ကွန်မြူနစ်အစိုးရရဲ့ ဘာသာရေးဖိနှိပ်မှုကို ပိုမိုခံစားလာရတဲ့ တရုတ်ခရစ်ယာန်များ

စက်တင်ဘာ ၁၆၊ ၂၀၁၈
M-Media

– တရုတ်နိုင်ငံအလယ်ပိုင်း ခရစ်ယာန် ကက်သလစ်ဘုရားကျောင်းတစ်ခုရဲ့ အရှေ့မှာ ‘ကလေးများကို ၀တ်ပြုဆုတောင်းခွင့်မပြု’ ဆိုတဲ့ သတိပေးဆိုင်းဘုတ်တစ်ခုကို တရုတ်အစိုးရက ချိတ်ဆွဲထားပါတယ်။ ‘ခွင့်ပြုချက်မရှိတဲ့ ဘုရားကျောင်း’တွေကို အစိုးရက ဖြိုချဖျက်ဆီးပြီး ဘုရားကျောင်းလာသူတွေရဲ့ ကိုယ်ရေးအချက်အလက်တွေကို ဘုန်းကြီးတွေက အစိုးရအာဏာပိုင်တွေဆီ အပ်ရပါတယ်။

ဘာသာမဲ့ ကွန်မြူနစ်အစိုးရဟာ ‘ဘာသာတရားကင်းစင်ရေး’ လှုပ်ရှားမှုကို တိုးမြှင့်လုပ်ဆောင်လာပြီး၊ ရှေးဟောင်းရပ်ကွက်တွေနေရာမှာ ဖွံ့ဖြိုးရေးစီမံကိန်းတွေနဲ့ အစားထိုးလာတာကြောင့် ဟီနန်ပြည်နယ်က ရိုမန်ကက်သလစ် ဘာသာဝင်တွေဟာ ၀တ်ပြုရာနေရာတွေ ပျောက်ဆုံးလာခဲ့ပါတယ်။

၁၉၅၁ ခုနှစ်ကတည်းက ဆက်ဆံရေးတင်းမာခဲ့တဲ့ ဗာတီကန်နဲ့ တရုတ်အစိုးရတို့ဟာ အချိန်အတော်ကြာ လိပ်ခဲတည်းလည်းဖြစ်နေတဲ့ ခရစ်ယာန်ဂိုဏ်းအုပ်ဘုန်းတော်ကြီး ခန့်အပ်ရေးပြဿနာအတွက် ဖြေရှင်းဖို့ ပိုမိုပူးပေါင်းဆောင်ရွက်နေပေမယ့် ခရစ်ယာန်ဖိနှိပ်ရေးကို တရုတ်အစိုးရက အရှိန်မြှင့် လုပ်ဆောင်နေတာ ဖြစ်ပါတယ်။

တရုတ်-ဗာတီကန် မကျေလည်မှုကြောင့် တရုတ်နိုင်ငံက ၁၂ သန်းသော ကက်သလစ်ခရစ်ယာန်တွေအကြား အစိုးရခန့်ထားတဲ့ ဘုန်းကြီးတွေနောက်လိုက်သူနဲ့ ဗာတီကန်လိုလားတဲ့ ‘မြေအောက်’ အသင်းတော်တွေနောက်လိုက်သူ စသဖြင့် အုပ်စုနှစ်ခု ကွဲသွားခဲ့ပါတယ်။

ဆုတ်ပြဲနေတဲ့ ခရစ်တော်ရုပ်ပုံကား၊ ကျိုးပဲ့နေတဲ့ ထိုင်ခုံတွေဟာ တစ်ချိန်က ‘ဖူယန်း’ မြို့မှာ တည်ရှိခဲ့ပြီး ‘တရားမ၀င် အဆောက်အဦး’ ဆိုကာ အစိုးရက ဖြိုချခဲ့တဲ့ ခရစ်ယာန်ဘုရားကျောင်းတစ်ခုရဲ့ အကြွင်းအကျန်တွေပဲ ဖြစ်ပါတယ်။

ဘ၀ခုလုံး စုဆောင်းထားသမျှကို ဘုရားကျောင်းဆောက်လုပ်ရေးအတွက် လှူဒါန်းခဲ့တဲ့ ဇရာထောင်း လယ်သမားကြီး လျူရှေရှန်းတစ်ယောက် ဘုရားကျောင်းက ကျိုးကျနေတဲ့ သလဲပင်အကိုင်းအခက်ကြားမှာ လက်ဝါးကပ်တိုင်တစ်ခုကို ရှာဖွေနေပါတယ်။

“ဒီမှာရှိတဲ့ ခရစ်ယာန်အသင်းတော်အနာဂတ်ဟာ မရေရာတော့ပါဘူး။ ဘုရားရှိခိုးဖို့ ကျွန်တော်တို့မှာ နေရာမရှိတော့သလို၊ ဘာလုပ်ရမှန်းလည်း မသိပါဘူး” လို့ လျူရှေရှန်းက ပြောကြားခဲ့ပါတယ်။

ပြည်နယ်တစ်ဝှမ်းမှာရှိတဲ့ လူဝတ်ကြောင်နဲ့ ခရစ်ယာန်ဘုန်းကြီး ၂ ဒါဇင်လောက်က တရုတ်အစိုးရရဲ့ ဘာသာရေးဆိုင်ရာ ဥပဒေသစ် ထွက်လာအပြီး အခုနှစ်အတွင်း ခရစ်ယာန်ဘာသာအပေါ် မကြုံစဖူး တင်းကြပ်တာတွေ ဆောင်ရွက်မှုကို AFP သတင်းဌာနရဲ့ တွေ့ဆုံမှုအတွင်း အသေးစိတ်ပြောကြားခဲ့ပါတယ်။

ဘုရားကျောင်းတွေရဲ့ ခေါင်မိုးမှာ တပ်ဆင်ထားတဲ့ လက်ဝါးကပ်တိုင် ဖြုတ်ချခံရမှုတွေ၊ ဘာသာရေးဆိုင်ရာ စာပေတွေနဲ့ ဆပ်ကပ်ပူဇော်ထားတဲ့အရာတွေ သိမ်းဆည်းခံရတာတွေ၊ ဘုရားကျောင်းက ဖွင့်ထားတဲ့ မူကြိုကျောင်း ပိတ်တာတွေ ဖြစ်ပါတယ်။

ခရစ်ယာန်ဘုရားကျောင်းတွေအနေနဲ့ နိုင်ငံတော်အလံထောင်ကာ အခြေခံဥပဒေတွေကို လူမြင်အောင်ပြသထားရပြီး၊ ဘုရားကျောင်းရဲ့ အပြင်ဘက်မှာ ဘာသာရေးဆိုင်ရာ ရုပ်ပုံတွေ ချိတ်ဆွဲတာကိုလည်း တရုတ်အစိုးရက တားမြစ်ထားပါတယ်။

အရွယ်မရောက်သေးသူတွေ၊ ကျောင်းသားတွေနဲ့ ရင်ခွင့်ပိုက်ကလေးတွေ ဘုရားကျောင်း ပရ၀ုဏ်ထဲဝင်ရောက်မှုကို ပြီးခဲ့တဲ့လတွေအတွင်းမှာ တားမြစ်ခဲ့ပါတယ်။

သိပ်မကြာသေးခင် တနင်္ဂနွေတစ်ရက်မှာ အန်းယန်မြို့က အစိုးရအသိအမှတ်ပြု ခရစ်ယာန်ဘုရားကျောင်း Cathedral of the Sacred Heart ကို ‘တရုတ်အစိုးရ သာသနာရေးဌာန’ က တာဝန်ရှိသူ အမျိုးသမီးတစ်ယောက် လာရောက်ပြီး ၀တ်ပြုဆုတောင်းသူ ၈၀၀ လောက်ကို စစ်ဆေးခဲ့ပါတယ်။

“ခရစ်ယာန်ကက်သလစ်သာသနာဟာ တရုတ်ပြည်ပေါက် သာသနာ မဟုတ်ပါဘူး” လို့ သူမက ပြောကြားခဲ့ပါတယ်။

ဖူးယန်မြို့တောင်ပိုင်း ရှီဖန်းရွာမှာ ခရစ်ယာန်ဘုရားကျောင်း ပရ၀ုဏ်အတွင်းမှာ ဖွင့်ထားတဲ့ မူကြိုကျောင်းတံခါးကို အာဏာပိုင်တွေက ၀ရိန်ဆော်ပြီး အသေပိတ်ပစ်ခဲ့ပါတယ်။

အမည်မဖော်လိုတဲ့ ကျေးရွာအကြီးအကဲတစ်ဦးက အစိုးရအနေနဲ့ ပညာရေးမှာ ‘ခရစ်ယာန်ဘုရားကျောင်းက ပါဝင်တဲ့ ဘယ်လိုအခြေအနေမျိုးကိုမဆို တားဆီးဖို့အတွက်’ မူကြိုကျောင်းကို ပိတ်ပစ်ခဲ့တာဖြစ်တယ်လို့ ပြောကြားခဲ့ပါတယ်။

ဘုရားကျောင်း ဂေါပကအဖွဲ့ဝင် တစ်ဦးချင်းစီအကြောင်း၊ ဘဏ္ဍာရေးဆိုင်ရာ အချက်အလက်တွေနဲ့ နိုင်ငံရပ်ခြားနဲ့ ဆက်နွယ်မှု ရှိ၊ မရှိ စတင် အသေးစိတ်အချက်အလက်တွေကို တရုတ်အစိုးရက တောင်းခံတဲ့ စာကိုလည်း AFP သတင်းဌာနက ရရှိခဲ့ပါတယ်။

အမည်မဖော်လိုတဲ့ ထိပ်တန်း ခရစ်ယာန်ဘုန်းကြီးတစ်ပါးက အဲဒီအချက်အလက်တွေကို အွန်လိုင်းအခြေပြု ဘာသာရေးဆိုင်ရာ စီမံခန့်ခွဲမှုစနစ်၊ ဖုန်းအခြေပြု စောင့်ကြည့်ရေး အက်ပလီကေးရှင်းတွေမှာ အသုံးပြုမယ်လို့ ပြောကြားခဲ့ပါတယ်။

ဆုပ်လည်းဆူး စားလည်းရူး

ဝတ်ပြုဆုတောင်းဖို့ လာရောက်သူတွေရဲ့ အချက်အလက်တွေကို ပေးရတာဟာ ‘ဘုန်းကြီးအသိုင်းအ၀ိုင်းအတွက် အင်မတန်မှ ခက်ခဲတဲ့ ၀န်ထုတ်ဝန်ပိုးတစ်ခု ဖြစ်ပြီး’ အပြစ်ရှိတယ်လို့ ဘုန်းကြီးတွေက ယူဆကာ ၀မ်းနည်းနေကြတယ်လို့လည်း အဲဒီဘုန်းကြီးက ဆိုပါတယ်။

ဒီလို တင်းကြပ်မှု တော်တော်များများဟာ ဟီနန်ပြည်နယ်မှာ ယုံကြည်သူ ‘လျင်လျင်မြန်မြန်’ မြင့်တက်လာတယ်လို့ အာဏာပိုင်တွေက ယုံကြည်တဲ့ ခရစ်ယာန် ပရိုတက်စတင့်ဝါဒကို ထိန်းချုပ်ဖို့ ဆောင်ရွက်တာဖြစ်တယ်လို့ အာဏာပိုင်တွေကပြောပေမယ့် ခရစ်ယာန် ကက်သလစ်ဘာသာဝင်တွေလည်း ပစ်မှတ်ထားခံနေရတယ်လို့ ဘုန်းတော်ကြီးက ဖွင့်ဟခဲ့ပါတယ်။

တရုတ်နိုင်ငံအရှေ့ပိုင်း ဟီနန်ပြည်နယ်က ကက်သလစ်ဘာသာဝင် တော်တော်များများဟာ တရုတ်အစိုးရနဲ့ ဗာတီကန်တို့အကြား ဆွေးနွေးညှိနှိုင်းမှုတွေကို အနီးကပ် စောင့်ကြည့်နေကြပါတယ်။

“ဘာသာရေးပြဿနာတွေကို ဖြေရှင်းနိုင်ဖို့ ကျွန်တော်တို့ မျှော်လင့်တယ်။ ကျွန်တော်မှာ တူညီတဲ့ဘာသာတရားရှိပြီး၊ ငြိမ်းချမ်းမှု၊ စည်းလုံးညီညွတ်မှုကို ကျွန်တော်တို့ လိုချင်ပါတယ်” လို့ မြေအောက် ခရစ်ယာန်အသင်းတော်ဝင်တစ်ဦးက ပြောကြားခဲ့ပါတယ်။

ဗာတီကန်ရဲ့ ပြောရေးဆိုခွင့်ရှိသူ ဂရဂ်ျဘာကီက ‘ဗာတီကန်နဲ့ တရုတ်အစိုးရတို့အကြား ဆွေးနွေးညှိနှိုင်းမှုတွေ ဆက်လက်လုပ်ဆောင်နေတယ်’ လို့ ပြောကြားခဲ့ပါတယ်။

ဟီနန်ပြည်နယ် သာသနာရေးဌာနနဲ့၊ တရုတ်အစိုးရ သာသနာရေးဌာနတို့က AFP သတင်းဌာနရဲ့ မေးမြန်းမှုကို ပြန်လည်ဖြေကြားခဲ့ခြင်း မရှိပါဘူး။

ခရစ်ယာန်ဘုရားကျောင်း တော်တော်များများတည်ရှိရာ ရပ်ကွက်ဟောင်းတွေကို ဖျက်ပြီး ဖွံ့ဖြိုးရေးစီမံကိန်းတွေ ဆောင်ရွက်မှုကလည်း ခရစ်ဘာသာအပေါ် နှိပ်ကွပ်မှုအခြေအနေကို ပိုပြီး သိသာလာစေပါတယ်။

ဖူးယန်က ခရစ်ယာန်ဘုရားကျောင်းပျက်ဟာ အထပ်မြင့်လူနေတိုက်ခန်း ဆောက်လုပ်ရေးလုပ်ငန်းခွင်ထဲမှာ ရှိနေပါတယ်။

ဆယ်စုနှစ်ချီ သက်တမ်းရှိတဲ့ အဲဒီဘုရားကျောင်းဟာ အစိုးရခွင့်ပြုချက်နဲ့ ဆောက်လုပ်ခဲ့ပြီး၊ အသုံးပြုဖို့ လိုင်စင်ရထားပေမယ့် ပြီးခဲ့တဲ့လအနည်းငယ်အတွင်း အာဏာပိုင်တွေက တရားမ၀င်အဆောက်အဦးအဖြစ် ကြေငြာခဲ့တယ်လို့ လယ်သမားတစ်ယောက်ဖြစ်ပြီး၊ ရွာသူကြီးလည်းဖြစ်တဲ့ လျူက ပြောကြားခဲ့ပါတယ်။

ဘာသတိပေးချက်မှ မထုတ်ပြန်ဘဲ တစ်ညမှာ ဘုရားကျောင်းကို ဘူဒိုဇာနဲ့ ဖြိုချဖျက်ဆီးလိုက်ပါတယ်။

“နောက်နေ့မှာ၊ ဘုရားကျောင်းအဖွဲ့ဝင်ဟောင်းတွေဟာ ဒီနေရာမှာ လာထိုင်ကာ ၀မ်းနည်း ငိုကြွေးကြပါတယ်” လို့ လျူက ပြောပါတယ်။

အစိုးရကပေးတဲ့ မဖြစ်စလောက်လျော်ကြေးက နောက်နေရာသစ်တစ်ခုရှာဖို့ မလုံလောက်ဘူးလို့လည်း သူက ဆိုပါတယ်။

ဟောင်ကောင်က Holy Spirit Study Centre ရဲ့ တရုတ်ကသလစ်ခရစ်ယာန်အသင်းတော်ဆိုင်ရာ ကျွမ်းကျင်သူ အန်သိုနီလမ်က မြို့ပြတည်ဆောက်ရေးဆိုတာ ‘ဘုရားကျောင်းတွေကို ဖြိုချဖျက်ဆီးဖို့အတွက် အသုံးပြုတဲ့ ဆင်ခြေတစ်ခုသာဖြစ်တယ်’ လို့ ပြောကြားခဲ့ပါတယ်

အစသာရှိသေး

မြေအောက်ခရစ်ယာန်အသင်းတော်တွေက မျှော်လင့်ချက်မဲ့နေတဲ့ ဘုန်းကြီးတွေဟာ အစိုးရအသိအမှတ်ပြုထားတဲ့ ဘုန်းကြီးတွေထံ ချဉ်းကပ်ပြီး သူတို့ ၀တ်ပြုနိုင်မယ့်နေရာတစ်ခု ဖန်တီးပေးဖို့ ပြောလာကြပြီး အပြန်အလှန်အားဖြင့် သူတို့ရဲ့လုပ်ကိုင်ဆောင်ရွင်မှုတွေကို ကြီးကြပ်မှုခံယူမယ်လို့ ဆိုလာကြပါတယ်။

အစိုးရအသိအမှတ်ပြုထားတဲ့ ဘုန်းတော်ကြီးတစ်ပါးက မြို့ပြတည်ထောင်မှုနဲ့ ခရစ်ယာန်ဘုရားကျောင်းတွေကို ဖြိုချဖျက်ဆီးမှုဟာ မြေအောက်အသင်းတော်တွေ ရှင်သန်နိုင်မယ့်နေရာ နည်းသထက် နည်းလာပြီလို့ ဆိုလိုတာဖြစ်ကြောင်း ပြောကြားခဲ့ပါတယ်။

“ဘုန်းကြီးတို့ မြေအောက်အသင်းတော်တွေနဲ့ လက်ရှိမှာ ဆွေးနွေးနေပါတယ်။ သူတို့ကို ကာကွယ်ဖို့ဖြစ်ပြီး ထိန်းချုပ်ဖို့ မဟုတ်ပါဘူး။ သူတို့ကို ဘုန်းကြီးတို့ စောင့်ကြည့်နေတယ်ဆိုတာ အစိုးရလည်း သိရမယ်။ ဒါဟာ ဟီနန်မှာ ဘုန်းကြီးတို့ ဖန်တီးထားတဲ့ စနစ်တစ်ခုပါ”

ကက်သလစ်ဘုန်းကြီး တော်တော်များများက ဟီနန်ပြည်နယ်က ကန့်သတ်မှုဟာ တရုတ်နိုင်ငံက အခြားသောဒေသတွေဆီ ပြန့်နှံ့သွားမှာကိုလည်း စိုးရိမ်နေကြပါတယ်။

“ဟီနန်ဟာ ဗဟိုအစိုးရရဲ့ စမ်းသပ်နယ်မြေတစ်ခုဖြစ်တယ်လို့ နှစ်တော်တော်ကြာကတည်းက ဘုန်းကြီးတို့ ခံစားရပြီး၊ ဒါဟာ အစလို့ ထင်ပါတယ်” လို့ အစိုးရနဲ့ အနီးကပ်ဆက်ဆံရေးရှိတဲ့ ခရစ်ယာန်ဘုန်းကြီးတစ်ပါးက ပြောကြားခဲ့ပါတယ်။

Ref: AFP

(AFP သတင်းဌာနတွင် ဖော်ပြထားသည့် ‘Nowhere to worship’: Crackdown bedevils China’s Catholics ဆောင်းပါးကို လေးမောင်က ဆီလျော်အောင် ဘာသာပြန်ဆိုသည်)