ဒီဇင်ဘာ ၉၊ ၂၀၂၁
M-Media
-လာမယ့်နှစ် ဘေဂျင်းဆောင်းရာသီအိုလံပစ်ပြိုင်ပွဲကို သပိတ်မှောက်မှုအတွက် ပြန်ပေးဆပ်ရလိမ့်မယ်လို့ တရုတ်က အနောက်နိုင်ငံတွေကို သတိပေးလိုက်ပါတယ်။
တရုတ်နိုင်ငံအနောက်ပိုင်း ရှင်ကျန်းပြည်နယ်က ဝီဂါမွတ်စလင်တွေအပေါ် လူမျိုးတုန်းသတ်ဖြတ်မှုမြောက်အောင် လူ့အခွင့်အရေးချိုးဖောက်မှုကို ဆန့်ကျင်တဲ့အနေနဲ့ ၂၀၂၂ ခုနှစ် ဘေဂျင်းဆောင်းရာသီအိုလံပစ်ပြိုင်ပွဲကို သပိတ်မှောက်မယ်လို့ အမေရိကန်က အခုတစ်ပတ်အစောပိုင်းမှာ ကြေငြာချက် ထုတ်ပြန်ခဲ့ပါတယ်။
ဩတေးလျ၊ ဗြိတိန်နဲ့ ကနေဒါနိုင်ငံတို့လည်း သပိတ်မှောက်ကြောင်း မနေ့က ကြေငြာပါတယ်။
ဒီသပိတ်မှောက်မှုဟာ အားကစာသမားတွေ မစေလွှတ်တာမျိုးသာ ဖြစ်ပေမယ့် တရုတ်အစိုးရက ဒေါသထွက်ခဲ့ပြီး လက်တုန့်ပြန်မယ်လို့ တရုတ်နိုင်ငံခြားရေးဝန်ကြီးဌာန ပြောဆိုရေးဆိုခွင့်ရှိသူ ဝမ်ဝင်ဘင်က ပြောပါတယ်။
“အိုလံပစ်ပြိုင်ပွဲအပေါ် နိုင်ငံရေးအမြတ်ထုတ်တဲ့ အမေရိကန်၊ ဩစတေးလျ၊ ဗြိတိန်နဲ့ ကနေဒါတို့ရဲ့ လုပ်ရပ်ကို လူတွေက ထောက်ခံမှာမဟုတ်သလို၊ ကိုယ့်ကိုယ်ကို ဖယ်ကျဉ်လိုက်တာ ဖြစ်ပါတယ်။ ဒီအမှားတွေအတွက် မုချဧကန် ပြန်ပေးဆပ်ရပါလိမ့်မယ်”
အမေရိကန်နဲ့ အနောက်နိုင်ငံတွေရဲ့ ဒီလိုသပိတ်မှောက်မှုကို လူ့အခွင့်အရေးအဖွဲ့တွေကလည်း ကြိုဆိုပါတယ်။
လူ့အခွင့်အရေးစောင့်ကြည့်အဖွဲ့ Human Rights Watch ရဲ့ တရုတ်ဆိုင်ရာ ဒါရိုက်တာ ဆိုဖီ ရစ်ချက်ဆန်က ဝီဂါနဲ့ အခြား တူရကီစကားပြော လူနည်းစုတွေအပေါ် တရုတ်အစိုးရက ရာဇဝတ်မှု ကျူးလွန်နေတာကို ဆန့်ကျင်ရာမှာ အခုသပိတ်မှောက်မှုက အရေးပါတဲ့ ခြေလှမ်းတစ်ခုဖြစ်တယ်လို့ ပြောကြားခဲ့ပါတယ်။
Ref: AFP