နို၀င်ဘာ ၁၊ ၂၀၂၃
M-Media
-၂၀၃၄ ခုနှစ် ကမ္ဘာ့ဖလား ဘောလုံးပြိုင်ပွဲကို လက်ခံကျင်းပဖို့ အမည်စာရင်းတင်သွင်းထားတဲ့ နိုင်ငံတွေစာရင်းမှာ ဆော်ဒီအာရေဗျ တစ်နိုင်ငံသာ ကျန်ရှိပါတော့တယ်။
၂၀၃၀ ကမ္ဘာဖလားကို စပိန်၊ ပေါ်တူဂီနဲ့ မော်ရိုကိုတို့က ပူးတွဲကျင်းပခွင့် ရရှိခဲ့ပြီး ၂၀၃၄ ခုနှစ်အတွက် အာရှတိုက်နဲ့ သမုဒ္ဒရာပိုင်းဇုန်က အလှည့်ကြတာ ဖြစ်ပါတယ်။
အင်ဒိုနီးရှားက နယူးဇီလန်၊ မလေးရှား၊ စင်ကာပူတို့နဲ့ ပူးတွဲကျင်းပဖို့ စိတ်၀င်စားကြောင်း အစောပိုင်းမှာ ပြောကြားခဲ့ဖူးပေမယ့် နောက်ပိုင်းမှာ ရုပ်သိမ်းသွားပါတယ်။
အိမ်ရှင်အဖြစ်လက်ခံကျင်းပဖို့ စာရင်းပေးထားတဲ့ သြစတေးလျကလည်း အောက်တိုဘာ ၃၁ ရက်နေ့မှာ နှုတ်ထွက်သွားခဲ့ပြီး လက်ရှိ ဆော်ဒီအာရေဗျ တစ်နိုင်ငံသာ ကျန်တော့ပါတယ်။
ဆော်ဒီအာရေဗျဟာ အာရှဘောလုံးအဖွဲ့ချုပ်ရဲ့ ထောက်ခံမှုကို အပြည့်အ၀ ရရှိထားပါတယ်။
ဖီဖာဟာ လိုအပ်ချက်တွေ ပြည့်မီချင်း ရှိ၊ မရှိ စစ်ဆေးကာ ၂၀၂၄ ခုနှစ် နှစ်ကုန်ပိုင်းမှာ အိမ်ရှင်နိုင်ငံကို ထုတ်ပြန်ကြေငြာသွားမှာ ဖြစ်ပါတယ်။
၂၀၃၀ ဖွံ့ဖြိုးရေး ရည်မှန်းချက် ထားရှိဆောင်ရွက်နေတဲ့ ဆော်ဒီအာရေဗျဟာ အားကစားပိုင်းမှာလည်း ရင်းနှီးမြှုပ်နှံမှု အကြီးအကျယ် ပြုလုပ်နေတာပါ။
အခုနှစ်ကုန်ပိုင်းမှာ ကလပ်အသင်းများကမ္ဘာ့ဖလား၊ ၂၀၂၇ ခုနှစ်မှာ အာရှဖလားနဲ့ ၂၀၂၉ ခုနှစ်မှာ အာရှဆောင်းရာသီ အားကစားပြိုင်ပွဲတွေကို ဆော်ဒီက လက်ခံကျင်းပဖို့ ရှိနေပါတယ်။
Ref: Arab News