော်တော်များများ နေခဲ့ရတဲ့ NLD က ကြီးတန်းအဖွဲ့ဝင် အမျိုးသမီးတစ်ဦးက ဒေါ်အောင်ဆန်းစုကြည်နဲ့ စစ်တပ်ခေါင်းဆောင်တွေအကြား ယုံကြည်မှုတည်ဆောက်ဖို့ ကြိုးစားနေချိန်မှာ ဦးဝင်းထိန်နဲ့ ဦးဖြိုးမင်းသိန်းတို့ရဲ့ ပြောကြားမှုတွေဟာ အထောက်အကူမဖြစ်ဘူးလို့ ပြီးခဲ့တဲ့တစ်ပတ်မှာ ဧရာဝတီကို ပြောကြားခဲ့ပါတယ်။

Ref : .irrawaddy

(ဧရာဝတီသတင်းဌာန၏ အင်္ဂလိပ်ပိုင်းတွင် လွှင့်တင်ထားသော Analysis: Behind NLD Spokesperson’s Hospitalization ဆောင်းပါးကို လေးမောင်က ဆီလျော်အောင် ဘာသာပြန်ဆိုသည်)