ပါလက်စတိုင်းများ အစုလိုက်အပြုံလိုက် သတ်ဖြတ်မြှုပ်နှံခံထားရသည့် နေရာ ၃ ခုကို ထပ်မံတွေ့ရှိ

မေ ၂၅၊ ၂၀၂၃

M-Media

-၁၉၄၈ ခုနှစ် ပါလက်စတိုင်းနယ်မြေတွေကို ဂျူးလက်နက်ကိုင်တွေက သိမ်းပိုက်စဥ် လူအမြောက်အများ သတ်ဖြတ်မြှုပ်နှံထားတဲ့ နေရာသစ် အနည်းဆုံး ၃ ခုကို တွေ့ရှိထားတယ်လို့ သုတေသန အဖွဲ့က ပြောပါတယ်။ 

ယနေ့ အစ္စရေးနိုင်ငံ ဟိုင်ဖာမြို့အနီးက တန်တူရာလို့ခေါ်တဲ့ ရွာမှာဖြစ်ပါတယ်။ တန်တူရာဟာ ၁၉၄၈ ခုနှစ် မတိုင်ခင်က ပါလက်စတိုင်း ၁၅၀၀ လောက် နေထိုင်တဲ့ ရွာတစ်ခုပါ။ 

၁၉၄၈ ခုနှစ်မှာ နောက်ပိုင်း အစ္စရေးစစ်တပ်ဖြစ်လာမယ့် ဂျူးလက်နက်ကိုင်အဖွဲ့က ဒီရွာကို ၀င်ရောက်တိုက်ခိုက်ပြီး ပါလက်စတိုင်းတွေကို မောင်းထုတ်ခဲ့ပါတယ်။ ဒီတိုက်ခိုက်မှုအတွင်း နည်းဆုံး လူ ၂၀၀ လောက် အသတ်ခံခဲ့ရတယ်လို့ လွတ်မြောက်လာသူတွေက ပြောပါတယ်။ 

တန်တူရာရွာက အစုလိုက်အပြုံလိုက် သတ်ဖြတ်မြှုပ်နှံထားတဲ့နေရာတွေကို သုတေသနအဖွဲ့အစည်းတွေက ရှာဖွေနေတာ ကြာပါပြီ။ 

လန်ဒန်အခြေစိုက် Forensic Architecture သုတေသနအဖွဲ့တစ်ခုက နောက်ဆုံးပေါ်နည်းပညာတွေ၊အသက်ရှင်ကျန်ရစ်သူတွေ၊ ပါလက်စတိုင်းကို ဗြိတိသျှအုပ်စိုးစဥ်က မှတ်တမ်းတွေကနေတစ်ဆင့် အစုလိုက်အပြုံလိုက် သတ်ဖြတ်မြှုပ်နှံထားတဲ့ နေရာ ၃ ခုကို ဖော်ထုတ်နိုင်ခဲ့ပါတယ်။ 

၂ ခုက တန်တူရာရွာ ကမ်းခြေက ကားပါကင်မှာဖြစ်ပါတယ်။

ကျန်ရစ်သူ မိသားစုတွေ ရုပ်ကြွင်းတွေကို တူးဖော်သင်္ဂြိုဟ်ခွင့် ရနိုင်ရေးအတွက် တွေ့ရှိထားတဲ့ အထောက်အထားတွေကို Forensic Architecture အဖွဲ့က အစ္စရေးအာဏာပိုင်တွေထံ တင်ပြသွားဖို့ ရှိနေပါတယ်။ 

၁၉၄၈ ခုနှစ် ဂျူးလက်နက်ကိုင်တွေက ပါလက်စတိုင်းနယ်မြေတွေကို သိမ်းပိုက်ချိန် ပါလက်စတိုင်းမြို့ရွာပေါင်း အနည်းဆုံး ၅၀၀ လောက် ဖျက်ဆီးခံခဲ့ရပြီး လူ ၇ သိန်းခွဲလောက် နေရပ်ကနေ မောင်းထုတ်ခံခဲ့ရပါတယ်။ 

Ref: Arab News