ကာကွယ်ဆေးနှစ်ကြိမ်ထိုးထားပြီးလျှင် အိန္ဒိယမှ ပုံပြောင်းကိုဗစ်ကိုလည်း ထိထိရောက်ရောက် ကာကွယ်နိုင်

မေ ၂၃၊ ၂၀၂၁
M-Media

-ကိုဗစ်ကာကွယ်ဆေးနှစ်ကြိမ် ထိုးထားခြင်းအားဖြင့် အိန္ဒိယမှာ အကြီးအကျယ် ပြန့်နှံ့နေတဲ့ ပုံပြောင်းကိုဗစ်ဗိုင်းရပ်စ်ကို ကာကွယ်နိုင်တယ်လို့ ဗြိတိန်ကျန်းမာရေးတာဝန်ရှိသူတွေက ပြောကြားလိုက်ပါတယ်။

Pfizer-BioNTech ကာကွယ်ဆေး နှစ်ကြိမ်ထိုးပြီး ၂ ပတ်ကြာတဲ့အခါ အိန္ဒိယက ပုံပြောင်းကိုဗစ် B16172 ကူးစက်မှုကို ၈၈ ရာခိုင်နှုန်း ကာကွယ်နိုင်ပြီး ဗြိတိန်က ပုံပြောင်းကိုဗစ် B117 ကို ၉၃ ရာခိုင်နှုန်း ကာကွယ်နိုင်တာကို အင်္ဂလန်ကျန်းမာရေးဌာနရဲ့ လေ့လာမှုမှာ တွေ့ရပါတယ်။

AstraZeneca နှစ်ကြိမ်ထိုးထားရင်တော့ B16172 ဗိုင်းရပ်စ်ကို ၆၀ ရာခိုင်နှုန်း၊ B117 ကို ၆၆ ရာခိုင်နှုန်း ကာကွယ်နိုင်တယ်လို့ ဆိုပါတယ်။

ဗြိတိန်ကျန်းမာရေးဝန်ကြီး မတ်ဟန်းကော့က ဒါဟာ အားတက်ဖွယ်တွေ့ရှိချက်ဖြစ်ပြီး နိုင်ငံအတွင်းထုတ်ထားတဲ့ ကိုဗစ်ကန့်သတ်ချက်တွေကို စီစဉ်ထားတဲ့အတိုင်း လာမယ့်လမှာ လျော့ချဖို့ မျှော်လင့်ချက်ရှိလာပြီလို့ ပြောကြားခဲ့ပါတယ်။

ဗြိတိန်ဟာ ဥရောပမှာ အမြန်ဆုံး ကိုဗစ်ကာကွယ်ဆေးစီမံကိန်းကို အကောင်အထည်ဖော်နေတာဖြစ်ပြီး၊ အိန္ဒိယက ပုံပြောင်းကိုဗစ် ကူးစက်မှု တွေ့လာရတာကြောင့် စိုးရိမ်မှုတွေလည်း ရှိနေပါတယ်။

ကာကွယ်ဆေး ပထမတစ်ကြိမ်ထိုးထားပြီး ၃ ပတ်ကြာရင် B16172 ဗိုင်းရပ်စ်ကို ၃၃ ရာခိုင်နှုန်း B117 ကို ၅၀ ရာခိုင်နှုန်း ကာကွယ်ပေးနိုင်တယ်လို့လည်း ဗြိတိန်ကျန်းမာရေးဌာနရဲ့ လေ့လာမှုမှာ တွေ့ရှိရပါတယ်။

Ref: Reuters