Author: KO LAY

M-Media

ဆေးရုံများကို အစ္စရေးက တိုက်ခိုက်မှုအတွက် စုံစမ်းရန် တောင်းဆို
——————
ဂါဇာကမ်းမြှောင်က ဆေးရုံတွေကို အစ္စရေးက အကြမ်းဖက်တိုက်ခိုက်မှုနဲ့ပတ်သက်ပြီး စုံစမ်းစစ်ဆေးမှုတွေ ပြုလုပ်ဖို့ ကုလသမဂ္ဂ လူ့အခွင့်အရေးဆိုင်ရာ ကော်မရှင်နာမင်းကြီး ဗိုလ်ကာ တာ့က်က ကုလလုံခြုံရေးကောင်စီကို တောင်းဆိုလိုက်ပါတယ်။ ဟားမက်စ်အဖွဲ့က ဆေးရုံတွေကို ဌာနချုပ်အဖြစ် အသုံးပြုနေတယ်ဆိုတဲ့ စွပ်စွဲမှုအတွက် အစ္စရေးက ခိုင်မာတဲ့ သက်သေအထောက်အထား မပြနိုင်ဘူးလို့လည်း တာ့က်က ထောက်ပြခဲ့ပါတယ်။ ပြီးခဲ့တဲ့ ၈ လအတွင်း ဂါဇာက ဆေးရုံ ၂၇ ခုနဲ့ ကျန်းမာရေးစင်တာ ၁၂ ခုကို အစ္စရေးက ၁၃၆ ကြိမ် လေကြောင်းကနေ တိုက်ခိုက်ခဲ့တယ်လို့ တာ့က်တင်ပြတဲ့ မှတ်တမ်းမှာ ဖော်ပြထားပါတယ်။

အမေရိကန်က အစ္စရေးကို လက်နက်ထပ်ပေးမည်
————
ကန်ဒေါ်လာ ၈ ဘီလီယံတန်ဖိုးရှိတဲ့ စစ်လက်နက်အကူအညီတွေ အစ္စရေးကို ထပ်ပေးမယ့်အစီအစဥ်ကို အတည်ပြုဖို့ သမ္မတ ဂျိုးဘိုင်ဒန်က လွှတ်တော်ကို တင်သွင်းလိုက်ပါတယ်။ တိုက်လေယာဥ်တွေနဲ့ တိုက်ခိုက်ရေး ရဟတ်ယာဥ်မှာ အသုံးပြုနိုင်မယ့် လက်နက်ခဲယမ်းတွေ၊ လက်နက်ကြီးခဲယမ်းတွေ၊ ပေါင် ၅၀၀ ရှိတဲ့ ဗုံးတွေအပါအ၀င် အခြား စစ်လက်နက်ပစ္စည်း အများအပြား ပါ၀င်မှာ ဖြစ်ပါတယ်။

သောကြာနေ့ တစ်ရက်တည်း ၆၀ ကျော်အသတ်ခံရ
—————–
ဒီဇင်ဘာ ၃ ရက်နေ့ ဂါဇာကမ်းမြှောင်တစ်၀ှမ်း အစ္စရေးရဲ့ အကြမ်းဖက်တိုက်ခိုက်မှုကြောင့် သေဆုံးသူအရေအတွက်ဟာ အနည်းဆုံး ၆၁ ဦး ရှိခဲ့ပါတယ်။ မြောက်ပိုင်းက ဂါဇာစီးတီးတစ်ခုတည်းမှာတင် အသတ်ခံရသူအရေအတွက်က ၃၀ ဦး ရှိခဲ့ပြီး အစ္စရေးဟာ ဆေးရုံနဲ့ စစ်ရှောင်စခန်းတွေကို ပစ်မှတ်ထား တိုက်ခိုက်ခဲ့တာ ဖြစ်ပါတယ်။ ၁၄ လအတွင်း ဂါဇာမှာ အစ္စရေးက သတ်ဖြတ်ထားသူ အရေအတွက်ဟာ ၄၆၀၀၀ နီးပါး ရှိလာပြီ ဖြစ်ပါတယ်။

Ref: Aljazeera

M-Media

နှစ်သစ်ကူးနေ့တွင် လူ ၃၀ နီးပါး အသတ်ခံရ
—-
ဇန်န၀ါရီ ၁ ရက်နေ့ ဂါဇာကမ်းမြှောင်တစ်၀ှမ်း စစ်ရှောင်စခန်းတွေကို အစ္စရေးရဲ့ တိုက်ခိုက်မှုကြောင့် အနည်းဆုံး ၂၈ ဦး သေဆုံးခဲ့ပြီး အများစုက အမျိုးသမီးတွေနဲ့ ကလေးငယ်တွေ ဖြစ်ပါတယ်။ ၂၀၂၃ အောက်တိုဘာလက စတင်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲအတွင်း အသတ်ခံရသူ အရေအတွက်ဟာ ၄၆၀၀၀ နီးပါး ရှိလာခဲ့ပြီး ပျောက်ဆုံးနေသူအရေအတွက်ဟာ ၁၁၀၀၀ ကျော် ရှိနေပါတယ်။

အေးခဲမှုကြောင့် ရင်ခွင်ပိုက် ကလေးငယ်သေဆုံးမှု ၇ ဦး ရှိပြီ
———
ပြီးခဲ့တဲ့ ရက်အနည်းငယ်အတွင်း ဂါဇာကမ်းမြှောင်မှာ ရာသီဥတု အေးခဲမှုကြောင့် သေဆုံးတဲ့ ရင်ခွင်ပိုက် ကလေးငယ် အရေအတွက်ဟာ ၇ ဦးအထိ ရှိလာပြီဖြစ်ပါတယ်။ အစ္စရေးရဲ့ အကြမ်းဖက် တိုက်ခိုက် သတ်ဖြတ်မှုတွေ၊ နိုင်ငံတကာ အကူအညီတွေကို ဟန့်တားမှု၊ ဆေးရုံ ဆေးခန်းတွေကို အကြမ်းဖက်မှုတွေကြောင့် ပါလက်စတိုင်းပြည်သူတွေဟာ နောက်ဆက်တွဲ ဆိုးကျိုးတွေကို ခါးစည်း ခံနေကြရတာ ဖြစ်ပါတယ်။

အလ်အက်ဆာဗလီ ကျူးကျော်ခံရမှု မြင့်တက်လာ
———
ပါလက်စတိုင်းနိုင်ငံ ဂျေရုစလင်မြို့က အလ်အက်ဆာဗလီ၀င်းအတွင်း ဂျူးအစွန်းရောက်တွေ ၀င်ရောက် ကျူးကျော်မှု အရေအတွက်ဟာ ဒီဇင်ဘာလအတွင်း သိသိသာသာ မြင့်တက်လာပါတယ်။ ဗလီ၀င်းအတွင်း ဂျူးတွေ၀င်ရောက်ကာ ပူဇော်ပသမှုတွေ မလုပ်ဆောင်ဖို့ ပါလက်စတိုင်းနဲ့ အစ္စရေးတို့ အရင်ကတည်းက သဘောတူညီထားကြတာ ဖြစ်ပါတယ်။ ဒါပေမယ့် အစ္စရေးလုံခြုံရေးတပ်ဖွဲ့တွေရဲ့ အကူအညီနဲ့ အစ္စရေးအစိုးရအဖွဲ့၀င်တွေ၊ ဂျူးအစွန်းရောက်တွေ ပုံမှန်လိုလို ၀င်ရောက်ကျူးကျော်နေကြတာ ဖြစ်ပါတယ်။

M-Media

Kamal Adwan ဆေးရုံကို အစ္စရေးက မီးရှို့
————–
ဂါဇာမြောက်ပိုင်းက Kamal Adwan ဆေးရုံကို လနဲ့ချီ ဗုံးကြဲတိုက်ခိုက်ပြီးတဲ့နောက် သောကြာနေ့မှာ အစ္စရေးစစ်သားတွေ ၀င်ရောက်စီးနင်းခဲ့ပါတယ်။ ဆေး၀န်ထမ်းတွေနဲ့ လူနာတွေအားလုံးကို မောင်းထုတ်ခဲ့ပြီး၊ ဆေးရုံဒါရိုက်တာအပါအ၀င် လူအများအပြားကို ဖမ်းဆီးသွားခဲ့ကာ ဆေးရုံကိုလည်း မီးရှို့ခဲ့ပါတယ်။ ဆေးရုံကို အစ္စရေးရဲ့ တရစပ်တိုက်ခိုက်မှုအတွင်း ၀န်ထမ်းတွေ၊ လူနာတွေနဲ့ ဆေးရုံ၀န်းထဲက စစ်ရှောင်အများအပြား သေဆုံးခဲ့ပါတယ်။

ရာမာလာမှ ပါလက်စတိုင်းလယ်သမားများ တိုက်ခိုက်ခံရ
——–
ပါလက်စတိုင်းပိုင်နက်နောက်တစ်ခုဖြစ်တဲ့ အနောက်ဖက်ကမ်းက ရာမာလာမြို့မှာ ပါလက်စတိုင်း လယ်သမားတွေကို တရားမ၀င် ဂျူးအခြေချ နေထိုင်သူတွေက ဒီကနေ့မနက်ပိုင်းမှာ တိုက်ခိုက်ခဲ့ပြီး ၃ ဦး ဒဏ်ရာရကာ တစ်ဦး ဓားစားခံအဖြစ် ဖမ်းဆီးခေါ်ဆောင်ခြင်း ခံခဲ့ရပါတယ်။ ဂျူးအခြေချနေထိုင်သူတွေဟာ ဌာနေပါလက်စတိုင်းတွေကို မကြာခန အကြမ်းဖက် တိုက်ခိုက် သတ်ဖြတ်လေ့ ရှိပါတယ်။

ဂါဇာအလယ်ပိုင်းမှ တိုက်ခိုက်မှု
———
ဂါဇာကမ်းမြှောင်အလယ်ပိုင်းက မဂ်ဟာဇီ ဒုက္ခသည်စခန်းကို အစ္စရေးက ဒီကနေ့ ထပ်မံတိုက်ခိုက်ခဲ့ရာမှာ အသက် ၁၂ နှစ်အရွယ် မိန်းကလေးငယ်တစ်ဦး အပါအ၀င် ၉ ဦး သေဆုံးခဲ့ပါတယ်။ ပြီးခဲ့တဲ့နှစ် အောက်တိုဘာက စတင်တဲ့ ဂါဇာက အစ္စရေးရဲ့ တစ်ကျော့ပြန်လူသတ်ပွဲအတွင်း အသတ်ခံရသူ အရေအတွက်ဟာ ၄၆၀၀၀ နီးပါး ရှိလာပြီ ဖြစ်ပါတယ်။

Ref: Aljazeera