ဂါဇာတွင် အစ္စရေးက စစ်ရာဇ၀တ်မှုများကို ပြောင်ပြောင်တင်းတင်း ဆက်လက်ကျူးလွန်နေ

နို၀င်ဘာ ၂၊ ၂၀၂၃

M-Media 

-ဂါဇာကမ်းမြှောင်မှာ အစ္စရေးက တိုက်ခိုက်သတ်ဖြတ်မှုတွေ ဆက်လုပ်နေပြီး ကမ္ဘာတစ်၀ှမ်းက ၀ေဖန်ရှုတ်ချသံတွေလည်း ပိုမို ကျယ်လောင်လာပါတယ်။ 

ဂျာဘာလီယာ ဒုက္ခသည်စခန်းကို ၂၄ နာရီအတွင်း ၂ ကြိမ် ဒုံးကျည်နဲ့ ပစ်ခတ်တိုက်ခိုက်ရာမှာ အနည်းဆုံး လူ ၂၀၀ လောက် သေဆုံးခဲ့ပြီး ပျောက်ဆုံးသူ ၁၂၀ ရှိနေပါတယ်။ 

ကုလသမဂ္ဂ အထွေထွေအတွင်းရေးမှူး အန်တိုနီယိုဂူတာရက်စ်က ဒီတိုက်ခိုက်မှုတွေဟာ အလွန်စက်ဆုပ်စရာကောင်းပြီး စစ်ရာဇ၀တ်မှုမြောက်တယ်လို့ ရှုတ်ချပြောဆိုခဲ့ပါတယ်။ 

ကုလသမဂ္ဂ ကလေးသူငယ် စောင့်ရှောက်ရေးအဖွဲ့ ယူနီဆက်ဖ်ကလည်း ဂျာဘာလီယာ ဒုက္ခသည်စခန်းကို တိုက်ခိုက်မှုဟာ စက်ဆုပ်စရာကောင်းတယ်လို့ ထုတ်ပြန်ခဲ့ပါတယ်။

၂၅ ရက်အတွင်း ကလေးငယ်ပေါင်း ၃၅၀၀ ကျော် အသတ်ခံရတာကို သိပ်မကြာခင်က သိရှိရတယ်လို့ ထုတ်ပြန်ချက်မှာ ဖော်ပြထားပါတယ်။ 

“ကလေးတွေ ထိခိုက်ခံစားရတာတွေ သိပ်များနေပါပြီ။ ကလေးတွေကိုသတ်တာ၊ ဖမ်းဆီးထားတာတွေကို ရပ်တန့်ရပါတော့မယ်” လို့ ယူနီဆက်ဖ်က ထုတ်ပြန်ပါတယ်။ 

မီးဖွားဆောင်ကို တိုက်ခိုက်

ဂါဇာစီးတီးက အလ်ဟီလူဆေးရုံရဲ့ မီးဖွားဆောင်ကို နို၀င်ဘာ ၁ ရက်နေ့မှာ အစ္စရေးက တိုက်ခိုက်ခဲ့တယ်လို့ ပါလက်စတိုင်း ကျန်းမာရေး၀န်ကြီးဌာန အက်ရှ်ရက်ဖ် အလ်ကွဒ်ရာက ပြောပါတယ်။ 

“ဆေး၀ါးပစ္စည်းတွေ၊ လောင်စာဆီတွေ မရအောင် ပိတ်ဆို့ကာ အစ္စရေးက ကျန်းမာရေးစနစ် ပြိုလဲအောင် လုပ်ဆောင်ထားပါတယ်။ အစ္စရေးကို ရပ်တန့်ရေး၊ ဆေးရုံတွေ၊ ကျန်းမာရေး၀န်ထမ်းတွေ၊ လူနာတွေကို ကာကွယ်ပေးရေး၊ နောက်ထပ် အစုလိုက်အပြုံလိုက် သတ်ဖြတ်မှုတွေ မဖြစ်အောင် တားဆီးရေး နိုင်ငံတကာအသိုင်းအ၀ိုင်းက ကြား၀င်ဆောင်ရွက်ဖို့ ကျွန်တော်တို့ တိုက်တွန်းပါတယ်”

အလ်ကွဒ်စ်ဆေးရုံ 

ဂါဇာက အဓိကဆေးရုံတစ်ခုဖြစ်တဲ့ အလ်ကွဒ်စ်ဆေးရုံ ပတ်၀န်းကျင်ကိုလည်း အစ္စရေးက တောက်လျှောက်တိုက်ခိုက်နေတာကြောင့် လူနာတွေ၊ ၀န်ထမ်းတွေနဲ့ စစ်ရှောင်တွေမှာ ထိတ်လန့်ကြောက်ရွံ့မှုတွေ ရှိနေတယ်လို့ ပါလက်စတိုင်း လခြမ်းနီအဖွဲ့က ပြောပါတယ်။ 

အောက်တိုဘာ ၃၀ ရက်နေ့မှာ ဆေးရုံ၀န်းအတွင်းက လခြမ်းနီအဖွဲ့ရဲ့ အဆောက်အဦးတွေကို အစ္စရေးက တိုက်ခိုက်ဖျက်ဆီးခဲ့ပါတယ်။ 

ဟားမက်စ်ရဲ့ တိုက်ခိုက်မှုကို တုန့်ပြန်တယ်ဆိုတဲ့ ခေါင်းစဥ်နဲ့ အစ္စရေးဟာ အောက်တိုဘာ ၇ ရက်နေ့က စတင်ပြီး ဂါဇာက ပါလက်စတိုင်းပြည်သူတွေကို တိုက်ခိုက်သတ်ဖြတ်နေတာပါ။ 

နို၀င်ဘာ ၁ ရက်နေ့အထိ အသတ်ခံရသူ ၈၈၀၀ နီးပါး ရှိလာပြီး အများစုဟာ အမျိုးသမီတွေနဲ့ ကလေးငယ်တွေ ဖြစ်ပါတယ်။ 

Ref: Aljazeera