အောက်တိုဘာ ၃၊ ၂၀၂၃
M-Media
-၂၀၂၄ အိုလံပစ်ပြိုင်ပွဲ လက်ခံကျင်းပဖို့ ရှိနေတဲ့ ပြင်သစ်နိုင်ငံ ပဲရစ်မြို့မှာ ကြမ်းပိုးပြဿနာကို အကြီးအကျယ် ရင်ဆိုင်နေရပါတယ်။
ကြမ်းပိုးတိုက်ဖျက်ရေး စီမံကိန်း စတင်နေပြီလို့ ပြင်သစ်အစိုးရက ပြီးခဲ့တဲ့တစ်ပတ်မှာ ကြေငြာရတဲ့အထိ ဖြစ်နေတာပါ။
ပဲရစ်မြို့က ဟိုတယ်တွေ၊ မိုတယ်တွေမှာသာ မကတော့ဘဲ ရထားဘူတာ၊ ကားဂိတ်တွေ၊ လေဆိပ်တွေအထိ ကြမ်းပိုးတွေ ပျံ့နှံ့နေပါတယ်။
ပြဿနာအစက ပြီးခဲ့တဲ့ နွေရာသီက ဖြစ်ပါတယ်။ ရုပ်ရှင်ရုံတွေ၊ ကပွဲရုံတွေမှာ ကြမ်းပိုးတွေ သောင်းကြမ်းနေတာကို လူတွေက ဆိုရှယ်မီဒီယာတွေမှာ တင်ခဲ့ကြပြီး နောက်ပိုင်းမှာ နေရာစုံမှာ တွေ့လာခဲ့ရတာ ဖြစ်ပါတယ်။
အရင်ကလည်းဖြစ်ဖူး
၁၉၅၀ ပြည့်နှစ်လောက်ကတည်းက ပြင်သစ်နိုင်ငံမှာ ကြမ်းပိုးတွေကို အမြစ်ဖြတ်နိုင်ခဲ့တာပါ။
ဒါပေမယ့် ၂၀၁၇ ခုနှစ်ကနေ ၂၀၂၂ ခုနှစ်အတွင်း ကြမ်းပိုးတွေ ပြန်ပေါ်လာခဲ့ပြီး ပျမ်းမျှ အိမ် ၁၀ အိမ်မှာ တစ်အိမ် ကြမ်းပိုးပြဿနာကို ရင်ဆိုင်ခဲ့ရတယ်လို့ ပြင်သစ်အစိုးရက ပြောပါတယ်။
၂၀၁၈ ခုနှစ်အတွင်း ဟိုတယ်၊ တိုက်ခန်းနဲ့ နေအိမ်ပေါင်း ၄ သိန်းလောက်မှာ အစိုးရက ကြမ်းပိုးရှင်းလင်းရေး လုပ်ပေးခဲ့ရပါတယ်။
၂၀၂၀ ခုနှစ်မှာ ကြမ်းပိုးကိစ္စ တိုင်ကြားဖိုး သီးသန့် ဖုန်းလိုင်းနဲ့ ၀ဘ်ဆိုက်တစ်ခုကိုလည်း အစိုးရက လုပ်ပေးခဲ့ပါတယ်။
ဘာ့ကြောင့်လဲ
DDT လို ပြင်းထန်တဲ့ ပိုးသတ်ဆေးတွေကို အသုံးပြုမှု တားဆီးပြီးနောက်ပိုင်းမှာ ပြင်သစ်မှာ ကြမ်းပိုးတွေ တစ်စခန်း ပြန်ထလာတာပါ။
ဇူလိုင်လက ထုတ်ပြန်တဲ့ အစိုးရအစီရင်ခံစာတစ်ခုမှာ ခရီးသွားလာမှု မြင့်တက်တာ၊ ကြမ်းပိုးတွေက ပိုးသတ်ဆေးအပျော့စားတွေကို ခံနိုင်ရည်ရှိလာတာတွေက ကြမ်းပိုးတွေများလာတဲ့ အဓိကအကြောင်းအရင်းဖြစ်တယ်လို့ ဆိုပါတယ်။
လက်ရှိ ပဲရစ်မြို့မှာ ကြမ်းပိုးတိုက်ဖျက်ရေးကို စီမံကိန်းချ ဆောင်ရွက်နေရပါတယ်။
မြို့တော်၀န်က ကြမ်းပိုးရှင်းလင်းရေးအဖွဲ့တစ်ခု ဖွဲ့စည်းလုပ်ဆောင်ပေးဖို့ သမ္မတ အီမန်နျူယဲလ်မာခရွန်ကို တောင်းဆိုထားပါတယ်။
Ref: Aljazeera