ဒုက္ခသည်များကို နိုင်ငံသားကဲ့သို့ တန်းတူအခွင့်အရေးမပေးဟု မလေးဝန်ကြီးချုပ်လောင်းပြော

စက်တင်ဘာ ၁၇၊ ၂၀၁၈
M-Media

မလေးရှား ဒုဝန်ကြီးချုပ်ဟောင်း အန်ဝါရ် အီဘရာဟင်

– မလေးရှားနိုင်ငံမှာ ရှိနေတဲ့ ဒုက္ခသည်တွေကို ခိုလှုံခွင့် ပေးကာ၊ လူသားချင်း စာနာတဲ့အနေနဲ့ စောင့်ရှောက်ကာကွယ်ပေးသွားမှာ ဖြစ်ပေမယ့် နိုင်ငံသားတွေရရှိတဲ့ အဆင့်အတန်းမျိုး ပေးမှာမဟုတ်ဘူးလို့ ၀န်ကြီးချုပ်မဟာသီယာ မိုဟာမက်နေရာကို ဆက်ခံဖို့ ရေပန်းစားနေတဲ့ အန်န၀ါရ် အီဘရာဟင်က ပြောကြားလိုက်ပါတယ်။

မကြာမီမှာ မလေးရှားက ထိပ်တန်း နိုင်ငံရေးပါတီ PKR ရဲ့ ခေါင်းဆောင်ဖြစ်လာတော့မယ့် အန်ဝါရ်က Corus ဟိုတယ်မှာ မနေ့က လူငယ်တွေနဲ့ တွေ့ဆုံစကားပြောဆိုမှုအတွင်း လူ့အခွင့်အရေးကို တန်ဖိုးထားမှုနဲ့ မိမိတို့ ကိုယ်ပိုင်နိုင်ငံသားတွေ သာယာဝပြောရေးကို ကာကွယ်မှု နှစ်ခုအကြား ချိန်ညှိသွားမယ်လို့လည်း ဆိုပါတယ်။

မလေးရှားအနေနဲ့ ဒုက္ခသည်တွေအပေါ် ပိုမိုကောင်းမွန်စွာ ဆက်ဆံပြီး နိုင်ငံသားတွေလို ပညာသင်ခွင့် ပေးမလားလို့ လူငယ်တစ်ယောက်က မေးမြန်းရာမှာ အန်ဝါရ်က …

“ဒုက္ခသည်တွေကို အခွင့်အရေးတွေပေးမလားဆိုတဲ့ မေးခွန်းကို ဖြေရရင် .. သူတို့ကို လူသားတွေအဖြစ် ကျွန်တော်တို့ ဆက်ဆံသွားမှာပါ။ ဒါပေမယ့် မလေးရှားနိုင်ငံသားတွေရရှိတဲ့ အခွင့်အရေးအားလုံး ဒုက္ခသည်တွေကို ပေးလို့ မရပါဘူး။ တစ်ယောက်ယောက်က ခင်ဗျားတို့အိမ်လာရင် ခင်ဗျားက လူသားချင်းစာနာတဲ့အနေနဲ့ သူ့ကို ကျွေးမွေးမယ်၊ စောင့်ရှောက်ပေးမယ်။ ဒါပေမယ့် ခင်ဗျားကလေးတွေရဲ့ အဆင့်မျိုး သူတို့ကို ပေးပါ့မလား၊ ဒါ့ကြောင့် ကျွန်တော်ကတော့ သူတို့ကို နိုင်ငံသားတွေရတဲ့ အခွင့်အရေးမျိုး မပေးနိုင်ဘူး။ ဒါပေမယ့် သူတို့ကို စောင့်ရှောက်ပေးမှာပါ။ သူတို့ရဲ့မူရင်းနိုင်ငံတွေမှာ သူတို့ နှိပ်စက်ညှင်းပမ်းခံရတယ်၊ အရှက်အတကွဲအကျိုးနည်းဖြစ်ရတယ်၊ ရန်ပြုခံရတယ်ဆိုရင် ကျွန်တော်တို့ သူတို့ကို ကာကွယ်ပေးသွားမှာပါ” လို့ ဖြေကြားခဲ့ပါတယ်။

မလေးရှားနိုင်ငံဟာ နိုင်ငံတကာ လူ့အခွင့်အရေးဆိုင်ရာ အဓိကစာချုပ် ၉ ခုမှာ ၃ ခုသာ လက်မှတ်ရေးထိုးထားပြီး ရွေးကောက်ပွဲအနိုင်ရရှိခဲ့တဲ့ Pakatan Harapan ရဲ့ ကတိပြုမှုတွေထဲမှာ ကုလရဲ့ ‘၁၉၅၁ ဒုက္ခသည်ဆိုင်ရာ သဘောတူညီချက်’ ကို လက်မှတ်ထိုးရေးလည်း ပါဝင်ပါတယ်။

မလေးရှားနိုင်ငံက UNHCR မှာ မှတ်ပုံတင်ထားတဲ့ ဒုက္ခသည် စုစုပေါင်းဟာ ၂၀၁၈ ခုနှစ် သြဂုတ်လအထိ ၁၆၁,၁၄၀ ဦး ရှိနေကာ မြန်မာနိုင်ငံကလာရောက်သူဟာ ၁၃၉,၇၄၀ ဦး ဖြစ်ပါတယ်။

မလေးရှားနိုင်ငံကို ဒုက္ခသည်အဖြစ် မြန်မာနိုင်ငံက ရောက်လာကြသူတွေမှာ ရိုဟင်ဂျာ၊ ချင်း၊ မြန်မာမွတ်စလင်၊ ရခိုင်နဲ့ အခြား တိုင်းရင်းသားလူနည်းစုတွေ ပါဝင်ပါတယ်။

ပါကစ္စတန်၊ ယီမင်၊ ဆိုမာလီ၊ ဆီးရီးယား၊ သီရိလင်္ကာ၊ အာဖဂန်၊ အီရတ်၊ ပါလက်စတိုင်းနဲ့ အခြားနိုင်ငံက ဒုက္ခသည်တွေလည်း မလေးရှားမှာ ရှိနေပါတယ်။

မလေးရှားနိုင်ငံရဲ့ လူဦးရေဟာ ၃၁.၁၉ သန်းရှိပြီး မလေးလူမျိုး၊ တရုတ်လူမျိုးနဲ့ အိန္ဒိယလူတွေအပါအ၀င် အခြားလူမျိုးစုငယ်တွေ မှီတင်းနေထိုင်ကြပါတယ်။

Ref: Malaymail, UNHCR